राष्ट्रीय जनजातीय महोत्सव
राष्ट्रीय जनजातीय महोत्सव आज ले नई दिल्ली म शुरू होगे हे। मेजर ध्यानचंद राष्ट्रीय स्टेडियम म आयोजित ए महोत्सव के प्रधानमंत्री नरेंद्र मोदी ह आज उद्घाटन करीन।
ए मउका म प्रधानमंत्री ह कीहिन हे कि केंद्र सरकार आदिवासी मनके उत्थान बर सरलग काम करत हे। इही कड़ी म जनजातीय समुदाय डहार ले तियार करे गे उत्पाद मन ल बाजार तक पहुंचाय बर विशेष कदम उठाय गेहे। ओमन कीहिन कि आदिवासी मनके आर्थिक प्रगति बर उंखर डहार ले बनाए गे बांस के उत्पाद के निर्यात घलो करे जावत हे ।
प्रधानमंत्री ह कीहिन हे कि ए बछर मोटा अनाज ल विशेष महत्व देबर कतकोन आयोजन करे जात हे। सत्ताईस फरवरी तक चलइया ए महोत्सव म अठाईस राज्य अउ केंद्र शासित प्रदेश मनले एक हजार जनजातीय कलाकार मन भाग लेवत हे।
आज जगदलपुर म होय प्रदर्शन के दउरान कार्यकर्ता मन ल संबोधित करत प्रदेश भाजपा अध्यक्ष अरूण साव ह आरोप लगाइन कि पाछू दिन बस्तर क्षेत्र म पार्टी के तीन स्थानीय नेता मनके हत्या ले ये संकेत मिलथे कि पार्टी ल हतोत्साहित करे बर लक्ष्य बनाके भाजपा कार्यकर्ता मनके हत्या करे गेहे। उंहे प्रदेश महामंत्री केदार कश्यप ह राज्य सरकार उपर माओवादी हिंसा ल रोके म नाकाम रेहे के आरोप लगाय हे।
भाजपा डहार ले ए मुद्दा ल लेके आज अउ काली प्रदेशभर म आंदोलन करे के ऐलान करे गेहे। एखर तहत पार्टी डहार ले काली बस्तर क्षेत्र के बारा विधानसभा क्षेत्र ल छोड़के प्रदेश के जम्मों अठहत्तर विधानसभा क्षेत्र मन म मंडल स्तर म चक्काजाम करे जाही। ए बेरा मंझनियां दू बजे ले संझा पांच बजे तक प्रदेश के चार सौ ले जादा सड़क उपर प्रदर्शन घलो करे जाही।
इही बीच राजनांदगांव म घलो ए मुद्दा ल लेके भारतीय जनता युवा मोर्चा के कार्यकर्ता मन ह काली रतिहा मशाल रैली निकालीन। जिला भाजपा पदाधिकारी के संग युवा मोर्चा के कार्यकर्ता मन पुलिस अधीक्षक कार्यालय पहुंचीन अउ जिला प्रशासन ल ज्ञापन सौंपीन।
चिट्ठी म श्री जुनेजा ह कहिन हे कि केंद्रीय सुरक्षा बल अउ राज्य पुलिस के कोसिस ले पाछू कुछ बछर के दउरान माओवादी मन ल नियंत्रित करे म सफलता मिले हे। एखर ले प्रदेश म माओवादी मनके प्रभाव क्षेत्र म सरलग कमती होवत हे। चिट्ठी म लिखे गेहे कि इही बौखलाहट के सेती माओवादी मन जनप्रतिनिधि अउ आम नागरिक मन ल निशाना बनावत हे।
अग्निवीर भर्ती अधिसूचना
भारतीय सेना म अग्निवीर महिला पुलिस, नर्सिंग असिस्टेंट, नर्सिंग असिस्टेंट -वेटनरी, सैनिक सिपाही फार्मा अउ धार्मिक शिक्षक के भर्ती बर आज ले ऑनलाइन आवेदन के प्रक्रिया शुरू हो गेहे। ए संबंध म अधिसूचना जारी कर दे गेहे। अधिसूचना भारतीय सेना के वेबसाइट- डब्लू डब्लू डब्लू डॅट जवाईन इंडियन आर्मी डॅाट एनआईसी डॅाट इन म उपलब्ध हे।
