‘मोर आवास-मोर अधिकार‘ अभियान ल लेके भारतीय जनता पार्टी ह आज रईपुर म प्रदर्सन करके विधानसभा के घेराव करे के प्रयास करीन। प्रदेसभर ले भाजपा कार्यकर्ता अउ प्रधानमंत्री आवास ले छूटे हितग्राही मन ह रईपुर पहुंचीन। आंदोलन ल लेके विधानसभा वाले रद्दा म सुरक्षा के पूरा व्यवस्था करे गे रिहीस।
घेराव के पहिली पिरदा चउक म एक ठिन जनसभा होईस। सभा ल संबोधित करत पार्टी के प्रदेस अध्यक्ष अरूण साव ह राज्य सरकार उपर निसाना साधीन। त उहें, नेता प्रतिपक्ष नारायण चंदेल ह किहीन कि गरीब जनता ह अपन हक मांगत हे। ए ह आम जनता के लड़ई हरय। त उहें, छत्तीसगढ़ प्रभारी ओम माथुर ह कार्यकर्ता मन ले ए बार सरकार बदले के बात किहीन।
सभा ल पार्टी के छत्तीसगढ़ सह प्रभारी नितिन नबीन, पूर्व मुख्यमंत्री डॉक्टर रमन सिंह, झारख्ांड के पूर्व मुख्यमंत्री रघुवर दास के संगेसंग पार्टी के आने-आने नेता मन घलो संबोधित करीन।
सभा के बाद कार्यकर्ता मनके संग पुलिस के झूमाझटकी होईस। आंदोलन ल रोके बर पुलिस ह पानी के बौछार के संगेसंग आंसू गैस के गोला घलो छोड़ीस अउ भाजपा के बड़का नेता मन ल हिरासत म ले गीस।
विस-पीएम आवास
राज्य विधानसभा म आज प्रधानमंत्री आवास योजना के तहत बनाय जात अधूरा मकान के मुद्दा गुंजीस। भाजपा ह सून्यकाल के दौरान ए मुद्दा उपर चरर्चा कराय के मांग राखीन। भाजपा सदस्य धरमलाल कौशिक, शिवरतन शर्मा, रजनीश सिंह, रंजना साहू अउ डॉक्टर कृष्णमूर्ति बांधी ह ए मांग ल उठईन। ओमन किहीन कि बछर दू हजार ग्यारह के सर्वें सूची के तहत मकान बनना रिहीस। राज्य सरकार ह अपन हिस्सा के पइसा ल नइ देत हे अउ एखरे सेती मकान ह नइ बन पात हे। विपक्षी सदस्य मन ह सदन के बाकी काम ल रोक के ए मुद्दा उपर चर्चा कराय के मांग राखीन। इही दउरान सत्तापक्ष के सदस्य मन ह विपक्ष उपर हमला बोलीन। विपक्षी सदस्य मनके हंगामा के सेती सदन के कार्यवाही ल पांच मिनट बर स्थगित कर दे गीस।
विधानसभा म आज मुख्यमंत्री ह एक ठिन लिखित जवाब म बतईन कि राज्य म दस फरवरी दो हजार तेईस के स्थिति म सिरिफ आठ सौ संतावन एनपीएस कर्मचारी मन ह ओल्ड पेंसन योजना उपर सहमति दे हंवय।
उहें, सदन म आज सुपेबेड़ा म पानी आपूर्ति बर टेंडर जारी नइ करे के मुद्दा घलो गुंजीस, लोक स्वास्थ्य यांत्रिकी मंत्री गुरू रूद्र कुमार ह सदन म किहीन कि एक महीना म टेंडर करा दे जाही। मंत्री के जवाब ले असंतुष्ट विपक्षी सदस्य मन ह सरकार उपर लोगन मन ल पानी नइ देके आरोप लगावत सदन ले बहिर्गमन कर दीन।
मुख्यमंत्री-बजट सामान्य चर्चा
