प्रदेस म अवइया तेईस जनवरी ले सबो ग्राम पंचायत म ग्रामसभा होही। एला लेके पंचायत विभाग ह कलेक्टर मन ल परिपत्र जारी कर देहे, जेमा ग्राम सभा के गतिविधि ल वाइब्रेंट ग्रामसभा पोर्टल अउ जीपीडीपी पोर्टल म अपलोड करे के निरदेस दे गेहे। पंचायत विभाग ह हर ग्राम पंचायत मुख्यालय अउ ओखर आश्रित गांव म ग्रामसभा के आयोजन बर समय-सारिणी तैयार करे अउ स्थानीय जरूरत ल देखत हुए अधिकारी अउ करमचारी मन ल बिसेस जिम्मेदारी देके घलो निरदेस दीन हे।
निर्वाचन आयोग-चुनाव घोषणा
भारत निर्वाचन आयोग ह पूर्वोत्तर के तीन ठिन राज्य त्रिपुरा, मेघालय अउ नागालैंड म विधानसभा चुनाव के तारीख के घोसना कर देहे। मुख्य निर्वाचन आयुक्त राजीव कुमार ह आज नई दिल्ली म संवाददाता सम्मेलन म ए जानकारी देवत हुए बतईन कि त्रिपुरा विधानसभा बर सोलह फरवरी के अउ नागालैंड के संग मेघालय म सत्ताईस फरवरी के मतदान होना हे। ए तीनों राज्य म मतगणना दू मार्च के होही।
भेंट-मुलाकात कार्यक्रम
भेंट-मुलाकात कार्यक्रम के चलत मुख्यमंत्री भूपेश बघेल ह आज बिलासपुर जिला के तखतपुर विधानसभा क्षेत्र के बेलपान अउ खैरी पहुंचीन। ए बेरा म ओमन ह कतकोन सरकारी योजना के जानकारी लीन। संगेसंग विकास बर कई ठिन घोसना घलो करीन। मुख्यमंत्री ह बेलपान गांव म चलत कारीकरम म गनियारी ग्राम पंचायत ल नगर पंचायत बनाय, तखतपुर के शासकीय पॉलीटेक्निक कॉलेज के नाव ल स्वर्गीय ठाकुर बलराम सिंह के नाव ल करे अउ कन्या महाविद्यालय के नाव वीरांगना रानी दुर्गावती के नाव म करे के घोसना करीन। संगेसंग ओमन ह तखतपुर नगर म पानी के समस्या ल दूर करे बर खुड़िया जलाशय ले पानी के बेवस्था करे के निरदेस दीन। उहें, ए बेरा म मुख्यमंत्री ह बेलपान म बनत ग्रामीण औद्योगिक पार्क ल देखे बर घलो पहुंचीन।
उहें, खैरी गांव म मुख्यमंत्री ह लोगन मन ले ऋण माफी अउ धान खरीदी व्यवस्था के संगेसंग कतकोन योजना के जानकारी लीन।
कृषि विभाग समीक्षा
प्रदेस म कृषि विभाग के अधिकारी मन गांव-गांव म जाके किसान मनके समस्या ल सुनके उंखर हल निकालही। कृषि मंत्री रविन्द्र चौबे ह विभागीय समीक्षा बइठका म किहीन कि ए बेरा अधिकारी मन हफ्ता म कम से कम पांच ठिन गौठान ल देखे बर जाही। संगेसंग उहां चलत कामकाज के जानकारी लीही। ओमन ह गोधन न्याय योजना के चलत हर जिला के पचास प्रतिसत गौठान ल स्वावलंबी बनाय के निरदेस दीन। श्री चौबे ह किहीन कि कृषि अधिकारी किसान मन ल रागी बोय बर प्रोत्साहित करय।
मन की बात लोगो-डिजाईन
