राज्य विधानसभा म आज सिक्षक मनके वेतन विसंगति के मुद्दा म विपक्ष ह सत्तापक्ष ल घेरे के परयास करीन। विधायक शिवरतन शर्मा ह ए मुद्दा उठईन अउ ओमन सहायक सिक्षक के वेतन विसंगति ल दूरिहा करे बर विभाग कोति ले तीन महीना म करे गे कार्रवाई के जानकारी चाहिन। शिक्षा मंत्री डॉक्टर प्रेमसाय सिंह टेकाम ह एखर जुवाब दीन, त विपक्षी सदस्य एखर ले संतुष्ट नइ होईन। विधानसभा अध्यक्ष डॉक्टर चरणदास महंत ह किहीन कि ए मुद्दा म अलग ले आधा घंटा के गोठबात कराय जा सकत हे। एखर बादे विपक्षी सदस्य मन ह घलो एमा अपन मंजूरी दे दीन।
उहें, सदन म आज आदिम जाति विकास मंत्री डॉक्टर प्रेमसाय सिंह टेकाम ह चार साल ले गायब एक दैनिक वेतन भोगी कर्मचारी मन ल नियमित करे के मामला म सहायक आयुक्त ल निलंबित करे के घोसना करीन। कांग्रेस सदस्य अमितेश शुक्ल ह प्रश्नकाल के बेरा ए मामला उठईन। ओमन सवाल पूछीन के गरियाबंद जिला म आदिवासी विभाग कोति ले कार्यालय अउ छात्रावास आश्रम म के झन चतुर्थ श्रेणी कर्मचारी मन ल नियमित करे गेहे। मंत्री के जुवाब के बाद श्री शुक्ल ह आरोप लगईन कि नियमितीकरण के ए काम म भ्रष्टाचार होय हे अउ चार साल ले गायब दैनिक वेतनभोगी कर्मचारी ल नियमित कर दे गेहे। श्री शुक्ल ह ए मामला के जांच के मांग करीन। मंत्री ह किहीन कि ए मामला के जांच कराय जाही।
सदन म आज प्रश्नकाल म भाजपा सदस्य बृजमोहन अग्रवाल ह राज्य सरकार के बजट म सवाल उठावत सरकार के नीति के आलोचन करीन। उहें, कांग्रेस सदस्य मन ह ईडी के छापामारी के मुद्दा उठईन। सदन म आज स्कूल शिक्षा, स्कूल भवन अउ गांव के विकास जइसन कतकोन मुद्दा म सत्तापक्ष अउ विपक्ष के बीच जमके हंगामा होईस।
भाजपा-विधानसभा घेराव
‘मोर आवास-मोर अधिकार‘ अभियान म भारतीय जनता पार्टी काली पन्द्रह मार्च के विधानसभा के घेराव करही। एमा पार्टी के बड़का नेता अउ कार्यकर्ता सामिल होही।
काली विधानसभा के घेराव के पहिली भाजपा नेता मन कोति ले पिरदा चउक म सभा के आयोजन करे जाही। पार्टी के प्रदेस सह-प्रभारी नितिन नबीन ह बिलासपुर अउ दुरूग संभाग के पदाधिकारी मनके बइठका लेके विधानसभा घेराव के तैयारी के समीक्षा करीन। एखर पहिली ओमन रईपुर संभाग के तैयारी के जानकारी ले रिहीन।
उहें, मुंगेली जिला भाजपा के अध्यक्ष शैलेष पाठक ह बतईन कि ए आंदोलन म मुंगेली जिला ले साढ़े तीन हजार ले जादा कार्यकर्ता सामिल होही।
मुख्यमंत्री वृक्ष संपदा योजना
राज्य म वृक्ष के व्यवसायिक उपयोग ल बढ़ावा देके संभावना ल देखत मुख्यमंत्री वृक्ष संपदा योजना ल लागू करे के तियारी होवत हे। ए योजना म आमदनी बढ़ाय के उद्देश्य ले किसान मनके मंजूरी ले उंखर भूईंया म वाणिज्यिक वृक्षारोपण करे जाही। योजना म सबो वरग के इच्छुक भूमि स्वामी पात्र होही। एखर संगेसंग शासकीय, अर्द्धशासकीय अउ सासन के स्वायत संस्थान के संगेसंग निजी शिक्षण संस्था, निजी ट्रस्ट, गैर सासकीय संस्था अउ पंचायत जउन अपन भूईंया म पौधा रोपण करवाना चाहत हे, ओमन एखर पात्र होही। ए योजना म राज्य सासन कोति ले पांच एकड़ भूईंया म वृक्षारोपण बर सौ प्रतिसत अनुदान अउ पांच एकड़ ले जादा क्षेत्र म पेड़ लगाय खातिर पचास प्रतिसत वित्तीय अनुदान दे जाही। योजना म मुख्य रूप ले टिशू कल्चर बांस क्लोनल निलगिरी, मिलिया डुबिया, टीशू कल्चर सागौन अउ सफेद चंदन के प्रजाति ल सामिल करे गेहे।
आरएसएस-प्रतिनिधि सभा
हरियाणा के पानीपत जिला के समालखा म राखे गे राष्ट्रीय स्वयं सेवक संघ-आरएसएस के अखिल भारतीय प्रतिनिधि सभा के आज आखिरी दिन हरय। तीन दिवसीय ए प्रतिनिधि सभा म स्वः आधारित राष्ट्र के नवोत्थान के संकल्प लेके प्रस्ताव पारित करे गीस। एमा प्रमुख रूप ले केहे गेहे कि अखिल भारतीय प्रतिनिधि सभा के ए सुविचार अभिमत हवय कि विश्व कल्याण के लक्ष्य ल मूर्त रूप दे खातिर भारत के स्व के सुदीर्घ यात्रा जम्मों बर प्रेरणादायक रेहे हे।
