मुख्यमंत्री भूपेश बघेल ह जम्मों सरकारी विभाग, निगम-मंडल अउ स्थानीय निकाय म पोताई-लिपाई के काम बर गोबर पेंट के उपयोग करे के निरदेस देहे। निरदेस के उल्लंघन करइया जिम्मेदार अधिकारी मनके खिलाफ कार्रवाई करे बर घलो किहीन हे। श्री बघेल ह निर्माण विभाग डहार ले केमिकल पेंट के उपयोग करे जाय म नाराजगी जतईन हे।
राष्ट्रपति-राज्यपाल/मुलाकात
राष्ट्रपति द्रौपदी मुर्मू ले छत्तीसगढ़ के राज्यपाल अनुसुईया उइके ह आज राष्ट्रपति भवन म भेंट करीन। ए दउरान राष्ट्रपति ल राज्यपाल ह प्रदेस के आने-आने गतिविधि के बारे म जानकारी दीन अउ अवइया बारह जनवरी के रईपुर के सासकीय नागार्जुन स्नातकोत्तर महाविद्यालय के ‘‘हीरक जयंती समारोह‘, एमिटी विश्वविद्यालय रईपुर के दीक्षांत समारोह अउ बारह ले अट्ठारह फरवरी तक होवइया महिला सशक्तिकरण कारीकरम म माईपहुना के रूप म सामिल होय बर नेवता दीन। ए दउरान राष्ट्रपति ल राज्यपाल ह राजभवन के त्रैमासिक पत्रिका ‘एक आशा‘ के प्रति घलो भेंट करीन अउ राजभवन सचिवालय के नवाचार संबंधी गतिविधि ले अवगत करईन। संगेसंग ओमन राष्ट्रपति ल सॉल अउ स्मृति चिन्ह भेंट करीन।
सुप्रीम कोर्ट-परसा खदान
सर्वोच्च न्यायालय ह राजस्थान सरकार के छत्तीसगढ़ स्थित परसा खदान अउ हसदेव क्षेत्र म प्रोजेक्ट ल रोके बर दाखिल याचिका ल रद्द कर देहे। न्यायमूर्ति बी.आर. गवई अउ विक्रमनाथ के पीठ ह अंतरिम याचिका के सुनवाई के बाद किहीन कि हम विकास के रद्दा म नइ आना चाहत हन। पीठ ह किहीन कि कोनो भी परियोजना ल तब तक नइ रोकन, जब तक अवैधता बड़े न होवय।
विजय बघेल-लोकसभा
दुरूग लोकसभा सांसद विजय बघेल ह संसद म प्रदेस के आदिवासी हित के मुद्दा उठईन हे। ओमन लोकसभा सत्र के दउरान आसंदी के माध्यम ले केन्द्रीय जनजातीय मंत्री अर्जुन मुण्डा ल बतईन कि छत्तीसगढ़ म कांग्रेस के सरकार बने के बाद ले केन्द्र सरकार के योजना के फायदा आदिवासी मन ल नइ मिल पात हे, जेखर ले आदिवासी समाज के लोगन मन ल परेसानी होवत हे। ओमन केन्द्रीय मंत्री ले एखर समीक्षा करे के आग्रह करीन।
भेंट-मुलाकात
भेंट-मुलाकात कारीकरम के तहत मुख्यमंत्री भूपेश बघेल ह कल बलौदाबाजार जिला के बिलाईगढ़ विधानसभा क्षेत्र स्थित सोनाखान पहुंचीन। ए मउका म मुख्यमंत्री ह करीबन सौ करोड़ रूपिया के विकास काम के भूमिपूजन अउ सत्ताईस करोड़ रूपिया के काम के लोकार्पण करीन। संगेसंग मुख्यमंत्री ह शहीद वीरनारायण सिंह के सुरता म बनाय गे इको टूरिज्म सर्किट अउ म्यूजियम के सुभारंभ घलो करीन। ए म्यूजियम म ऑडियो-विजुअल सेटअप अउ एक बिसेस धातु कॉर्टेन स्टील के माध्यम ले शहीद वीर नारायण सिंह के जीवनी ल प्रदर्सित करे गेहे। कॉर्टेन स्टील के बने लम्बा अउ सुंदर पैनल्स म शहीद वीर नारायण सिंह के जीवनी ल उकेरे गेहे, जेला दिन के उजाला के संग रतिहा म घलो देखे जा सकथे।
