राष्ट्रपति द्रौपदी मुर्मु ह आज नई दिल्ली म जलशक्ति अभियान के अंतर्गत ‘‘कैच द रेन‘‘ अभियान के सुरूवात करीन। एखर उद्देश्य पेयजल के स्त्रोत ल टिकाऊ बनाय रखना हे। राष्ट्रपति ह कहिन कि जल संरक्षण अउ प्रबंधन भारत बर सबले जादा जरूरी मुद्दा हे, काबर कि भारत म जल संसाधन केवल चार प्रतिसत हे।
स्वच्छ-सुजल भारत के निर्माण बर जल-संरक्षण के क्षेत्र म सक्रिय महिला मन ल सम्मानित करे बर राष्ट्रपति ह आज नई दिल्ली म स्वच्छ सुजल शक्ति सम्मान प्रदान करीन। ए पुरस्कार स्वच्छ भारत मिशन-ग्रामीण, जल जीवन मिशन अउ राष्ट्रीय जल मिशन के आने-आने श्रेणी म दे गेहे। ए बेरा म राष्ट्रपति ह ‘‘जल शक्ति ले नारी शक्ति‘‘ बिसय म एक वीडियो अउ एक स्मारक टिकट घलो जारी करीन।
महिला सम्मेलन/मड़ई
मुख्यमंत्री भूपेश बघेल ह आज रायपुर के बीटीआई मैदान म आयोजित राज्य स्तरीय महिला सम्मेलन के सुभारंभ करीन। ए मउका म मुख्यमंत्री ह कहिन कि महिला मनके सशक्तिकरण बर राज्य सरकार डहार ले कतकोन कदम उठाय जात हे। गौठान मन म महिला समूह डहार ले वर्मी खाद, गमला, तेलघानी अउ सब्जी उत्पादन जइसे गतिविधि संचालित करे जात हे। सरकार के ए प्रयास हे कि महिला मन सिक्षित अउ आर्थिक रूप ले सशक्त बनय।
मुख्यमंत्री ह अच्छा प्रदर्सन बर बिलासपुर, बालोद अउ नारायणपुर के सखी वन स्टॉप सेंटर अउ नवा बिहान योजना के महिला संरक्षण अधिकारी अउ पर्यवेक्षक मन ल सम्मानित करीन। संगेसंग महिला स्व-सहायता समूह ल आर्थिक गतिविधि बर तीन प्रतिसत ब्याज के दर म चार लाख के ऋण रासि के चेक घलो वितरित करीन। मुख्यमंत्री ह महिला समूह डहार ले बने सामान के बिक्री बर महिला मड़ई म लगाय गे स्टॉल के घलो भ्रमण करीन। महिला मड़ई म प्रदेसभर ले महिला समूह अपन उत्पाद ल लेके पहुंचे हे। ए मड़ई म चौंसठ स्टॉल के माध्यम ले उत्पाद के बिक्री अउ प्रदर्सनी लगाय गेहे।
पवन दीवान अलंकरण
संत कवि पवन दीवान के नाम ले कविता लेखन के क्षेत्र म राज्य सासन डहार ले राज्य अलंकरण पुरस्कार दे जाही। ए पुरस्कार अवइया राज्य अलंकरण समारोह ले हर बछर दे जाही। मुख्यमंत्री भूपेश बघेल ह रायपुर म आयोजित संत कवि पवन दीवान श्रद्धांजलि सभा अउ सम्मान समारोह म एखर घोसना करीन। ए बेरा म मुख्यमंत्री ह कहिन कि संत कवि पवन दीवान के छत्तीसगढ़ के माटी ले गहरा लगाव रिहीस। ओमन ह समाज के मौजूदा स्थिति ल बड़ सहजता ले अपन रचना म पिरोय हे।
केन्द्र-स्वर्ण आभूषण
