रेलवे देशभर म दू हजार रेलवे स्टेसन म दुकान खोलही, जेमा जरूरत के जिनीस मिलही। रेलमंत्री अश्वनी वैष्णव ह आज नई दिल्ली म किहीन कि यात्री मन ए दुकान म साबुन, पेस्ट, टाबेल-नेपकिन जइसन जिनीस बिसा सकही। ए दुकान हफ्ता के सबो दिन चौबीसों घंटा खुल्ला रइही। यात्री सुरक्षा के संबंध म रेलमंत्री ह किहीन कि अवइया तीन बछर म सबो मेल अउ एक्सप्रेस गाड़ी म अभी लगे डिब्बा के जघा म एल.एच.बी. कोच लगाय जाही।
लिडार तकनीक-सर्वे
प्रदेश के सबो राजस्व गांव म आधुनिक लिडार तकनीक ले फेर से सर्वें करे जाही। मुख्य सचिव अमिताभ जैन के अगुवई म काली मंत्रालय म राखे गे बइठका म राजस्व विभाग के अधिकारी मन ह राजस्व ग्राम के फेर ले सर्वें बर लिडार समेत आने-आने तकनीक के संबंध म बतईन, जेखर बाद लिडार तकनीक म मंजूरी बनीस। बइठका म वन विभाग के प्रमुख सचिव मनोज कुमार पिंगुआ ह बतईन कि राज्य म वन अउ वन्यजीव संरक्षण प्रबंधन अउ नरवा विकास म भू-जल संरक्षण काम बर आधुनिक लिडार तकनीक ले सर्वें कराय जाही।
मुख्यमंत्री-किसान सम्मेलन
मुख्यमंत्री भूपेश बघेल ह काली राजनांदगांव जिला के भर्रे गांव म किसान अन्नदाता सम्मेलन म पैरादान करइया किसान मन ल सम्मानित करीन। मुख्यमंत्री ह किहीन कि प्रदेस के किसान मन ह पन्द्रह लाख कुंटल ले जादा पैरा गौठान म दान करीन हे। ए क्षेत्र के बारह हजार ले जादा किसान मन घलो गौठान म करीबन छियानवे हजार कुंटल पैरादान करके सुघ्घर काम करीन हे। एखर ले मवेसी मन ल चारा के बेवस्था हो सकही। ए दउरान ओमन एसो समर्थन कीमत म धान बिसाय के काम म बने काम करइया समिति प्रबंधक मन ल सम्मानित करीन।
ओवरब्रिज/अंडरब्रिज-लोकार्पण
लोक निर्माण मंत्री ताम्रध्वज साहू ह आज रईपुर रेलवे स्टेसन तीर पांच सौ छब्बीस मीटर लंबा तेलघानी-रेलवे ओवर ब्रिज अउ उरकुरा-सरोना बाईपास रेललाइन म चार सौ सात मीटर लंबा गोगांव रेलवे अंडरब्रिज के लोकार्पण करीन। ए मउका म श्री साहू ह किहीन कि ए दूनों ब्रिज के बने ले सहर के एक कोंटा ह दूसर कोंटा ले जुड़ गेहे।
ओमन बतईन कि लोगन के सुरक्षा खातिर जुन्ना तेलघानी ओवरब्रिज ले भारी वाहन के अवई-जवई ल बंद कर दे गेहे। अब ए पुल ले सिरिफ दुपहिया अउ चौपहिया गाड़ी निकल सकही।
वन मंत्री-वेटलैण्ड
वन अउ जलवायु परिवर्तन मंत्री मोहम्मद अकबर ह प्रदेस म वेटलैण्ड ल चिन्हा करके ओखर विकास बर काम करे बर किहीन हे। ए बात श्री अकबर ह काली रईपुर म विश्व आर्द्र भूमि दिवस म राखे गे कारीकरम म किहीन। ओमन किहीन कि आर्द्र भूमि ल पारिस्थिकीय अउ स्वास्थ्य पर्यावरण बर बने माने जाथे। श्री अकबर ह किहीन कि राज्य म सर्वें के बाद वेटलैण्ड के सूची बनाय अउ महत्ता के वेटलैण्ड ल रामसर स्थल के रूप म घोषित करे के पहल करे जाय।
मुख्यमंत्री-अजय मंडावी
मुख्यमंत्री भूपेश बघेल ले काली रईपुर म पद्मश्री सम्मान बर चुने गे काष्ठशिल्प कलाकार अजय मंडावी ह भेंट करीन। श्री बघेल ह श्री मंडावी ल देस के ए प्रतिष्ठित पुरस्कार बर बधाई अउ सुभकामना दीन। मुख्यमंत्री ह किहीन कि काष्ठ कलाकार श्री मंडावी सिरिफ कांकेर जिला के नइ, भलूक छत्तीसगढ़ के गौरव हे। ओमन किहीन कि आदिवासी समुदाय के ए कलाकार के सुघ्घर कला अउ शिल्प ले प्रदेस ल नवा चिन्हारी मिले हे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत केन्द्रीय वित्तमंत्री निर्मला सीतारमण कोति ले पाछु एक फरवरी के संसद म पेस करे गे आम बजट उपर केन्द्रित रइही। एमा जाने-माने अर्थशास्त्री प्रोफेसर आर.के. ब्रम्हे ले लेगे भेंटवार्ता प्रसारित करे जाही। एखर प्रसारण आकाशवाणी के रईपुर केन्द्र डहार ले काली चार फरवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
