प्रदेस म अवइया विधानसभा चुनाव ल लेके भारतीय जनता पार्टी ह तैयारी सुरू कर देहे। इही कड़ी म राजनांदगांव म प्रदेश प्रभारी ओम माथुर अउ सह प्रभारी नितिन नबीन के नेतृत्व म प्रदेश भाजपा कोर कमेटी के बैठक आयोजित करे गीस। बैठक म बूथ स्तर म चुनावी रणनीति बनाय गीस। संगेसंग अवइया कार्ययोजना अउ अवइया समय म होवइया आंदोलन मनके बारे म विचार करे गीस। बैठक म प्रदेश भाजपा अध्यक्ष अरूण साव, राष्ट्रीय उपाध्यक्ष डॉक्टर रमन सिंह अउ नेता प्रतिपक्ष नारायण चंदेल ह घलो अपन विचार राखीस। बैठक म क्षेत्रीय संगठन महामंत्री अजय जामवाल, प्रदेश महामंत्री पवन साय, राज्यसभा सांसद सरोज पांडेय, रामविचार नेताम अउ विधायक बृजमोहन अग्रवाल सहित पार्टी के वरिष्ठ नेता मन सामिल होईन।
इही बीच, भाजपा के वरिष्ठ नेता मन ह राजनांदगांव जिला के 150 ले ज्यादा शक्ति केन्द्र मन म बूथ मनके दउरा करीस। ए दउरान पार्टी नेता मन ह बूथ स्तर म बैठक करके कार्यकर्ता मन ल संगठन ल अउ मजबूत करे बर प्रेरित करीस।
अरूण साव-प्रेसवार्ता
इही बीच, भारतीय जनता पार्टी के प्रदेस अध्यक्ष अरूण साव ह किहीन कि प्रधानमंत्री आवास योजना के तहत आवास देवाय बर भाजपा आंदोलन करही। आज राजनांदगांव म पत्रकार मन ले चरचा करत श्री साव ह किहीन कि भाजपा ह आंदोलन के रूपरेखा तैयार कर लेहे। ए मुद्दा ल लेके पार्टी के पदाधिकारी पदयात्रा करही।
आप मन ल बतादन कि भाजपा ह आरोप लगाय हे कि केन्द्र सरकार डहार ले बछर 2015 ले सुरू करे गे ए योजना के अंतर्गत छत्तीसगढ़ म कांग्रेस के सरकार आय के बाद बछर 2018 ले प्रदेस के गरीब मन ल स्वयं के मकान मिलना बंद होगे हे। ओमन किहीन कि प्रदेस के लगभग 16 लाख प्रधानमंत्री आवास राज्य सरकार डहार ले राज्यांश नइ मिले ले बंद होगे हे। श्री साव ह बतईन कि भाजपा कोर ग्रुप के आज होय बैठक म पार्टी ह 11 हजार गांव मन म हितग्राही मन ले फार्म भराय गे निर्णय लेहे। ए हितग्राही मनके संग मुख्यमंत्री के गृह जिला दुर्ग म बड़े आंदोलन करे जाही। एखर अलावा धर्मांतरण, कानून व्यवस्था, प्रसासन अउ अराजकता के मुद्दा उपर घलो सरकार ल घेरे के तैयारी हे।
छत्तीसगढ़िया ओलंपिक
राजधानी रायपुर म आयोजित तीन दिवसीय राज्य स्तरीय छत्तीसगढ़िया ओलंपिक के दूसर दिन लइका अउ सियान मन ह बेहतरीन प्रदर्शन करीन। सरदार बलबीर सिंह जूनेजा इंडोर स्टेडियम म आने-आने आयु वर्ग म आयोजित बिल्लस एकल प्रतियोगिता म सरगुजा संभाग के मोहम्मद सरफराज अंसारी अउ रामपाल अउ रायपुर संभाग के गणेश्वर राम निषाद ह पहिली स्थान पाय हे। उहें, महिला वर्ग म बस्तर संभाग के उर्मिला मौर्य, सरगुजा संभाग के नंदनी अउ बिलासपुर संभाग के नीरा कश्यप पहिली स्थान बनाय हे।
