विस-शीतकालीन सत्र-01
छत्तीसगढ़ विधानसभा के शीतकालीन सत्र के दूसर चरण आज ले सुरू होगे। सत्र के पहिली दिन आज आरक्षण के मुद्दा उपर सत्तापक्ष अउ विपक्ष के बीच आरोप-प्रत्यारोप के दौरान अब्बड़ सोर-सराबा होईस। हंगामा ल देखत विधानसभा अध्यक्ष ह विधानसभा के कार्यवाही ल काली तक बर स्थगित कर दीन।
प्रश्नकाल के बाद कांग्रेस विधायक मोहन मरकाम ह किहीन कि विधानसभा म विधेयक पारित होय के बाद घलो एला अब तक लागू नइ करे जा सकय हे, जेखर उपर विपक्षी सदस्य मन ह सोर-सराबा के बीच सत्तापक्ष उपर आरोप लगाय बर सुरू कर दीन। सत्तापक्ष के विधायक मन ह आरक्षण विधेयक लागू होय म देरी बर राजभवन ल जिम्मेदार ठहरईन। ए बात उपर विधानसभा अध्यक्ष ह किहीन कि राजभवन अउ राज्यपाल के प्रति मर्यादा के पालन होना चाही। ए बारे म कोनों प्रकार के टीका-टिप्पणी नइ करे जा सकय। इही बीच, विपक्ष के कोनों-कोनों सदस्य मन ह क्वांटीफायबल डाटा आयोग के रिपोर्ट ल सदन म पेस करीन अउ सोर-सराबा करत गर्भगृह तक पहुंच हे, जेखर ले ए जम्मों सदस्य मन ह खुदे निलंबित होगे। सदन म सोर-सराबा ल देखत विधानसभा अध्यक्ष ह पहिली तीन मिनट अउ बाद म दस मिनट बर सदन के कार्यवाही ल स्थगित कर दीन, जेखर बाद सदन के कार्यवाही एक घांव फेर सुरू होईस। फेर भाजपा सदस्य मन ह आरक्षण के मुद्दा ल लेके सरकार ल घेरे के कोसिस करीन। इही दउरान दूनों पक्ष के सदस्य मन ह एक-दूसर उपर आरोप-प्रत्यारोप लगावत रिहीन। आसंदी कोति ले सांत कराय के बाद घलो सोर-सराबा चलत रिहीस, जेखर बाद विधानसभा अध्यक्ष ह सदन के कार्यवाही ल काली तक बर स्थगित कर दीन।
विस-शीतकालीन सत्र-02
एखर पहिली, जल जीवन मिशन के निविदा ल लेके आज सदन म सोर-सराबा होईस। भाजपा के डॉक्टर कृष्णमूर्ति बांधी ह आरोप लगईन कि बिलासपुर जिला म जल जीवन मिशन के तहत बसे संख्या म निविदा जारी करे गीस। फेर ओला निरस्त करके जादा भाव म एक घांव फेर निविदा जारी करे गीस। डॉक्टर बांधी ह आरोप लगईन कि एखर ले सरकारी खजाना उपर उपरहा भार पड़थे। जवाब म लोक स्वास्थ्य यांत्रिकी मंत्री गुरू रूद्र कुमार ह किहीन कि सौ म अस्सी निविदा एखर सेती रद्दा करे गीस कि एमा कोनों-कोनों प्रकरण म एक भी निविदा नइ मिले रिहीस। ए मुद्दा उपर नेता प्रतिपक्ष नारायण चंदेल ह सदन के समिति ले जांच कराय के मांग करीन। ए मामला उपर पूर्व नेता प्रतिपक्ष धरमलाल कौशिक अउ विधायक अजय चंद्राकर ह घलो पूरक प्रश्न करीन। भाजपा विधायक ब्रिजमोहन अग्रवाल ह आरोप लगावत किहीन कि अतेक गंभीर बिसय उपर घलो मंत्री ह बने ढंग ले जवाब नइ देवत हे। एखर बाद मंत्री के जवाब ले असंतुष्ट भाजपा सदस्य मन ह सदन ले बहिर्गमन कर दीन।
आज सदन म कांग्रेस विधायक कुलदीप जूनेजा ह प्रदेस के सीमेंट संयंत्र मन म करे गे पौधरोपण अउ प्रदूषण के स्थिति उपर सवाल करीन। ओमन पूछीन कि सोनाडीह, हिरमी, रिसदा अउ धनधनी म चलत संयंत्र मन म कतका भूईंया म रूख-राई लगाय बर राखे गेहे। जवाब म पर्यावरण मंत्री ह किहीन कि संयंत्र म एक तिहाई जमीन म पौधा लगाय गेहे। ए जवाब ले विधायक जुनेजा ह संतुष्ट नइ हो पईन, जेखर बाद विधानसभा अध्यक्ष ह मंत्री ल किहीन कि प्रदूषण के सिकायत आवत हे, जेला देखत सीमेंट संयंत्र मन म कतका पौधा लगाय गेहे, एखर बने ढंग ले जांच करावयं।
विस-शीतकालीन सत्र-03
एक ठिन आने प्रश्न म जनता कांग्रेस छत्तीसगढ़ म विधायक रेहे धरमजीत सिंह के सवाल के जवाब म पर्यावरण मंत्री ह सदन ल बतईन कि पाछु तीन बछर के दउरान प्रदेस म तिरालीस हाथी के मउत होय, जेमा ले तेरह हाथी के मउत करेंट लगे ले होय हे।
एखर पहिली, आज सदन के कार्यवाही सुरू होतेच विधानसभा अध्यक्ष ह भानुप्रतापपुर उनचुनई म चुने गे कांग्रेस विधायक सावित्री मंडावी ल पद अउ गोपनीयता के सपथ देवईन। छै जनवरी तक चलइया विधानसभा सत्र के दउरान कुल पांच बइठका होही।
