आज दिनभर के खबर ल अपन गुरतुर छत्तीसगढ़ी भाखा म पढ़व

केंद्र सरकार ह देशभर म नवा सैनिक स्कूल खोले के प्रस्ताव ल मंजूरी दे देहे। ये स्कूल मन ह गैर सरकारी संगठन या निजी या राज्य सरकार के भागीदारी ले खोले जाही। सैनिक स्कूल सोसायटी के संग समझौता ज्ञापन म हस्ताक्षर करे जाय के बाद ही अइसन सैनिक स्कूल खोले जा सकही।

छत्तीसगढ़ म माओवाद ल खतम करे बर विकास, विश्वास अउ सुरक्षा के कार्ययोजना उपर आधारित नवा नीति बनाय गे हवय। मुख्यमंत्री भूपेश बघेल के अगवई म काली राज्य मंत्रिमंडल के बइठका म छत्तीसगढ़ माओवाद उन्मूलन नीति ल मंजूरी दे गीस। ए नीति म पुलिस बल के शहीद मनके परिवार वाला मन ल उपराहा राहत राशि के रूप म कृषि भूमि खरीदे बर बीस लाख रूपिया के राशि दे जाही। संगेसंग तीन बछर के भीतर कृषि भूमि खरीदे म ओमन ल दू एकड़ भूमि तक स्टाम्प ड्यूटी या पंजीयन शुल्क म पूरा छूट दे जाही । ए नीति म माओवादी अउ उंखर परिवार अउ आत्मसमर्पित माओवादी मनके पुर्नवास बर घलो प्रावधान करे गेहे।

माओवाद पीड़ित लोगन ल दे जाने वाला मुआवजा राशि म दुगुना वृद्धि करे गेहे। पीड़ित परिवार के कमइया व्यक्ति के हत्या प्रकरण म अनुकंपा नियुक्ति क तर्ज म शासकीय सेवा दे जाही। पीड़ित परिवार ल शासकीय नौकरी नइ मिले के स्थिति म कृषि भूमि खरीदे बर पंद्रह लाख रूपिया के उपराहा राशि दे जाही। अइसने आत्मसमर्पित माओवादी मन ल पच्चीस हजार रूपिया के प्रोत्साहन राशि दे जाही। उंहे पांच लाख रूपिया या जादा के इनामी माओवादी ल आत्मसमर्पण करे म दस लाख रूपिया के राशि अलग से दे जाही। नवा नीति म दूसर राज्य के पीड़ित लोगन ल घलो पात्र माने गे हावय। ये नीति लागू होय के तिथि ले पांच बछर बर प्रभावी रइही।

छत्तीसगढ़ म माओवादी मनके खिलाफ सीमा ले लगे राज्य मनके संग मिल के संयुक्त अभियान चलाये जाही। नया रायपुर के पुलिस मुख्यालय म आंध्रप्रदेश अउ तेलंगाना राज्य मनके संग राखे गे अंतर्राज्यीय समन्वय बइठका म ए बारे म रणनीति बनाये गीस।

बइठका म छत्तीसगढ़ पुलिस, केंद्रीय गृह मंत्रालय, सीएपीएफ अउ आंध्रप्रदेश अउ तेलंगाना राज्य के बड़े अधिकारी मन शामिल होइन। बइठका म आसूचना के तुरते आदान प्रदान, संयुक्त अभियान बर फोकस एरिया के निर्धारण, सुरक्षा विहीन क्षेत्र म रणनीति बढ़त, माओवादी मनके सप्लाई नेटवर्क उपर कार्रवाई जइसन विषय म घलो चर्चा करे गीस।

भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन पंजीयन होवत हे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म चलत हे। पंजीयन करवाय के आखिरी तारीख बीस मार्च हवय। पंजीयन बर अब सिरिफ दू दिन बाकी हे।

सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि ए भर्ती प्रक्रिया म उही उम्मीदवार मन सामिल होही, जउन मन अपन पंजीयन करवा लेहे। पंजीयन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे।

सेना भर्ती कार्यालय ह सबो इच्छुक उम्मीदवार मन ल बताय हवय कि ये भर्ती प्रक्रिया पूरा तरीका ले निष्पक्ष हे अउ एमा कोनो भी प्रकार के हस्तक्षेप संभव नइ हे। एखर सेती ओमन ह कोनो भी दलाल के चंगुल म झन फंसय।

प्रधानमंत्री नरेन्द्र मोदी ह ‘‘मन की बात‘‘ के निन्यानवां कड़ी बर देसवासी मनले अपन विचार अउ अइसन प्रेरणादायक प्रयास ल साझा करे बर कीहिन हे जेखर ले समाज म परिवर्तन आ सकत हे। मन की बात के ये कड़ी के प्रसारण छब्बीस मार्च के करे जाही। श्रोता मन ह नमो ऐप या माई जीओवी ओपन फोरम म अपन विचार साझा कर सकथे या एक आठ शून्य शून्य – एक एक सात आठ शून्य शून्य म अपन मैसेज रिकार्ड कर सकत हे।

प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म बिलासपुर जिला के बारे म जानकारी दे जाही।