उहें, क्षत्रपति शिवाजी महाराज आउटडोर स्टेडियम म आयोजित गेड़ी दउड़ प्रतियोगिता म सरगुजा संभाग के भूपेन्द्र कुमार राजवाड़े, कवर्धा जिला के पुनेश धुर्व्रे अउ बिलासपुर जिला के आत्माराम ह पहिली स्थान हासिल करे हे। उहें, तीनों आयु वर्ग म बिलासपुर संभाग के ही राजेश्वरी, सफिला कंवर अउ लक्ष्मीबाई सिदार ह प्रथम स्थान प्राप्त करे हे।
उहें, फुगड़ी प्रतियोगिता म बालक वर्ग म महासमुंद जिला के एवन पटेल अउ महिला वर्ग म रायपुर संभाग ले आशो बाई ह बाजी मारे हे।
छत्तीसगढ़िया ओलंपिक के तहत आज कबड्डी, भंवरा, संखली, रस्सा-कसी, लगड़ी दउड़, पिट्ठूल अउ बाटी खेल के प्रतियोगिता होईस। छत्तीसगढ़िया ओलंपिक के राज्य स्तरीय प्रतियोगिता के काली समापन होही।
निःशुल्क पेसमेकर जांच शिविर
दक्षिण पूर्व मध्य रेलवे बिलासपुर के सेंट्रल अस्पताल म आज 22वां निःशुल्क पेसमेकर जांच सिविर के आयोजन करे गीस। ए सिविर म 8 ले 99 बछर के आने-आने प्रकार के कार्डियक पेसमेकर वाले करीब 118 मरीज मनके उपकरण ले जांच करे गीस। सिविर म छत्तीसगढ़ सहित मध्यप्रदेश अउ महाराष्ट्र के कतको जिला के मरीज मन हिस्सा लीन। सिविर म सेंट्रल अस्पताल के ह्दय रोग विशेषज्ञ डॉक्टर सी.के. दास सहित आने चिकित्सक मन ह अपन सेवा दीन।
सुनइया मन ल बतादन कि पेसमेकर जीवन रक्षक उपकरण होथे, जेला ह्दय रोगी मनके छाती के आघू के त्वचा के खाल्हे म कॉलर बोन के नीचे प्रत्यारोपित करे जाथे। बछर 2011 ले ए सिविर के सुरूवात करे गे रिहीस।
धर्मांतरण-ज्ञापन
सरगुजा म जनजातीय गौरव युवा समाज के लोगन मन ह धर्मांतरण रोके के मांग ल लेके आज सरगुजा कलेक्टर ल ज्ञापन सौंपीन। जनजातीय गौरवा युवा समाज के प्रदेश अध्यक्ष इंदर भगत ह ज्ञापन म केहे हे कि नारायणपुर म धर्मांतरित ईसाई मन ह अनुसूचित जनजाति के श्रेणी म अवइया लोगन मन उपर प्राणघातक हमला करे हे। ओमन किहीन कि धर्म परिवर्तन के बाढ़त घटना ह क्षेत्रीय अस्मिता ल संकट म डार देहे, जेखर सेती अब छत्तीसगढ़ के संस्कृति खतरा म हे। ईसाई मनके बाढ़त प्रभाव वाले क्षेत्र मन म सामुदायिक सौहार्द घलो बिगड़त हे अउ एखर ले प्रदेस के आने-आने क्षेत्र मन म अस्थिरता के स्थिति बनत हे। समाज के लोगन मनके मांग हे कि धर्म परिवर्तन ल रोके बर कठोर कानून बनाय जाय।
