मन की बात-01
प्रधानमंत्री नरेन्द्र मोदी ह कारगिल विजय दिवस म जम्मों देसवासी मन डहार ले कारगिल के वीरजवान मन ल श्रद्धांजलि दीन हे। आकाशवाणी ले ‘‘मन की बात‘‘ कारीकरम ए वीरजवान मन श्रद्धांजलि देके संगेसंग उंखर महतारी मनके नमन करीन हे, जउन मन मां भारती के अइसन सच्चा सपूत मन ल जनम दे हवय। प्रधानमंत्री ह देस के नौजवान मन ले सहीद मनके शौर्यगाथा ल लोगन ल बताय के आग्रह करीन।
‘‘मन की बात‘‘ कारीकरम म प्रधानमंत्री ह कारगिल युद्ध बेरा लालकिला ले पूर्व प्रधानमंत्री अटल बिहारी वाजपेयी के भासन के जिकर करीन। जेमा ओमन महात्मा गांधी के एक ठिन मंत्र के सुरता देवाय रिहीन, जेमा ओमन केहे रिहीन कि अगर कोई दुसमुंधा हो तो का करना चाही तब तुमन भारत के सबले असहाय मनखे के बारे म गुनव अउ खुद ले पूछव कि का जउन करे ल जावत हव, का तुंहर काम ले ओ मनखे के भलई होही।
प्रधानमंत्री ह किहीन कि भारत ह पाछु कुछ महीना ले एकजुट होके जे तरह ले कोविड महामारी के मुकाबला करे हे। एखर ले अनेको आसंका ह गलत साबित होईस।
प्रधानमंत्री ह संकट के ए घड़ी म पूरा देस ल दिसा देखाने वाले गंवई के मनखे मनके काम ल सहराईन। ओमन ए बात उपर खुसयाली देखावत किहीन कि कोनों-कोनों मनखे अउ संस्था मन राखी तिहार ल अलग ढंग ले मनाय के परयास करत हे।
मन की बात-02
प्रधानमंत्री ह किहीन कि अवइया सात अगस्त के राष्ट्रीय हथकरघा दिवस हरय अउ भारत के हैंडलूम अउ हस्तशिल्प ह अपन आप म तइहां ले सुघ्घर इतिहास बिनोए हवय।
प्रधानमंत्री ह देसवासी मन ले अनुरोध करीन हे कि ए बछर स्वतंत्रता दिवस पन्द्रह अगस्त के मउका म ए महामारी ले मुक्ति अउ आत्म निर्भर भारत के संकल्प लेवय अउ हमर देस ह महान विभूति मनके तपस्या ले ए ऊंचाई म पहुंचे हे, जेमा ले एक झिन लोकमान्य तिलक घलो हवय अउ एक अगस्त के लोकमान्य तिलक के सौवां पुण्यतिथि घलो हरय।
कारगिल विजय दिवस
राष्ट्र आज कारगिल विजय दिवस के मउका म युद्धवीर मन ल अपन श्रद्धांजलि देवत हे। एला बछर उन्नीस सौ नियान्नवे म आॅपरेसन विजय म भारतीय सशस्त्र बल मनके सफलता के उपलक्ष्य म मनाय जाथे। करगिल युद्ध ह साठ दिन ले जादा बेरा तक चले रिहीस।
राष्ट्रपति रामनाथ कोविंद, उपराष्ट्रपति एम. वेंकैया नायडू, प्रधानमंत्री नरेन्द्र मोदी अउ सूचना प्रसारण मंत्री प्रकाश जावड़ेकर ह मां भारती के रक्षा बर परान तेजइया सहीद मन ल नमन करीन।
भारतीय सेना डहार ले एक ठिन ट्वीट म केहे हे कि आॅपरेसन विजय ह भारतीय सैनिक मनके अदम्य सौर्य, साहस अउ बलिदान के गाथा हरय।
