छत्तीसगढ़ राज्य पावर कंपनी ह वी.सी.ए. चार्ज बढ़ाय के घोसना करे हे। बीते चार महीना म दूसरा बार वी.सी.ए. चार्ज बढ़ाय जात हे। वी.सी.ए. चार्ज बढ़ाय ले उपभोक्ता मन ल प्रति यूनिट उनचास पइसा जादा देना होही। ए बाढ़े दर खपत के हिसाब ले उपभोक्ता मन उपर लागू होही। खबर के मुताबिक पहिली ए दर इकसठ पइसा प्रति यूनिट रिहीस, जउन ह अभी बाढ़के एक रूपिया दस पइसा प्रतियूनिट होगे हे।
इही बीच, भाजपा के प्रदेस अध्यक्ष अरूण साव ह वी.सी.ए. चार्ज के नाम म बिजली दर म वृद्धि उपर राज्य सरकार के निंदा करे हे। ओमन ह कहिन कि सरकार बिजली के बिल बढ़ाके जनता के संग अन्याय करत हे। ओमन ह सरप्लस बिजली वाला राज्य म सरलग बिजली के दर म बढ़ोतरी करे जाना उपभोक्ता मनके संग वादाखिलाफी हरय।
भेंट-मुलाकात
मुख्यमंत्री भूपेश बघेल ह दाड़ी गांव ल पूरा तहसील के दरजा दे जाय के घोसना करे हे। भेंट-मुलाकात कारीकरम के दउरान मुख्यमंत्री बेमेतरा जिला के नवागढ़ विधानसभा के दाढ़ी गांव पहुंचीन। ए दउरान ओमन ह स्वामी आत्मानंद अंग्रेजी माध्यम स्कूल खोले, सामुदायिक भवन बनाय, प्रतापपुर म जिला सहकारी बैंक के साखा खोले संग आने-आने घोसना करीन। श्री बघेल ह नांदघाट ल नगर पचांयत बनाय, नवा विश्राम गृह बनाय के संगेसंग चरगवां म हाई स्कूल अउ तरके म प्राथमिक स्कूल बर नवा भवन निर्माण कराय के घलो घोसना करीन।
एखर पहिली, मुख्यमंत्री ह भेंट-मुलाकात कारीकरम के दउरान काली देवरबीजा म गांव वाले मन ले भेंट करीन। ए दउरान ओमन ह देवरबीजा ल उप-तहसील बनाय के अउ सल्धा म जिला सहकारी बैंक के साखा खोले के घोसना करीन।
मुख्य निर्वाचन पदाधिकारी-निर्देश
राज्य के मुख्य निर्वाचन पदाधिकारी रीना बाबा साहेब कंगाले ह दिव्यांग मन बर मतदान ल सुगम बनाय बर समाज कल्याण विभाग अउ लोक शिक्षण संचालनालय ल निरदेस देहे। मुख्य निर्वाचन पदाधिकारी के अध्यक्षता म आज दिव्यांग मतदाता मनके सुगम मतदान बर गठित राज्य स्तरीय संचालन समिति के बइठका होईस।
केन्द्र-ऑनलाइन गेम्स
केन्द्र सरकार ऑनलाइन गेम्स के हिंसक अउ अश्लील सामग्री ले निपटे बर मजबूत नियम बनाय के पक्ष म हे। आकाशवाणी समाचार के संग बिसेस साक्षात्कार म संचार इलेक्ट्रॉनिक्स अउ सूचना प्रौद्योगिकी मंत्री अश्वनी वैष्णव ह युवा पीढ़ी बर ऑनलाइन गेम्स के प्रभाव के बारे म चिंता जताय हे। ओमन कहिन कि सरकार सख्त नियम बनाही, जेमा ऑनलाइन खेल मन म नसा के लत, जुआ अउ हिंसक सामग्री झन होवय। दूरसंचार, डिजिटल डाटा संरक्षण अउ डिजिटल इंडिया बिल म श्री वैष्णव ह कहिन कि डिजिटल अर्थव्यवस्था ल बढ़ावा दे खातिर उपयोग करइया मनके अधिकार के संरक्षण बर कड़ा कानून अउ नियम बनाय के जरूरत हे।
आईओसीएल-टीबी उन्मूलन
केन्द्र सरकार के सार्वजनिक क्षेत्र के उपक्रम इंडियन ऑयल कार्पोरेशन लिमिटेड-आईओसीएल ह छत्तीसगढ़ म टीबी उन्मूलन म राज्य सासन के सहयोग करही। एखर बर नई दिल्ली म काली छत्तीसगढ़ के स्वास्थ्य विभाग, केन्द्रीय स्वास्थ्य मंत्रालय के सेंट्रल टीबी डिवीजन अउ आई.ओ.सी.एल. के बीच एमओयू म हस्ताक्षर करे गीस। आई.ओ.सी.एल. कॉर्पोरेट सामाजिक उत्तरदायित्व के तहत टीबी के जांच बर छत्तीसगढ़ ल पचास टू्र नॉट मसीन अउ पांच पोर्टेबल डिजिटल एक्स-रे मसीन उपलब्ध कराही। तीन बछर तक ए मसीन मनके मेंटेनेस के खर्च घलो उंखर डहार ले उठाय जाही। ए परियोजना म आई.ओ.सी.एल. छत्तीसगढ़ सरकार के संग मिलके टीबी के मरीज मनके संख्या म अस्सी प्रतिसत के कमी लाय के काम करही।
