रोजगार मेला
युवा मन ल सरकारी नौकरी देवाय के उद्देश्य ले भारत सरकार डहार ले ए बेरा देश के आने आने जगा मन म रोजगार मेला के आयोजन करे जावत हे। ए रोजगार मेला के तीसर चरण के तहत काली बीस जनवरी के रायपुर समेत देश के आने आने जगा मन म रोजगार मेला के आयोजन करे जाही। देश के कतकोन जगा के संग राजधानी के पंडित दीनदयाल उपाध्याय सभागार म होवइया रोजगार मेला म प्रधानमंत्री नरेंद्र मोदी वीडियो कॉन्फ्रेसिंग के माध्यम ले सामिल होही। काली होवइया रोजगार मेला म केंद्रीय मंत्री अउ सांसद डहार ले नवनियुक्त उम्मीदवार मन ल नियुक्ति पत्र दे जाही।
भेंट-मुलाकात
भेंट मुलाकात कार्यक्रम के तहत मुख्यमंत्री भूपेश बघेल अब प्रदेश के आने आने जगा के दउरा करे के संग उंहा के स्थानीय लोगन मनले भेंट करके उंखर मांग अउ परसानी सुनत हे।
ए कार्यक्रम म काली मुख्यमंत्री ह बिलासपुर जिला म तखतपुर विधानसभा क्षेत्र के आने आने गांव के दउरा करीन। खपरी गांव म ओमन ह स्थानीय अधिकारी के संग समीक्षा बइठका म कानून व्यवस्था समेत आने आने मुद्दा मन उपर जानकारी लीन। श्री बघेल ह ग्रामीण क्षेत्र के स्कूल मन म शिक्षक मनके अनुपस्थित रेहे के शिकायत मिले म जिला शिक्षा अधिकारी ल अचानके जांच करे अउ अनुपस्थित शिक्षक मनके खिलाफ जरूरी कार्रवाई करे बर कीहिन। ओमन राजस्व कार्यालय म पटवारी मनके उपस्थिति सुनिश्चित करे के संबंध म घलो अधिकारी मन ल निर्देश दीन।
मुख्यमंत्री ह जुनापारा म सहकारी बैंक के शाखा खोले अउ खैरी म ट्रांसफार्मर लगाए जाए के घोषणा करीन। ओमन गिरधोना म उप स्वास्थ्य केंद्र के भवन निर्माण के एलान घलो करीन।
भाजपा आमसभा
प्रदेश म अवइया विधानसभा चुनाव ल देखत राजनीतिक सरगर्मी बाढ़त हे। सत्ता पक्ष अउ विपक्ष समेत आने आने दल आज जनता के बीच आने आने मुद्दा ल लेके सभा अउ आंदोलन के माध्यम ले अपन सक्रियता बढ़ाय म जुटे हुए हे। इही कड़ी म भारतीय जनता पार्टी ह राजनांदगांव जिला के खुज्जी विधानसभा क्षेत्र के कुमर्दा गांव म मोर आवास-मोर अधिकार अभियान के तहत एक जनसभा के आयोजन करे गीस।
जनसभा ल संबोधित करत पार्टी के बड़का नेता अउ राज्यसभा के पूर्व सांसद नंदकुमार साय ह आरोप लगाइन हे कि छत्तीसगढ़ म कांग्रेस के सरकार गरीब मन ल प्रधानमंत्री आवास योजना ले वंचित करत हे। ओमन कीहिन हे कि प्रधानमंत्री ह ए बछर के आखरी तक देश के जम्मों बेघर परिवार मन ल पक्का घर देके जउन वादा करे रीहिस हे, उखर लक्ष्य राज्य सरकार के रवैया के सेती प्रभावित होवत हे।
मेडिकल फीस
प्रवेश अउ फीस विनियामक समिति ह प्रदेश के निजी मेडिकल कॉलेज मन म आने आने पाठ्यक्रम बर फीस तय कर देहे।
समिति के प्रमुख प्रभात कुमार शास्त्री के अध्यक्षता म होय बइठका म ये तय करे गेहे कि रायपुर अउ भिलाई के निजी मेडिकल कॉलेज मन म एमडी अउ एमएस बर करीबन दस लाख रूपिया प्रतिवर्ष तय करे गेहे।
उंहे ए पाठ्यक्रम के प्री-क्लीनिकल पढ़ाई बर करीबन आठ लाख रूपिया हर बछर फीस ले जाही। ओमन बताइन कि ए फीस म पढ़ई के संग गणवेश, प्रयोगशाला, खेलकूद अउ आने आने मद मनके फीस घलो शामिल हे।
ओमन बताइन हे कि जुनवानी भिलाई स्थित मेडिकल कॉलेज म एमबीबीएस के पहिली तीन बछर बर करीबन आठ लाख रूपिया हरेक वर्ष के फीस ले जाही। उंहे आखरी छैमाही म करीबन चार लाख रूपिया शुल्क देना होही। अइसने रायपुर इंस्टीट्यूट ऑफ मेडिकल साईंस म एमबीबीएस के पहिली तीन बछर बर करीबन साढ़े सात लाख रूपिया हर बछर के फीस तय करे गेहे। इंहा आखरी छै महीना बर पौने चार लाख रूपिया के फीस तय करे गेहे।
