छत्तीसगढ़ विधानसभा के बजट सत्र एक मार्च ले सुरू होके चौबीस मार्च तक चलही। ए सत्र के बेरा चौदह बइठका होही। ए संबंध म अधिसूचना जारी कर दे गेहे। बजट सत्र के सुरूवात राज्यपाल अनुसुईया उइके के अभिभाषण ले होही। सत्र के बेरा वित्तीय काम के संगेसंग आने सरकारी कामकाज करे जाही।
हाईकोर्ट-आरक्षण
प्रदेस म आरक्षण मामला ल लेके छत्तीसगढ़ उच्च न्यायालय म दाखिल याचिका म आज सुनवाई होईस। ए मामला म न्यायमूर्ति रजनी दुबे ह राज्यपाल सचिवालय ल नोटिस जारी करके हफ्ताभर के भीतरी जुवाब मांगे हे।
खबर के मुताबिक राज्य सरकार ह दू महीना पहिली विधानसभा के बिसेस सत्र म आरक्षण ल बढ़ा दे रिहीस। एखर बाद ए विधेयक ल राज्यपाल अनुसुईया उइके तीर मंजूरी बर भेजे गे रिहीस। राज्यपाल ह आरक्षण संबंधी विधेयक ल अभी तक मंजूरी नइ देहे। एडवोकेट हिमांक सलूजा अउ राज्य सासन कोति ले हाईकोर्ट म याचिका दायर करे गीस। एमा केहे गेहे कि राज्यपाल ल विधानसभा म पारित कोनों भी विधेयक ल रोके के अधिकार नइ हे।
चिटफंड कंपनी-रकम वापसी
मुख्यमंत्री भूपेश बघेल ह आज रईपुर म अपन निवास कार्यालय म राखे गे वर्चुअल कारीकरम म चिटफंड कंपनी म पइसा लगइया दुरूग जिला के तीन हजार ले जादा झन ल करीबन दू करोड़ छप्पन लाख रूपिया के रकम लहुटा दीन। ए बेरा म मुख्यमंत्री ह किहीन कि प्रदेस म करीबन चालीस करोड़ रूपिया के रकम निवेसक मन ल लहुटाय गेहे। ओमन किहीन कि ठगी करइया चिटफंड कंपनी चलइया मनके संपत्ति कुर्क करके निवेसक मन ल पइसा लहुटाय जावत हे।
वर्चुअल कारीकरम म दुरूग जिला के पुलिस अधीक्षक अभिषेक पल्लव ह बतईन कि जिला म अभी तक चिटफंड कंपनी के एक सौ छब्बीस संचालक अउ आठ पदाधिकारी ल गिरफ्तार करे गेहे।
गोधन न्याय योजना-राशि अंतरण
मुख्यमंत्री भूपेश बघेल ह किहीन हे कि उद्योग नीति असन जल्दीच प्रदेस म ग्रामीण उद्योग नीति बनाय के काम सुरू करे जाही। श्री बघेल ह आज रईपुर म राखे गे कारीकरम म गोधन न्याय योजना म पशुपालक, गांव के लोगन, गौठान ले जुड़े महिला समूह अउ गौठान समिति ल आठ करोड़ तेईस लाख रूपिया के रकम ऑनलाइन जारी करीन। कारीकरम म मुख्यमंत्री ह गोबर ले पेंट बनाय के इकाई की समीक्षा करत किहीन कि प्रदेस के इक्कीस जिला म पेंट बनाय के तेईस ठिन इकाई के काम चलत हे। उहें, तेरह इकाई पूरा होगे हे।
भाजपा-बैठक
भारतीय जनता पार्टी कोर गु्रप अउ लोकसभा टोली के बइठका आज प्रदेस भाजपा कार्यालय कुशाभाऊ ठाकरे परिसर म होवत हे। बइठका म प्रदेस भाजपा अध्यक्ष अरूण साव, प्रदेस प्रभारी ओम माथुर, राष्ट्रीय सह-संगठन महामंत्री शिवप्रकाश, क्षेत्रीय संगठन महामंत्री अजय जामवाल अउ प्रदेस सह-प्रभारी नितिन नबीन मौजूद हे।
मुख्यमंत्री-बजट समीक्षा
मुख्यमंत्री भूपेश बघेल ह आज रईपुर म अपन विभाग संग कैबिनेट मंत्री रविन्द्र चौबे, मोहम्मद अकबर अउ कवासी लखमा ले जुड़े विभाग के बजट तैयारी के समीक्षा करीन। बइठका म ऊर्जा विभाग, सामान्य प्रसासन, वित्त, जनसंपर्क, परिवहन, आवास अउ पर्यावरण, कृषि, पशुपालन, पंचायत अउ ग्रामीण विकास समेत एखर ले जुड़े विभाग के बजट अनुमान उपर गोठबात करे गीस।
रेलवे-ई-केटरिंग सेवा
भारतीय रेलवे ह सेवा ल ज्यादा सुभीता के बनाय बर यात्री मन बर ई-केटरिंग सेवा ले भोजन मंगाय खातिर वाट्स सेवा सुरू करे हे। एखर बर रेलवे के वाट्स ऐप नंबर नौ एक आठ सात पांच शून्य शून्य शून्य एक तीन दो तीन के उपयोग कर सकत हे। सुरू म वाट्एअप ले ई खान-पान सेवा दू चरण म मिलही। वाट्सऐप नंबर लिंक म क्लिक करके ई-केटरिंग सेवा ल चुने बर ई-टिकट बुक करइया मन एखर फायदा उठा सकत हे।
निकलर-ऐप