उहें, मुख्यमंत्री ह गिरौदपुरी म अनुविभागीय कार्यालय खोले के संगेसंग प्राथमिक स्वास्थ्य केन्द्र के उन्नयन सामुदायिक स्वास्थ्य केन्द्र के रूप म करे के घोसना करीन। ओमन सोनाखान म सहकारी बैंक अउ स्वामी आत्मानंद अंग्रेजी माध्यम स्कूल खोले अउ टुण्डरा के हाईस्कूल बर नवा भवन के निर्माण कराय के घोसना घलो करीन।
हाईकोर्ट-आदेश
छत्तीसगढ़ उच्च न्यायालय ह पुराना आरक्षण प्रक्रिया ले बी अउ डी फॉर्मेसी के काउंसिलिंग पूरा करे के आदेस देहे। न्यायमूर्ति गौतम भादुड़ी अउ न्यायमूर्ति एन.के. चंद्रवंशी के युगल पीठ ह इकतीस दिसंबर ले पहिली काउंसिलिंग प्रक्रिया पूरा करे बर डायरेक्टर तकनीकी शिक्षा ल निरदेस जारी करे हे। खबर के मुताबिक फार्मेसी कॉलेज मन म प्रवेस बर सर्वोच्च न्यायालय ह इकतीस दिसंबर तक के समय देहे।
उपचुनाव-नामांकन
राज्य के नगर पालिक निगम, नगर पालिका परिषद, नगर पंचायत अउ त्रिस्तरीय पंचायत मन म उपचुनाव बर नामांकन के काम चलत हे। पाछु उन्नीस दिसंबर तक पार्षद बर एक अउ पंचायत प्रतिनिधि बर उनसठ उम्मीदवार मन ह नामांकन दाखिल करे हे। एमा जनपद पंचायत सदस्य बर एक, सरपंच बर पन्द्रह अउ पंच बर तिरालीस उम्मीदवार सामिल हवय। उपचुनाव बर नामांकन दाखिल करे के आखिरी तारीख तेईस दिसंबर हवय। उहें, छब्बीस दिसंबर तक नाम वापस लीहीं।
खबर के मुताबिक त्रिस्तरीय पंचायत चुनाव के तहत राज्य के तैंतीस जिला म छह सौ सत्यासी पद बर उनचुनाव होही।
माओवादी मुठभेड़
बीजापुर जिला म सुरक्षा बल के संग होय मुठाभेड़ म एक झिन माओवादी मारे गेहे। जिला के पुलिस अधीक्षक आन्जनेय वार्ष्णेय ह बतईन कि मिरतुर थाना ले डीआरजी अउ एसटीएफ के सामलात टीम ह तलासी अभियान म निकले रिहीन। ए दउरान तिमेनार अउ पोरोवाडा के जंगल म माओवादी मन ह अचानके घात लगाके हमला कर दीन। जवाबी कार्रवाई म सुरक्षा बल ह एक झिन माओवादी ल मार गिरईन। पुलिस ह घटना जघा ले हथियार, विस्फोटक अउ आने-आने माओवादी सामान बरामद करे हे।
मुख्यमंत्री वृक्ष संपदा योजना
मुख्यमंत्री भूपेश बघेल ह मंत्रिपरिषद के अवइया बइठका म ‘‘मुख्यमंत्री वृक्ष संपदा योजना‘‘ के प्रस्ताव तैयार करके प्रस्तुत करे के निरदेस दीन हे। ए योजना के माध्यम ले काष्ठ आधारित उद्योग मन ल प्रोत्साहन मिलही। संगेसंग आय अउ रोजगार के मउका घलो बाढ़ही। खबर के मुताबिक ए योजना के उद्देश्य निजी भूमि म वृक्षारोपण ल प्रोत्साहन देना हवय।
