आज दिनभर के खबर ल अपन गुरतुर छत्तीसगढ़ी भाखा म पढ़व

गृह मंत्रालय-अग्निवीर

केन्द्रीय गृह मंत्रालय ह केन्द्रीय औद्योगिक सुरक्षा बल-सी.आई.एस.एफ. म पूर्व अग्निवीर मन बर दस प्रतिसत पद आरक्षित करे के घोषणा करे हे। एखर ले अग्निवीर मन ल अधिकतम उम्र सीमा म छूट मिलही। पूर्व अग्निवीर मन ल सारीरिक योग्यता जांच म घलो राहत दे जाही। ए घोसना सीमा सुरक्षा बल म अग्निवीर मन बर दस प्रतिसत आरक्षण दे जाय के घोसना के कुछ दिन बाद करे गेहे। अधिसूचना अनुसार पहिली बैच के अग्निवीर उम्मीदवार मन ल अधिकतम उम्र सीमा म पांच साल के राहत दे जाही। जबकि दूसर बैच के उम्मीदवार मन ल अधिकतम उम्र सीमा म तीन साल के छूट मिलही। केन्द्र सरकार ह सशस्त्र बल मन म अग्निपथ भर्ती योजना के सुभारंभ करे रिहीस। ए योजना के उद्देश्य साढ़े सत्रह साल ले इक्कीस साल तक के युवा मन ल चार साल के अंशकालिक अनुबंध के आधार म सशस्त्र बल म सामिल करना हे। एखर परिकल्पना सशस्त्र बल मन म युवा संख्या बढ़ाय बर करे गेहे।

मंत्रिपरिषद-निर्णय

मुख्यमंत्री भूपेश बघेल के अध्यक्षता म आज राज्य विधानसभा परिसर म होय मंत्रिपरिषद के बइठका म प्रदेस के नगरीय क्षेत्र के आवासहीन मनखे मन ल पट्टाधृति अधिकार विधेयक के प्रारूप के अनुमोदन करे गीस। एखरे संग छत्तीसगढ़ मीडियाकर्मी सुरक्षा विधेयक अउ छत्तीसगढ़ भू-राजस्व संहिता उन्नीस सौ उनसठ म संसोधन विधेयक दू हजार तेईस के प्रारूप के घलो अनुमोदन होइस। अइसने, छत्तीसगढ़ माल अउ सेवा कर संसोधन विधेयक, माओवाद उन्मूलन नीति के संघरा छत्तीसगढ़ विधानसभा सदस्य वेतन भत्ता अउ पेंसन संसोधन विधेयक के प्रारूप के घलो अनुमोदन करे गीस।
बइठका म प्रदेस म सिक्षा के गुणवत्ता ल बढ़ाय बर करीबन ढाई हजार करोड़ रूपिया के विश्व बैंक परियोजना के क्रियान्वयन बर सिक्षा विभाग ल अधिकृत करे गेहे। उहें, बछर दू हजार बाईस म बर्मिंघम म आयोजित कॉमनवेल्थ गेम्स म रजत पदक प्राप्त करइया दुरूग जिला के बैंडमिंटन खिलाड़ी आकर्षी कश्यप ल उप पुलिस अधीक्षक के पद म नियुक्ति प्रदान करे के निर्णय ले गेहे। एखर अलावा राज्य मंत्रिमंडल ह पुलिस मुख्यालय नवा रईपुर म बिसेस कर्तव्यस्थ अधिकारी के नवा पद अस्थाई रूप ले एक साल बर बनाय जाय के घलो निर्णय लेहे।

विस-पीडीएस

राज्य विधानसभा म आज सार्वजनिक वितरण प्रणाली-पीडीएस म घोटाला के मामला गूंजीस। पूर्व मुख्यमंत्री डॉक्टर रमन सिंह ह पीडीएस म छह सौ करोड़ रूपिया के घोटाला के आरोप लगावत सदन के कमेटी ले जांच कराय के मांग करीन। एमा खाद्य मंत्री अमरजीत भगत ह किहीन कि मामला के जांच कराय जात हे अउ चौबीस मार्च तक जांच रिपोर्ट देहे के निरदेस दे गेहे। उहें, विपक्षी सदस्य मन सदन के कमेटी ले जांच के मांग ल लेके हल्ला-गुल्ला मचईन। हंगामा के सेती सदन के कार्यवाही पांच मिनट बर स्थगित करना पड़ीस।
सदन के कार्यवाही दोबार सुरू होय म खाद्य मंत्री ह बतईन कि सत्यापन कराय ले लगभग पांच हजार उचित मूल्य के दुकान मन म इकचालीस हजार टन चावल के कमी पाय गीस। ए अनियमितता के परीक्षण कराय जात हे। संघरा स्टॉक कमी वाला मामला म एफआईआर दर्ज कराय गेहे। उहें, एक सौ इकसठ उचित मूल्य के दुकान मन ल निलंबित करे गेहे।

विस-अनुदान मांग

राज्य विधानसभा म काली मुख्यमंत्री भूपेश बघेल ले जुड़े विभाग मन बर तेरह हजार तीन सौ पच्चीस करोड़ रूपिया ले जादा रासि के अनुदान मांग पारित करे गीस। ए मउका म मुख्यमंत्री ह अपन विभाग के अनुदान मांग उपर चरचा के जवाब देवत किहीन कि छत्तीसगढ़ विकास के दिसा म तेजी ले आगू बढ़त हे। छत्तीसगढ़ म ऋण भार बजट के सत्रह दशमलव नौ प्रतिसत हरय, जउन ह दूसर राज्य मनके तुलना म बेहतर हरय। मुख्यमंत्री ह किहीन कि प्रदेस म नवीन पेंसन योजना के जघा म पुराना पेंसन योजना लागू करे गेहे। राज्य म बिजली के लगातार मांग ल देखत राज्य सासन डहार ले तेरह सौ बीस मेगावाट के सुपर क्रिटिकल ताप विद्युत परियोजना के स्थापना के संबंध म निर्णय ले गेहे।

