प्रधानमंत्री राष्ट्रीय बाल पुरस्कार
राष्ट्रपति द्रौपदी मुर्मू ह काली नई दिल्ली म एक समारोह म ग्यारह झन लइका मन ल प्रधानमंत्री राष्ट्रीय बाल पुरस्कार प्रदान करही। प्रधानमंत्री नरेन्द्र मोदी ह परन दिन चौबीस जनवरी के ए पुरस्कार विजेता मन ले गोठबात करही।
सुनइया मन ल बतादन कि ए पुरस्कार पांच बछर ले अट्ठारह बछर के लइका मन ल छै श्रेणी म उत्कृष्ट प्रदर्शन बर दे जाथे। ए श्रेणी म कला अउ संस्कृति, बहादुरी, नवाचार, शैक्षिक, सामाजिक सेवा अउ खेल सामिल हवय। हरेक विजेता ल एक पदक, एक लाख रूपिया के नगद राशि अउ एक प्रमाण पत्र प्रदान करे जाही।
परीक्षा पे चर्चा
प्रधानमंत्री नरेंद्र मोदी ह विद्यार्थी, शिक्षक अउ अभिभावक मनले परीक्षा पे चर्चा कार्यक्रम म भाग लेके आग्रह करे हे। परीक्षा पे चर्चा के छठवां संस्करण सत्ताईस जनवरी के नई दिल्ली के तालकटोरा इंडोर स्टेडियम म राखे जाही। श्री मोदी ह कीहिन कि ये कार्यक्रम परीक्षा ल तनावमुक्त बनाय बर अउ विद्यार्थी मनके मदद करे के तरीका उपर चर्चा करे के मउका देथे।
भेंट-मुलाकात
मुख्यमंत्री भूपेश बघेल ह अपन भेंट-मुलाकात कारीकरम म आज रईपुर जिला के धरसींवा विधानसभा क्षेत्र के गांव माठ पहुंचीन, जिहां ओमन ह लोगन मन ले गोठबात करत हुए उंखर समस्या सुनीन अउ योजना मनके क्रियान्वयन के जानकारी लीन।
ए मउका म मुख्यमंत्री ह ग्राम पंचातय गनियारी म स्वामी आत्मानंद अंग्रेजी माध्यम स्कूल अउ ग्राम पंचायत मड़ही अउ जाराकुम्हारी म प्राथमिक स्वास्थ्य केन्द्र खोले के घोसना करीन। उहें, सारागांव म जिला सहकारी बैंक के साखा खोले, प्राथमिक स्वास्थ्य केन्द्र सिलयारी के नाम स्वर्गीय इंदिरा बनीराम वर्मा अउ आईटीआई के नाम स्वर्गीय गुणवंतीन बाई बघेल के नाम म करे के घोसना करीन। एखरे संगेसंग पेण्ड्रा म वन डॉक्टर खूबचंद बघेल के मूर्ति लगाय के ऐलान घलो करीन।
पराक्रम दिवस-कवि सम्मेलन
पराक्रम दिवस म काली प्रधानमंत्री नरेन्द्र मोदी ह अंडमान अउ निकोबार द्वीप समूह के इक्कीस सबले बड़े द्वीप मनके नामकरण परमवीर चक्र ले सम्मानित सैनिक मनके नाम म करही। केन्द्र सरकार ह नेताजी सुभाषचंद्र बोस के जन्मदिन तेईस जनवरी ल पराक्रम दिवस के रूप म मनाय के घोसना करे हे।
ऐति, छत्तीसगढ़ म प्रदेस भाजपा सांस्कृतिक प्रकोष्ठ कोति ले नेता जी सुभाषचंद्र बोस के जयंती म काली रईपुर म कवि सम्मेलन के आयोजन करे जाही। राजधानी के शहीद स्मारक भवन म होवइया ए कवि सम्मेलन म देस के प्रखर राष्ट्र कवि डॉक्टर हरिओम पवार, जगदीश सोलंकी, पद्मश्री डॉक्टर सुरेन्द्र दुबे, रामानंद त्रिपाठी अउ कवियित्री निशा आनंद ह काव्य पाठ करही।