कोंडागांव जिला के मांझीनगढ़ पर्यटन स्थल ल जैव विविधता पार्क के रूप म जंगल सफारी जइसन बनाय जाही। मुख्यमंत्री भूपेश बघेल ह आज कोंडागांव जिला के बांसकोट म भक्त माता कर्मा जयंती अउ मुख्यमंत्री कन्या विवाह के मउका म राखे गे वचुअर्ल कार्यक्रम म ए घोषणा करीन। ए मउका म मुख्यमंत्री ह केशकाल विधानसभा के ग्राम बांसकोट म जिला सहकारी केंद्रीय बैंक शाखा के स्थापना अउ स्वामी आत्मानंद उत्कृष्ट अंग्रेजी माध्यम स्कूल खोले के अउ केशकाल म इंडोर स्टेडियम बनाय के घलो घोषणा करीन।

कार्यक्रम म मुख्यमंत्री ह कोंडागांव जिला म एक सौ चौवन करोड़ के आने आने काम के लोकार्पण अउ भूमिपूजन करीन। ए मउका म देवगुड़ी, मातागुड़ी अउ घोटुल के भुंइया ल सहेजे बर चार सौ छत्तीस सामुदायिक वन अधिकार पत्र दे गीस। संगेसंग साहू समाज के प्रतिभावान युवा म ल घलो सम्मानित करे गीस।

महिला अउ बाल विकास विभाग डहार ले लइका अउ माइलोगिन मनके पोषण अउ सेहत ले जुड़े जागरूकता अउ आदत म सुधार लाये बर बीस मार्च ले तीन अप्रैल तक पोषण पखवाड़ा मनाये जाही। ये दउरान जागरूकता रथ डहार ले प्रमुख पंचायत अउ हाट बाजार म एखर ले जुड़े वीडियो देखाके लोगन ल जागरूक करे जाही। पोषण पखवाड़ा के दउरान मिलेट्स के फायदा बताके एखर उपयोग बर लोगन ल प्रेरित करे जाही।

केंद्रीय युवा कार्यक्रम अउ खेल मंत्रालय के राष्ट्रीय सेवा योजना क्षेत्रीय निदेशालय भोपाल डहार ले काली ले चौबीस मार्च तक गुरू घासीदास केंद्रीय विश्वविद्यालय बिलासपुर म सात दिवसीय राष्ट्रीय एकता शिविर के आयोजन करे जाही। एमा छत्तीसगढद्व सहित गुजरात, दिल्ली, हरियाणा, आंध्रप्रदेश, तेलंगाना, राजस्थान, पश्चिम बंगाल, ओडिशा, झारखंड, महाराष्ट्र अउ मध्यप्रदेश ले दू सौ दस चुने गे राष्ट्रीय सेवा योजना के स्वयंसेवक अउ दल नायक मन ह भाग लीहीं।

रायपुर विकास प्राधिकरण आरडीए के आने आने योजना म बकायादार मन ल एकमुश्त राशि जमा कराय म सरचार्ज राशि म दे जावत छूट अवइया इकतीस मार्च तक ही मिलही। पुराना योजना म सबले जादा बकाया राशि बाम्बे मार्केट बोरियाखुर्द, हीरापुर, रायपुरा अउ ट्रांसपोर्ट नगर रावांभाटा के आवंटित मन उपर हे। एमा आबंटित मन ल एकमुश्त राशि जमा कराय म बड़े राहत दे जावत हे। आरडीए के सीईओ ह ओमन ले छूट के जादा ले जादा फायदा उठाय के आग्रह करीन हे।

– भारतीय प्रशासनिक सेवा के अधिकारी एन. श्रीधर राष्ट्रीय खनिज विकास निगम के अध्यक्ष सह प्रबंध निदेशक होही। केंद्र सरकार के पब्लिक इंटरप्राइजेस सलेक्सन बोर्ड ह दिल्ली म होय बइठका म श्रीधर के नाव उपर मुहर लगाइन।

– मुख्यमंत्री भूपेश बघेल ह आज भक्त माता कर्मा जयंती म उंखर छायाचित्र म फूल चघाके ओमन ल नमन करीन।

– राज्य शासन ह छत्तीसगढ़ उच्च न्यायालय के अनुशंसा के आधार म अतिरिक्त जिला अउ सत्र न्यायाधीश एफ.टी.सी. जशपुर गणेश राम बर्मन के सेवा ल तत्काल प्रभाव ले समाप्त करे के आदेश जारी कर देहे।

– पत्रकार मनके सुरक्षा बर छत्तीसगढ़ मीडियाकर्मी सुरक्षा विधेयक के प्रारूप के राज्य केबिनेट म अनुमोदन करे जाय उपर रायपुर प्रेस क्लब ह स्वागत करत मुख्यमंत्री भूपेश बघेल बर आभार जताय हे।

– छत्तीसगढ़ श्रमजीवी पत्रकार कल्याण संघ डहार ले रायपुर म पत्रकार सम्मेलन के अयोजन करे गीस। ए मउका म मुख्यमंत्री भूपेश बघेल ह आयोजक मन डहार ले पत्रकार मन ल पुरोधा पत्रकारिता सम्मान ले सम्मानित करीन।