प्रधानमंत्री नरेन्द्र मोदी ह किहीन हे कि भारत दू हजार बाईस म दुनिया के पांचवां सबले बड़े अर्थव्यवस्था बन गेहे। ओमन किहीन कि देस के रहवइया मन ल गर्व हे कि ए बछर देस ह हरेक क्षेत्र म कई ठिन उपलब्धि पाय हे। आकाशवाणी ले मन की बात कारीकरम म श्री मोदी ह किहीन कि हरेक क्षेत्र म मिले आपार सफलता ह देस ल विश्व म बिसेस स्थान देवाय हे।
प्रधानमंत्री ह लोगन मनके शक्ति, सहयोग अउ संकल्प ल सहरावत किहीन कि ए बछर ह एक भारत-श्रेष्ठ भारत के भावना ल बढ़ाय बर जाने जाही। श्री मोदी ह अगस्त महीना म चलाय गे ‘हर घर तिरंगा‘ अभियान के जिकर करत किहीन कि आजादी के पचहत्तर बरीस के ए अभियान म पूरा देस ह तिरंगा मय होगे रिहीस। ओमन यहू किहीन कि दू हजार तेईस म जी-ट्वेंटी के उछाह ह हमन ल नवा ऊंचाई म लेके जाही।
प्रधानमंत्री ह किहीन कि देस ह पाछु कई बछर के दउरान मेडिकल क्षेत्र के बड़का चुनौती मन उपर सफलता प्राप्त करे हे। एखर बर ओमन चिकित्सा बिसेसज्ञ, वैज्ञानिक अउ देसवासी मन ल श्रेय दीन हे। ओमन किहीन कि भारत ले चेचक अउ पोलियो असन गंभीर बीमारी सिरा गेहे। उहें, कालाजार ह घलो अब सिरोइया हे। प्रधानमंत्री ह किहीन कि सरकार ह बछर दू हजार पच्चीस तक भारत ल टीबी मुक्त करे बर घलो काम करत हे।
मन की बात-02
मन की बात कारीकरम म बोलत ओमन किहीन कि गंगा नदी ल साफ-सुफा बनाय बर आठ बछर पहिली नमामि गंगे अभियान सुरू करे गे रिहीस, जेला आज जम्मों दुनिया ह सहरावत हे। स्वच्छ भारत मिशन के चरचा करत प्रधानमंत्री ह किहीन कि बछर दू हजार चौदह म ए कार्यक्रम के सुरू होय बाद लोगन मन ए सोझ बड़ भारी परयास करे हे। श्री मोदी ह लोगन मन ले किहीन कि ओमन मन की बात के सौवां कड़ी म सामिल बिसय बारे म अपन सुझाव पठोवय।
प्रधानमंत्री ह विश्व म कोविड-नाइंटीन के बाढ़त मामला लोगन मन ल चेतईन घलो हे।
प्रधानमंत्री के मन की बात कारीकरम ल छत्तीसगढ़ म घलो लोगन मन सुनीन। भाजपा के प्रदेस अध्यक्ष अरूण साव ह बिलासपुर जिला के बिरकोना म अउ नेता प्रतिपक्ष नारायण चंदेल ह जांजगीर-चांपा जिला म कार्यकर्ता अउ नागरिक मन संग मन की बात कारीकरम म सुनीन।
स्वास्थ्य मंत्रालय-मॉकड्रिल
केन्द्रीय स्वास्थ्य मंत्रालय ह राज्य अउ केन्द्रसासित प्रदेस मन ले देस के सबो स्वास्थ्य केन्द्र जघा म सत्ताईस दिसंबर के मॉकड्रिल राखे बर पाती पठोय हे। केन्द्रीय स्वास्थ्य सचिव राजेश भूषण ह किहीन हे कि ए पहल के उद्देश्य कोविड प्रबंधन म तैयारी करना हे। स्वास्थ्य सचिव ह किहीन कि मॉकड्रिल के दउरान स्वास्थ्य सुविधा देके तियारी, बिस्तर, डॉक्टर, नर्स अउ पैरामेडिकल कर्मी मनके क्षमता देखे जाही। एखर संगेसंग एंबुलेंस, जांच अउ ऑक्सीजन के व्यवस्था म बिसेस ध्यान दे जाही।
