विश्व भूषण हरिचंदन ह आज छत्तीसगढ़ के नौवां राज्यपाल के रूप म पद के सपथ लीन। राजभवन म राखे गे समारोह म छत्तीसगढ़ उच्च न्यायालय के मुख्य न्यायाधिपति न्यायमूर्ति अरूप कुमार गोस्वामी ह ओमन ल सपथ देवईन। राज्यपाल श्री हरिचंदन ह हिन्दी म ईश्वर के नाम म सपथ लीन। ए मउका म राज्य के प्रथम महिला सुप्रभा हरिचंदन घलो मौजूद रिहीन। सपथ ग्रहण के बाद मुख्यमंत्री भूपेश बघेल, मुख्य न्यायाधिपति अरूप कुमार गोस्वामी, विधानसभा अध्यक्ष डॉक्टर चरणदास महंत संघरा दूसर गणमान्य लोगन मन राज्यपाल ल गुलदस्ता देके अपन-अपन सुभकामना दीन।
सपथ ग्रहण समारोह के सुरूवात अउ समापन पारंपरिक पुलिस बैंड डहार ले बजाय गे राष्ट्रगान के संग होईस। ए मउका म राज्यगीत के धुन घलो बजाय गीस। सपथ ग्रहण के बाद नवा राज्यपाल श्री हरिचंदन ल गार्ड ऑफ ऑनर दे गीस।
कारीकरम म राज्य मंत्रिमंडल के सबो सदस्य के अलावा प्रदेस के पूर्व मुख्यमंत्री डॉक्टर रमन सिंह, लोकसभा सांसद अरूण साव अउ सुनील सोनी, नेता प्रतिपक्ष नारायण चंदेल, पूर्व नेता प्रतिपक्ष धरमलाल कौशिक, कांग्रेस अउ भाजपा के कुछेक विधायक के अलावा आने-आने आयोग अउ निगम मंडल के अध्यक्ष मनके संग विश्वविद्यालय के कुलपति अउ राज्य सरकार के बड़े अधिकारी मन घलो मौजूद रिहीन।
राज्यपाल-शपथ-02
छत्तीसगढ़ के राज्यपाल बने के पहिली श्री हरिचंदन आंध्रप्रदेश के राज्यपाल रिहीन। ओड़िसा के निवासी श्री हरिचंदन राज्य विधानसभा बर पांच घांव विधायक रेहे हे। ए दउरान ओमन ल ओड़िसा सरकार म चार घांव मंत्री के दायित्व घलो दे गे रिहीस। अर्थशास्त्र म ऑनर्स के डिग्री के संग श्री हरिचंदन ह कानून के सिक्षा लीन हे। राजनीति म आय ले पहिली ओमन ह लंबा समय तक वकालत के पेसा म घलो सक्रिय रिहीन। श्री हरिचंदन ह ऐतिहासिक जे.पी. आंदोलन म घलो बड़े भूमिका निभाय रिहीन, जेखर बर आपातकाल के दउरान ओमन ल कतकोन महीना तक जेल म रहना पड़े रिहीस। श्री हरिचंदन के साहित्य म घलो बिसेस योगदान हे। उंखर प्रमुख रचना म – महासंग्रामर-महानायक, मरूभताश, राणाप्रताप अउ शेष झलक बिसेस रूप ले चर्चित रेहे हे।
कांग्रेस-राष्ट्रीय अधिवेशन
कांग्रेस के पच्यासीवां राष्ट्रीय अधिवेशन राजधानी रईपुर म काली ले सुरू होवत हे। ए अधिवेशन ल लेके सबो तैयारी पूरा होगे हे। छब्बीस फरवरी तक चलइया ए आयोजन के दउरान देसभर के कांग्रेसी नेता अउ पदाधिकारी मन रईपुर म मौजूद रइही। पार्टी के राष्ट्रीय अध्यक्ष मल्लिकार्जुन खड़गे के अलावा पूर्व राष्ट्रीय अध्यक्ष सोनिया गांधी अउ राहुल गांधी घलो अधिवेशन म बिसेस रूप ले सामिल होही। श्री खड़गे ह आज संझा रईपुर पहुंचत हे। ए बड़े नेता मनके सुरक्षा ल देखत अधिवेशन स्थल म बिसेस इंतजाम करे गेहे।
प्रदेस कांग्रेस अध्यक्ष मोहन मरकाम ह बतईन कि ए अधिवेशन के दउरान आने-आने बिसय उपर चरचा होही। संगेसंग कृषि, आर्थिक, रोजगार अउ विदेश नीति जइसन बिसय उपर प्रस्ताव पारित होय के संभावना हे।