मन की बात
प्रधानमंत्री नरेन्द्र मोदी उनतीस जनवरी के बिहनिया ग्यारा बजे आकाशवाणी के ‘‘मन की बात‘‘ कारीकरम म देस-बिदेस के लोगन मन संग अपन विचार साझा करही। प्रधानमंत्री ह ए कारीकरम म चरचा होवइया बिसय म लोगन मन ले उंखर विचार साझा करे बर केहे हे।
नमो ऐप या माई जीओवी ओपर फोरम म लोगन मन अपन सुझाव साझा कर सकथे। टोल फ्री नंबर – एक आठ शून्य शून्य – एक-एक सात आठ शून्य शून्य के माध्यम ले अपन संदेस हिन्दी या अंग्रेजी म रिकॉर्ड करा सकथे। ए फोन लाइन ह सत्ताईस जनवरी तक खुला रइही। लोगन मन एक नौ दू दू म मिस्ड कॉल देके प्राप्त एसएमएस लिंक के जरिए सीधा प्रधानमंत्री ल अपन सुझाव भेज सकत हे।
राज्यपाल-मुलाकात
राज्यपाल अनुसुईया उइके ले आज राजभवन म प्रगतिशील छत्तीसगढ़ सतनाम समाज अउ गर्वंमेंट एम्लाइज वेलफेयर एसोसिएशन के संयुक्त प्रतिनिधिमंडल ह भेंट करीन। प्रतिनिधिमंडल ह राज्यपाल ल बतईन कि राज्य सरकार ह कई ठिन विभाग म बिना रोस्टर नियम के पदोन्नति करत हे। ओमन किहीन कि आरक्षण नियम के पालन नइ करे ले अनुसूचित जाति अउ जनजाति विद्यार्थी मनके हित प्रभावित होवत हे। एमा राज्यपाल ह किहीन कि ए बारे म विधि-सम्मत काम करही।
भाजपा-जनजाति अधिकारी रैली
केन्द्रीय कोयला अउ उद्योग राज्यमंत्री फग्गन सिंह कुलस्ते ह किहीन हे कि छत्तीसगढ़ के राज्य सरकार ह जनजाति समाज के हक छीनत हे। ओमन किहीन कि जनजाति मनके संस्कृति ल मिटाय बर राज्य सरकार ह धर्मांतरण ल संरक्षण अउ बढ़ावा देवत हे। श्री कुलस्ते ह काली अंबिकापुर म भाजपा के जनजाति अधिकार रैली ल संबोधित करत रिहीन। ओमन ह कहिन कि पाछु चार बछर के कार्यकाल म राज्य के कांग्रेस सरकार ह आदिवासी मन बर कोनों याद करे लायक काम नइ करे हे। श्री कुलस्ते ह किहीन कि आदिवासी मनके अधिकार बर चलत आंदोलन ल अउ तेज करे के जरूरत हे। ओमन किहीन कि पाछु पन्द्रह बछर के भाजपा कार्यकाल म जनजाति वर्ग के विकास बर सुघ्घर काम होय रिहीस। एमा आदिवासी बहुल क्षेत्र ल मुख्य सड़क ले जोड़े के काम ह तेज होय रिहीस। उहें, प्रधानमंत्री नरेन्द्र मोदी ह आजादी के अमृत महोत्सव म भगवान बिरसा मुंडा के जनमदिन ल आदिवासी गौरव दिवस के रूप म मनाय के ऐतिहासिक निर्णय लेहे, जेखर ले जनजाति समाज ह गौरवन्वित होय हे।
रैली ल भाजपा के राष्ट्रीय उपाध्यक्ष डॉक्टर रमन सिंह, केन्द्रीय राज्यमंत्री रेणुका सिंह अउ प्रदेस भाजपा अध्यक्ष अरूण साव ह घलो संबोधित करीन।
राजभाषा सम्मेलन