ऐति, छत्तीसगढ़ के स्वास्थ्य सचिव आर. प्रसन्ना ह जम्मों जिला कलेक्टर मन ल पाती लिखके सत्ताईस दिसंबर के कोरोना प्रोटोकॉल के तैयारी ले जुड़े मॉकड्रिल करे बर किहीन हे।
मालवीय-वाजपेयी-जयंती
राष्ट्र आज स्वतंत्रता संग्राम सेनानी अउ समाज सुधारक भारतरत्न पंडित मदन मोहन मालवीय अउ पूर्व प्रधानमंत्री भारतरत्न अटल बिहारी वाजपेयी के जयंती मउका म ओमन भावभीनी श्रद्धांजलि देवत हे। अटल बिहारी वाजपेयी के जनम दिन ल सुशासन दिवस के रूप म घलो मनाय जथे।
अटल बिहारी वाजपेयी के जयंती बेरा म आज राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी ह उंखर समाधि सदैव अटल म पुष्पांजलि अर्पित करीन।
उहें, छत्तीसगढ़ के मुख्यमंत्री भूपेश बघेल ह रईपुर स्थित अपन निवास कार्यालय म पंडित मदन मोहन मालवीय अउ अटल बिहारी वाजपेयी के जयंती म उंखर फोटू उपर फुल चढ़ाके ओमन ल माथ नवईन।
इही तरह, छत्तीसगढ़ विधानसभा के सेंट्रल हॉल म पूर्व प्रधानमंत्री अटल बिहारी वाजपेयी के तैलचित्र उपर विधानसभा सचिवालय के अधिकारी मन पुष्पांजलि अर्पित करीन। उहें, भाजपा के प्रदेस अध्यक्ष अरूण साव अउ नेता प्रतिपक्ष नारायण चंदेल ह घलो अटल बिहारी वाजपेयी के जयंती म उंखर सुरता करीन।
इही बीच, मुख्यमंत्री ह आज अपन निवास कार्यालय म भारत के पहिली गवर्नर जनरल भारतरत्न चक्रवर्ती राजगोपालाचारी के पुण्यतिथि म उनला नमन करीन।
जवान मौत
बीजापुर जिला म माओवादी मनके स्मॉल एक्सन टीम ह बीते रतिहा डीआरजी के एक झिन जवान उपर कुल्हाड़ी ले हमला कर दीस। ए हमला म आरक्षक आसाराम कड़ती के मउत होगे।
जिला के पुलिस अधीक्षक अंजनेय वार्ष्णेय ह बतईन कि ए आरक्षक के पोस्टिंग राजनांदगांव म रिहीस। फेर ओ ह छुट्टी म अपन गृह गांव मिरतुर आय रिहीस, जिहां माओवादी मन मिरतुर थाना क्षेत्र के मंदिर पारा इलाका म ओखर उपर कुल्हाड़ी ले हमला कर दीस, जेखर ले घायल होय आरक्षक के जगदलपुर मेडिकल कॉलेज अस्पताल म इलाज बेरा मउत होगे।
मुख्यमंत्री-संत समागम
मुख्यमंत्री भूपेश बघेल आज बेमेतरा जिला के लोलेसरा गांव म कबीर पंथ डहार ले राखे गे संत समागम मेला म सामिल होईन। ए मउका म ओमन करीबन डेढ़ करोड़ रूपिया के लागत ले बने बाउंड्री वॉल अउ सीसीरोड के लोकार्पण करीन। कार्यक्रम गृह मंत्री ताम्रध्वज साहू अउ कबीर पंथ के धरमगुरू प्रकाशमुनि नाम साहब भी मौजूद रिहीन।