केन्द्र सरकार ह एक अप्रैल ले हॉलमार्क वाले अइसन सोना के गहना अउ सोना के कलाकृति के बिक्री उपर प्रतिबंध लगाय के निर्णय लेहे, जेखर उपर छह अंक के कोड नइ होही। केन्द्रीय उपभोक्ता मामला, खाद्य अउ सार्वजनिक वितरण मंत्रालय के अनुसार ए निर्णय छोटे विक्रेता मनके स्तर म घलो गुणवत्ता ल बनाय रखे बर ले गेहे। वाणिज्य अउ उद्योग मंत्री पीयूष गोयल के अध्यक्षता म काली भारतीय मानक ब्यूरो के समीक्षा बइठका के बाद ए निर्णय ले गेहे। मंत्रालय के अनुसार छोटे बिक्री स्तर म घलो गुणवत्ता ल बढ़ावा दे बर उत्पाद के प्रमाणन या न्यूनतम मार्किंग सुल्क म अस्सी प्रतिसत के छूट दे जावत हे।
कवर्धा-प्रदर्शन
कबीरधाम जिला म भोरमदेव थाना क्षेत्र के गौरी चौरा जघा म झंडा हटाय ल लेके गोंडवाना गणतंत्र पार्टी ह रैली निकाल के प्रदर्सन करीन। प्रदर्सनकारी मन ल पुलिस ह राजानवागांव के बाहिर हरमो रद्दा अउ ओखर बाद विवादित स्थल पहिली बैरीकेड्स लगाके रोके के प्रयास करीन। ए दउरान प्रदर्सनकारी अउ पुलिस के बीच झूमाझटकी होईस। प्रदर्सनकारी मन ल रोके बर पुलिस डहार ले हल्का बल प्रयोग करत हुए आंसू गैस घलो छोड़े गीस। ए घटना म पुलिस अधीक्षक के संग कतकोन पुलिस कर्मी अउ प्रदर्सनकारी मन ल चोट पहुंचे हे। घटना के बाद विवादित जघा के आसपास सुरक्षा के कड़ा प्रबंध करे गेहे, जेखर ले अभी स्थिति नियंत्रण म हे। उहें, दुर्ग रेंज के पुलिस महानिरीक्षक घलो अतिरिक्त बल के संग मउका म पहुंचीस। पुलिस ह डेढ़ सौ ले जादा प्रदर्सनकारी मन ल हिरासत म लेहे।
अतिरिक्त पुलिस अधीक्षक मनीषा ठाकुर ह बतईन कि ए मामला म आने-आने धारा के तहत साठ लोगन ल गिरफ्तार करे गेहे अउ घटना म बीस अधिकारी-कर्मचारी घायल होय हे। घायल मन ल जिला अस्पताल म भर्ती कराय गेहे।
राष्ट्रीय शोध संगोष्ठी
संचालनालय पुरातत्व अभिलेखागार अउ संग्रहालय रायपुर डहार ले छत्तीसगढ़ के क्षेत्रीय राजवंश उपर आधारित तीन दिवसीय राष्ट्रीय शोध संगोष्ठी के आयोजन काली ले महंत घासीदास स्मारक संग्रहालय के सभागार म करे जात हे। ए संगोष्ठी के पहिली दिन अकादमिक सत्र म बारह सोध पत्र पढ़े गीस अउ छह व्याख्यान होईस।
प्रोफेसर ब्योमकेश त्रिपाठी ह संगोष्ठी म किहीन कि क्षेत्रीय इतिहास लेखन के दौरान केवल राजनीतिक सीमा ल ही नहीं, बल्कि सांस्कृतिक सीमा ल घलो ध्यान म रखना चाही, तभे इतिहास लेखन के संग न्याय हो पाही। उहें, आचार्य रमेन्द्रनाथ मिश्र ह सोधार्थी मन ल ईमानदारी ले सोध कार्य करे अउ पहिली के विद्धान मनके कार्य ल समझे के सुझाव दीन। ए बेरा म विभाग डहार ले प्रकासित सोध संक्षेपिका अउ रींवा के उत्खनन प्रतिवेदन के विमोचन घलो करे गीस।
