केन्द्रीय सड़क परिवहन अउ राजमार्ग मंत्रालय ह आज ले सत्रह जनवरी तक देसभर म सड़क सुरक्षा सप्ताह के आयोजन करत हे। एखर उद्देश्य सड़क सुरक्षा ल देखत आम लोगन मन ल जागरूक करना अउ सबो संबंधित पक्ष ल अवसर देना हवय।
ऐति, छत्तीसगढ़ म घलो राजधानी रईपुर समेत कतकोन जिला म सड़क सुरक्षा सप्ताह के चलत आने-आने कारीकरम करे जात हे। रईपुर म कलेक्ट्रेट चउक ले यातायात पुलिस ह जागरूकता रैली निकालीस, जेमा लोगन मन ल हेलमेट लगाय अउ यातायात नियम के पालन करे बर जागरूक करे गीस।
उहें, कोरिया जिला म बैकुंठपुर बस स्टैंड करा सड़क सुरक्षा सप्ताह जागरूकता कारीकरम आयोजित करे गीस। कारीकरम म लोगन मन ल सड़क सुरक्षा ले संबंधित जम्मों नियम के जानकारी दे गीस। अइसने, जांजगीर-चांपा जिला म ‘‘यातायात मॉडल बनाओ‘‘ प्रतियोगिता आयोजित करे गीस, जेमा स्कूल म पढ़ईया लइका मन भाग लीन।
परीक्षा पे चर्चा
प्रधानमंत्री नरेन्द्र मोदी ह एसो ‘‘परीक्षा पे चर्चा‘‘ गोठबात म देसभर के पढ़ईया लइका मनके बड़का संख्या म पंजीकरण होय म खुसी जाहिर करे हे। नवोदय विद्यालय समिति के एक ठिन ट्वीट के जवाब देवत हुए प्रधानमंत्री ह कहिन कि लइका मन म परीक्षा के तनाव ल दूर करे कतकोन तरीका बताय जात हे। प्रधानमंत्री ह सत्ताईस जनवरी के ‘परीक्षा पे चर्चा‘ संवाद म लइका, सिक्षक, अउ अभिभावक मनके संग गोठबात करही।
साम्प्रदायिक सौहार्द्र-कार्रवाई
राज्य सरकार ह साम्प्रदायिक सौहार्द्र बिगाड़े वाले लोगन मनके खिलाफ राष्ट्रीय सुरक्षा कानून के तहत कार्रवाई करे के अधिसूचना जारी करे हे। एखर चलत कोनों भी जिला म साम्प्रदायिक सौहार्द्र ल बिगाड़े के सिकायत मिले म थाना पुलिस ह मनखे ल तुरते गिरफ्तार कर सकत हे। संगेसंग घटना ले संबंधित प्रतिवेदन पुलिस अधीक्षक ल भेजे जाही, जेमा जिला कलेक्टर राज्य सुरक्षा कानून के तहत कार्रवाई करे के अनुसंसा करही।
भेंट-मुलाकात
भेंट मुलाकात कारीकरम के चलत मुख्यमंत्री भूपेश बघेल ह आज धमतरी जिला के सिहावा विधानसभा क्षेत्र के खिसोरा अउ बेलरगांव पहुंचीन, जिहां ओमन ह खिसोरा म छह झिन स्वतंत्रता सेनानी – देवनाथ पटेल, थानूराम बंसोर, ताराचंद साहू, अलखराम पटेल, माधोराम पटेल अउ भूखेलाल पटेल के मूर्ति के अनावरण करीन। उहें, करेलीबड़ी ल उप तहसील के दर्जा दे, मगरलोड म अनुविभागीय अधिकारी राजस्व के लिंक कोर्ट हफ्ता म दू दिन सुरू करे अउ संगेसंग खिसोरा म प्राथमिक कृषि साख सहकारी समिति ल खोले जाय के घोसना करीन।
भाजपा-आरोप
भारतीय जनता पार्टी के प्रदेस अध्यक्ष अरूण साव ह किहीन हे कि राज्य के कांग्रेस सरकार ह आर्थिक विकास नइ करके राज्य ल उधारी के बोझ ले दबा देहे। इहां औद्योगिक विकास के प्राथमिक सुविधा घलो लोगन मन ल नइ मिल पात हे। संगेसंग निवेसक मन छत्तीसगढ़ म निवेस करे बर तैयार नइ हे। राज्य सरकार ह एक लाख लोगन मन ल नवा निवेस ले रोजगार दिलाय के दावा करे रिहीन। जबकि सिरिफ तीन हजार मनखे मन ल ही रोजगार मिल पाय हे। उहें, सरकार ह बयानवे हजार करोड़ रूपिया के निवेस के दावा करे रिहीन, फेर सिरिफ चार हजार करोड़ रूपिया के निवेस ही अभू तक करे गेहे। श्री साव ह किहीन कि राज्य सरकार निवेस म छियानवे प्रतिसत अउ रोजगार दे म संतानवे प्रतिसत असफल होय हे। ओमन आरोप लगईन कि कानून व्यवस्था के स्थिति अच्छा नइ हे, जेखर सेती सरलग अपराध बढ़त हे।
उहें, भाजपा के प्रदेस प्रवक्ता संदीप शर्मा ह किहीन कि सोसायटी ले धान उठाव म लापरवाही बरते जात हे, जेखर ले खरीद केन्द्र मन म धान जाम होगे हे अउ किसान मन ल टोकन नइ मिल पात हे। ओमन बतईन कि सरकार कोति ले केहे गेहे कि अभू तक ससत्तर फीसदी धान के उठाव कर ले गेहे, जउन कि गलत हे।
विवेकानंद जयंती-डे भवन
