प्रधानमंत्री ह ए बात म गरब व्यक्त करत किहीन कि संयुक्त राष्ट्र ह अंतर्राष्ट्रीय योग दिवस अउ अंतर्राष्ट्रीय मोटा अनाज वर्ष मनाय के भारत के प्रस्ताव म सकारात्मक निर्णय लेहे। ओमन किहीन कि योग अउ मोटा अनाज दूनों स्वास्थ्य ले जुड़े हे। प्रधानमंत्री ह खुसी जाहिर करत किहीन कि अब लोगन मन मोटा अनाज ल अपन भोजन म सामिल करत हे। श्री मोदी ह किहीन कि एखर ले पारंपरिक रूप ले मोटा अनाज उगइया छोटे किसान मन उपर सकारात्मक प्रभाव पड़त हे।
‘‘मन की बात‘‘ कारीकरम म श्री मोदी ह छत्तीसगढ़ के रायगढ़ जिला के मिलेट्स कैफे के घलो जिकर करीन। ओमन किहीन कि कुछेक महीना पहिली सुरू होय ए मिलेट्स कैफे म चीला, डोसा, मोमोस, पिज्जा अउ मंचूरियन जइसन व्यंजन ल बहुत पंसद करे जावत हे। श्री मोदी ह श्रोता मन ले किहीन कि जब भी छत्तीसगढ़ के रायगढ़ जाय के मउका मिलही, त मिलेट कैफे जाके उहां के व्यंजन के आनंद जरूर उठावयं।
प्रधानमंत्री ह प्राकृतिक खेती ले जुड़े छत्तीसगढ़ के बिलासपुर जिला के किसान संदीप शर्मा के घलो जिकर करीन, जिखर एफपीओ ले आज बारह राज्य के किसान मन जुड़े हे। बिलासपुर के ए एफपीओ म आठ प्रकार के मिलेट्स के आटा अउ उंखर व्यंजन बनाय जाथे।
प्रधानमंत्री ह जी-ट्वेंटी ले जुड़े आयोजन म मोटा अनाज ले तैयार करे गे स्वादिष्ट भोजन परोसे म खुसी जताय हे।
मुख्यमंत्री-राजस्व प्रकरण
मुख्यमंत्री भूपेश बघेल ह प्रदेस म राजस्व प्रकरण के निराकरण म देरी होय म नाराजगी जताय हे। ओमन किहीन कि अगर राजस्व प्रकरण के निराकरण म बिना कारण विलंब होही, त एखर बर कलेक्टर मन उपर कार्रवाई करे जाही। मुख्यमंत्री ह कलेक्टर मन ल जारी निरदेस म किहीन कि ओमन फरवरी के आखिरी हफ्ता म राजस्व प्रकरण के समीक्षा करय। एखर तहत नामांतरण, सीमांकन अउ डायवर्सन जइसे आने-आने राजस्व प्रकरण के समीक्षा करे जाही।
अग्निवीर
छत्तीसगढ़ म अग्निवीर भर्ती के लिखित परीक्षा के परिणाम घोसित कर दे गेहे। परीक्षा म सामिल एक हजार तीन सौ सड़सठ अभ्यर्थी म चार सौ तैंतीस अभ्यर्थी मनके चयन जीडी, अग्निवीर तकनीकी, अग्निवीर क्लर्क अउ अग्निवीर ट्रेड्समैन बर करे गेहे। परीक्षा परिणाम ज्वाईन इंडियन आर्मी के वेबसाइट म उपलब्ध हवय। एखर अलावा सेना भर्ती कार्यालय, रईपुर के नोटिस बोर्ड म घलो चस्पा करे गेहे।
जम्मों चयनित अभ्यर्थी मन ल सुरूवाती जानकारी बर इकतीस जनवरी के बिहनिया साढ़े आठ बजे सेना भर्ती कार्यालय, रईपुर म उपस्थित होना जरूरी हे। ए अभ्यर्थी मनके प्रसिक्षण एक मार्च ले अलग-अलग ट्रेनिंग सेंटर म सुरू होही।
पीएससी-दिव्यांग छात्र
छत्तीसगढ़ लोक सेवा आयोग के प्रारंभिक परीक्षा बारह फरवरी के आयोजित होही। ए परीक्षा प्रदेस के अट्ठाईस जिला म आयोजित करे जाही। परीक्षा म सामिल होवइया दिव्यांग परीक्षार्थी मन ल संग म लेखक लाय के सुविधा दे गेहे। एखर बर एक हफ्ता पहिली संबंधित कलेक्टर कार्यालय म आवेदन दे बर पड़ही।
कोदो-कुटकी खरीदी
प्रदेस म समर्थन मूल्य म अब तक अट्ठारह हजार क्विंटल ले जादा के कोदो-कुटकी अउ रागी के खरीदी करे जा चुके हे। आधिकारिक जानकारी के अनुसार कोदो के खरीदी तीस रूपिया प्रति किलो, कुटकी के खरीदी इकतीस रूपिया अउ रागी के खरीदी पैंतीस रूपिया अठहत्तर पइसा प्रतिकिलो के दर ले करे जात हे।
