मुख्यमंत्री भूपेश बघेल ह अवइया वित्तीय बछर बर राज्य विधानसभा म बजट पेस करीन। एक लाख इक्कीस हजार पांच सौ करोड़ रूपिया के ए बजट म आने-आने वरग बर कतकोन प्रावधान करे गेहे। आज प्रस्तुत करे गे बजट म प्रदेस के सिक्षित बेरोजगार मन ल बेरोजगारी भत्ता दे बर नवा योजना सुरू करे के घोसना करे गीस। एखर मुताबिक अट्ठारह ले पैंतीस बछर के बेरोजगार युवक जिखर परिवार के वार्षिक आमदनी ढाई लाख रूपिया ले कमती हे, ओमन ल पच्चीस सौ रूपिया हरेक महीना के हिसाब ले बेरोजगारी भत्ता दे जाही। ए भत्ता अइसन युवा मन ल दू बछर तक मिलही। एखर बर बजट म ढाई सौ करोड़ रूपिया के रकम के प्रावधान हवय।
एखर संगेसंग ए बजट म कतकोन सरकारी करमचारी मनके मानदेय बढ़ाय गेहे। आंगनबाड़ी कार्यकर्ता मन ल मिलइया मासिक मानदेय ल साढ़े छह हजार ले बढ़ाके दस हजार रूपिया करे गेहे। उहें, आंगनबाड़ी सहायिका मनके मानदेय अब पांच हजार रूपिया, मिनी आंगनबाड़ी कार्यकर्ता मनके मानदेय बढ़ाके साढ़े सात हजार रूपिया हरेक महीना देके घोसना करे गेहे। ग्राम कोटवार मन ल सेवा भूमि के आकार के हिसाब ले आने-आने दर म मानदेय दे जाथे। यहू ल बढ़ाय गेहे, जउन मन ल अभी बाईस सौ पचास रूपिया मिलथे, ओमन ल अब तीन हजार रूपिया मिलही। उहें, तैंतीस सौ पचहत्तर रूपिया ल बढ़ाके चार हजार पांच सौ रूपिया, चार हजार पचास रूपिया ल बढ़ाके पचपन सौ रूपिया अउ चार हजार पांच सौ रूपिया ल बढ़ाके छह हजार रूपिया देके घोसना करे गेहे। ग्राम पटेल ल मिलइया दू हजार मासिक मानदेय के रासि ल बढ़ाके तीन हजार रूपिया करे के घोसना करे गीस।
बजट-02
मितानिन मन ल मिलइया प्रोत्साहन राशि के संगेसंग अब राज्य मद ले बाईस सौ रूपिया हरेक महीना मानदेय दे जाही। मध्यान्ह भोजना कार्यक्रम म स्कूल मन म मंझनिया के भोजन बनइया रसोईया मन ल दे जावत मानदेय के रकम डेढ़ हजार रूपिया ले बढ़ाके अट्ठारह सौ रूपिया करे के घोसना करे गेहे। विद्यालय मन म काम करत स्वच्छता कर्मचारी मनके मानदेय पच्चीस सौ रूपिया ले बढ़ाके अट्ठाईस सौ रूपिया करे गेहे। होम गार्ड जवान मनके मानदेय मन म घलो न्यूनतम छह हजार तीन सौ रूपिया ले छह हजार चार सौ बीस रूपिया के बढ़वार होय हे। स्वावलंबी गौठान मनके संचालन समिति के अध्यक्ष मन ल साढ़े सात सौ रूपिया अउ अशासकीय सदस्य मन ल पांच सौ रूपिया महीना के दर ले मानदेय दे जाही। निराश्रित, सियान, दिव्यांग, विधवा अउ परित्यकता माईलोगिन मन ल सामाजिक सुरक्षा पेंसन योजना म मिलइया मासिक पेंसन के रकम अब पांच सौ रूपिया प्रतिमाह दे जाही।
