देसभर म आज ले नवा एकीकृत खाद्य सुरक्षा योजना लागू होगे हे। केन्द्रीय मंत्रिमंडल के मुताबिक ए बछर राष्ट्रीय खाद्य सुरक्षा अधिनियम म इक्यासी करोड़ ले जादा लाभार्थी मन ल निःशुल्क खाद्यान्न दे जाही। ए अधिनियम ले देसभर म एक राष्ट्र-एक रासनकार्ड म पोर्टेबिलिटी तय करे जाही। एकीकृत खाद्य सुरक्षा योजना के पूरा खरचा केन्द्र सरकार ह करही। देसभर म पांच लाख ले जादा उचित मूल्य के दुकान हे, जेखर ले हितग्राही मन ल मुफत रासन-पानी दे जाही। खाद्य सब्सिडी के रूप म एक बछर म दू लाख करोड़ रूपिया ले जादा के खरचा केन्द्र सरकार ह करही।
नववर्ष-स्वागत
जम्मांं दुनियाभर के संगेसंग छत्तीसगढ़ म घलो नवा बछर ल हंसी-खुसी के संग मनाय जावत हे। लोगन मन बछर दू हजार तेईस के स्वागत पूरा जोस अउ उत्साह के संग करीन। रात बारह बजते लोगन मन ल एक-दूसर ल बधाई देके नवा बछर के खुसयारी मनईन। नवा बछर के पहिली दिन आज मंदिर मन म श्रद्धालु मनके रेम लगे हे।
राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेन्द्र मोदी, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह नवा बछर के मउका म लोगन मन ल बधाई दीन।
मुख्यमंत्री-नववर्ष घोषणा
मुख्यमंत्री भूपेश बघेल ह आज नवा बछर के बेरा म राजधानी रईपुर म चावड़ी के कमिया मन संग नवा बछर मनईन। ए मउका म मुख्यमंत्री ह श्रमिक मन ल चार ठिन नवा सौगात दीन। ओमन छत्तीसगढ़ भवन अउ सन्निर्माण कर्मकार कल्याण मंडल के रजिस्टर्ड श्रमिक मन बर चलत मुख्यमंत्री श्रमिक सहायता योजना के रासि ल दस ले बढ़ाके बीस हजार रूपिया एकमुश्त देके घोसना करीन। संगे श्री बघेल ह प्रतियोगी परीक्षा बर कमिया मनके लइका मन ल निःशुल्क कोचिंग सहुलियत देके बात किहीन। ओमन चौथी अउ पांचवीं कक्षा के लइका मन ल सैनिक स्कूल, नवोदय अउ आने निजी संस्था म एडमिसन बर कोचिंग अउ ट्रेनिंग दे खातिर मुख्यमंत्री आधारभूत शिक्षा प्रशिक्षण सहायता योजना सुरू करे के ऐलान करीन।
उहें, मुख्यमंत्री ह श्रमिक मन बर चलत मेधावी छात्र-छात्रा शिक्षा प्रोत्साहन योजना के नाव ल बदलत ‘‘मुख्यमंत्री नोनी-बाबू मेधावी शिक्षा योजना‘‘ करे के घोसना करीन। ए योजना ले मुख्यमंत्री ह नवा कोर्स – इंजीनियरिंग, आईआईटी, बीटेक, ट्रिपल आईटी, एम टेक अउ एमबीबीएस के पढ़ई समेत विदेस म पढ़े बर घलो कमिया मनके लइका मन ल सहायता देके घोसना करीन। श्री बघेल ह ए सबो म पढ़ई बर श्रमिक मनके लइका मन ल एडमिशन फीस, शैक्षणिक फीस अउ भोजन के फीस म सहायता देके संगे हर बछर स्टेशनरी बर घलो दू हजार रूपिया सहायता रासि देके घोसना करीन।
मुख्यमंत्री-नववर्ष मिलन समारोह
मुख्यमंत्री भूपेश बघेल ह किहीन हे कि बस्तर संभाग म माओवादी मन अब नान्हें जघा म सकला के रहि गेहे। ओमन किहीन कि राज्य सरकार के विश्वास, विकास अउ सुरक्षा के रणनीति म चलत सुरक्षा बल मन आदिवासी, वनवासी मनके भारोसा जीते म सफलता पाय हे।
श्री बघेल आज राजधानी रईपुर के पुलिस परेड मैदान म पुलिस के अधिकारी अउ जवान मन बर राखे गे नववर्ष मिलन समारोह ल संबोधित करीन। ओमन किहीन कि पुलिस अउ पैरामिलिट्री फोर्स के साहस, समर्पण अउ बहादुरी ले बस्तर के अंदरूनी इलाका मन म सड़क पुल-पुलिया के बनई संभव हो सकीस, जेखर ले ए जघा म लोगन मन तक सासन के योजना के लाभ पहुंचत हे। मुख्यमंत्री ह किहीन कि बस्तर के अंदरूनी इलाका मन म एक बछर म तेईस ठिन कैम्प खोले गेहे। उहां सुरक्षा व्यवस्था, अपराध के नियंत्रण के संगेसंग कोरोना काल म मानवता के सेवा करे म पुलिस अउ मिलिट्रीफोर्स के जवान मन ह देस के आगू म उदाहरण प्रस्तुत करे हे।