पार्टी के प्रदेस प्रभारी कुमारी शैलजा ह बतईन कि अधिवेशन के पहिली दिन संचालन समिति के बइठका होही। एमा कांग्रेस कार्यसमिति के सदस्य मनके चुनाव होही। उहें, पच्चीस फरवरी के अखिल भारतीय कांग्रेस कमेटी अउ प्रदेस कांग्रेस के पदाधिकारी मनके बइठका होही। अधिवेशन के आखिरी दिन छब्बीस फरवरी के जनसभा के आयोजन करे जाही।
पवन खेड़ा-पूछताछ
सर्वोच्च न्यायालय ह कांग्रेस के राष्ट्रीय प्रवक्ता पवन खेड़ा के गिरफ्तारी म रोक लगावत किहीन हे कि उंखर डहार ले नियमित जमानत बर आवेदन करे जाय तक उंखर गिरफ्तारी म रोक लगे रइही।
एखर पहिली, पवन खेड़ा ल आज दिल्ली विमानतल म पुलिस ह पूछताछ बर रोके रिहीस। ओमन ह रईपुर म काली ले सुरू होवइया पार्टी के राष्ट्रीय अधिवेशन म सामिल होय बर विमानतल पहुंचे रिहीन। पुलिस ह पवन खेड़ा ल बतईन कि दिल्ली अउ असम म उंखर खिलाफ प्राथमिक रिपोर्ट दर्ज होय के संबंध म उंखर ले पूछताछ करना हे। बताय गे हवय कि प्रधानमंत्री के पिता ल लेके कथित रूप ले पवन खेड़ा डहार ले करे गे टिप्पणी बर उंखर खिलाफ दिल्ली अउ असम म रिपोर्ट दर्ज करे गेहे।
भाजपा-विरोध प्रदर्शन
प्रधानमंत्री आवास योजना के हितग्राही मन ल मकान देवाय बर भाजपा डहार ले प्रदेसभर म मोर आवास-मोर अधिकार कार्यक्रम चलाय जावत हे। एमा पार्टी डहार ले चौबीस अउ पच्चीस फरवरी के आरंग म आवासहीन अधिवेशन के आयोजन करे जाही। आज प्रदेस के ग्यारह ठिन विधानसभा क्षेत्र म भाजपा कार्यकर्ता मन ह कांग्रेस विधायक के निवास के घेराव करे के परयास करीन।
विरोध प्रदर्सन के दउरान पार्टी नेता मन ह किहीन कि छत्तीसगढ़ म करीबन सोलह लाख परिवार प्रधानमंत्री आवास योजना के हितग्राही मन म सामिल हे। फेर अभी तक एमा ले जादा ले जादा परिवार ल योजना के फायदा नइ मिल सकय। भाजपा नेता मन ह एखर बर राज्य सरकार ल दोसी बतईन।
प्रधानमंत्री-ईको टूरिज्म
प्रधानमंत्री नरेन्द्र मोदी ह साउथ ईस्टर्न कोल फील्ड्स लिमिटेड-एसईसीएल डहार ले सूरजपुर जिला के केनापारा क्षेत्र म अनुपयोगी खदान ल ईको-टूरिज्म के रूप म विकसित करे के प्रयास के सराहना करीन हे। कोल इंडिया लिमिटेड ह देसभर के अइसन तीस ठन खदान क्षेत्र ल ईको टूरिज्म स्थल के रूप म बदले हे। कोल इंडिया लिमिटेड डहार ले ए बखत अपन अनुपयोगी खदान ल ईको पार्क अउ पर्यटन स्थल म बदले के दिसा म बिसेस प्रयास करे जावत हे। ए पर्यटन स्थल स्थानीय लोगन बर आजीविका के स्त्रोत घलो साबित होवत हे। कोल इंडिया डहार ले देसभर म चिन्हित करे गे अइसन तीस ठन ईको पार्क के तीर-तखार के पर्यटन ले जुड़े बुनियादी सुविधा के विकास करे जावत हे।
छत्तीसगढ़ के सूरजपुर जिला म एसईसीएल डहार ले विकसित केनापारा ईको-टूरिज्म पर्यटन स्थल म आय एक झिन मनखे ह किहीस कि ए अनुपयोगी खदान क्षेत्र ल जउन तरीका ले पर्यटन केन्द्र के रूप म विकसित करे गेहे, ओ ह कलपना ले परे हे। ओमन किहीन कि इहां हरियाली के वातावरण म नौका विहार के संग सुंदर जलाशय म तउरत होटल म खाना खाय के मजा घलो काखरो बर बहुते सुघ्घर हो सकत हे अउ एखरे संग स्थानीय लोगन बर आमदनी के एक ठन जरिया घलो हे।