जगदलपुर म काली संभाग स्तरीय छत्तीसगढ़ राजभाषा सम्मेलन, साहित्य सम्मान समारोह, विचार गोष्ठी अउ कवि सम्मेलन के आयोजन करे गीस। कारीकरम म बस्तर संभाग के कवि अउ साहित्यकार मन सामिल होईन। कारीकरम म बस्तर के साहित्यकार नरेन्द्र पाढ़ी, सुरेश विश्वकर्मा, जगन्नाथ बघेल अउ अबलेश कुमार के सम्मान करे गीस।
जवान-मौत
जांजगीर-चांपा जिला के ग्राम राहौद निवासी लांस नायक दीपेश यादव के काली सम्मान के संग अंतिम संस्कार करे गीस। जवान ल अंतिम विदाई दे बर सैनिक कल्याण बोर्ड के सदस्य समेत गांव के लोगन मन बड़ संख्या म पहुंचे रिहीन।
सुनइया मन ल बतादन कि पाछु सत्रह जनवरी के जबलपुर म पदस्थ लांस नायक दीपेश यादव के खुदे के रिवाल्वर ले अचानक गोली चले ले मउत होगे रिहीस।
दुर्घटना
प्रदेस म पाछु रतिहा होय दू आने-आने सड़क दुर्घटना म पांच झिन मनखे के मउत होगे।
पुलिस ले मिले जानकारी अनुसार बिलासपुर जिला म पाछु रतिहा होय एक सड़क दुर्घटना के बाद कार म आगी लगे ले ओमा बइठे तीन झन मनखे ह जिंदा जल गे। बताय गेहे कि रतनपुर-पेण्ड्रा मार्ग के लकठा म ग्राम खैरा अउ पोड़ी के बीच रतिहा लगभग एक बजे कार ह अनियंत्रित होके पेड़ म ठोका गे, जेमा सवार मनखे मनके बाहर निकले ले पहिली ही कार म आगी लग गे। एमन तोरवा क्षेत्र के रहइया बताय जावत हे।
ओति, दुरूग जिला के भिलाई-तीन के सिरसा चाउक मेर ट्रक के टक्कर ले मोटर साइकिल सवार दू झिन युवक मनके मउत होगे।
नगर पंचायत अध्यक्ष-एफआईआर
सक्ती जिला के डभरा पुलिस ह थाना चौक मेर मुख्य मार्ग म चक्काजाम करइया नगर पंचायत के पूर्व अध्यक्ष अनिल चन्द्रा समेत आने-आने लोगन के खिलाफ धारा-एक सौ सैंतालीस अउ तीन सौ इकतीस के तहत एफआईआर दर्ज करे हे। जानकारी के मुताबिक पाछु उन्नीस जनवरी के अनिल चंद्रा के अगुवई म सात सूत्रीय मांग ल लेके करे गे चक्काजाम के कारण ए रद्दा म लगभग पांच घंटा ले अवई-जवई ह बाधित रिहीस।
अउ अब थोरकुन समाचार सार म-
– कोरबा जिला म आज बालपुर रेलवे स्टेशन के लकठा म एक मेमू लोकल ट्रेन ह मेंटनेंस ट्रॉली ले टकरा गे। ए हादसा म कोनों हताहत नइ होय हे।
– मुंगेली नगर पालिका उपाध्यक्ष के खिलाफ अविश्वास प्रस्ताव लाय गेहे। एखर बर भाजपा अध्यक्ष अरूण साव ह विजय शर्मा ल पार्टी के पर्यवेक्षक नियुक्त करे हे।
– छत्तीसगढ़ आर.सी.आई. प्रशिक्षित शिक्षक संघ ह अपन तीन सूत्रीय मांग ल लेके राजधानी रईपुर म एक दिन के धरना-प्रदर्शन करे के घोसना करे हे।
अउ
– रायगढ़ पुलिस ह चोरी के बावन मोटर साइकिल अउ एक कार के संग चार झिन आरोपी मन ल गिरफ्तार करे हे। बरामद वाहन मनके कीमत तेईस लाख रूपिया ले जादा बताय जात हे।