बजट म मुख्यमंत्री कन्या विवाह योजना म मिलइया सहायता रासि ल पच्चीस हजार रूपिया ले बढ़ाके पचास हजार रूपिया कर दे गेहे। पत्रकार मन ल खुद के रेहे बर घर बनाय खातिर सहयोग करे बर पत्रकार गृह निर्माण ऋण अनुदान योजना सुरू करे जाही, जेमा पच्चीस लाख रूपिया तक के आवास ऋण म ब्याज अनुदान मिलही। बजट म नवा रईपुर ले दुरूग तक लाईट मेट्रो सेवा सुरू करे के प्रस्ताव करे गेहे। उहें, प्रदेस म चार जघा म नवा मेडिकल कालेज बनाय बर बजट म दू सौ करोड़ रूपिया के प्रावधान हरय। ए नवा चिकित्सा महाविद्यालय मनेन्द्रगढ़, गीदम, जांजगीर-चांपा अउ कबीरधाम जिला म खोले जाही। उहें, कोरबा पश्चिम म नवा ताप विद्युत गृह के स्थापना होही।
बजट-03
प्रदेस म एसो एक सौ एक नवा स्वामी आत्मानंद अंग्रेजी माध्यम विद्यालय खोले के प्रस्ताव राखे गेहे। महात्मा गांधी ग्रामीण औद्योगिक पार्क असन सहरी क्षेत्र म घलो औद्योगिक पार्क बनाय जाही। बजट म करे गे प्रावधान के मुताबिक राजनांदगांव अउ रायगढ़ जिला म उर्वरक गुणवत्ता नियंत्रण प्रयोगसाला अउ रईपुर म नवा कीटनाशक प्रयोगसाला के स्थापना होही। उद्यानिकी ले जुड़े आधुनिक तकनीक ल अपनाय बर नवा रईपुर म सेंटर ऑफ एक्सीलेंस बनाय जाही। छुईखदान म पान अनुंसधान केन्द्र के स्थापना होही। आने-आने राज्य के तीर्थस्थल म छत्तीसगढ़ के तीर्थयात्री मन ल रूकवाय बर छत्तीसगढ़ जन निवास भवन बनाय जाही।
बजट म प्रधानमंत्री आवास योजना-ग्रामीण बर तीन हजार करोड़ रूपिया ले जादा के रासि प्रावधान करे गेहे। उहें, राज्य म अंतर्राष्ट्रीय रामामण महोत्सव के आयोजन होही। एखर बर बजट म बारह करोड़ रूपिया के प्रावधान हरय। प्रदेस म मुख्यमंत्री धरोहर दर्शन योजना सुरू करे जाही, जेमा राज्य संरक्षित स्मारक जघा म धरोहर मित्र नियुक्त होही अउ सैक्षणिक संस्था के पढ़ईया लइका मन ल ए जघा ल घुमाय बर अनुदान दे जाही। खेल ल बढ़ावा दे खातिर बस्तर अउ रईपुर म तीरंदाजी खेल अकादमी, नारायणपुर म मलखंब अकादमी बनाय जाही। एखर संगेसंग रईपुर म अंतर्राष्ट्रीय बैंडमिंटन खेल अकादमी के स्थापना करे जाही। पुलिस करमचारी मनके सुभीता बर बस्तर, कोंडागांव, सुकमा, दंतेवाड़ा, बीजापुर, कांकेर अउ नारायणपुर म आमचो बस्तर पुलिस कैंटिन खोले जाही।
बजट-04
आज प्रस्तुत बजट म सबले जादा करीबन सोलह प्रतिसत के रकम के प्रावधान स्कूल सिक्षा बर करे गेहे। बजट पेस करे के बाद पत्रकार मन ले गोठबात करत मुख्यमंत्री ह किहीन कि धान के कटोरा के रूप म प्रसिद्ध छत्तीसगढ़ ल धान के कटोरा बनाय बर राज्य सरकार संकलप करे हे अउ एखर बर राजीव गांधी किसान न्याय योजना म छह हजार आठ सौ करोड़ रूपिया के प्रावधान बजट म करे गेहे। मुख्यमंत्री ह आज पेस करे गे बजट ल भरोसा के बजट बतईन।