ए मउका म मुख्यमंत्री ह प्रदेस के कई ठिन अंचल म दस ठिन नवा बने थाना मनके वचुअर्ल यानि ऑनलाइन के माध्यम ले लोकार्पण करीन। एखर संगे ओमन हमर बेटी-हमर मान अभियान के चलत रईपुर, दुरूग, राजनांदगांव, बिलासपुर, कोरबा अउ रायगढ़ जिला बर एक-एक ठिन माईलोगिन सुरक्षा पुलिस पेट्रोल वाहन के घलो लोकार्पण करीन।
उहें, मुख्यमंत्री ह रईपुर के प्रेस क्लब म राखे गे नववर्ष मिलन समारोह म घलो सामिल होईन। ए मउका म ओमन किहीन कि राज्य सरकार ह पत्रकार मनके सहायता बर हर हमेसा तियार हे। राज्य म प्रस्तावित पत्रकार सुरक्षा कानून ह पूरा देस बर उदाहरण बनही। ओमन पत्रकार मनके होम लोन के ब्याज म छूट दे उपर बिचार करे के बात किहीन।
विस-शीतकालीन सत्र
छत्तीसगढ़ विधानसभा के सीतकालीन सत्र के दूसर चरण काली ले सुरू होही। छह जनवरी तक चलइया ए सत्र बेरा कुल पांच ठिन बइठका होही। सत्र के पहिली दिन काली दिवंगत विधायक मंगत राम उसेंडी ल श्रद्धांजलि दे जाही।
उहें, भानुप्रतापपुर विधानसभा उपचुनाव म निर्वाचित कांग्रेस सदस्य सावित्री मंडावी सपथ लीहीं। सत्र के दउरान प्रश्नोत्तर अउ ध्यानाकर्षण के संगे कई ठिन सरकारी काम घलो होही।
रमन सिंह-बयान
पूर्व मुख्यमंत्री अउ भरतीय जनता पार्टी के उपाध्यक्ष डॉक्टर रमन सिंह ह किहीन हे कि राजनांदगांव म दू दिन पहिली प्रधानमंत्री आवास बर एक झिन माईलोगिन डहार ले खुद ल आगी लगाय के प्रयास ह एक ठिन दुखद घटना हरय अउ एखर बर नगर पालिक निगम राजनांदगांव म पूरा तरह ले जिम्मेदार हे। डॉक्टर सिंह ह किहीन कि पूरा प्रदेसभर म करीबन सोलह लाख प्रधानमंत्री आवास योजना के इही हाल हे।
इहां ए बतादन कि प्रधानमंत्री आवास योजना बर खुदे ल आगी लगइया माईलोगिन के इलाज भिलाई के सेक्टर-नाईन अस्पताल म चलत हे। डॉक्टर सिंह ह काली रतिहा अस्पताल पहुंच के ए माईलोगिन के हालचाल जानीन।
माओवादी-हत्या
बीजापुर जिला म माओवादी मन एक झिन जवान मनखे के हत्या कर दीस। पुलिस अधीक्षक आंजनेय वार्ष्णेय ह घटना के पुष्टि करत बतईन कि तर्रेम थाना क्षेत्र म बीते रतिहा माओवादी मन एक झिन जवान मनखे के अपहरण कर ले रिहीस, जेखर लास आज बिहनिया तर्रेम अउ पेगड़ापल्ली के बीच रद्दा म मिलीस। घटना के जिम्मेदारी माओवादी मनके जगरगुंडा एरिया कमेटी ह लेहे।
महामाया पहाड़-राष्ट्रीय ध्वज
अंबिकापुर सहर के मां महामाया पहाड़ के उपर आज राष्ट्रीय झंडा फहराय गीस। ए झंडा ओ स्वतंत्रता संग्राम सेनानी अउ सैनिक मन ल समर्पित करे गेहे जउन मन देस के रक्षा करत सहीद होय हे। झंडा के देखरेख वन विभाग डहार ले करे जाही। ए मउका म स्वास्थ्य मंत्री टी.एस. सिंहदेव ह लोगन मन ल बधाई अउ सुभकामना दीन।
कोविड-जांच
केन्द्र सरकार ह आज ले चीन, हांगकांग, जापान, दक्षिण कोरिया, सिंगापुर अउ थाईलैंड ले अवइया यात्री मनके आर.टी.पी.सी.आर. जांच जरूरी कर देहे। केन्द्रीय स्वास्थ्य मंत्रालय ह किहीन हे कि ए जांच भारत के यात्रा सुरू होय ले पहिली बहत्तर घंटा के भीतर के होना चाही। भारत म अंतर्राष्ट्रीय उड़ान के आते दू प्रतिसत यात्री मनके हुरहा जांच पहिलीच ले चलत हे। मंत्रालय ह बताय हे कि पूरा विश्व म कोविड के हालत ल देखत ए कदम उठाय गेहे।
महादेव सट्टा ऐप
दुरूग पुलिस ह ऑनलाइन सट्टा महादेव ऐप के विरूद्ध कार्रवाई करत बालाघाट के वारासिवनी म महादेव बुक नंबर-एक सौ नब्बे ब्रान्च भंडाफेड़ करत छह झिन आरोपी ल गिरफ्तार करे हे। पुलिस अधीक्षक डॉक्टर अभिषेक पल्लव ह पत्रकार मन ल बतईन कि ए ब्रांच ह खाली चार दिन म अट्ठारह लाख रूपिया के कारोबार करे हवय। आरोपी मन तीर ले तीन ठिन लैपटॉप, चौदह ठिन मोबाइल अउ एटीएम कार्ड बरामद करे हे।