राज्यपाल अनुसुईया उइके अउ मुख्यमंत्री भूपेश बघेल ह घलो कारगिल विजय दिवस छब्बीस जुलाई के मउका म ए युद्ध म सहीद होय जवान मन ल सुरता करत अपन श्रद्धांजलि दीन।
प्रवेश परीक्षा-स्थगित
राज्य सरकार ह कोरोना संक्रमण के बाढ़त प्रकोप ल देखत ए बछर व्यापमं डहार ले होवइया पीईटी, पीपीएचटी, पीपीटी अउ पीएमसीए के प्रवेस परीक्षा नइ कराय के निरनय लेहे। निकले आदेस मुताबिक सैक्षणिक सत्र दू हजार बीस-इक्कीस बर तकनीकी पाठ्यक्रम- बैचलर आॅफ इंजीनियरिंग, बैचलर आॅफ फाॅर्मेसी, डिप्लोमी इन फार्मेसी, डिप्लोमा इन इंजीनियरिंग अउ मास्टर आॅफ कम्प्यूटर एप्लीकेशन म अब बारहवीं के अंक के आधार ले प्रवेस दे जाही।
इही तरह, आने राज्य के पढ़ईया लइका मन बर होवइया जेईई मेंस अउ एन.आई.एन.सी.ई.टी. के परीक्षा लेके जघा अब बीई अउ एम.सी.ए. पाठ्यक्रम म एडमिसन अर्हकारी परीक्षा मन म मिले अंक मुताबिक दे जा सकही। ए सबो पाठ्यक्रम म प्रवेस आनलाईन काउंसलिंग के जरिया ले दे जाही। ए बारे तकनीकी शिक्षा संचालनालय डहार ले दिसा-निरदेस जारी करे जाही।
कोरोना मरीज
प्रदेस म आज घलो कई ठिन जिला ले कोरोना संक्रमित नवा मरीज मिले हे। दुरूग जिला म आज बीएसएफ के आठ झिन जवान समेत बत्तीस झिन कोरोना संक्रमित मरीज के पुष्टि होय हे, जेमा छह झिन स्वास्थ्यकर्मी घलो सामिल हे।
उहें, बलौदाबाजार म घलो आज ग्यारह झिन नवा कोरोना संक्रमित मरीज के चिन्हारी होय हे।
ऐति, कांकेर जिला म भानुप्रतापपुर के सामुदायिक स्वास्थ्य केन्द्र म पांच झिन करमचारी कोरोना ले संक्रमित पाय गेहे। सबो मरीज मन ल इलाज खातिर कोविड अस्पताल म भर्ती कराय जात हे।
ओति, कोरिया जिला म आज तीन झिन कोरोना संक्रमित मरीज मिले हे।
बस्तर जिला म काली रतिहा तक ग्यारह झिन कोरोना संक्रमित मरीज के पुष्टि होय हे। उहें, राजनांदगांव म घलो अट्ठारह झिन कोरोना संक्रमित मरीज मिले हे।
ऐति, रईपुर जिला म काली रतिहा तक एक सौ तेईस झिन नवा कोरोना संक्रमित मरीज के पुष्टि होय रिहीस।
गृह मंत्री-निर्देश
गृह मंत्री ताम्रध्वज साहू ह प्रदेस के पुलिस जवान, जेल करमचारी अउ उंखर परिवार वाले ल कोरोना वायरस संक्रमण ले बचाय बर जम्मों जरूरी उपाय अपनाय बर किहीन हे। ए बारे म ओमन मुख्य सचिव ल किहीन हे कि ओमन पुलिस के अइसन अधिकारी-करमचारी जउन फ्रंट लाइन वारियर्स हरय अउ लोगन मन ले सोझे संपर्क म आथे, उंखर मन बर जम्मों सुरक्षा वाले उपाय देवय। गृहमंत्री ह सबो कार्यालय जघा म सरकारी सेवक मन ल फेस मास्क के संगे रोजिना कीटाणुनासक स्प्रे अउ एक-दूसर ले फिजिकल अउ सोसल डिस्टेंसिंग के पालन करे के निरदेस दीन हे।