अखिल भारतीय प्रतिनिधि सभा म सर संघ चालक डॉक्टर मोहन भागवत अउ सर कार्यवाह दत्तात्रेय होसबाले सामिल होईन।
कांकेर-लापता परिवार
कांकेर जिला के चारामा थाना क्षेत्र के चावड़ी गांव ले पाछु दिन एक कार के जले अउ ओमा सवार एक परिवार के लापता होय के मामला ल पुलिस ह सुलझा लेहे। ए परिवार के चारों सदस्य मन ल उंखरे फार्म हाउस ले खोज निकाले गीस। जिला के पुलिस अधीक्षक शलभ कुमार सिन्हा ह बतईन कि समीरन सिकदार ह बहत्तर लाख रूपिया के बीमा के रकम ले खातिर खुदे ए साजिस रचीस अउ पाछु एक मार्च के रईपुर ले वापसी के बेरा कोरर तीर खुदे अपन गाड़ी म आगी लगा दीन अउ ओखर बाद समीरन सिकदार अपन माईलोगिन अउ लइका संग रईपुर ले आने-आने जघा घुमत रिहीस। ए दउरान ओ ह पुलिस ले बांचे बर नवा मोबाइल अउ दूसर के नाव के सिम बउरत रिहीस हे। इही बीच, कोनों मन ए परिवार ल धमतरी अउ रईपुर म देखे के दावा करीन। पुलिस के टीम तलाशी अभियान म लगे रिहीस अउ आखिर म ओ परिवार ल खोज निकाले गीस।
सेना भर्ती
भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन रजिस्ट्रेसन होवत हे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म चलत हे। रजिस्ट्रेसन करवाय के आखिरी तारीख अवइया बीस मार्च हवय।
सेना भार्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि ए भर्ती प्रक्रिया म उही उम्मीदवार मन सामिल होही, जउन मन अपन रजिस्ट्रेसन करवा ले होही। रजिस्ट्रेसन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे। सेना भर्ती कार्यालय ह सबो इच्छुक उम्मीदवार मन ल बताय हे कि ए भर्ती के कामकाज निष्पक्ष हवय अउ कोनों भी किसम के बाहिरी लोगन के हस्तक्षेप संभव नइ हे। एखर सेती कोनों भी दलाल के चंगुल म झन फंसय।
माओवादी-गिरफ्तार
सुकमा जिला म सुरक्षा बल ह एक लाख रूपिया के इनामी समेत चार झिन माओवादी ल गिरफ्तार करे हे। एमा ले तीन झिन उपर बछर दू हजार चौदह म होय कसलपाड़ हमला म सामिल रेहे के आरोप हवय। ए हमला म सीआरपीएफ के चौदह जवान सहीद होगे रिहीन।
राष्ट्रीय सेमिनार
जांजगीर म जी-ट्वेंटी अउ आजादी के अमृत महोत्सव म राष्ट्रीय सेमिनार राखे गीस। एखर बिसय डिजिटल म आईपीआर ऑनलाइन सामग्री निर्माण अउ वितरण के चुनौती के संगेसंग रसायनिक विज्ञान म रूझान रिहीस। सेमिनार म छत्तीसगढ़, झारखंड, मध्यप्रदेश अउ महाराष्ट्र के बिसेसज्ञ मन ह आने-आने बिसय म अपन बात राखीन।
संत-पदयात्रा
हिन्दू स्वाभिमान जागरण संत पदयात्रा दुरूग सहर म काली आही। मंच कोति ले परनदिन सोलह मार्च के खुर्सीपार म धर्मसभा राखे जाही। ए पदयात्रा राज्य के चार आने-आने दिसा के प्रमुख देवी मंदिर ले पाछु अट्ठारह फरवरी ले सुरू होय रिहीस। ए कड़ी म डोंगरगढ़ के मां बम्लेश्वरी मंदिर ले निकले पदयात्रा काली दुरूग पहुंचत हे।
साइबर अपराध-प्रशिक्षण शिविर
रईपुर पुलिस मुख्यालय म साइबर अपराध अनुसंधान बिसय म ग्यारह दिवसीय प्रसिक्षण सिविर लगाय जात हे। पुलिस महानिदेसक अशोक जुनेजा ह ए सिविरि के सुभारंभ करीन। ए बेरा म श्री जुनेजा ह किहीन कि पुलिस अधिकारी मन ल पता लगाना चाही कि देस अउ प्रदेस म साइबर अपराध कोनों किसम के हवय। ओमन बतईन कि छत्तीसगढ़ म साइबर अपराध के प्रकार म आरोपी मन कोति ले फीसिंग करके लोगन के व्यक्तिगत जानकारी लेके पैन कार्ड, क्रेडिट कार्ड ले जादा ठगी के मामला आगू आवत हे। एखर संगेसंग सोशल मीडिया म फर्जी आईडी बनाके पर्सनल अटैक, ऑनलाइन हरासमेंट जइसन अपराध घलो होवत हे।