संगीत नाटक अकादमी फेलोशिप
राष्ट्रपति द्रौपदी मुर्मू ह आज आज नई दिल्ली म राखे गे समारोह म बछर दू हजार उन्नीस, बीस अउ इक्कीस बर संगीत नाटक अकादमी फेलोशिप अउ पुरस्कार दीन। संगीत अउ नाटक ले जुड़े देस के आठ बड़े हस्ती मन ल प्रदर्सन कला के क्षेत्र म संगीत नाटक अकादमी फेलोशिप दे गीस। एमा छत्तीसगढ़ के लोक गायिका ममता चंद्राकर घलो सामिल हे। उहें, संगीत, नृत्य, रंगमंच, लोक कला अउ कठपुतली जइसन कला ले जुड़े एक सौ अट्ठाईस कलाकार मन ल संगीत नाटक अकादमी सम्मान दे गीस। एमा खैरागढ़ के विश्वविद्यालय के सहायक प्राध्यापक डॉक्टर दिवाकर कश्यप अउ डॉक्टर प्रभाकर कश्यप ल घलो चुने गेहे। एमन ल उस्ताद बिस्मिलाह खां युवा श्रेणी के पुरस्कार दे गेहे।
अग्निवीर भर्ती-आवेदन
भारतीय सेना म अग्निवीर मनके भर्ती बर ए बखत प्रदेस के आने-आने जिला म युवा मन ले आवेदन ले जावत हे। एमा सामिल होय बर आवेदन के आखिरी तारीख पन्द्रह मार्च हे। सेना म भर्ती के इच्छुक उम्मीदवार भारतीय सेना के वेबसाइट ‘‘ज्वाईन इंडियन आर्मी‘‘ के माध्यम ले अपन ऑनलाइन पंजीयन करा सकत हे। अभ्यर्थी मन ल जरूरी जानकारी दे बर आने-आने जिला म हेल्पडेस्क घलो बनाय गे हवय। ए भर्ती रैली ले जुड़े ऑनलाइन परीक्षा के प्रश्न के नमूना ले बर अभ्यर्थी हेल्प डेस्क के ई-मेल म संपर्क कर सकत हे। ए संबंध म अउ जादा जानकारी बर रईपुर के सेना भर्ती कार्यालय ले टेलीफोन नंबर – शून्य सात सात एक – दो नौ छह पांच दो एक तीन म संपर्क करे जा सकत हे।
आंगनबाड़ी कार्यकर्ता-प्रदर्शन
प्रदेसभर के आंगनबाड़ी कार्यकर्ता अउ सहायिका मन ह अपन छह सूत्रीय मांग ल लेके आंदोलन करत हे। एमा राजधानी रईपुर संघरा आने-आने जिला म आंगनबाड़ी कार्यकर्ता मन ह धरना-प्रदर्शन करत हे। उंखर ए आंदोलन ल आने-आने संगठन मन ह घलो अपन समर्थन दे हवय।
इही कड़ी म प्रदेस के पूर्व मुख्यमंत्री डॉक्टर रमन सिंह ह अपन बालोद प्रवास के दउरान जिला के गुरूर गांव म आंगनबाड़ी कार्यकर्ता मनके धरनास्थल म पहुंचीन अउ ओमन ल अपन समर्थन दे जाय के घोसना करीन।
पीएम किसान सम्मान निधि
प्रधानमंत्री किसान सम्मान निधि योजना म हितग्राही मन ल अपन बैंक खाता म आधार संख्या ल जुड़वाय बर काली रईपुर जिला के सबो सहकारी समिति मन म सिविर लगाय जाही। कलेक्टर डॉक्टर सर्वेश्वर भूर्रे ह बतईन कि सिविर म हितग्राही किसान मनके बैंक खाता म आधार संख्या ल जोड़े के संगेच नवा किसान मन बर क्रेडिट कार्ड घलो बनाय जाही।
हज यात्रा
छत्तीसगढ़ राज्य हज कमेटी के चेयरमेन मोहम्मद असलम खान ह बतईन हे कि भारतीय हज कमेटी के निरदेस के अनुसार साउदी अरब सरकार डहार ले बारह बछर ले कम उमर के लइका मन ल ए बछर हज यात्रा के मंजूरी नइ दे जाही। श्री खान ह बतईन कि ए आधार म भारतीय हज कमेटी ह अइसन लइका मनके हज यात्रा के आवेदन ल निरस्त करे जाय के निरदेस दीन हे। ए संबंध म जादा जानकारी बर छत्तीसगढ़ राज्य हज कमेटी के रईपुर के कार्यालय ले संपर्क करे जा सकत हे।