प्रदेस म त्रिस्तरीय पंचायत अउ नगरीय निकाय उपचुनाव बर काली वोट डाले जाही। पंचायत उपचुनाव के चलत बिहनिया सात बजे ले मंझनिया तीन बजे तक अउ नगरीय निकाय मन म बिहनिया आठ बजे ले संझा पांच बजे तक वोटिंग होही। राज्य निर्वाचन आयोग ह मतदान ल लेके जम्मों तैयारी करीबन पूरा कर लेहे। पंचायत उपचुनाव के चलत जिला पंचायत सदस्य के एक ठिन पद समेत जनपद पंचायत सदस्य के आठ ठिन, सरपंच के छियासठ अउ पंच के चौंसठ ठिन रीता पद बर उपचुनाव होवत हे। उहें, नगरीय निकाय उपचुनाव के चलत चौदह ठिन नगरीय निकाय मन म पार्षद के पन्द्रह ठिन पद बर अड़तीस झिन उम्मीदवार चुनाव मैदान म हे।
इही बीच, राज्य सरकार ह त्रिस्तरीय पंचायत अउ नगरीय निकाय उपचुनाव बर काली नौ जनवरी के संबंधित निर्वाचन क्षेत्र के सरकारी संस्थान अउ कार्यालय मन म बर सार्वजनिक अवकाश घोसित करे हे। मतदान वाले जघा मन म ए दिन वोटिंग करे बर सामान्य अवकाश घलो रइही।
फोटोयुक्त निर्वाचन नामावली
छत्तीसगढ़ म फोटो वाले निर्वाचक नामावली मन बर बिसेस संक्षिप्त पुनरीक्षण बाद रजिस्टर्ड मतदाता मनके संख्या म करीबन एक लाख संतानवे हजार चार सौ नब्बे मन बाढ़े हे। एक जनवरी दू हजार तेईस के स्थिति म निर्वाचन नामावली के अंतिम प्रकासन करे गेहे। एखर मुताबिक प्रदेस म अब रजिस्टर्ड मतदाता मनके कुल संख्या एक करोड़ चौरानवे लाख चौव्वन हजार ले जादा होगे हे। एमा संतानवे लाख सत्ताईस हजार पुरूष अउ संतानवे लाख छब्बीस हजार माईलोगिन वोटर सामिल हे। एखर संगे प्रदेस म करीबन एक लाख सैंतालीस हजार दिव्यांग अउ आठ सौ ग्यारह थर्ड जेंडर वोटर हवय। राज्य म अट्ठारह ले उन्नीस बछर आयु वर्ग म दू लाख पन्द्रह हजार नवा मतदाता मनके पंजीयन होय हे। इही तरह, बीस ले उनतीस बछर आयु वरग म बयालीस लाख सत्यासी हजार वोटर रजिस्टर्ड हे। एखर संगे बिसेस पिछड़ा जनजाति समूह मनके पांच हजार सात सौ छब्बीस नवा मतदाता मन ल घलो जोड़े गेहे।
इहां ए बतादन कि प्रदेस म ए बछर विधानसभा चुनाव होवइया हे।
मुख्यमंत्री-प्रधानमंत्री पत्र
मुख्यमंत्री भूपेश बघेल ह प्रधानमंत्री नरेन्द्र मोदी ल पाती लिखके उनला मिलेट फसल मनके उत्पादन अउ उपभोग ल बढ़ावा देके संगे एला जन आंदोलन बनाय बर पहल करे के आग्रह करे हे। मुख्यमंत्री ह पाती म केहे हे कि राष्ट्रीय खाद्य सुरक्षा अधिनियम म अनाज, मध्यान्ह भोजन, पोषण आहार, आश्रम अउ हॉस्टल मनके पढ़ईया लइका मन ल दे जावत रियायती अनाज म बीस ले पच्चीस प्रतिसत मिलेट फसल ल संघराय जाय। संगे केन्द्र सरकार डहार ले मिलेट फसल मनके न्यूनतम समर्थन मूल्य म सकेले बारे म घलो निर्णय लेके आग्रह करे गेहे। मुख्यमंत्री ह किहीन हे कि प्रदेस म मिलेट फसल मनके उत्पादन ल बढ़ावा दे बर मिलेट मिसन के स्थापना करे गेहे। इही तरह, राज्य म कोदो-कुटकी अउ रागी के न्यूनतम समर्थन मूल्य घोसित करके ओखर सकलई, बिसई अउ बेचई के व्यवस्था करे गेहे।
मुख्यमंत्री श्रमिक सियान सहायता
प्रदेस म मुख्यमंत्री श्रमिक सियान सहायता के चलत एकमुश्त देवइया आर्थिक सहायता रासि ल दस हजार रूपिया ले बढ़ाके बीस हजार रूपिया कर दे गेहे। श्रम विभाग ह ए बारे म अधिसूचना जारी कर देहे। योजना के लाभ लेवइया निर्माण श्रमिक के रूप म कम से कम पाछु तीन बछर ले छत्तीसगढ़ भवन अउ सन्निर्माण कर्मकार कल्याण मंडल म रजिस्टर्ड होना जरूरी हे। संगे निर्माण श्रमिक के न्यूनतम आयु उनसठ बछर अउ अधिकतम साठ बछर होना चाहिए। पात्र कमिया मन ऑनलाइन एप्लीकेशन श्रम विभाग के विभागीय पोर्टल म दे सकत हे।
नितिन नबीन-दुर्ग