सेना भर्ती

भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन पंजीयन होवत हे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म चलत हे। पंजीयन करवाय के आखिरी तारीख बीस मार्च हवय।
सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि ए भर्ती प्रक्रिया म उही उम्मीदवार मन सामिल होही, जउन मन अपन पंजीयन करवा लेहे। पंजीयन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे।

उषा बारले-सम्मान

पद्मश्री पुरस्कार बर चयनित दुरूग जिला के प्रसिद्ध पंथी अउ पंडवानी गायिका उषा बारले ल बाईस मार्च के नई दिल्ली म राष्ट्रपति द्रौपदी मुर्मू सम्मानित करही। श्रीमती बारले के पद्मश्री पुरस्कार लेके गृह नगर भिलाई लहुटे म चौबीस मार्च के उंखर नागरिक अभिनंदन करे जाही।

चेट्रीचण्ड्र महोत्सव-अवकाश

मुख्यमंत्री भूपेश बघेल ह किहीन कि चेट्रीचण्ड्र महोत्सव म राज्य के नगर निगम अउ नगर पालिका क्षेत्र म अवकास दे जाही। ए घोषणा श्री बघेल ह काली रईपुर स्थित शदाणी दरबार तीर्थ म राखे गे संत राजाराम साहिब के तिरसठवां वर्सी महोत्सव म करीन। ए मउका म मुख्यमंत्री ह वर्सी महोत्सव म सामिल होय बर पाकिस्तान के सिंध प्रांत ले आय लगभग साढ़े तीन सौ श्रद्धालु मनके स्वागत करीन अउ शदाणी दरबार म आधारित फिल्म ‘धुनेश्वर महादेव‘ के सीडी के विमोचन घलो करीन।

राज्यपाल-मैट्स विवि

राज्यपाल विश्वभूषण हरिचंदन ह आज रईपुर स्थित मैट्स विश्वविद्यालय डहार ले आयोजित छत्तीसगढ़ रिसर्च कान्क्लेव म मुख्य अतिथि के रूप म सामिल होईन। ‘‘वैश्विक वित्तीय और आर्थिक परिवर्तन-विकास पर प्रभाव‘‘ बिसय म राखे गे कारीकरम म राज्यपाल ह किहीन कि प्रधानमंत्री नरेन्द्र मोदी के विचार हरय कि वैश्विक अर्थव्यवस्था म परिवर्तन लाय बर विश्व म सांति स्थापित होना पहला प्राथमिकता होना चाही। ओमन किहीन कि युद्ध न केवल विश्व के वित्तीय व्यवस्था बल्कि सामाजिक व्यवस्था ल घलो कमजोर करथे।

महिला सम्मेलन

महिला अउ बाल विकास मंत्री अनिला भेंड़िया ह बलौदाबाजार-भाटापारा जिला के हथबंद गांव म राखे गे वृहद महिला सम्मेलन म अच्छा काम करइया तीस ले जादा महिला अधिकारी अउ कर्मचारी मन ल सम्मानित करीन। ओमन पांच आंगनबाड़ी केन्द्र मन ल गैस चुल्हा अउ स्व-सहायता समूह मन ल ग्यारह लाख रूपिया ले जादा के ऋण रासि घलो बांटीन।

बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत राष्ट्रीय युवा संसद महोत्सव म तीसरा स्थान पाने वाला छत्तीसगढ़ के माहिरा खान के भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली अट्ठारह मार्च के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।

ओपी चौधरी-आरोप

भाजपा के प्रदेस महामंत्री ओपी चौधरी ह आरोप लगईन कि राज्य के कांग्रेस सरकार युवा मन ल रोजगार दे म विफल रेहे हे। ओमन किहीन कि प्रदेस म अट्ठारह लाख अठहत्तर हजार ले जादा युवा रोजगार बर पंजीयन करा चुके हे। ए आंकड़ा विधानसभा म उच्च सिक्षा मंत्री उमेश पटेल ह दीन हे। श्री चौधरी ह किहीन कि ए सरकार युवा मन ल न तो रोजगार दे पावत हे अउ न ही बेरोजगारी भत्ता।

पीडीएस-चावल वितरण

सार्वजनिक वितरण प्रणाली-पीडीएस के तहत प्रदेस के पात्र रासनकार्ड धारी परिवार मन ल अप्रैल अउ मई महीना के चाउर एके संग अप्रैल महीना म दे जाही। ए संबंध म खाद्य विभाग ह जिला कलेक्टर मन ल पत्र जारी कर देहे। पत्र म केहे गेहे कि रासन कार्ड धारी मन ल अप्रैल अउ मई महीना के रासन वितरण कराय बर खाद्यान्न के भंडारण उचित मूल्य दुकान मन म समय म करे जाय अउ अन्न वितरण पोर्टल म ए संबंध म माहवार वितरण दर्साय बर जरूरी व्यवस्था करे जाय। पत्र म यहू केहे गेहे कि दू माह के चाउर वितरण संबंधी सूचना रासन कार्डधारी मन ल मुनादी अउ उचित मूल्य के दुकान मन म पोस्टर अउ बैनर म प्रदर्सित कर दे जाय। चाउर ल छोड़के बांचे रासन सामान जइसे – नमक, सक्कर, मिट्टी तेल अउ चना के वितरण पात्रता अनुसार माहवार करे जाही।