जनजातीय गौरव युवा समाज डहार ले धर्मांतरण ल लेके करे गे ए मांग ल सरगुजा के विश्व हिन्दू परिषद, धर्म जागरण समन्वय अउ हिन्दूवादी संगठन मन ह घलो समर्थन देहे।
हत्या-आरोपी गिरफ्तार
दुर्ग जिला म बीते रतिहा दू पक्ष के बीच होय मारपीट के घटना म दू युवक मनके मउत होगे। पुलिस ह हत्या के मामला दर्ज करके 15 लोगन मन ल गिरफ्तार कर लेहे। उहें, सी.सी.टी.वी. फुटेज के मदद ले आने आरोपी मनके पहिचान करे जात हे।
भिलाई-छावनी के नगर पुलिस अधीक्षक प्रभात कुमार ह बतईन कि भिलाई थाना क्षेत्र के हथखोज म काली रतिहा कोन्हों बात ल लेके दू पक्ष म विवाद होगे, जेमा दू युवक के मउत होगे। पुलिस के अनुसार ए दोनों पक्ष लंबा बेरा ले हथखोज औद्योगिक क्षेत्र म कबाड़ के चोरी करे के मामला म लिप्त हे।
मुख्यमंत्री-कबीर स्मृति महोत्सव
मुख्यमंत्री भूपेश बघेल ह किहीन कि नवा रईपुर म कबीर शोध संस्थान के स्थापना करे जाही। मुख्यमंत्री काली बालोद जिला के भालूकोन्हा गांव म आयोजित सतगुरू कबीर स्मृति महोत्सव म सामिल होईन। ए मउका म ओमन भालूकोन्हा म कबीर सत्संग भवन, सी.सी. रोड निर्माण अउ सामुदायिक भवन निर्माण के घोसना करीन। कार्यक्रम ल संबोधित करत श्री बघेल ह किहीन कि संत कबीर के प्रासंगिकता हर युग म हे। ओमन समाज म व्याप्त बुराई के पूरा दृढ़ता के संग विरोध करीन अउ बतईन कि प्रेम, सौहार्द्र, आपसी भाईचारा अउ मानवता ले बड़े कोन्हों दूसर चीज नइ हे।
स्कूल-समय
प्रदेस म ए बेरा कड़ाका के ठंड पड़त हे। एला देखत हुए प्रसासन ह राजधानी रायपुर म संचालित स्कूल मनके समय म बदलाव करे हे। जारी आदेश के अनुसार 2 पाली म संचालित होवइया स्कूल मन म प्राथमिक स्तर के कक्षा अब बिहनिया 8 बजे ले मंझनिया 2 बजे तक चलही। उहें, माध्यमिक अउ हायर सेकेंडरी स्कूल के कक्षा मंझनिया 12.30 बजे ले संझा 05 बजे तक चलही।
दुर्घटना
दुर्ग जिला म उतई-सेलूद मार्ग म काली संझा ट्रैक्टर अउ चारपहिया वाहन के भिंड़त होगे, जेमा एक महिला सहित दू लोगन के मउत होगे। उहें, 13 आने लोगन मन गंभीर रूप ले घायल होगे।
मिले जानकारी के अनुसार ए सबो लोगन चारपहिया वाहन म सवार होके सुपेला ले बटरेल-जामगांव जात रिहीन। इही दउरान धौराभाटा मोड़ के तीर म चारपहिया वाहन अउ ट्रैक्टर म भिंड़त होगे। ए घटना म दू लोगन के मउका म ही मउत होगे।
उहें, राजनांदगांव जिला म चिचोला थाना क्षेत्र के अंतर्गत ग्राम जनकपुरी म मोटर साइकिल सवार सड़क किनारे खड़े कंटेनर ले जा टकरईस। ए हादसा म मोटर साइकिल सवार एक मनखे के मउत होगे। त उहें, आने दू मनखे मन घायल होगे।