इही बीच कोंडागांव पुलिस ह पथराव के घटना म शामिल ग्यारा आरोपी मन ल गिरप्तार कर लेहे। एमा जिला पंचायत सदस्य खेमचंद नेताम, गोंडवाना समाज के जिलाध्यक्ष बुद्धसिंह नेताम, अउ सरपंच संग आने लोगन मन सामिल हे। उंहे पुलिस डहार ले पत्थरबाजी म सामिल आने लोगन उपर कानूनी कार्रवाई बर उंखर पहिचान करे जात हे।
खबर के मुताबिक नारायणपुर म धर्मांतरण ल लेके दू पक्ष के बीच होय विवाद ल रोके खातिर पुलिस ह हस्तक्षेप करे रीहिन। ए दउरान होय झड़प अउ पत्थरबाजी के घटना म सिर म चोट लगे ले पुलिस अधीक्षक सदानंद कुमार गंभीर रूप ले घायल होगे।
इही बीच भाजपा के एक ठिन छै सदस्यीय प्रतिनिधि मंडल घटना के जानकारी बर नारायणपुर जात रीहिन। ए प्रतिनिधि मंडल म सांसद संतोष पांडे, केदार कश्यप, मोहन मंडावी अउ महेश गागड़ा संग आने प्रतिनिधि मन सामिल रीहिन। भाजपा के मुताबिक पुलिस ह बेरिकेट्स लगाके ए प्रतिनिधि मंडल ल नारायणपुर जाय ले पहिली बेरून थाना तीर रोक दीस। जेखर विरोध म भाजपा नेता रद्दा म ही धरना म बइठ गे।
उंहे पार्टी के प्रदेश अध्यक्ष अरूण साव अउ सांसद श्री पांडे ह आरोप लगाय हे कि राज्य सरकार के संरक्षण म आदिवासी इलाका मन म धर्मांतरण कराये जात हे ।
छत्तीसगढ़ विधानसभा के शीतकालिन सत्र के दूसर दिन सदन म आज घलो सत्तापक्ष ह आरक्षण के मुद्दा ल जोरशोर ले उठात हंगामा करके नारेबाजी करीन। एखर सेती सदन के कार्यवाही बाधित होइस। विधानसभा अध्यक्ष डॅाक्टर चरणदास महंत ह दस मिनट बर सदन के कार्यवाही ल स्थगित कर दीस। प्रश्नकाल खतम होय के बाद कांग्रेस सदस्य मन ह नारेबाजी शुरू कर दीन तब आसंदी ह ओमन ल शांत रेहे बर कीहिन, फेर ओमन हंगामा जारी रखीन।
सदन म आज नारायणपुर म धर्मांतरण के मुद्दा ल लेके होय विवाद म घलो जमके हंगामा होइस, एखर चलत सदन के कार्यवाही काली बीहनिया ग्यारा बजे तक बर स्थगित कर दे गेहे। ए घटना बर भाजपा सदस्य मन ह राज्य सरकार ल जिम्मेदार बतावत वेल म आके नारेबाजी करीन। जेखर बाद ओमन ल निलंबित कर दे गीस।
उंहे संविदा कर्मचारी मनके नियमितिकरण के मामला घलो आज सदन म जोरशोर ले उठाय गीस। भाजपा सदस्य शिवरतन शर्मा के सवाल के जवाब म स्वास्थ्य मंत्री टी.एस. सिंहदेव ह कीहिन कि घोषणा पत्र म अनियमित अउ संविदा कर्मचारी मन ल नियमित करे के बात केहे गे रीहिस। एखर आधार म सबो विभाग ले जानकारी मंगाये जात हे। एखर उपर विपक्षी सदस्य श्री शर्मा ह नियमितिकरण के समय सीमा के जानकारी मांगीन। जवाब म मंत्री ह कीहिन कि वित्तीय प्रबंधन के हिसाब ले शासन स्तर म विचार करे जात हे अउ एला अवइया बजट या अनुपूरक बजट म समाहित करे जाय के कोशिश करे जाही। मंत्री के जवाब के बाद भाजपा सदस्य मन ह शोर शराबा शुरू कर दीस तब सत्ता पक्ष के सदस्य मन ह विपक्षी सदस्य के विरोध करीन।
आरक्षण के मुद्दा ल लेके कांग्रेस ह आज राजधानी रायपुर म जनअधिकार रैली के आयोजन करीस। साईंस कॉलेज मैदान म आयोजित ए रैली म मुख्यमंत्री भूपेश बघेल अउ प्रदेश प्रभारी कुमारी शैलजा के संग पार्टी के बड़का नेता अउ मंत्री मौजूद रीहिन। ए मउका म अपन संबोधन म मुख्यमंत्री ह कीहिन कि आरक्षण के मुद्दा ल अभियान के रूप म जन-जन तक पहुंचाय गीस। ओमन कीहिन कि सरकार आरक्षण के लाभ देना चाहथे। फेर ए संबंध म विधानसभा ले पारित करे गे विधेयक म राज्यपाल हस्ताक्षर नइ करत हे अउ न ही एला वापिस करत हे। श्री बघेल ह आरोप लगाय हे कि संविधान के व्यवथा के पालन नइ होत हे, जेखर सेती जनअधिकार रैली निकाले गेहे।