बतादन कि समर्थन मूल्य म कोदो-कुटकी अउ रागी फसल के खरीदी अवइया फरवरी तक करे जाही।
भाजपा-बैठक
भारतीय जनता पार्टी के क्षेत्रीय संगठन मंत्री अजय जामवाल ह किहीन कि गलत शिक्षा पद्धति ले भारत के संस्कृति के संग विचारधारा घलो दूषित होय हे। एला सुधारे बर भारतीय जनता पार्टी ल केन्द्र म लंबा पारी के आवश्यकता हे। ओमन मुंगेली म विधानसभा स्तरीय बैठक म कार्यकर्ता मन ल संबोधित करत किहीन कि हमर देस अउ इहां के दूषित करे गे संस्कृति अउ विचारधारा ल आगू आ के सुधारे ल पड़ही। श्री जामवाल ह कार्यकर्ता मन ल संगठनात्मक गतिविधि के जानकारी लेके बूथ जीते के टिप्स दीन।
युवा महोत्सव
राजधानी रईपुर के साईंस कालेज मैदान म ए बेरा तीन दिवसीय राज्य स्तरीय युवा महोत्सव के आयोजन करे जात हे। महोत्सव के दूसरा दिन आज लोक नृत्य के मनमोहक प्रस्तुति देखे ल मिलीस। युवा कलाकार मन पारंपरिक वेसभूषा म सुआ, कर्मा, ददरिया अउ पंथी नृत्य के सानदार प्रस्तुति दीन। एखर अलावा फुगड़ी अउ भौरा स्पर्धा के घलो आयोजन करे गीस। सुआ नृत्य म पन्द्रह ले चालीस आयु वर्ग म खैरागढ़-छुईखदान-गंडई जिला पहला स्थान प्राप्त करीस। उहें, बलौदाबाजार ह दूसरा अउ सूरजपुर जिला ह तीसरा स्थान प्राप्त करीस। अइसने, चालीस ले जादा आयु वर्ग म धमतरी ह पहला, कोंडागांव ह दूसरा अउ बेमेतरा जिला ह तीसरा स्थान हासिल करीस।
उहें, पंथी नृत्य म पन्द्रह ले चालीस आयु वर्ग म कोंडागांव ह अउ चालीस वर्ष ले जादा आयु वर्ग म बेमेतरा जिला ह पहला स्थान प्राप्त करीन।
राष्ट्रपिता-कार्यक्रम
राष्ट्रपिता महात्मा गांधी के सहादत के पचहत्तर साल पूरा होय म देसभर म कार्यक्रम आयोजित करे जावत हे। ए बेरा रईपुर म काली दीनदयाल उपाध्याय सभागार म चर्चा, संवाद अउ गांधी भजन के संगेसंग पोस्टर अउ चित्र प्रदर्शनी लगाय जाही। ए आयोजन प्रेम, करूणा अउ विवेक के अविस्मरणीय नायक महात्मा गांधी के अनमोल विरासत ल सहेजे अउ आगू बढ़ाय के प्रयास हरय।
एनएसएस शिविर
राज्य स्तरीय राष्ट्रीय सेवा योजना के सिविर ए दिन भिलाई के कृष्णा कालेज म आयोजित करे जावत हे। अट्ठाईस जनवरी ले सुरू होय ए सात दिवसीय सिविर म नौ विश्वविद्यालय के दू सौ ले जादा एनएसएस, स्वयंसेवक अउ पचास ले जादा एनएसएस अधिकारी सामिल होवत हे। सिविर म स्वच्छता अभियान, श्रमदान, जागरूकता रैली, बौद्धिक चर्चा अउ सांस्कृतिक गतिविधि के आयोजन करे जावत हे।
जूडो प्रतियोगिता
भिलाई म बाईसवां राज्य स्तरीय सब जूनियर जूडो प्रतियोगिता के आयोजन करे गीस। दू दिवसीय ए प्रतियोगिता म प्रदेस के चौदह जिला ले एक सौ अड़तालीस बालक अउ बालिका जूडो खिलाड़ी मन भाग लीन। प्रतियोगिता म पहला स्थान प्राप्त करइया अड़तीस खिलाड़ी सत्रह ले बाईस फरवरी तक आयोजित राष्ट्रीय सब जूनियर अउ कैडेट बालक-बालिका जूडो प्रतियोगिता म भाग लीहीं।
ट्रेन-पत्थरबाजी
ट्रेन म पत्थरबाजी करइया मन उपर अब कड़ा कार्रवाई करे जाही। एखर बर रेलवे सुरक्षा बल-आरपीएफ डहार ले अभियान चलाय जावत हे। एखर तहत पटरी के तीर-तखार रहइया लोगन मन ल जागरूक करे जावत हे। संगेसंग पत्थरबाजी करइया असमाजिक तत्व मनके खिलाफ कार्रवाई करे जावत हे। ए मामला म अब तक अट्ठारह आरोपी मन ल गिरफ्तार करे गेहे।