भारतीय विज्ञान कांग्रेस
प्रधानमंत्री नरेन्द्र मोदी ह काली वीडियो कान्फ्रेंस के माध्यम ले भारतीय विज्ञान कांग्रेस ल संबोधित करही। एसो के बिसय हे – ‘‘महिला सशक्तिकरण के साथ सत्त विकास के लिए विज्ञान और प्रौद्योगिकी‘‘। एखरे उपर गोठबात के संगेसंग विज्ञान अउ प्रौद्योगिकी के महत्ता उपर घलो गोठबात होही।
नारायणपुर एसपी-हमला
नारायणपुर म धर्मांतरण ल लेके दू पक्ष के बीच चलत विवाद के बीच आज स्थिति गंभीर होगीस। सर्व आदिवासी समाज के लोगन मन ह नगर बंद करत नारायणपुर-कोंडागांव रद्दा म चक्काजाम कर दीन, जेखर सेती दूनों पक्ष कोति ले झड़प अउ पत्थरबाजी होय के सेती पुलिस ल बीच म आय बर पड़ीस। इही दउरान प्रदर्सन करत लोगन मन ल पत्थरबाजी सुरू कर दीन। ए पत्थरबाजी म पुलिस अधीक्षक सदानंद कुमार ह गंभीर रूप ले घायल होगे। घायल पुलिस अधीक्षक के सिर म टांका घलो लगाय गेहे। उहें, पुलिस डहार ले पत्थरबाजी म सामिल लोगन मन उपर कानूनी कार्रवाई करे बर उंखर पहिचान करे जात हे।
ऐति, नारायणपुर म स्थिति ल देखत बस्तर रेंज के पुलिस महानिरीक्षक सुंदरराज पी. ह पुलिस बल के संग मउका म पहुंच गे रिहीन। ए बेरा स्थिति नियंत्रण म बताय जात हे।
जानबा के मुताबिक नारायणपुर के बंगला पारा म धर्मांतरण के खिलाफ बड़ संख्या म आदिवासी समुदाय के लोगन मन ह आज नारायणपुर-कोंडागांव राजमार्ग म सकलाय रिहीन। आदिवासी समाज के आरोप हे कि एक बिसेस समुदाय के लोगन मन ह आदिवासी मनके संग मारपीट करीन। त दूसर पक्ष ह आरोप लगाय हे कि आदिवासी समुदाय के लोगन मन ह बंगलापारा स्थित गिरिजा घर म घुस के तोड़फोड़ करीन। ए घटना के बाद ए जघा म पुलिस बल तैनात कर दे गेहे।
दुर्घटना
जशपुर जिला म बेन घाट के तीर एक ठिन कार के अनते-तनते होके रूख ले टकराय ले एमा बइठे चार झिन लोगन के मउत होगे, जेमा ले छै झिन आने मनखे मन गंभीर रूप ले घायल होगे हे। मृतक म बाप-बेटा के संगेसंग एक झिन माईलोगिन अउ एक झिन नोनी घलो सामिल हे। ए जम्मों झिन एके परिवार के बताय जात हे। पुलिस ले मिले जानबा के मुताबिक ए परिवार के मनखे मन पिकनिक मनाय के बाद लहुटत रिहीन, तभे ए घटना होगे। घायल मनके इलाज रांची के अस्पताल म चलत हे।
माओवादी-ग्रामीण अपहरण
बीजापुर जिला म पाछु चौबीस दिसंबर के एक झिन ठेकेदार के संगेसंग चार झिन लोगन मन ल माओवादी मन डहार ले अगुवा करे के खबर हे। चौबीस दिसंबर के बाद ले ए चारों झिन के बारे म अब तक कोनों जानबा नइ मिल सके हे। सोशल मीडिया म जारी वीडियो म ए लोगन मनके परिवार वाले मन ह माओवादी मन उपर अपहरण के संसो जताय हे। परिजन मन ह पुलिस ले बने कार्रवाई के मांग करत माओवादी मन ले घलो ए लोगन मन ल छोड़े के बिनती करे हे। ए वीडियो म बस्तर के सामाजिक कार्यकर्ता सोनी सोरी ह बतावत हे कि एखर परिजन म चौबीस दिसंबर के गंगालूर कोति गे रिहीन, जेखर बाद एखर मनके बारे म कोनों प्रकार के जानबा नइ मिल पात हे।
ऐति, बीजापुर पुलिस ह घलो ए मामला म पूरा जानबा लेवत हे।
मुख्यमंत्री-कौशल्या मंदिर
मुख्यमंत्री ह रईपुर के तीर चंदखुरी स्थित माता कौशिल्या मंदिर म श्रद्धालु मन बर इहां बने सुविधा बढ़ाय के निरदेस देहे, जेमा मंदिर कोति जवइया रद्दा ल चौड़ा करे के संगेसंग रद्दा म बिजली के खंभा लगाय अउ गाड़ी मनके पार्किंग बर बने ढंग ले व्यवस्था करे के बाद केहे हवय। उहें, मंदिर परिसर के अंदर अउ बाहिर पीये के पानी बर वाटर फील्टर लगाय जाही। मुख्य सचिव ल देगे निरदेस म केहे हवय कि मंदिर परिसर के बाहर के दीवार मन म रामकथा ल भित्तिचित्र के माध्यम ले बनाय जाय। उहें, मंदिर परिसर के तरिया म समुद्र मंथन के झांकी अउ भगवान विष्णु के मूर्ति ल बढ़िया ढंग ले सजाय जाय।