केन्द्र सरकार ह प्रधानमंत्री नरेन्द्र मोदी के ‘‘मन की बात‘‘ कारीकरम के सौवां कड़ी के ‘‘लोगो‘‘ डिजाईन करे बर आवेदन मंगाय हे। एसो अप्रैल म ए कारीकरम के सौवां कड़ी प्रसारित करे जाही। सरकार ह किहीन कि मन की बात के सौवां एपिसोड बर आकाशवाणी ह लोगो के डिजाईन मंगाय हे। ए लोगो म मन की बात के सौवां कड़ी ल दिखाय वाला डिजाईन होना चाही। सरकार ह सबले अच्छा लोगो डिजाईन करे वाले ल एक लाख रूपिया के इनाम देके घोसना घलो करे हे। उहें, एक फरवरी तक माई.जीओवी. डॉट इन पोर्टल के माध्यम ले अपन आवेदन जमा कराय जा सकत हे।
किसान-मंत्रिमंडल उपसमिति
नवा रईपुर के किसान मन ह कतकोन मुद्दा के निराकरण बर बने मंत्रिमंडल उपसमिति के बइठका आज कृषि मंत्री रविन्द्र चौबे के अध्यक्षता म मंत्रालय म होईस। बइठका म नवा रईपुर के किसान मनके समस्या के समाधान बर गोठबात होईस। उहें, लेयर-एक के गांव म कब्जा के आधार म पट्टा दे बर एक ठिन प्रस्ताव कैबिनेट के बइठका म भेजे के फइसला ले गीस। अइसने, लेयर-दू के गांव म सरकारी भूईंया म रहत कब्जाधारी मन ल आबादी पट्टा जिला प्रसासन डहार ले दे म सहमति बनीस। संगेसंग राखी गांव म ईडब्ल्यूएस बर आरक्षित भूईंया ल गांव के लोगन मन ल बाड़ी जइसे कतकोन कामबूता बर देके घलो फइसला ले गीस।
धान खरीदी
राज्य म धान खरीदी के आंकड़ा सौ लाख मीटरिक टन ल पार कर गेहे। खाद्य मंत्री अमरजीत भगत ह पत्रकार मन ले गोठबात करत हुए बतईन कि एसो धान के पंजीकृत रकबा म घलो बढ़ोतरी होय हे अउ बत्तीस लाख ले जादा हेक्टेयर क्षेत्र म धान के फसल लगाय गेहे। ए सीजन म धान बेचे बर पंजीकृत किसान मनके संख्या ह बाढ़के करीबन पच्चीस लाख होगे हे, जेमा ले दू लाख तीस हजार झिन नवा किसान हवय। ओमन ह किहीन कि राजीव गांधी किसान न्याय योजना के चलत किसान मन ल मिले इनपुट सब्सिडी के रासि खेती बर मददगार साबित होय हे। खाद्य मंत्री ह बतईन कि एखर बलदा म बीस हजार तीन सौ पचहत्तर करोड़ रूपिया के भुगतान बैंक लिंकिंग व्यवस्था के तहत करे गेहे। ओमन बतईन कि राज्य म ए दरी एक सौ दस लाख मीटरिक टन धान खरीदी के अनुमान हे।
गणतंत्र दिवस-तैयारी
प्रदेस म गणतंत्र दिवस कारीकरम के तैयारी सुरू होगे हे। मुख्य कारीकरम रईपुर के पुलिस परेड मैदान म होही, जिहां राज्यपाल अनुसुईया उइके ह झंडा फहरा के परेड के सलामी लीहीं। उहें, बस्तर जिला मुख्यालय जगदलपुर म मुख्यमंत्री भूपेश बघेल ह झंडा फहराही। छत्तीसगढ़ विधानसभा अध्यक्ष डॉक्टर चरणदास महंत ह सक्ती म अउ विधानसभा उपाध्यक्ष संतराम नेताम ह कोंडागांव म झंडा फहराही। गृहमंत्री ताम्रध्वज साहू ह महासमुंद, स्वास्थ्य मंत्री टी.एस. सिंहदेव अंबिकापुर, कृषि मंत्री रविन्द्र चौबे दुरूग, वन मंत्री मोहम्मद अकबर कवर्धा म गणतंत्र दिवस कारीकरम म सामिल होके झंडा ल फहराही। उहें, आने-आने मंत्री, संसदीय सचिव, विधायक अउ जनप्रतिनिधि मन कतकोन जिला म झंडा फहराही।