हाथी हमला-मौत
सक्ती जिला के ग्राम कारीभांवर म हाथी के हमला म घायल गांव के एक मनखे के इलाज के बेरा मउत होगे। खबर के मुताबिक ए मनखे अपन खेत म बूता करत रिहीस हे, इही बेरा हाथी के दल उहां पहुंच के अउ हमला कर दीस। हाथी के हमला म घायल मनखे ल जांजगीर के जिला अस्पताल म भर्ती कराय गे रिहीस, जिहां इलाज के बेरा ओखर मउत होगे।
बताय जात हे कि जैजेपुर क्षेत्र के दतौद गांव म अभी करीबन दस हाथी के दल किंजरत हे। वन विभाग के टीम गांव के मनखे मन संग मिलके हाथी के दल ल खदेड़े म जुटे हे।
दवाई-जब्त
खाद्य अउ औषधि प्रसासन विभाग ह रईपुर म आयुर्वेदिक दवई के नाव म मिलावट वाले दवई बनाय अउ बेचे के अवैध कारोबार के खुलासा करत कार्रवाई करे हे। जब्त करे गे करोड़ों रूपिया के ए कथित दवई के जांच म एलोपैथी, डायक्लोफेनिक अउ अक्सलोफेनिक के मात्रा पाय गीस।
भाजपा-आरोप
भारतीय जनता पार्टी के रईपुर जिला अध्यक्ष जयंती पटेल ह रईपुर महापौर एजाज ढेबर कोति ले धरनास्थल हटाय बर कलेक्टर ले करे गे भेंट ल राजनीतिक नौटंकी बतईन हे। ओमन किहीन कि आम नागरिक आंदोलन के सेती नइ, भलूक प्रदेस सरकार के काम के सेती हलाकान हे। जिला अध्यक्ष ह आरोप लगईन कि जब इही जनता सप्रे स्कूल ले दानी स्कूल होवत पुलिस लाईन के पाछु तक जवइया रद्दा ल बंद करे के विरोध करत रिहीस, त महापौर ह खुदे भ्रष्टाचार करे बर अपन मनमानी करीन। श्री पटेल ह आरोप लगईन कि विश्वविद्यालय के तीर-तखार के शैक्षणिक क्षेत्र म महापौर अपन लोगन ल बसाय बर चौपाटी खुलवात हे। सहर के कतकोन जघा म अतिक्रमण के सेती जनता हलाकान हे। ओमन मांग करीन कि सहर के भीतरी सही जगह देख के धरनास्थल बदले जाय।
ओति, राजनांदगांव के सड़क चिरचारी गांव म जर्जर रद्दा ल नवा बनाय के मांग ल लेके भाजपा कार्यकर्ता मन ह चक्काजाम करीन, जेखर सेती कुछेक बेर बर यातायात प्रभावित होईस। खुज्जी विधानसभा के ग्राम सड़क चिरचारी ले लेके जोब तक के रद्दा के हालत खराब हे, जेला नवा बनाय के मांग करत गांव के लोगन मन अरजी देहे, फेर अभी तक ओ ह बने नइ हे।
माघी पुन्नी मेला
जांजगीर-चांपा जिला के शिवरीनारायण म काली चार फरवरी ले माघी पुन्नी मेला सुरू होही। पांच फरवरी के बिहनिया महानदी के त्रिवेदी संगम म श्रद्धालु पुण्य स्नान करही। ए मेला अट्ठारह फरवरी तक चलही। ए मउका म शिवरीनारायण म राज्य सासन कोति ले काली ले ही पांच दिवसीय शिवरीनारायण महोत्सव के आयोजन करे जाही, जेखर शुभारंभ काली विधानसभा अध्यक्ष डॉक्टर चरणदास महंत करही। ए दउरान संझाकुन कतकोन सांस्कृतिक कारीकरम प्रस्तुत करे जाही।
अउ अब थोरकुन समाचार सार म-
– राज्य सरकार ह पूर्व मुख्य सचिव अउ रेरा के पूर्व चेयरमैन विवेका ढांड ल छत्तीसगढ़ राज्य नवाचार आयोग के अध्यक्ष बनाय हे।
– एनटीपीसी कोरबा के मुख्य महाप्रबंधक बी.राम. चन्द्रराव ह परियोजना प्रमुख के रूप म कोरबा सुपर थर्मल पावर स्टेसन के काम संभाल लेहे।
– इंदिरा गांधी राष्ट्रीय मुक्त विश्वविद्यालय इग्नू म स्नातक, स्नातकोत्तर, पीजी डिप्लोमा समेत आने-आने पाठ्यक्रम प्रवेस बर ऑनलाइन पंजीयन के तारीख दस फरवरी तक बढ़ा दे गेहे।
अउ
– बिलासपुर जिला के सिविल लाइन पुलिस ह चरस तस्करी के मामला म एक मनखे ल उसलापुर ले गिरफ्तार करके ओखर तीर ले पन्द्रह ग्राम चरस बरामद करे हे। पुलिस के मुताबिक मेरठ के रहवइया ए मनखे कुछ दिन ले बिलासपुर के उसलापुर म किराया के मकान म रइही के चरस के तस्करी करत रिहीस।