आरक्षण-मुख्यमंत्री
आरक्षण मामला म सरलग होवत बयानबाजी के बीच आज मुख्यमंत्री भूपेश बघेल ह कहिन कि भारतीय जनता पार्टी ह ओबीस आरक्षण के खिलाफ हे अउ एखर चलत आदिवासी अउ अनुसूचित जनजाति के संग गरीब सवर्ण मनके आरक्षण घलो रूक गेहे।
कांग्रेस-जन अधिकार रैली
प्रदेस कांग्रेस अध्यक्ष मोहन मरकाम के नेतृत्व म तीन जनवरी के जनअधिकार रैली निकाले जाही। ए रैली म मुख्यमंत्री भूपेश बघेल, प्रदेस प्रभारी कुमारी शैलजा संग कांग्रेस पदाधिकारी, मंत्री, जिला अउ ब्लॉक के अध्यक्ष के संग विधायक मनके अलावा कांग्रेस कार्यकर्ता सामिल होही। रैली के बाद रईपुर के साईंस कॉलेज मैदान म एक ठिन आमसभा के आयोजन करे जाही।
आरटीओ-सेकेंड हैंड गाड़ी
राज्य सरकार ह प्रदेस म जुन्ना गाड़ी मनके चोरी संग फर्जी तरीका ले बेचे अउ खरीदे उपर लगाम लगाय बर नवा पहल करे हे। एखर तहत छत्तीसगढ़ सरकार ह केन्द्र सरकार ल पाती लिखे रिहीन, जेखर बाद केन्द्रीय मोटर वाहन अधिनियम म बदलाव करे गेहे। नवा नियम एक अप्रैल दू हजार तेईस ले लागू हो जही। ए नियम के तहत अब सेकेंड वाहन विक्रेता ल घलो नवा वाहन विक्रेता जइसन ही डीलर के दर्जा दे जाही। डीलर के दर्जा मिले ले सेकेंड हैंड डीलर ल गाड़ी खरीदे के बाद स्टॉक म दिखाय या फाइनेंस कराय म सहायता मिलही। संगेसंग कोन्हों गाड़ी के दुर्घटना होय म बीमा क्लेम म घलो मदद मिलही।
संयुक्त निदेशक-एफआईआर
निजी विश्वविद्यालय ल लाभ पहुंचाय अउ राज्य सरकार ल सात करोड़ रूपिया के क्षति पहुंचाय के आरोप म नगर निवेश विभाग के संयुक्त निदेशक के खिलाफ सिकायत करके एफ.आई.आर. दर्ज कराय के निवेदन करे गेहे। रईपुर के अवंति विहार कॉलोनी निवासी अविनाश पेशवानी ह नवा रईपुर विकास प्राधिकरण के महाप्रबंधक ल लिखित सिकायत म बताय हे कि सहर म स्थित एक ठिन निजी विश्वविद्यालय डहार ले बछर दू हजार अट्ठारह म करीबन चौदह हेक्टेयर म निर्माण के अनुमति बर नगर निवेस विभाग रईपुर म आवेदन दे रिहीन। फेर, तत्कालीन नगर निवेश विभाग के संयुक्त निदेशक ह नियम ल अनदेखा करत भू-उपयोग म बाह्य विकास सुल्क नइ लगईस, जेखर ले सासन ल सात करोड़ रूपिया के क्षति होय हे। अविनाश पेशवानी के सिकायत म महाप्रबंधक ह भवन अनुज्ञा अधिकारी ल पूरा मामला के जांच करे के निरदेस देहे।
गुरू गोविंद सिंह-प्रकाश पर्व
सिक्ख मनके दसवां गुरू अउ खालसा पंथ के संस्थापक गुरू गोविंद सिंह महाराज के तीन सौ छप्पनवां प्रकाश पर्व आज देसभर म धार्मिक श्रद्धा अउ उछाह के संग मनाय जावत हे। प्रधानमंत्री नरेन्द्र मोदी ह प्रकाश पर्व के मउका म गुरू गोविंद सिंह जी ल नमन करीन अउ मानवता के प्रति उंखर सेवा ल सुरता करीन। अपन ट्वीट संदेस म श्री मोदी ह कहिन कि उंखर अदम्य साहस कतकोन बछर तक लोगन ल प्रेरणा देवत रइही।
ऐति, छत्तीसगढ़ के राज्यपाल अनुसुईया उइके ह गुरू गोविंद सिंह महराज ल श्रद्धासुमन अर्पित करत प्रदेसवासी मन ल प्रकाश पर्व के बधाई दीन हे।
धान खरीदी
प्रदेस म समर्थन मूल्य म धान खरीदी के आंकड़ा पचहत्तर लाख मीटरिक टन ल पार कर देहे। ए बछर एक सौ दस लाख मीटरिक टन धान खरीदी के अनुमान हे। धान खरीदी के ए कारीकरम अवइया इकतीस जनवरी तक चलही। खबर के मुताबिक बछर दू हजार सत्रह के तुलना म धान के रकबा, किसान मनके संख्या अउ उत्पादकता म वृद्धि होय के बावजूद प्रदेस म हर बछर धान खरीदी के नवा रिकार्ड बनत हे।