शाला प्रबंधन समिति बैठक
राज्य म जम्मों सरकारी स्कूल मन म ए सत्र म शाला प्रबंधन समिति के तीसर बइठका काली बीस जनवरी के होही। ए संबंध म समग्र शिक्षा अभियान के प्रबंध संचालक ह जम्मों जिला शिक्षा अधिकारी, प्राचार्य अउ आने आने अधिकारी मन ल निर्देश देहे। बइठका म निपुण भारत अभियान उपर विशेष चर्चा के संग उपस्थित सदस्य मन ल निपुण भारत ले जुड़े शपथ घलो देवाय जाही।
डॅाक्टर हड़ताल
जूनियर डॅाक्टर एसोसिएशन डॅाक्टर प्रेम चौधरी ह बताइन हे कि ओमन पाछू दू बछर ले सरलग छात्रवृत्ति बढ़ाय के मांग करत हे। फेर उंखर मांग उपर राज्य सरकार डहार ले अभी तक कोनो फैसला नइ ले गीस हे।
एखरे सेती जूनियर डॅाक्टर मन ह हड़ताल म जाय के फैसला करीन हे। ए हड़ताल के सेती आज प्रदेश के आने आने सरकारी अस्पताल मन म ओपीडी समेत आपात चिकित्सा सेवा आंशिक रूप ले प्रभावित रीहिस। फेर स्वास्थ्य विभाग ह वरिष्ठ डॅाक्टर मन ल मरीज मनके इलाज बर जम्मों जरूरी सुविधा उपलब्ध कराय के निर्देश देहे।
दुर्घटना
रायगढ़ जिला म खरसिया थाना क्षेत्र के अंतर्गत बनाये गे एक ठन निजी संयंत्र के ट्रेलर के चपेट म आय ले फटफटी सवार तीन झिन मनखे मनके मउकाच म मउत होगे। ये तीनो मुड़गांव के निवासी बताए गेहे। ए हादसा म एक झिन आने युवक गंभीर रूप ले घायल होगे हे। घायल युवक ल रायगढ़ मेडिकल कॉलेज अस्पताल म भर्ती कराय गेहे।
काली संझा कुनकुनी के तीर होय ए दुर्घटना के बाद स्थानीय लोगन मन ह राष्ट्रीय राजमार्ग म चक्काजाम कर दीन। एखर सेती बड़ देर तक यातायात प्रभावित रीहीस। पुलिस अउ प्रशासन डहार ले प्रदर्शनकारी मन ल समझाए के बाद चक्काजाम सिराइस। प्रदर्शनकारी मन ह जम्मों मृतक अउ घायल युवक बर उचित मुआवजा के मांग करीन हे।
उंहे रायपुर के टिकरापारा इलाका म एक कबाड़ी के दुकान म विस्फोट होय ले दस बछर के बालक के मउत होगे। घटना म घायल दू आने लोगन मन ल इलाज बर स्थानीय एम्स अस्पताल म भर्ती कराय गेहे।
पुलिस छापा
रायपुर पुलिस ह निगरानीशुदा बदमाश अउ आपराधिक तत्व मन उपर नकेल कसे बर आज बीहनिया छापामार के बड़े कार्रवाई करीन हे। ए दउरान पहिली बखत राजधानी म चाकूबाजी, लूट अउ चोरी समेत आने आने अपराध म सामिल होवइया करीबन एक सौ साठ निगरानी शुदा बदमाश मन ल पुलिस ह सड़क म पैदल मार्च कराइन। अतिरिक्त पुलिस अधीक्षक अभिषेक महेश्वरी अउ डीसी पटेल के अगवई म सौ ले जादा पुलिस अधिकारी अउ जवान मन ह सामूहिक रूप ल ए कार्रवाई ल अंजाम दीन।
ए कार्रवाई के दउरान पुलिस ह बस स्टेण्ड परिसर म पंद्रा किलो गांजा के संग एक आरोपी ल गिरप्तार करे हे। उंहे शहर के सात आने आने जगा ले घलो उन्नीस किलो गांजा बरामद करे गेह अउ ए मामला म ग्यारा झिन आरोपी मन ल हिरासत म ले गेहे।
रायपुर के वरिष्ठ पुलिस अधीक्षक प्रशांत अग्रवाल ह बताइन हे कि छापामार कार्रवाई के दउरान तेलीबांधा ले लेके खम्हाडीह अउ खमतराई ले लेके आमानाका तक आने आने जगा मन म करे गे कार्रवाई म साठ आरोपी के तीर ले चाकू बरामद करे गीस हे। कार्रवाई के बेरा पकड़े गे जम्मों आरोपी मन ल जेल भेज देहे अउ शहर के संवेदनशील इलाका मन म रहइया किराएदार के सत्यापन घलो करे गीस।
सड़क सुरक्षा सप्ताह
प्रदेस के गाड़ी चलइया मन ल यातायात नियम के जानकारी देबर राखे गे सड़क सुरक्षा सप्ताह काली सिरागे। ए दउरान आने आने जिला म पुलिस डहार ले रद्दा मन म बैनर-पोस्टर अउ संकेत के माध्यम ले यातायात नियम के जानकारी दे गीस। संगेसंग गाड़ी चलावत बेरा जरूरी सुरक्षा उपाय के बारे म घलो बताये गीस।