कोविड मॉकड्रिल 01
देश म कोविड के आपात तियारी मनके जांच बर आज सबो अस्पताल म राष्ट्रव्यापी मॉकड्रिल करे गीस। ये मॉकड्रिल चीन समेत कुछ देश मन म कोविड के बाढ़त मामला ल देखत आयोजित करे गेहे। ये दउरान ऑक्सीजन संयंत्र, वेंटिलेटर, लॉजिस्टिक्स अउ मानव संसाधन म विशेष रूप ले ध्यान केंद्रित करत बुनियादी सुविधा के आकलन करे गीस।
प्रधानमंत्री नरेंद्र मोदी डहार ले देश म कोविड स्थिति के समीक्षा बइठका के बाद मॉकड्रिल आयोजित करे के निर्णय लेगे रीहिस। इही बीच केंद्रीय स्वास्थ्य मंत्री डॅाक्टर मनसुख मांडविया ह देश म कोविड मामला बढ़े के कोनो भी स्थिति से निपटे बर स्वास्थ्य सुविधा अउ दूसर तियारी मनके जायजा लेके मद्देनजर आज नई दिल्ली के सफदरजंग अस्पताल के दउरा करीन।
संवाददाता मनले बातचीत म डॅाक्टर मांडविया ह विश्वास जताइन कि सरकार कोविड ले निपटे बर पूरी तरह ले तैयार हे।
एति छत्तीसगढ़ के अलग-अलग कोविड अस्पताल मन म घलो मॉकड्रिल करे गीस। कोरिया कलेक्टर विनय कुमार लंगेह के उपस्थिति म बैंकुठपुर स्थित कोविड अस्पताल के जायजा ले गीस। ए दउरान सबो मेडिकल उपकरण के कार्यप्रणाली के अवलोकन करीन।
कलेक्टर ह मुख्य चिकित्सा अउ स्वास्थ्य अधिकारी ल जिला म कोविड टीकाकरण के प्रतिशत के समीक्षा कर टीकाकरण कैंप लगाये के निर्देश घलो दीन। उंहे दंतेवाड़ा जिला म घलो मॉकड्रील के तहत कोविड अस्पताल मनके जायजा ले गीस। जिला कलेक्टर विनीत नंदनवार ह जिला के लोगन मनले अपील करे हे कि कोरोना वायरस के नवा वेरिएंट से बांचे बर सबो प्रोटोकॉल के अनिवार्य रूप से पालन करय।
भेंट-मुलाकात
मुख्यमंत्री ह लीटिया म नवीन आईटीआई के स्थापना, घोटवानी, खिलोराकला अउ देवरी म हायर सेकण्डरी स्कूल भवन के बनाये के बात कीहिन ओमन कीहिन कि बोरी म उप पंजीयक कार्यालय शुरू करे जाही। सामुदायिक स्वास्थ्य केंद्र धमधा म पोषण पुनर्वास केंद्र के स्थापना करे के संग शिवकोकड़ी, पोटिया-टेमरी, घोटवानी, नवागांव अउ डोमा म पुल निर्माण के घोषणा घलो करीन।
उंहे मुख्यमंत्री ह बेमेतरा जिला के ठेलका गांव म आयोजित भेंट-मुलाकात कार्यक्रम म शामिल होइन। कार्यक्रम म कृषि मंत्री रविंद्र चौबे घलो शामिल होइन। इही बीच मुख्यमंत्री भूपेश बघेल ह कीहिन कि क्षेत्र म सिंचाई के विस्तार होय ले कृषि म व्यापक पैमाना म बदलाव देखे बर मिलही। छत्तीसगढ़ म वर्तमान अउ भविष्य दूनो किसानी आय अउ किसानी म सहभागिता देने वाला किसान हमेशा आगू रीही।
श्री बघेल काली दुर्ग जिला म पाटन क्षेत्र के गांव निपानी म तांदुला जल संसाधन संभाग के अंतर्गत आयोजित 32 करोड़ पच्यासी लाख रूपिया के छै सिंचाई योजना ले संबंधित काम मनके लोकार्पण, अउ भूमिपूजन समारोह ल संबोधित करत रीहिन। ये अवसर म मुख्यमंत्री ह जिला के खारून नदी उपर निपानी म नौ करोड़ छिहत्तर लाख रूपिया के लागत ले बनइया एनीकट के भूमिपूजन घलो करीन।
मुख्यमंत्री लोकार्पण
मुख्यमंत्री भूपेश बघेल ह आज धमधा विकासखंड के अंतर्गत ग्राम पंचायत बोरी म निर्मित नवीन तहसील कार्यालय भवन के लोकार्पण करीन। ए अवसर म ओमन कीहिन कि आम लोगन के बीच पारदर्शिता के माध्यम ले विश्वास हासिल करना ही छत्तीसगढ़ शासन के मुख्य लक्ष्य आय। एखरे सेती छत्तीसगढ़ शासन, प्रशासन के विकेन्द्रीकरण करत हे अउ जादा ले जादा ऑनलाईन सिस्टम के स्थापना करत हे ताकि सबो काम मन ल पारदर्शी बनाय जा सकय।
आरक्षण कांग्रेस-भाजपा बयान
प्रदेश म आरक्षण ल लेके राजनीति तेज होगे हे। आरक्षण विधेयक उपर राजभवन डहार ले राज्य शासन ले पूछे गे सवाल के जवाब भेजे जाय के बाद राज्यपाल डहार ले अब तक एमा हस्ताक्षर नइ करे ल लेके मुख्यमंत्री भूपेश बघेल ह आज बयान देहे कि राज्यपाल ह बिल म हस्ताक्षर नही करना चाहत हे, त बिल ल वापस कर दें।