उहें, मुख्यमंत्री ह बेरला म माता बिंदेश्वरी बघेल स्मृति सामुदायिक भवन के लोकार्पण करीन। संगेसंग बेरला म तीस बिस्तर अस्पताल ले पचास बिस्तर वाले अस्पताल, मिनी इनडोर स्टेडियम, हसदा म स्वामी आत्मानंद स्कूल अउ भिंभोरी म विद्युत सब स्टेशन बनाय के घोसना करीन।
क्रिसमस
क्रिसमस के तिहार आज जम्मों विश्व म हंसी-खुसी के संग मनाय जावत हे। क्रिसमस प्रभु यीशू के जनम के उपलक्ष्य म मनाय जाथे। ए मउका म राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी ह लोगन मन ल सुभकामना दीन हे।
छत्तीसगढ़ म घलो क्रिसमस के परब ल धार्मिक उछाह के संग मनाय जात हे। ए गिरिजा घर म बिसेस प्रार्थना सभा होईस, जेमा लोगन मन एक-दूसर ल क्रिसमस के बधाई दीन। मुख्यमंत्री भूपेश बघेल ह रईपुर के सेंट जोसफ कैथेड्रल अउ सेंटपॉल के कैथेड्रल पहुंच के मसीही समाज समेत प्रदेसवासी मन ल बधाई अउ सुभकामना दीन। श्री बघेल ह किहीन कि प्रभु यीशू के आरो म भाईचारा हे, जेखर ले दुनिया म मारकाट, घृणा अउ दुख ल हराय जा सकत हे। ए मउका म मुख्यमंत्री ह केक काटीन अउ लोगन मन ल केक खवा के क्रिसमस के खुसी ल बांटीन।
छत्तीसगढ़ प्रभारी-रायपुर
अखिल भारतीय कांग्रेस कमेटी के महासचिव अउ छत्तीसगढ़ प्रभारी कुमारी शैलजा आज देर संझा रईपुर पहुंचही। पार्टी के संचार विभाग के अध्यक्ष सुशील आनंद शुक्ला ह बतईन कि अपन दौरा बेरा कुमारी शैलजा काली बिहनिया राजीव भवन म राखे गे प्रदेस कांग्रेस कमेटी के बइठका म सामिल होही। तहां पाछु सत्ताईस दिसंबर के नई दिल्ली वापिस लहुट जही।
मुख्यमंत्री-घासीदास जयंती
मुख्यमंत्री भूपेश बघेल ह किहीन हे कि छत्तीसगढ़ म मेडिकल पढ़ई के इन्फ्रास्ट्रक्चर ह मजबूत होय हे, जेला आगू बढ़ावत जल्दीच नवा मेडिकल कॉलेज खोले जाही। श्री बघेल ह काली दुरूग जिला के दैमार गांव म बाबा गुरू घासीदास जयंती कारीकरम म सामिल होईन। ए मउका म ओमन किहीन कि आई.टी.आई. के माध्यम ले जवान लइका मन ल कौशल विकास कार्यक्रम ले जोड़े जावत हे। मुख्यमंत्री ह किहीन कि बाबा गुरू घासीदास के रद्दा म रेंग के हमन ल समाज के कुरीति ल छोड़ना होही।
बीएसपी-बिजली उत्पादन
भिलाई इस्पात संयंत्र के पीडीएस विभाग ह ब्लास्ट फर्नेस अउ कोक ओवन ले निकलइया अपशिष्ट गैस के माध्यम ले बिजली उत्पादन ले पर्यावरण संरक्षण सोज सहराय के लईक काम करे हे। बीएसपी के मुख्य महाप्रबंधक राजीव पांडेय ह बतईन कि पाछु तीन बछर के दउरान संयंत्र प्रबंधन ह करीबन तीन लाख मेगावाट बिजली उत्पादन करे हे।