ओमन किहीन कि प्रदेस के दूर-दराज के क्षेत्र म मोबाइल मेडिकल यूनिट के स्थापना बर बजट म पांच करोड़ रूपिया के प्रावधान करे गेहे। ओमन बतईन कि माईलोगिन मन ल रोजगार देवाय बर कौशल्या समृद्धि योजना सुरू करे जाही। एखर खातिर बजट म पच्चीस करोड़ रूपिया के रकम के प्रावधान करे गेहे।
बजट-प्रतिक्रिया
आज मुख्यमंत्री कोति ले पेस करे गे बजट म प्रतिक्रिया देवत भारतीय जनता पार्टी के प्रदेस अध्यक्ष अरूण साव ह किहीन कि ए भरोसा के नइ भलूक भरोसा तोड़इया बजट हरय। ओमन किहीन कि ए बजट म सबो वरग ल छले गेहे।
उहें, नेता प्रतिपक्ष नारायण चंदेल ह किहीन कि ए बजट नाउम्मीदी के बजट हरय। ओमन किहीन कि पाछु बछर के बजट म ही सरकार ह जउन प्रावधान करे रिहीस। ओमा ले कोन-कोन से योजना सुरू होगे हे, ए जनता जानना चाहत हे। पूर्व मंत्री अउ भाजपा के मुख्य प्रवक्ता अजय चंद्राकर ह किहीन कि आज पेस करे गे बजट म अनियमित, संविदा, दैनिक वेतनभोगी के नियमितीकरण बर कुछु नइ केहे गेहे। विधायक बृजमोहन अग्रवाल ल घलो बजट ल छलावा के बतावत किहीन कि एमा कृषि बर कुछु नइ केहे गेहे। श्री अग्रवाल ह किहीन कि छह लाख तक आमदनी वाले परिवार ल गरीबी रेखा ले नीचे माने जाथे। फेर बजट म बेरोजगारी भत्ता के संबंध म जउन प्रावधान हरय, ओमा केहे गेहे कि ढाई लाख रूपिया के सलाना आमदनी वाले परिवार के बेरोजगार युवक मन ल बेरोजगारी भत्ता दे जाही। ए घोसना प्रदेस के बेरोजगार मन बर एक किसम के मजाक हरय। पूर्व विधानसभा अध्यक्ष धरमलाल कौशिक ह घलो ए बजट ल घोर निरासा के बजट बतईन। जेमा सबो वरग ल छले गेहे।
एम्स-दीक्षांत समारोह
अखिल भारतीय आयुर्विज्ञान संस्थान-एम्स रईपुर के पहलइया दीक्षांत समारोह काली सात मार्च के राखे गेहे। ए दीक्षांत समारोह के माईपहुना केन्द्रीय स्वास्थ्य अउ परिवार कल्याण राज्यमंत्री डॉक्टर भारती प्रवीण पवार होही। ए बेरा म केन्द्रीय राज्यमंत्री ह एम्स रईपुर के दंत चिकित्सा विभाग के सुभारंभ करही।
ए कार्यक्रम म सांसद सुनील सोनी, अरूण साव अउ सरोज पांडेय विशिष्ट अतिथि के रूप म संघरही। दीक्षांत समारोह म केन्द्रीय स्वास्थ्य सचिव राजेश भूषण, स्वास्थ्य सेवा के महानिदेशक प्रोफेसर अतुल गोयल अउ केन्द्रीय स्वास्थ्य मंत्रालय के अतिरिक्त सचिव जयदीप कुमार मिश्रा समेत आने-आने वरिष्ठ अधिकारी मौजूद रइही।
दीक्षांत समारोह म मेडिकल नर्सिंग अउ स्नातकोत्तर पाठ्यक्रम के करीबन आठ सौ पचास झिन विद्यार्थी मन ल डिग्री के संगेसंग दस झिन मेधावी विद्यार्थी मन ल गोल्ड मेडल दे जाही।