रेलवे सोलर प्लांट
दुर्ग जिला के भिलाई-चरोदा क्षेत्र म भारतीय रेल के सबले बड़े पचास मेगावाट क्षमता के सोलर प्लांट बनके तैयार होगे हे। जल्दी ही ए सोलर प्लांट ले उत्पादन सुरू हो जही।
दक्षिण पूर्व मध्य रेलवे बिलासपुर जोन के महाप्रबंधक आलोक कुमार ह आकाशवाणी रायपुर ले चरचा के दउरान एखर जानकारी दीन। ओमन ह बतईन कि रेलवे सोलर एनर्जी उपर काम करत हे। रेलवे के जेन भी खाली पड़े जमीन हे ओखर उपर सोलर प्लांट लगाय जात हे। भिलाई-चरोदा म तैयार हो चुके सोलर प्लांट रेलवे के सबले बड़े पावर प्लांट हे। ओमन ह कहिन कि यात्री मनके सुरक्षित यात्रा अउ सुविधा बर भारतीय रेलवे नवा-नवा आधुनिक तकनीक ल लगातार अपनावत आत हे। श्री कुमार ह आज डीआरएम रायपुर के संग दुर्ग रेलवे स्टेसन के घलो निरीक्षण करीन अउ अधिकारी मन ल व्यवस्था म सुधार बर जरूरी निरदेस दीन।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन रिले करही। ए बखत के अंक म ‘‘बीजापुर‘‘ जिला के गतिविधि के बारे म जानकारी दे जाही।
अउ अब थोरकुन समाचार सार म-
– छत्तीसगढ़ के राज्यपाल विश्वभूषण हरिचंदन ह नई दिल्ली म उपराष्ट्रपति जगदीप धनखड़ अउ प्रधानमंत्री नरेन्द्र मोदी ले मुलाकात करीन।
– छत्तीसगढ़ नागरिक संघर्ष समिति डहार ले रईपुर म ध्वनि प्रदूषण के मामला म रायपुर कलेक्टर अउ पुलिस अधीक्षक के विरूद्ध दायर अवमानना याचिका के सुनवाई बिलासपुर हाईकोर्ट म होईस। कोर्ट ह रायपुर कलेक्टर अउ पुलिस अधीक्षक ल नवा शपथ पत्र प्रस्तुत करे बर आदेसित करे हे।
– बेमेतरा जिला के सिटी कोतवाली थाना क्षेत्र म पाछु बछर एक मनखे के हत्या के मामला म न्यायालय ह तीन आरोपी मन ल आजीवन कारावास के सजा सुनाय हे।
– इही जिला म स्मार्ट कार्ड नवीनीकरण के नाम उपर धोखाधड़ी करइया चार आरोपी मन ल सीजीएम न्यायालय ह तीन बछर के कारावास के संग एक हजार रूपिया के अर्थदण्ड ले दंडित करे हे।
– जांजगीर-चांपा जिला प्रसासन ह चौबीस झोलाछाप डॉक्टर अउ पैथोलेब के खिलाफ कार्रवाई करे हे। उहें, चार क्लीनिक ल सील करत हुए संचालक मनके विरूद्ध एफ.आई.आर. दर्ज करे गेहे।
– बेमेतरा जिला मुख्यालय म आंदोलन करइया आंगनबाड़ी कार्यकर्ता मन ह अपन आने-आने मांग ल लेके बांधा तालाब म जल सत्याग्रह करके प्रदर्सन करीन।
अउ
– बालोद जिला के डौंडीलोहारा थाना क्षेत्र म संबलपुर-नर्सरी तीर एक गाड़ी के पलटे ले चार मजदूर गंभीर रूप ले घायल होगे हे।