उंहे प्रदेश प्रभारी कुमारी शैलजा ह आरक्षण ल लेके भाजपा उपर राजनीतिक आरोप लगाय हे। ओमन कीहिन कि भाजपा ह राज्यपाल ल विधेयक म हस्ताक्षर कर ले रोकीन।
दूसर कोति नेता प्रतिपक्ष नारायण चंदेल ह कीहिन कि राज्य सरकार अन्य पिछड़ा वर्ग ल आरक्षण नइ देना चाहत हे अउ जानबूझके क्वांटीफायबल डाटा आयोग के रिपोर्ट ल सार्वजनिक नइ करत हे।
प्रधानमंत्री नरेंद्र मोदी ह आज वीडियो कॉन्फ्रेंसंग ले एक सौ आठवां भारतीय विज्ञान कांग्रेस के उद्घाटन करीन। पांच दिन के ये विज्ञान कांग्रेस नागपुर म आयोजित करे जात हे। ओमन अपन संबोधन म वैज्ञानिक समुदाय के आह्वान करीन कि ओमन ह ओ विसय उपर काम करय जउन संपूर्ण मानवता अउ भारत के बाढ़त जरूरत बर महत्वपूर्ण हे। श्री मोदी ह कीहिन कि माइलोगिन समाज अउ विज्ञान के प्रगति के प्रतिबिंब हरय। ए बछर के सम्मेलन के बिसय हरय- महिला सशक्तिकरण के साथ सतत विकास के लिए विज्ञान और प्रौद्योगिकी।
बीजापुर जिला ले अगवा करे गे चार म ले दू लोगन ल माओवादी ह छोड़ देहे। उंहे दू आने लोगन मन अभी घलो माओवादी के कब्जा म बताये जात हे। कोंडागांव के रहइया दू झिन ग्रामीण मन ल माओवादी मन ह बीते रतिहा छोड़ दीन। एखर परिवार वा ले मन ह ग्रामीण मनके रिहाई के जानकारी दीन।
खबर के मुताबिक पाछू चौबीस दिसंबर के माओवादी मन ह एक झिन ठेकेदार संग चार लोगन मन ल अगवा कर ले रीहिस। एखर बाद अगवा करे गे ग्रामीण मनके परिवार वाले मन ह पुलिस ले उचित कार्रवाई के मांग करत माओवादी मनले घलो अपन लोगन के सुरक्षित रिहाई के अपील करे रीहिन।
उंहे बीजापुर जिला म पामेड़ थाना क्षेत्र के चिंतावागु नदी तीर बनाए गे सुरक्षा बलके कैंप म माओवादी मन ह हमला करीन। ए दउरान सुरक्षा बल अउ माओवादी के बीच मुठभेड़ घलो होइस। फेर जवान मनके सक्रियता के चलते कोनो हताहत नइ होय हे।
सरगुजा म बहत्तर बछर के हाथी सिविल बहादुर के मउत हो गीस। सिविल बहादुर ल छत्तीसगढ़ ले सबले बुजुर्ग हाथी के नाव ले जाने जाथे। पाछू कुछएक दिन ले ओखर तबियत बने नइ रीहिस अउ आज बीहनिया रामकोला तीर हाथी पुनर्वास केंद्र म उंखर मउत होगे।
उंहे मनेन्द्रगढ़-चिरमिरी-भरतपुर जिला के मनेन्द्रगढ़ वनमंडल म तेंदुआ के हमला ले एक झिन माइलोगिन के मउत होगे। जनकपुर परिक्षेत्र के कुंवारी बीट के सिंगरौली गांव के रहइया एक झिन माइलोगिन आज बीहनिया अपन घर के बाहिर खड़े रीहिस, उही बखत तेंदुआ ह ओखर उपर हमला कर दीस।
बताय गेहे कि ए इलाका म तेंदुआ के हमला म अब तक दू झिन माइलोगिन के मउत हो चुके हे अउ उंहे एक झिन लइका घायल हो चुके हे। तेंदुआ के आतंक ले स्थानीय ग्रामीण दहशत म हे।
रायगढ़ पुलिस ह हैदराबाद म इंटा भट्ठा म बंधक बनाके राखे गे बारा मजदूर अउ उंखर छै झिन लईका मन ल छुड़ाय म सफलता हासिल करे हे। एमा माइलोगिन घलो सामिल हे।
एकताल गांव म रहइया झारा समुदाय के बारा ले जादा लोगन जउन मन ह बेलमेटल शिल्पकार हरय, ओमन ह रोजगार खोजत हैदराबाद गे रीहिन, जिहां ओमन ल इंटा भट्ठा के मालिक ह बंधक बनाले रीहिस अउ ओमन ल न तो मजदूरी देवत रीहिस, न ही अपन घर लहुटत देत रीहिस।
जानकारी मिले म ए मजदूर के परिवार वाले मन ह रायगढ़ पुलिस म शिकायत दर्ज करइन, जेखर बाद चक्रधर नगर थाना ले पुलिस के टीम ह हैदराबाद पहुंचीन अउ स्थानीय पुलिस के मदद ले ए ग्रामीण मन ल छुड़ाय गीस। संगेसंग इंखर बकाया मजदूरी दिलाके एमन ल इंखर भेज दे गीस।
खबर के मुताबिक बेलमेटल शिल्प बर एकताल के शिल्पकार प्रसिद्ध हे, एला राष्ट्रपति पुरस्कार घलो मिले हे।