काली स्वामी विवेकानंद के जयंती हरय। एला युवा दिवस के रूप म मनाय जाथे। मुख्यमंत्री भूपेश बघेल ह काली रईपुर के गांधी मैदान म होवइया कारीकरम म स्वामी विवेकानंद स्मारक डे-भवन के जीर्णोद्धार काम के सुभारंभ करही। कारीकरम के अध्यक्षता रामकृष्ण मिशन विवेकानंद शैक्षणिक अउ अनुसंधान संस्थान, पश्चिम बंगाल के कुलपति स्वामी सर्वोत्तमानंद महाराज ह करही।
जानबा के अनुसार राज्य सरकार ह रईपुर म स्वामी विवेकानंद के निवास स्थान डे-भवन ल स्मारक के रूप म संरक्षित करे के फइसला ले रिहीन।
छत्तीसगढ़िया ओलंपिक-समापन
राजधानी रायपुर म चलत तीन दिन के राज्य स्तरीय छत्तीसगढ़िया ओलंपिक खेल के काली समापन होईस। कारीकरम ल संबोधित करत हुए खेल मंत्री उमेश पटेल ह किहीन कि राज्य सरकार ह गांव-गंवई म नंदावत खेल ल बढ़ावा दे बर राज्य म पहिली घांव छत्तीसगढ़िया ओलंपिक के सुरूवात करे गेहे, जेमा फुगड़ी, बिल्लस, भवंरा, बाटी, कबड्डी, लंगरी, पिट्ठूल समेत चौदह ठिन पारंपरिक खेल ल सामिल करे गेहे। पाछु सोलह अक्टूबर ले चलत छत्तीसगढ़िया ओलंपिक म लइका, सियनहा समेत आने-आने उमर के लोगन मन ह हिस्सा लीन। राज्य स्तरीय प्रतियोगिता म पहिली, दूसर अउ तीसर जघा पाय वाले विजेता मन ल प्रमाण पत्र दे गीस।
खेल अउ युवा कल्याण विभाग के अपर मुख्य सचिव रेणुजी पिल्ले ह बतईन कि ए प्रतियोगिता म सत्रह सौ ले जादा प्रतिभागी मन सामिल होईन। ओमन ह बतईन कि ए ओलंपिक म गांव के पच्चीस लाख ले जादा अउ नगरीय क्षेत्र ले एक लाख तीस हजार ले जादा लोगन मनके भागीदारी रिहीस।
गणतंत्र दिवस-तैयारी
प्रदेस म गणतंत्र दिवस समारोह के तैयारी सुरू होगे हे। मुख्य समारोह राजधानी रईपुर के पुलिस परेड मैदान म होही, जिहां राज्यपाल अनुसुईया उइके ह झंडा फहरा के परेड के सलामी लीहीं। रईपुर कलेक्टर डॉक्टर सर्वेश्वर नरेन्द्र भूरे ह गणतंत्र दिवस कारीकरम के तैयारी के संबंध म अधिकारी मन ल निरदेस दीन। ओमन बतईन कि परेड के आखिरी रिहर्सल चौबीस जनवरी के करे जाही। ए दरी जिला प्रसासन ह कोरोना ल देखत हुए सांस्कृतिक कारीकरम ल नइ करे के फइसला लेहे।
सुनील सोनी-बैठक
रईपुर के कलेक्ट्रेट परिसर म सांसद सुनील सोनी के अध्यक्षता म जिला विकास समन्वय अउ निगरानी समिति के बइठका होईस। एमा केन्द्र सरकार डहार ले रईपुर जिला म चलत योजना अउ विकास कार्यक्रम के समीक्षा करे गीस। बइठका म श्री सोनी ह सबो अधिकारी मन ल योजना के चलत करे जाय वाले कामबूता के देखरेख करे के निरदेस दीन। बइठका म विधायक कुलदीप जुनेजा, कलेक्टर डॉक्टर सर्वेश्वर नरेन्द्र भूरे समेत जिला प्रसासन अउ पंचायत के वरिष्ठ अधिकारी मन रिहीन।
एनसीसी प्रशिक्षण-शिविर
छत्तीसगढ़ के पहिली घुड़सवार रेजीमेंट राष्ट्रीय कैडेट कोर-एन.सी.सी. डहार ले अभी भिलाई म संयुक्त वार्षिक प्रशिक्षण सिविर के आयोजन होवत हे। सिविर के दूसर दिन आज कैडेट मन ह योगा अउ कसरत के बाद परेड करीन। उहें, कैडेट मन ल राइफल चलाय बर सिखाय गीस। सिविर म कैडेट मन ल बैंकिंग सेवा के चलत साइबर अपराध ले बचे के बारे म जानकारी घलो दे गीस।
झुमका जल महोत्सव
कोरिया जिला म अवइया सत्रह अउ अट्ठारह जनवरी के झुमका जल महोत्सव के आयोजन करे जाही। एमा लोगन मन ल जिला के संस्कृति अउ पर्यटन के बारे म जानकारी मिल सकही। संगेसंग कलाकार मन डहार ले सांस्कृतिक कारीकरम घलो होही। ए बेरा म झुमका जल महोत्सव ल देखाय बर लोगो, टैग लाइन अउ मोमेंटो डिजाईन प्रतियोगिता घलो होही। एखर बर प्रतिभागी मन तेरह जनवरी के मंझनिया दू बजे तक अपन प्रविष्टि भेज सकत हे। अइसने जिला के पर्यटन स्थल म आधारित चित्रकला प्रतियोगिता घलो होही। एखर बर चौदह जनवरी के संझा पांच बजे तक लोगन मन पेंटिग जमा करा सकत हे। उहें, ए महोत्सव के चलत अभिनय, नाचा अउ गाना गाय के प्रतियोगिता घलो होही।