प्रदेस म अवइया विधानसभा चुनाव ल लेके भारतीय जनता पार्टी ह तैयारी सुरू कर देहे। एखर चलत भाजपा नेता मनके सरलग प्रदेस दउरा चलत हे। इही कड़ी म भाजपा के प्रदेस सह प्रभारी नितिन नबीन आज दुरूग पहुंचीन, जिहां रैली निकाले गीस। ए मउका म श्री नबीन ह पार्टी पदाधिकारी, कार्यकर्ता अउ दुरूग नगर निगम के पार्षद मनके बइठका लीन।
एखर आगू, पत्रकार मन ले गोठियावत श्री नबीन ह किहीन कि अवइया विधानसभा चुनाव ल देखत संगठन के नजरिया ले ए बइठका ह काफी महत्वपूर्ण हे। पार्टी के प्रमुख कार्यकर्ता मन ल मैदानी स्तर तक ले जाय बर प्रोत्साहित करे जाही। ओमन राज्य सरकार उपर आरोप घलो लगईन कि प्रदेस म प्रधानमंत्री आवास योजना समेत केन्द्र सरकार के कई ठिन योजना मनके बने ढंग ले क्रियान्वयन नइ होवत हे।
उहें, बिलासपुर दउरा म पहुंचे भाजपा के प्रदेस प्रभारी ओम माथुर ह किहीन कि पार्टी के संसदीय बोर्ड ह तय करथे कि कोनों भी राज्य म पार्टी ह कोनों नेता के चेहरा ल आगू राख के चुनाव लड़ही या फेर बिना चेहरा के। श्री माथुर ह किहीन कि भाजपा ह देस के इकलौता अइसन पार्टी हरय, जउन ह सालभर संगठन ल कई ठिन कारीकरम ले सक्रिय राखथे।
छत्तीसगढ़िया ओलंपिक
मुख्यमंत्री भूपेश बघेल ह किहीन हे कि छत्तीसगढ़ के पारंपरिक खेल मन ल बढ़ावा दे बर हर बछर छत्तीसगढ़िया ओलंपिक के आयोजन सितंबर-अक्टूबर महीना म करे जाही। ए गोठ ल मुख्यमंत्री ह आज राजधानी रईपुर के बलवीर सिंह जुनेजा स्टेडियम म छत्तीसगढ़िया ओलंपिक के राज्य स्तरीय स्पर्धा के उद्घाटन समारोह म बोलत बेरा किहीन। ए मउका म मुख्यमंत्री ह छत्तीसगढ़िया ओलंपिक के क्लस्टर, ब्लॉक, जिला, संभाग अउ राज्य स्तर के स्पर्धा म पहला, दूसरा अउ तीसरइया स्थान पवइया प्रतिभागी मन ल पुरस्कार रासि देके के घोसना करीन। श्री बघेल ह टॉस करके छत्तीसगढ़िया ओलंपिक के राज्य स्तरीय कबड्डी खेल प्रतियोगिता के सुरूवात करीन।
इहां ए बतादन कि छत्तीसगढ़िया ओलंपिक के राज्य स्तरीय स्पर्धा म जम्मों जिला के करीबन एक हजार नौ सौ प्रतिभागी भाग लेवत हे। ए प्रतियोगिता दस जनवरी तक चलही। इंडोर स्टेडियम म फुगड़ी, बिल्लस, भौंरा, बाटी अउ कबड्डी, उहें, आउटडोर स्टेडियम म संखली, रस्साकसी, लंगड़ी, पिट्ठूल, गेड़ी दउड़ होही। सप्रे साला मैदान म खो-खो, गिल्ली डंडा अउ स्वामी विवेकानंद स्टेडियम कोटा म लंबी कूद अउ सौ मीटर दउड़ के प्रतिस्पर्धा होही।
राजधानी रईपुर समेत प्रदेस के कई ठिन जघा म ए बेरा कड़ाकेदार जाड़ पड़त हे। एखर असर सामान्य जनजीवन म घलो देखे जात हे। सरगुजा संभाग के मैनपाट म बिहनिया बेरा बरफ वाले चद्दर देखे ल मिलत हे। जाड़ ले बांचे बर लोगन मन गरम ओनहा अउ भूर्री के सहारा लेवत हे।
इही बीच, मौसम विभाग ह चेताय हे कि प्रदेस के कोरिया, सूरजपुर, बलरामपुर, सरगुजा, जशपुर, कबीरधाम, बिलासपुर पेण्ड्रा रोड, दुरूग अउ ओखर ले लगे जिला मन म एक-दू पॉकेट यानि कोनों-कोनों जघा बिसेस म अवइया अड़तालीस घंटा के दउरान सीतलहर चल सकत हे।
– मुख्यमंत्री ह काली राजधानी रईपुर के गांधी नेहरू उद्यान म राखे गे फल, फुल अउ साग भाजी के तीन दिन वाले प्रदर्सनी अउ प्रतियोगिता के सुभारंभ करीन।
– खैरागढ़-छुईखदान-गंडई जिला के गातापार थाना क्षेत्र के कौरूआ अउ भोथली के बीच जंगल म सुरक्षा बल के जवान मन एक ठिन आईईडी बरामद करीन, जेला बाद म निष्क्रिय कर दे गीस।
– दुरूग जिला म शिवनाथ नदी ओवर ब्रिज तीर कार के टक्कर ले फटफटी सवार पति-पत्नी के मउत होगे।
– कबीरधाम जिला के सरदार वल्लभ भाई पटेल सहकारी शक्कर कारखाना म एक ठिन करमचारी के मसीन भीतरी फंसे ले मउत होगे। घटना के जांच बर प्रसासनिक अधिकारी मनके संघरा टीम बनाय गेहे।
अउ
– महासमुंद जिला म कोडार एलबीसी नहर तीर करेंट ले एक नर हाथी के मउत होगे। वन विभाग के टीम ह घटना के जांच सुरू कर देहे।