मुख्यमंत्री भूपेश बघेल ह किहीन हे कि राज्य सरकार के बजट ह प्रदेस के गरीब, किसान, मजूर, अनसुचित जाति, जनजाति, युवा मनके जम्मों वर्ग बर फायदा के हे। काली विधानसभा म अवइया वित्तीय बछर के बजट उपर सामान्य चर्चा के जवाब देवत ओमन किहीन कि सदन म बजट पारित होय के बाद आंगनबाड़ी कार्यकर्ता, सहायिका, मिनी आंगनबाड़ी कार्यकर्ता, कोटवार, रसोइया, पटेल अउ सफाई कर्मी मन ल बाढ़े मानदेय मिलना सुरू हो जही। ओमन किहीन कि राजीव गांधी ग्रामीण भूमिहीन कृषि मजदूर न्याय योजना के विस्तार ग्रामीण क्षेत्र के संग नगर पंचायत म करे जाही। मुख्यमंत्री ह यहू किहीन कि राज्य सरकार ह आवास योजना, उज्जवला योजना अउ सौचालय के सर्वें कराय के फइसला लेहे। ओमन किहीन कि चालू वित्तीय बछर दू हजार बाईस-तेईस म राज्य सरकार डहार ले आज तक बाजार ले कोनों प्रकार के करजा नइ ले गेहे। छत्तीसगढ़ अइसन करइया देस के तीन राज्य म सामिल हे।
मुख्यमंत्री ह किहीन कि जून महीना ले जीएसटी क्षतिपूर्ति के पइसा ह मिलना बंद होगे हे, जेखर ले प्रदेस ल हर साल पांच ले छह हजार करोड़ रूपिया के नकसान होवत हे।
सेना भर्ती
भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन रजिस्ट्रेसन होवत हे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म चलत हे। रजिस्ट्रेसन करवाय के आखिरी तारीख बीस मार्च हवय।
सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि ए भर्ती प्रक्रिया म उही उम्मीदवार मन सामिल होही, जउन मन अपन रजिस्ट्रेसन करवा लेहे। रजिस्ट्रेसन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे। सेना भर्ती कार्यालय ह सबो इच्छुक उम्मीदवार मन ल बताय हे कि ए भर्ती के कामकाज निष्पक्ष हवय अउ कोनों भी किसम के बाहिरी लोगन के दखलंदाजी संभव नइ हे।
हादसा
महासमुंद जिला के गढ़फुलझर गांव म पाछु रतिहा ईंटा पकाय बर बनाय गे भट्टी के उपर म सोवत बाप-बेटा के संगेसंग पांच झिन मजूर के दम घुटे ले मउत होगे। उहें, एक झिन आने मजूर गंभीर रूप ले घायल होगे हे। बसना थाना प्रभारी कुमारी चंद्राकर ह बतईन कि ईंट भट्टा ले निकलइया धुंआ के सेती दम घुटे ले ए मजूर मनके मउत होय हे। मृतक म तीन झिन लोगन एकेच परिवार के हरय।
मुख्यमंत्री ह ए घटना उपर दुख जतावत मृतक के परिवार वाले मन ल जरूरी मदद के संगेसंग गंभीर रूप ले घायल मजूर के बढ़िया इलाज बर जरूरी सुविधा देके निरदेस अधिकारी मन ल देहे।
ऐति, जशपुर जिला के कांसाबेल विकासखंड के प्राईमरी स्कूल म कुकर के फटे ले तीन झिन लइका मन गंभीर रूप ले घायल होगे हे। खाना बनइया मनके हड़ताल के सेती ए लइका मन ह मध्यान्ह भोजन बनावत रिहीन।