सिंहदेव-समीक्षा
रईपुर म चिकित्सा शिक्षा मंत्री टी.एस. सिंहेदव के अध्यक्षता म स्वशासी समिति के सामान्य परिषद के बइठका होईस, जेमा कतकोन महत्वपूर्ण फइसला ले गीस। श्री सिंहदेव ह कहिन कि जिला अस्पताल के हमर लैब म अब ओ जम्मों जांच होही, जउन कि डॉक्टर भीमराव अंबेडकर अस्पताल म रि-एजेंट्स के कमी ले नइ हो पात रिहीस। उंखर व्यवस्था हो जाय के बाद अंबेडकर अस्पताल के मरीज मन ल ए सुविधा फेर मिले बर लगही। उहें, पोस्ट मार्टम रिपोर्ट तैयार करे के काम म तेजी लाय बर फॉरेसिंक लिपिकीय स्टाफ अउ कम्प्यूटर के संख्या बढ़ाय जाही। ए बइठका म श्री सिंहदेव ह अंबेडकर अस्पताल म कामबूता करत स्टाफ के लइका मन बर जल्दी झूला घर सुरू करे बर घलो किहीन।
बोस जयंती-पराक्रम दिवस
नेताजी सुभाष चंद्र बोस के एक सौ छब्बीसवां जयंती पराक्रम दिवस के रूप म मनाय जाही। ए मउका म तेईस अउ चौबीस जनवरी के नई दिल्ली के जवाहर लाल नेहरू स्टेडियम म मिलिट्री टैटू अउ जनजातीय नृत्य महोत्सव के आयोजन करे जाही। दू दिन तक चलइया ए कारीकरम म सशस्त्र सेना मनके कौशल अउ भारत के जनजातीय संस्कृति ल दिखाय जाही। केन्द्रीय जनजातीय मंत्री अर्जुन मुंडा ह बतईन कि महोत्सव के उद्देश्य देश के बलिदानी मनके सुरता अउ संगेसंग देस के सांस्कृतिक विरासत ल दिखाना हे।
दुर्ग-हेलमेट अनिवार्य
दुरूग जिला म आज ले दुपहिया गाड़ी म हेलमेट लगाना जरूरी कर दे गेहे। बिना हेलमेट के गाड़ी चलाय पाये जाय म कार्रवाई करे जाही। पुलिस अधीक्षक डॉक्टर अभिषेक पल्लव ह बतईन कि जिला म रद्दा हादसा म जतना भी मउत होय हे, ओमा इही देखे बर मिलीस कि गाड़ी चलइया मन हेलमेट नइ लगाय रिहीस। ओमन कहिन कि पुलिस ह अइसे लोगन मन उपर कार्रवाई करही जउन के अपन छोटे लइका मन ल गाड़ी देके यातायात नियम के पालन नइ करत हे।
तेंदुआ-पकड़ाया
मनेन्द्रगढ़ के भरतपुर विकासखंड म पाछु करीबन अड़तीस दिन ले आंतक मनाच वाले तेंदुआ ल वन विभाग के टीम ह पकड़ लेहे। मुख्यमंत्री भूपेश बघेल के निरदेस म तेंदुआ ल पकड़े बर बिसेसज्ञ के मदद ले वन विभाग कोति ले एक ठिन बड़का अभियान चलाय गीस। तेंदुआ ल बिलासपुर के कानन पेंडारी अभ्यारण्य भेजे जाही। जानबा के अनुसार ए तेंदुआ के हमला ले तीन झिन मनखे के मउत हो चुके हे।