इही बीच भारतीय जनता पार्टी के प्रदेश प्रवक्ता देवलाल ठाकुर ह आरक्षण के मामला म कहिन कि कंाग्रेस के रवइया निराशाजनक हे। ओमन कीहिन कि आरक्षण के मामला म कंाग्रेस सरकार न उच्च न्यायालय म पक्ष रख सके हे अउ न ही उच्चतम न्यायालय म अउ अब ओमन राजभवन म घलो सामान्य से दस ठन सवाल मनके संतोषजनक जवाब नइ दे पावत हे। एखर से स्पष्ट होथे कि सरकार नइ चाहय कि राज्य म आरक्षण लागू होवय। श्री ठाकुर ह कीहिन कि दस ठन सवाल के जवाब देके आरक्षण के दिशा म आगू बढ़े जा सकत हे। लेकिन कांग्रेस ह राजनीति करत हे।
माओवादी समर्पण
राजनांदगांव के सीमा ले लगे महाराष्ट्र के गढ़चिरौली पुलिस ह दू लाख रूपिया के इनामी माओवादी मन ल गिरप्तार करे हे। मिले जानकारी के अनुसार ये माओवादी अपन गांव भामरागढ़ के नेलगुण्डा म छिपे रीहिन। पुलिस ल एखर सूचना मिले के बाद मउका ले ए माओवादी मन ल गिरप्तार करे गीस। ये माओवादी के खिलाफ हत्या, मुठभेड़ समेत कई ठन मामला दर्ज हे।
शैलजा बैठक
कांग्रेस महासचिव अउ प्रदेश प्रभारी कुमारी शैलजा के उपस्थिति म काली राजधानी रायपुर के राजीव भवन म ब्लॉक कांग्रेस अध्यक्ष मनके बइठका संपन्न होइस। बइठका म आरक्षण समेत कई ठिन मुद्दा उपर चर्चा करे गीस। ए मउका म कुमारी शैलजा ह कीहिन कि कंाग्रेस पार्टी मजबूत एखर सेती हे कि पार्टी के सदस्य जमीन से जुड़े हुए हे।
ओमन कहिन कि कंाग्रेस जन आंदोलन के पार्टी आय। ब्लॉक अउ बूथ मजबूत नइ होही त पार्टी के ढांचा कमजोर हो जाही। ये अवसर म प्रदेश अध्यक्ष मोहन मरकाम ह कीहिन कि इकतीस दिसंबर तक ब्लॉक के बइठका आयोजित कर कांग्रेस आलाकमान के निर्देशानुसार हाथ से हाथ जोड़ो यात्रा के रूपरेखा बनाय जाही। ये यात्रा तीन सौ सात ब्लॉक म हर दिन होही। बइठका म राष्ट्रीय सचिव विकास उपाध्याय समेत आनेे पदाधिकारी मन उपस्थित रीहीन।
कंाग्रेस स्थापना दिवस
छत्तीसगढ़ प्रदेश कंाग्रेस काली अठाईस दिसंबर ल कंाग्रेस स्थापना दिवस के रूप म मनाही। भारतीय राष्ट्रीय कंाग्रेस के एक सौ अड़तीसवंा बछर म प्रवेश करे के अवसर म प्रदेश कंाग्रेस डहार ले कई ठन कार्यक्रम करे जाही। स्थापना दिवस ल प्रदेश के सबो जिला शहर, नगर अउ ब्लॉक मुख्यालय मन म मनाये जाही।
ये अवसर म पार्टी के जिला अउ ब्लॉक मुख्यालय मन म कंाग्रेस के इतिहास, विचारधारा, अतीत अउ वर्तमान के उपलब्धि भविष्य के दृष्टि जइसे विषय मन उपर गोष्ठी अउ परिसंवाद के कार्यक्रम के संगेसंग रैली अउ सेमिनार के आयोजन घलो करे जाही। ये कार्यक्रम म सेवादल, महिला कंाग्रेस, युवा कंाग्रेस अउ एनएसयूआई के नेता अउ कार्यकर्ता मन सामिल होही।
भाजपा बयान
भारतीय जनता पार्टी के वरिष्ठ नेता अउ पूर्व विधानसभा अध्यक्ष धरमलाल कौशिक ह कीहिन कि निजी पत्रिका के बीस ठन राज्य के सर्वे म छत्तीसगढ़ सोलहवंा स्थान म हे। ओमन कीहिन कि राज्य के कंाग्रेस सरकार के इही सर्टिफिकेट आय। श्री कौशिक ह कीहिन कि सर्वे के अनुसार राज्य के कंाग्रेस सरकार ह हर क्षेत्र म पिछड़ गेहे।
ओमन बताइन कि छत्तीसगढ़ ल दू हजार अस्सी अंक म मात्र आठ सौ निन्यानबे अंक मिले हे। ये सर्वे रिपोर्ट से जेन आंकड़ा मिले हे, ओखर ले कांग्रेस सरकार के चार बछर म प्रदेश के विकास के दिशा म तेज गति आने वाला सबो दावा मनके पोल खुल गेहे।
वन मेला
अंतर्राष्ट्रीय वन मेला म लघु वनोपज आधारित क्रेता-विक्रेता सम्मेलन म छत्तीसगढ़ अउ मध्यप्रदेश लघु वनोपज संघ के बीच लगभग चौंतीस करोड़ के एमओयू होय हे। एमा अठाईस करोड़ पचास लाख रूपिया के एम.एफ.पी.पी.ए.आर.सी अउ अलग अलग संस्था के बीच व्यावसायिक अनुबंध घलो करे गीस। ये अंतर्राष्ट्रीय वन मेला मध्यप्रदेश के राजधानी भोपाल म बीस ले छब्बीस दिसंबर तक आयोजित करे गीस।