कर्मचारी चयन आयोग-परीक्षा
कर्मचारी चयन आयोग डहार ले आने-आने पद म भर्ती बर संयुक्त हायर सेकेंडरी स्तरीय परीक्षा के आयोजन करे जावत हे। कम्प्यूटर आधारित ए परीक्षा दू चरण म राखे जाही। एमा टियर-एक, टियर-दू अउ दक्षता परीक्षा सामिल हवय। ए परीक्षा के माध्यम ले निम्न श्रेणी लिपिक, कनिष्ठ सचिवालय सहायक अउ डाटा एंट्री ऑपरेटर के पद म भर्ती करे जाही। परीक्षा बर ऑनलाइन आवेदन करे के आखिरी तारीख चार जनवरी तय करे गेहे।
मल्टीमीडिया चित्र प्रदर्शनी
केन्द्रीय संचार ब्यूरो के प्रादेशिक कार्यालय रईपुर डहार ले सेवा, सुसासन अउ गरीब कल्याण के आठ बछर पूरा होय के मउका म काली ले धमतरी म मल्टीमीडिया चित्र प्रदर्शनी के आयोजन करे जाही। तीन दिन तक चलइया ए प्रदर्सनी म हरेक दिन आने-आने प्रतियोगिता अउ संझा के सांस्कृतिक कारीकरम के आयोजन करे जाही।
राज्य वन जीव बोर्ड-बैठक
छत्तीसगढ़ म बाघ मनके संख्या बढ़ाय बर मध्यप्रदेश ले बाघ लाने जाही, जेला अचानकमार टाईगर रिजर्व म छोड़े जाही। मुख्यमंत्री भूपेश बघेल के पगरइति म रईपुर म होय राज्य वन्य जीव बोर्ड के बइठका म बलौदाबाजार जिला के बारनवापारा अभ्यारण्य म फेर ले बाघ मनके पुनर्स्थापित करे बर टाईगर छोड़े के प्रस्ताव ल सैद्धांतिक सहमति दे गीस।
बइठका म मुख्यमंत्री ह वन्य प्राणी मनके सुरक्षा अउ संरक्षण बर जंगल के दस किलोमीटर के परिधि के गांव म आजीविका मूलक गतिविधि ल बढ़ावा दे बर, वन्य प्राणी मनके सुरक्षा के दृष्टि ले वन क्षेत्र मन म संचार नेटवर्क ल मजबूत बनाय, हाथी मानव द्वंद रोके बर जागरूकता अभियान ल गति दे अउ वन्य प्राणी बर पानी अउ चारा विकसित करे के निरदेस दीन।
बइठका म भारत माला परियोजना के तहत प्रस्तावित रईपुर-विशाखापटनम इकोनॉमिक कॉरिडोर निर्माण बर उदन्ती-सीतानदी टाईगर रिजर्व म केशकाल अउ कांकेर वनमंडल के करीब चौंसठ वन क्षेत्र अउ इन्द्रावती-उदंती-सीतानदी-सुना
अउ अब थोरकुन समाचार सार म –
– सशस्त्र सीमा बल आज अपन उनसठवां स्थापना दिवस मनावत हे।
– मुंगेली नगर पालिका के तीन भाजपा पार्षद मन ह कांग्रेस पार्टी म प्रवेस कर लेहे।
– राजनांदगांव जिला के अछोली म अज्ञात गाड़ी के चपेट म आय ले एक झिन मनखे के मउत होगे। उहें, एक झिन आने मनखे गंभीर रूप ले घायल होगे हे।
– नवा रईपुर के कोटनी स्थित एक निजी विश्वविद्यालय म विद्यार्थी मनके दू गुट म मारपीट अउ झड़प होय के खबर हे। बताय जात हे कि ए घटना म तेरह झिन पढ़ईया लइका मन ल चोट आय हे।
अउ
– झारखंड जूडो संघ डहार ले राखे गे राष्ट्रीय जूनियर जूडो प्रतियोगिता म भिलाई के स्नेहा नियोगी ह कांस्य पदक हासिल करे हे।