मुंगेली पुलिस-जागरूकता अभियान
साईबर बाल अपराध अउ माईलोगिन मन ले जुड़े अपराध के जानबा दे अउ लइका मनके सुरक्षा ल लेके मुंगेली पुलिस डहार ले जन-जागरूकता अभियान चलाय जात हे। उड़ान ‘‘सामर्थ्य का, हौसले का‘‘ नाव ले सुरू करे गे ए अभियान के माध्यम ले गांव-गांव म सार्वजनिक जघा अउ महिला स्व-सहायता समूह मनके बीच पुलिस के टीम ह जावत हे। उहें, अभिव्यक्ति ऐप के संबंध म जानकारी देके संगेसंग जारी करे गे हेल्पलाइन नंबर एक आठ शून्य-शून्य – एक दो तीन छह शून्य एक शून्य अउ साईबर हेल्पलाइन नंबर – एक नौ तीन शून्य के बारे म घलो बताय जात हे।
अनाधिकृत निर्माण-नियमितीकरण
रईपुर कलेक्टर डॉक्टर सर्वेश्वर भूर्रे ह उपरहा वित्तीय भार ले बांचे बर नगरीय क्षेत्र के रहइया मन ल अपन घर या दुकान मन ल नियम के मुताबिक नियमित कराय के अपील करे हे। ओमन किहीन हे कि इकतीस मार्च के चालू वित्तीय बछर समाप्त हो जही अउ नवा वित्तीय बछर एक अप्रैल ले नगर निगम के अनुज्ञा सुल्क म पहिली जइसन दस प्रतिसत के बढ़ोतरी हो जही अउ ए बढ़ोतरी ले नियमितीकरण बर घलो सुल्क ह बाढ़ जही।
नक्शा दुरूस्ती
बिलासपुर संभागायुक्त डॉक्टर संजय अलंग ह अधिकारी मन ले नक्सा दुरूस्ती के काम ल अभियान के रूप म सुरू करे अउ ओखर उपर सरलग ध्यान राखे के निरदेस देहे। बैकुंठपुर म एसडीएम अउ तहसील कार्यालय मनके जांच करे के संगेसंग ओमन राजस्व अधिकारी मनके बइठका लीन। डॉक्टर अलंग ह अधिकारी मन ल नक्सा सुधार के बारे म विशेष अभियान सुरू करे अउ एला अवइया तीन महीना म पूरा करे बर केहे हे।
खेल
हरियाणा के पंचकूला म होय अखिल भारतीय वन खेलकूद प्रतियोगिता म छत्तीसगढ़ ह ग्यारहवां बार चैंपियन बने हे। प्रतियोगिता म छत्तीसगढ़ ह कुल एक सौ चौंसठ मेडल जीत के कनार्टक ल पीछे छोड़के ए प्रतियोगिता म पहला नंबर म आय हे। ए स्पर्धा म टेनिस, टेबल टेनिस, बैंडमिंटन, तैराकी, कैरम, शतरंज, वेट लिफ्टिंग, क्रिकेट, फुटबॉल, बास्केबॉल, हॉकी, गोल्फ अउ एथलेटिक्स के मुकाबला होईस। मुख्यमंत्री अउ वन मंत्री ह ए सफलता उपर वन विभाग ल बधाई अउ सुभकामना दे हवय।
शिक्षक-साइकिल यात्रा
पर्यावरण प्रदूषण ल रोके अउ नशामुक्ति के संदेस ल लेके मुंगेली जिला के एक झिन सिक्षक संतोष गुप्ता ह छत्तीसगढ़ के यात्रा म निकले हे। ओमन बतईन कि मुख्यमंत्री ह प्रदेस म जैविक खेती अउ पर्यावरण प्रदूषण ल रोके बर हरियाली अभियान उपर काम करत हे। उंखर इच्छा साइकिल के माध्यम ले जादा ले जादा लोगन मन ल जागरूक करना हे। ओमन बतईन कि साइकिल चलाके अवई-जवई करे ले प्रदूसन ल रोके जा सकथे अउ सेहत घलो बने रहिथे।