मुख्यमंत्री भूपेश बघेल ह आज मकर संक्रांति के मउका म बलरामपुर जिला म राखे गे तीन दिन के तातापानी महोत्सव के उद्घाटन करीन। ए मउका म मुख्यमंत्री ह नौ सौ छिहत्तर करोड़ रूपिया ले जादा के विकास कार्य मनके सिलान्यास अउ लोकार्पण करीन। महोत्सव म मुख्यमंत्री ह सामूहिक कन्या विवाह योजना अंतर्गत पांच सौ एक जोड़ा के बिहाव कारीकरम म सामिल हाईन। मुख्यमंत्री ह कुसमी म व्यवहार न्यायालय, चांदो म सहकारी बैंक, तातापानी महोत्सव ल ट्रस्ट बनाय के अउ गौरलाटा ल पर्यटन केन्द्र के रूप म विकसित करे संबंधी आने-आने घोसना घलो करीन।
एखर पहिली, मुख्यमंत्री ह भेंट-मुलाकात कार्यक्रम के तहत कोरबा जिला के पाली-तानाखार विधानसभा क्षेत्र म लगभग संतानवे करोड़ रूपिया के आने-आने विकास कार्य मनके लोकार्पण अउ भूमिपूजन करीन। संगेसंग लाफा के भेंट-मुलाकात कारीकरम म चैतुरगढ़ के देवी स्थल म यात्री प्रतीक्षालय, छत्तीस केवी विद्युत सब स्टेशन अउ पाली के पचास बिस्तर अस्पताल ल सिविल अस्पताल के दर्जा देके घोसना करीन।
पत्रकारवार्ता म मुख्यमंत्री ह बतईन कि कोरबा म चिरौंजी के प्रोसिसिंग प्लांट लगाय के फइसला करे गेहे। उहें, महुआ के गुणवत्ता ल बनाय राखे बर अब ओखर संग्रहण नेट लगाके करे जाही।
जवान-घायल
बीजापुर जिला म प्रेसर आईईडी के चपेट म आय ले सीआरपीएफ के एक झिन जवान ह घायल होगे हे। बस्तर रेंज के पुलिस महानिरीक्षक सुंदरराज पी. ह घटना के पुष्टि करत हुए बतईन कि सुरक्षा बल के टीम तर्रेम ले पेगडापल्लो अउ मुकुर तक सड़क निर्माण कार्य के सुरक्षा म तैनात रिहीन। ए दउरान माओवादी मन कोति ले लगाय गे प्रेसर बम के चपेट म आय ले सीआरपीएफ के एक सौ तिरपनवां बटालियन के सहायक उप निरीक्षक ह घायल होगे हे, जेला बने इलाज बर रईपुर रिफर करे गेहे।
चिकित्सा अधिकारी-वसूली
प्रदेस के आने-आने सरकारी अस्पताल मन म पदस्थ करे गे एम.बी.बी.एस. डॉक्टर जउन मन ह अपन पदस्थापना जघा म कार्यभार ग्रहण नइ करे हे, ओमन मनके विरूद्ध बॉण्ड रासि के वसूली के कार्रवाई सुरू कर दे गेहे। स्वास्थ्य विभाग ह पाछु नौ नवंबर के दू सौ बारह अनुबंधित डॉक्टर मन ल अपन पदस्थापना जघा म पांच दिन के भीतर कार्यभार लेहे के आखिरी मउका दे रिहीन। एखर परिपालन म एक सौ तिरासी अनुबंधित डॉक्टर मन ह अपन उपस्थिति दे दीन हे, फेर बॉण्ड सर्त के पालन नइ करइया उनतीस चिकित्सा अधिकारी मनके विरूद्ध वसूली के कार्रवाई करे जात हे।
भारतीय थल सेना-परीक्षा
भारतीय थल सेना कोति ले दुरूग जिला म आयोजित करे के भर्ती रैली म चयनित आवेदक मनके लिखित परीक्षा काली पन्द्रह जनवरी के नवा रईपुर के परसदा स्थित आर्मी रिक्रूटमेंट कार्यालय म होही। आवेदक मन ल परीक्षा केन्द्र म काली बिहनिया चार बजे तक पहुंचना अनिवार्य हे। अभ्यर्थी मन ल अपन संग थल सेना कोति ले जारी प्रवेस पत्र, बॉल पॉईंट पेन, पेंसिल अउ आधार कार्ड ले जाना जरूरी हवय। आवेदक मन ल परीक्षा केन्द्र तक पहुंचाय बर पुराना पुलिस मुख्यालय स्थित जिला रोजगार कार्यालय डहार ले आज संझा छह बजे ले रतिहा बारह बजे तक निःशुल्क वाहन के व्यवस्था करे गेहे। अभ्यर्थी मनके विश्राम बर परसदा स्थित शासकीय उच्चतर माध्यमिक विद्यालय ल आरक्षित करे गेहे, जहां रियायती दर म भोजन के व्यवस्था घलो करे गेहे।
पैरादान
प्रदेस म पाछु दू महीना म तेरह लाख नवासी हजार क्विंटल ले जादा पैरा गौठान मन म जोरे जा चुके हे। मुख्यमंत्री भूपेश बघेल ह पैरादान ल महादान के संज्ञा देवत हुए किहीन हे कि किसान अपन खेत म पैरा ल जलाय के बजाय गौठान मन दान कर देवय। एखर ले प्रदूसन ले राहत मिलही अउ गाय-गरू मन ल चारा घलो मिलही। एखरे संगेसंग ए ह वर्मी कम्पोस्ट बनाय के घलो काम आही।