लाउडस्पीकर-स्कूल पढ़ाई
प्रदेस म कोरोना संक्रमण के बाढ़त मामला ल देखत अब लाउड स्पीकर ले स्कूल जघा म पढ़ई कराय जाही। स्कूल सिक्षा मंत्री डाॅक्टर प्रेमसाय सिंह टेकाम ह सबो जिला के प्रत्येक पंचायत म कम से कम एक ठिन स्कूल म ए योजना ल अवइया एक सप्ताह भीतरी सुरू करे के निरदेस देहे। डाॅक्टर टेकाम ह रईपुर स्थित अपन निवास कार्यालय ले वीडियो कान्फ्रेंसिंग के माध्यम ले बस्तर जिला म ए योजना के क्रियान्वयन ले जुड़े अधिकारी मन संग गोठबात करीन। ओमन किहीन कि बस्तर जिला म लाउड स्पीकर ले छप्पन ठिन पंचायत म पढ़ई सुरू होगे हे। प्रदेस म ए बेरा लइका मनके पढ़ई चालू राखे बर एहर एक ठिन माॅडल बनही। जउन ह आॅनलाईन पढ़ई के वैकल्पिक बेवस्था हवय।
इहां ए बतादन कि ए माॅडल म पंचायत डहार ले लइका मनके पढ़ई बर लाउडस्पीकर दे जावत हे, जेखर माध्यम ले सिक्षक मन लइका मन ल पढ़ावत हे। जेमा लइका मन अपन घर-मुहाटी म बइठ के पाठ ल सुनथे। उहें, ए कक्षा ह रोजिना राज्यगीत के संगे सुरू होथे।
पढ़ई तुंहर दुआर
राज्य शैक्षिक अनुसंधान अउ प्रशिक्षण परिषद रईपुर डहार ले स्कूली लइका मन बर कोरोना संकट काल ले पढ़ई तुंहर दुआर कारीकरम सुरू करे गेहे। तेखर चलत हर सनिचर के बिसेस बिसय वाले आॅनलाईन कक्षा चलाय जात हे। ए कारीकरम म काली जाने-माने मनौवैज्ञानिक अउ सिक्षाविद् डाॅक्टर जवाहर सुरिसेट्टी ह भाग लीन अउ ओमन बिसेस बिसय ‘‘जीरो से हीरो‘‘ म लइका मन के उत्साह बढ़ाईन।
ओमन कोरोना संकट काल म राज्य सासन डहार ले लइका मन ल पढ़ई ले जुड़े हरय कई के सुरू करे गे पढ़ई तुंहर दुआर योजना ल सहरावत किहीन कि ए कारीकरम ल लइका मन भीतरी एक ठिन नवा समझ जागे हे।
माओवादी-आईईडी बरामद
बीजापुर जिला म सुरक्षा बल मन माओवादी मन डहार ले लगाय गे चालीस किलो वजनी आईईडी बम बरामद करे हे।
हमर संवाददाता ह बतईन कि बासागुड़ा थाना क्षेत्र म ए बेरा रद्दा बनाय के काम चलत हे। ए काम म जिला पुलिस बल, सीआरपीएफ अउ कोबरा बटालियन के जवान मन ल तैनात करे गे रिहीस। आज बिहनिया जब सुरक्षा बल के जवान मन जब सर्चिंग बर निकले रिहीन, तभे ओमन बासागुड़ा अउ तर्रेम के बीच प्लास्टिक डब्बा म राखे चालीस किलो के आईईडी बम ल देखे बाद मउकाच म निष्क्रिय कर दीन।
इहां ए बतादन कि माओवादी मन अवइया अट्ठाईस जुलाई ले सहीदी सप्ताह मनाय के आह्वान करे हवय।