प्रदेस के स्कूल मन म निकलर ऐप ले पढ़ाई कराय बर स्कूल सिक्षा विभाग ल उत्कृष्टता पुरस्कार बर चुने गेहे। ए इनाम छत्तीसगढ़ ल पच्चीस मार्च के नई दिल्ली के नेताजी सुभाष प्रौद्योगिकी विश्वविद्यालय म राखे गे ई-गनर्वेंस कारीकरम म दे जाही। एखर बर मुख्यमंत्री भूपेश बघेल अउ स्कूल सिक्षा मंत्री डॉक्टर प्रेमसाय सिंह टेकाम ह स्कूल सिक्षा विभाग के पूरा टीम ल बधाई दीन हे।
खबर के मुताबिक स्कूल सिक्षा विभाग अउ एनआईसी ह स्कूल के जांच संबंधी काम ल सरल बनाय बर निकलर ऐप बनाय हे। एमा लइका मन ल खेल-खेल म पढ़ई कराय जात हे अउ ओखर जांच घलो कराय जाथे।
सहायक शिक्षक वेतन-विसंगति
छत्तीसगढ़ सहायक सिक्षक अउ समग्र सिक्षक फेडरेशन के पदाधिकारी मन ह लोक शिक्षण संचालक सुनील कुमार जैन ले भेंट करके ओखर तीर ले सहायक शिक्षक के वेतन म विसंगति ल दूरिहा करे के मांग करीन हे। ए बेरा म श्री जैन ह किहीन कि राज्य सरकार कोति ले सिक्षक मनके समस्या ल जल्दी सुलझाय जाही। ओमन सिक्षक मन ले किहीन कि पढ़ईया लइका मनके हित ल ध्यान म राखत हड़ताल म झन जावय।
हाथी-विचरण
जांजगीर-चांपा जिला के पोड़ीदलहा गांव के जंगल म पाछु तीन दिन ले तेरह ठिन हाथी के दिन किंचरत हे। एखर ले गांव के लोगन दहसत म हवय। काली पकरिया गांव म हाथी ले बाचे के परयास करत एक मनखे गिरके घायल होगे, जेखर इलाज के बेरा मउत होगे। वन विभाग के टीम हाथी के दल उपर नजर राखे हे अउ लोगन मन ल सतर्क रेहे बर गांव म मुनादी करा देहे।
दुर्घटना
कबीरधाम जिला के गांव मन्नाबेदी तीर एक चौपहिया गाड़ी अनते-तनते होके पलट गे। एमा एक मनखे के मउत होगे अउ एक आने मनखे गंभीर रूप ले घायल होगे।
ओति, जांजगीर-चांपा जिला के लोहर्सी गांव म अज्ञात वाहन के ठोकर ले फटफटी सवार एक मनखे के मउत होगे।
वंदे भारत-ट्रेन पथराव
नागपुर ले बिलासपुर जावत वंदे भारत एक्सप्रेस म दाधापारा स्टेसन तीर काली कुछेक लोगन मन ह पत्थरबाजी करीन। ए घटना म ट्रेन के सीट नंबर-बीस के सीसा टूट गे। ए मामला म रेलवे पुलिस ह जुर्म दर्ज करके तीन झिन संदेही मन ल हिरासत म लेहे अउ पूछताछ करत हे।
माघी पुन्नी मेला
महानदी, पैरी अउ सोंढूर के त्रिवेणी संगम म राजिम माघी पुन्नी मेला सुरू होगे हे। मुख्यमंत्री भूपेश बघेल ह काली ए मेला के सुभारंभ करीन। ए बेरा म मुख्यमंत्री ह किहीन कि राज्य सरकार प्रदेस के संस्कृति के संरक्षण अउ बढ़वार बर सरलग काम करत हे। श्री बघेल ह किहीन कि राजिम माघी पुन्नी मेला हम सबो के आस्था के प्रतीक हे। ए मेला म छत्तीसगढ़ के धार्मिक परंपरा के संगेसंग लोक संस्कृति के घलो दर्सन होथे। मुख्यमंत्री ह महानदी म महाआरती कार्यक्रम म सामिल होईन। उहें, धर्मस्व मंत्री ताम्रध्वज साहू ह किहीन कि अवइया बछर ले राजिम पुन्नी मेला नवा मैदान म लगही। ए मैदान म साढ़े तीन किलोमीटर तक रद्दा बनाय जाही, जेखर बर इकचालीस करोड़ रूपिया के रकम मंजूर करे गेहे।
जांजगीर-चांपा जिला के शिवरीनारायण म घलो माघी पुन्नी मेला के मउका म महानदी के तट म गंगा आरती करे गीस, जेमा गौसेवा आयोग के अध्यक्ष महंत रामसुंदर दास बिसेस रूप ले संघरीन। इहां पांच दिवसीय शिवरीनारायण महोत्सव के आयोजन घलो होवत हे। हरेक दिन संझा लोक कलाकार मन ह सुघ्घर प्रस्तुति देवत हे।
शराब व्यसन मुक्ति अभियान
लोगन ल नसा करे ले रोके अउ ओखर गलत परभाव बर जागरूक करे खातिर प्रदेस म दू हजार छह सौ छब्बीस भारतमाता वाहिनी बनाय गेहे। एमा महिला स्व-सहायता समूह ल सामिल करे गेहे। ए वाहिनी ले समाज कल्याण विभाग कोति ले गांव अउ सहरी क्षेत्र म व्यापक अभियान चलाय जाही। विभाग कोति ले हर तीन महीना म गठित वाहिनी के काम के समीक्षा करे जाही। उहें, जिला कार्यालय कोति ले एक तय बेरा म काम अउ कारीकरम चलाय संबंधी पालन प्रतिवेदन प्रस्तुत करे जाही। नशा मुक्ति अभियान म रैली, दीवार लेखन, नुक्कड़ नाटक अउ प्रभात फेरी जइसन कारीकरम होही।