ए महोत्सव के उद्देश्य लोगन मन ल अपन रोज के खाना म कोदो, कुटकी अउ रागी जइसन अनाज ल शामिल करे बर प्रेरित करना अउ ए अनाज के पोषक मूल्य के प्रति जागरूकता लाना हे। एखर संगेसंग कोदो, कुटकी अउ रागी के खेती के पर्यावरणीय लाभ के बारे म युवा पीढ़ी ल जागरूक करे बर शैक्षणिक संस्थान डहार ले नुक्कड़ नाटक अउ स्थानीय लोक कलाकार मन डहार ले हरएक दिन संझा के सांस्कृतिक कार्यक्रम के प्रस्तुती घलो दे जाही।
खबर के मुताबिक प्रधानमंत्री किसान सम्मान निधि के तहत देशभर के पात्र हितग्राही किसान मन ल बारा किस्त दे जा चुके हे। ए महीना तेरहवां किस्त के भुगतान करे जाना हे। ए संबंध म केंद्र सरकार ह स्पष्ट करे हे कि किसान सम्मान निधि के अवइया किस्त के भुगतान उही हितग्राही मन करे जाही, जिखंर बैंक खाता म आधार संख्या जोड़े के संगेसंग उंखर जमीन के जानकारी घलो शामिल कर दे गेहे। कृषि विभाग ह प्रदेश के किसान मनले प्रधानमंत्री किसान सम्मान निधि के तहत मदद प्राप्त करे बर अपन बैंक खाता म ए दूनों जानकारी ल जल्दी ले जल्दी दर्ज कराय के आग्रह करे हे।
प्रदेश म प्रधानमंत्री किसान सम्मान निधि के राज्य नोडल अधिकारी अउ कृषि विभाग के अपर संचालक एस.सी. पद्म ह बताइन कि अब तक राज्य म आधार प्रमाणित चौबीस लाख चालीस हजार आठ सौ अठ्यासी किसान मनले इक्कीस लाख ससत्तर हजार नौ सौ इकसठ हितग्राही मनके बैंक खाता म आधार संख्या जुड़ गेहे। उंहे दू लाख बैंसठ हजार आठ सौ इकहत्तर किसान मनके विवरण दर्ज होना बाकी हे।
ए योजना के तहत निर्धारित मापदण्ड के संबंध म अपन स्थिति के जानकारी लेबर हितग्राही किसान अपन क्षेत्रीय ग्रामीण कृषि विस्तार अधिकारी या जिला कृषि कार्यालय म संपर्क कर सकत हे।
बस्तर मतदाता पुरस्कृत
भारत निर्वाचन आयोग डहार ले राखे गे राष्ट्रीय जागरूकता प्रतियोगिता म बस्तर के युवा मन ह अपन विशेष छाप छोड़े हे। पच्चीस जनवरी के राष्ट्रीय मतदाता दिवस म मेरा मत मेरा भविष्य विसय उपर आयोजित प्रतियोगिता म बस्तर के युवा मन ह गीत, वीडियो पोस्टर, नारा लेखन अउ प्रश्नोत्तरी समेत पांच विधा म भाग लीन। एमा बस्तर जिला ले अभय एम. सेमदेकर अउ आशीष सामंत ल नारा लेखन प्रतियोगिता म विशेष उल्लेख के रूप म पुरस्कार दे गीस। कलेक्टर चंदन कुमार ह ए विजेता मन ल दू हजार रूपिया नगद अउ प्रमाण पत्र देके सम्मानित करीन।
ए प्रतियोगिता म भारत ह मेजबान संयुक्त अरब अमीरात ल 5-0 ले हराके क्वार्टर फाइनल म अपन जगा पक्का कर लेहे। एखर बाद अब भारत के अगला मुकाबला मलेशिया के संग होही। एशिया मिक्सड चैंपियनशिप म जगा बनाने वाली आकर्षि कश्यप ह छत्तीसगढ़ के पहिली खिलाड़ी बन गेहे।
महिला हैंडबॉल चैंपियनशिप
जॉर्डन के अम्मान म सात ले चौदा फरवरी तक आयोजित वेस्ट एशियन महिला हैंडबॉल चैंपियनशिप के खिताब म भारतीय टीम ह जीत लेहे। विजेता भारतीय टीम म दक्षिण पूर्व मध्य रेलवे बिलासपुर जोन के तीन महिला खिलाड़ी घलो शामिल रीहिन। रायपुर रेलमंडल के हैंडबाल खिला़ड़ी निकी, काजल अउ मीनू ह सुघ्घर प्रदर्शन करत भारतीय टीम के जीत म अपन योगदान दीन।