प्रवर्तन निदेशालय-ईडी के टीम ह आज प्रदेस म दू विधायक मनके संग कांग्रेस के कतकोन नेता मनके घर अउ कार्यालय मन म छापामार कार्रवाई करीन। एमा भिलाई विधायक देवेन्द्र यादव अउ बिलाईगढ़ के विधायक चंद्रदेव राय के संगेसंग प्रदेस कांग्रेस कमेटी के कोषाध्यक्ष रामगोपाल अग्रवाल, गिरीश देवांगन, आर.पी. सिंह, विनोद तिवारी अउ सन्नी अग्रवाल के संग कतकोन नेता मनके नाम सामिल हे। ईडी के टीम काली रात के छत्तीसगढ़ पहुंचे रिहीन। आज बिहनिया टीम ह सन्नी अग्रवाल के पंडरी के मकान, भिलाई विधायक देवेन्द्र यादव के भाई धर्मेन्द्र यादव के दुर्ग के घर अउ कांग्रेस नेता रवि डडसेना के मकान म घलो तलासी लीन। उहें, रईपुर म श्रीराम नगर, डीडी नगर, गीतांजलि नगर, मोवा अउ भिलाई के सेक्टर पांच के संग हाउसिंग बोर्ड औद्योगिक क्षेत्र म छापा मारे गीस।
इही बीच, रायपुर म आयोजित पत्रकारवार्ता म कांग्रेस के प्रदेस प्रभारी कुमारी शैलजा, मुख्यमंत्री भूपेश बघेल अउ प्रदेस कांग्रेस अध्यक्ष मोहन मरकाम ह किहीन कि कांग्रेस के राष्ट्रीय अधिवेशन म अवरोध पैदा करे बर ईडी ह छापा मारे हे। ओमन कहिन कि भारत जोड़ो यात्रा के सफलता ले हतास होके ए कार्रवाई करे गेहे।
जवान-शहीद
राजनांदगांव जिला के बोरतालाब थाना क्षेत्र म आज बिहनिया माओवादी मन ह दू पुलिस जवान के गोलीमार के हत्या कर दीन।
जानबा के मुताबिक छत्तीसगढ़ अउ महाराष्ट्र के सीमा म राजनांदगांव के बोरतालाब इलाका म सराब तस्करी ल रोके बर बैरियर लगाय गेहे। इहां पुलिस जवान राजेश सिंह अउ ललित सम्रत के ड्यूटी लगाय गे रिहीस। ओमन आवत-जावत गाड़ी मन ल रोके तलासी लेवत रिहीस। इही दउरान कुछ माओवादी मन उहां पहुंचीन अउ दूनों जवान मन ल गोली मारदीन। एमा ले एक जवान के मउका म ही मउत होगे। उहें, एक आने जवान ह अस्पताल ले जात बखत दम तोड़ दीस। एखर बाद माओवादी मन ह जवान मनके मोटर साइकिल म आगी लगा दीन। घटना के बाद माओवादी मन जंगल डहार भाग गीन। घटना के बाद पुलिस ह इलाका म सर्चिंग ल बढ़ा देहे। बताय जात हे कि आरक्षक ललित सम्रत दंतेवाड़ा अउ राजेश सिंह डोंगरगढ़ के रहइया रिहीन। ए दूनों जवान बोरतालाब थाना म पदस्थ रिहीन।
जानबा के अनुसार छत्तीसगढ़ अउ महाराष्ट्र के सीमा म सराब के अवैध परिवहन अउ आने आपराधिक गतिविधि मनके सिकायत मिले के बाद पुलिस के टीम इहां बैरियर लगाके अवइया-जवइया गाड़ी मनके जांच करत रिहीन। दू दिन पहिली पुलिस ह इही जघा म एक सौ अस्सी पेटी सराब जब्त करे रिहीन।
मुख्यमंत्री भूपेश बघेल ह माओवादी हमला म सहीद दूनों जवान के सहादत म दुख जतईन। श्री बघेल ह सहीद मनके परिजन के प्रति संवेदना जतात हुए किहीन कि पुलिस जवान के सहादत व्यर्थ नइ जाही।
ओति, बीजापुर जिला के भैरमगढ़ म अज्ञात लोगन मन ह प्रधान आरक्षक के हत्या कर दीन। वरिष्ठ पुलिस अधिकारी आर.के. बर्मन ह घटना के पुष्टि करत हुए बतईन कि ए प्रधान आरक्षक अपन भाई के बिहाव म संघरे बर बेलचर गांव आय रिहीन। इही दउरान चार लोगन बिहाव वाले घर म घुसीन अउ प्रधान आरक्षक ल घर के बाहिर लाके टंगिया अउ चाकू मारके उंखर हत्या कर दीन। ए जवान दंतेवाड़ा जिला के गुमलानार के रहवइया रिहीन।
गोधन न्याय योजना-राशि अंतरण
मुख्यमंत्री भूपेश बघेल ह आज रईपुर म आयोजित वर्चुअल कारीकरम म गोधन न्याय योजना के तहत पशुपालक ग्रामीण, गौठान ले जुड़े महिला समूह अउ गौठान समिति ल आठ करोड़ तिरसठ लाख रूपिया के रासि ऑनलाइन जारी करीन। ए योजना के तहत हितग्राही मन ल अब तक चार सौ बारह करोड़ रूपिया ले जादा के भुगतान करे जा चुके हे।