सुनइया मन ल बतादन कि आने-आने जघा के भेंट-मुलाकात कार्यक्रम म मुख्यमंत्री ह किसान मन ले पैरादान करे के अपील करत हवय, जेखर ले किसान मन ह खुदे गौठान म पैरादान करत हे।
मकर संक्रांति
देस के आने-आने जगह म मकर संक्रांति के पर्व ल आज उत्साह के संग मनाय जावत हे। सूर्य देव के उत्तरायण म प्रवेस करे म ए तिहार मनाय जाथे। ए ह अच्छा फसल, खुसहाली अउ सौभाग्य देहे बर प्रकृति के प्रति आभार के प्रतीक हवय। देस म ए तिहार ल आने-आने नाव ले जाने जाथे, जइसे तमिलनाडु म पोंगल, गुजरात म उत्तरायण, असम म बिहू अउ पश्चिम बंगाल म पौष संक्रांति।
छत्तीसगढ़ म घलो मकर संक्रांति के मउका म आने-आने कारीकरम आयोजित करे गीस। राजधानी रईपुर के महादेवघाट स्थित खारून नदी म आज स्नान बर श्रद्धालु मनके तांता लगे रिहीस। उहें, सरगुजा सेवा समिति कोति ले अंबिकापुर म पतंग उत्सव के आयोजन करे गीस। जेमा दू सौ ले जादा प्रतिभागी मन ह हिस्सा लीन। संस्कृति मंत्री अमरजीत भगत ह विजेता मन ल पुरस्कार प्रदान करीन।
प्रधानमंत्री नरेन्द्र मोदी, सूचना अउ प्रसारण मंत्री अनुराग सिंह ठाकुर, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह मकर संक्रांति के अवसर म लोगन ल बधाई दीन हे।
भाजपा-चौपाटी विरोध
केन्द्रीय मंत्री हरदीप सिंह पुरी के आश्वासन के बाद राजधानी रईपुर म साईंस कॉलेज मैदान के लकठा म चौपाटी के विरोध म चलत धरना-प्रदर्शन ल स्थगित कर दे गेहे। भाजपा के राष्ट्रीय उपाध्यक्ष डॉक्टर रमन सिंह ह केन्द्रीय मंत्री ले गोठबात के बाद धरनास्थल म किहीन कि केन्द्रीय मंत्री ह आश्वासन दे हवय कि रईपुर म स्मार्ट सिटी के जम्मों काम के जांच करे जाही अउ दोसी मनखे मन ल सजा देवाय जाही।
उहें, मुंगेली म भारतीय जनता पार्टी के जिला कार्यसमिति के बइठका राखे गीस। बइठका म पार्टी के अवइया कारीकरम के रूपरेखा तय करे के संगेसंग संगठनात्मक मुद्दा मन म घलो चरचा होईस।
कोंडागांव-चलित थाना
कोंडागांव पुलिस डहार ले बांस गांव म चलित थाना के आयोजन करे गीस, जेमा कलेक्टर दीपक सोनी अउ पुलिस अधीक्षक दिव्यांग पटेल ह ग्रामीण मनके समस्या सुनीन। ए मउका म सामुदायिक पुलिसिंग के तहत ग्रामीण मनके टीम बनाके कबड्डी अउ वालीबॉल प्रतियोगिता अउ माईलोगिन मन बर कुर्सी दउड़ अउ रस्साखींच प्रतियोगिता कराय गीस। कोंडागांव कलेक्टर ह गांव वाले मन ल जुर-मिलके रेहे अउ सांति व्यवस्था बनाय राखे के समझाइश दीन।
जिले की चिट्ठी
प्रादेशिक समाचार एकांश, आकाशवाणी समाचार डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मों केंद्र एक संगरा रिले करही। ए बखत के अंक म ‘‘दुर्ग‘‘ जिला के गतिविधि के संबंध म जानकारी दे जाही।
अउ अब थोरकुन समाचार सार म-
– राजधानी रईपुर म राजस्व खुफिया निदेशालय के टीम ह एक ट्रक ले लगभग तीन करोड़ रूपिया कीमत के विदेशी सिगरेट जब्त करे हे। ए मामला म चार झिन आरोपी ह गिरफ्तार होय हे।
– रायगढ़ जिला के कटंगपाली अउ बोंदा क्षेत्र म खनिज विभाग के टीम ह पांच क्रशर मसील ल सील करे के कार्रवाई करे हे।
– बिलासपुर जिला म तोरवा पुलिस ह साढ़े दस किलो गांजा के संग एक झिन माईलोगिन ल गिरफ्तार करे हे।
अउ
– राजनांदगांव के पार्रीनाला खेल मैदान म चलत अंतरक्षेत्रीय विद्युत कबड्डी प्रतियोगिता म कोरबा-पश्चिम के टीम ह फाइनल मैच म रईपुर क्षेत्र के टीम ल हरा के खिताब अपन नाम करीन।