मंत्रिपरिषद-निर्णय-01
राज्य सरकार अब प्रदेस के बेरोजगार युवा मन ल बेरोजगारी भत्ता दीही। ए निर्णय आज मुख्यमंत्री भूपेश बघेल के अध्यक्षता म रायपुर म आयोजित राज्य मंत्रिपरिषद के बइठका म ले गीस। बइठका म छत्तीसगढ़ विधानसभा म बजट सत्र के दउरान पढ़े जाने वाला राज्यपाल के अभिभाषण के अनुमोदन करे गीस। उहें, बछर दू हजार तेईस-चौबीस बर बजट अनुमान, बछर दू हजार बाईस-तेईस के तीसरइया अनुपूरक अनुमान अउ विनियोग विधेयक के प्रारूप ल कैबिनेट ह मंजूरी दीन। संगेसंग छत्तीसगढ़ विधानसभा सदस्य वेतन, भत्ता, पेंसन संशोधन विधेयक के प्रारूप अउ छत्तीसगढ़ लोक सेवा आयोग के इक्कीसवां वार्षिक प्रतिवेदन के घलो अनुमोदन करे गीस।
राज्य सरकार सार्वजनिक वितरण प्रणाली के तहत अनुसूचित क्षेत्र अउ माडा क्षेत्र के अंत्योदय अउ प्राथमिकता वाला परिवार मन ल चना वितरण बर केन्द्र सरकार के बफर स्टॉक ले आठ हजार रूपिया प्रति टन के सब्सिडी योजना के तहत चना खरीदही। उहें, प्रदेस म एक नवंबर दू हजार उन्नीस ले बंद पड़े उद्योग मन ल दुबारा सुरू करे के निर्णय ले गीस। राज्य ल लॉजिस्टिक्स अउ वेयर हाउसिंग हब के रूप म विकसित करे जाही।
मंत्रिपरिषद-निर्णय-02
मंत्रिपरिषद के बइठका म नवा रईपुर म लोगन मन ल आवंटित जमीन के प्रीमियम म अधिरोपित ब्याज अउ सरचार्ज म छूट वन टाईम सेटलमेंट स्कीम लागू करे के निर्णय ले गेहे। राज्य प्रवर्तित मुख्यमंत्री सह प्रधानमंत्री आवासीय योजना म अब विधवा, विधुर, परित्यागता अउ अविवाहित पुरूष के संग महिला ल सामिल करे के निर्णय ले गेहे। एखर बर पंजीयन के तरीख इकतीस मार्च दू हजार चौबीस तक बढ़ा दे गेहे। उहें, राज्य बर भारतीय पुलिस सेवा संवर्ग के तहत पुलिस महानिरीक्षक, अतिरिक्त पुलिस महानिदेशक के पद ल अस्थायी रूप ले दू बछर बर बनाय के अनुमोदन करे गीस।
मंत्रिपरिषद ह टाटा टेक्नोलॉजीस लिमिटेड के संग पार्टनरशिप म औद्योगिक प्रसिक्षण संस्था उन्नयन योजना ल मंजूरी देहे। एखर तहत प्रदेस के छत्तीस आई.टी.आई. के विकास बर एक हजार दू सौ सोलह करोड़ अस्सी लाख रूपिया खरचा करे जाही। उहें, प्रदेस म नवाचार आयोग के डहार ले जन कल्याणकारी योजना ल बढ़ावा दे अउ प्रसासनिक सेवा म दक्षता बढ़ाय संबंधी सुझाव उपर चरचा करे गीस।
भाजपा-घेराव
मोर आवास-मोर अधिकार ल लेके भारतीय जनता पार्टी के कार्यकर्ता मन ह आज रायपुर पश्चिम के संग प्रदेस के ग्यारह विधानसभा क्षेत्र म विधायक निवास के घेराव करीन। महासमुंद म प्रदेस अध्यक्ष अरूण साव के नेतृत्व म सभा होईस अउ रैली निकाले गीस। एखर बाद बड़ संख्या म कार्यकर्ता मन ह विधायक विनोद सेवनलाल चंद्राकर के घर के घेराव करीन। इही दउरान भाजपा कार्यकर्ता अउ पुलिस के बीच हल्का झूमाझटकी घलो होईस।
इही बीच, विधायक विनोद सेवनलाल चंद्राकर के नेतृत्व म कांग्रेस कार्यकर्ता मन ह घलो भाजपा के खिलाफ नारेबाजी करीन।
उहें, रायगढ़ क पूर्व विधायक विजय अग्रवाल के नेतृत्व म भाजपा कार्यकर्ता मन ह विधायक प्रकाश नायक के घर के घेराव करीन।
गरियाबंद-घेराव
आदिवासी इलाका म पेसा कानून लागू करे अउ ग्राम पंचायत ल अधिकार संपन्न बनाय के संग आने-आने मांग ल लेके आज गरियाबंद जिला म ग्रामीण मन ह कलेक्टोरेट के घेराव करीन। इही दउरान सोभा अउ गोना-गौरगांव क्षेत्र के ग्रामीण मन ह ट्रैक्टर रैली निकाल के प्रदर्सन करीन। उहें, आयोजित सभा म ग्रामीण मन ह विधानसभा चुनाव के बहिष्कार करे के घोसना करीन। ओमन ह वन अधिकार पट्टा दिलाय अउ जल, जंगल अउ जमीन म आदिवासी मन ल अधिकार देके मांग करीन।