ईडी डहार ले मनी लॉण्ड्रिग के मामला म गिरप्तार मुख्यमंत्री के उप सचिव सौम्या चौरसिया ल राज्य सरकार ह निलंबित करीन। इही बीच आज प्रवर्तन निदेशालय के टीम ह सौम्या चौरसिया ल वीडियो कॉन्फ्रेसिंग के माध्यम ले रायपुर के विशेष अदालत म सुनवाई बर पेश करीन। जिहां अदालत ह ओमन ल चौदा दिन के न्यायिक रिमांड म जेल भेजे के आदेश देहे। अब ओमन ल दू जनवरी के कोर्ट म पेस करे जाही।
उंहे निलंबित आईएएस समीर विश्नोई, कारोबारी सुनील अग्रवाल, लक्ष्मीकांत तिवारी अउ सूर्यकांत तिवारी घलो जेल म बंद हवय। ए जम्मों झिन ल तेरा जनवरी के कोर्ट म पेस करे जाही।
गोधन न्याय योजना-राशि वितरण
मुख्यमंत्री भूपेश बघेल ह आज रईपुर म राखे गे वर्चुअल कारीकरम म गोधन न्याय योजना के हितग्राही मन ल करीबन छह करोड़ रूपिया के रासि ऑनलाइन जारी करीन। योजना के तहत एक से पन्द्रह दिसंबर तक पशुपालक ग्रामीण, किसान मन ले बिसाय गे गोबर एवज म उंखर खाता म चार करोड़ इकचालीस लाख रूपिया के रासि जारी करीन। उहें, गौठान समिति मन ल चौरानवे लाख अउ महिला समूह मनके खाता म चौसठ लाख रूपिया के रासि जारी करीन।
मुख्यमंत्री-घासीदास जयंती
मुख्यमंत्री ह किहीन हे कि अनुसूचित जाति मन ल बछर दू हजार इक्कीस के जनगणना के आधार म आरक्षण मिलही। ओमन केन्द्र सरकार ले दू हजार इक्कीस के जनगणना ल जल्दी कराय के मांग करे हे। काली मुंगेली जिला के गांव लालपुर धाम म बाबा गुरू घासीदास जयंती के मउका म राखे गे कारीकरम ल संबोधित करत ओमन किहीन कि अनुसूचित जाति मन ल अभी जनसंख्या के मुताबिक तेरह प्रतिसत आरक्षण देके प्रावधान करे गेहे। ए मउका म मुख्यमंत्री ह लालपुरधाम के विकास बर एक करोड़ रूपिया देके घोसना करीन।
उहें, मुख्यमंत्री ह काली मुंगेली जिला के अमरटापू धाम म राखे गे गुरू पर्व मेला कारीकरम म घलो सामिल होईन। कारीकरम म ओमन मोतिमपुर म होवइया हर साल के मेला बर दस लाख रूपिया दे, नवीन धान उपार्जन केन्द्र खोले, उप स्वास्थ्य केन्द्र ल प्राथमिक स्वास्थ्य केन्द्र के रूप म दर्जा देके संगेसंग स्वामी आत्मानंद सासकीय अंग्रेजी माध्यम स्कूल खोले के घोसना करीन।
ऐति, मुख्यमंत्री ह कुम्हारी म सतनामी समाज डहार ले राखे गे कारीकरम म समाज बर सामुदायिक भवन म उपरहा कमरा अउ मंच निर्माण के घलो घोसना करीन।
उंहे लोक स्वास्थ्य यांत्रिकी मंत्री गुरू रूद्रकुमार ह काली रायपुर के सेंट्रल जेल अउ मंदिरहसौद के मुनगेसर नगर पंचायत म राखे गे बाबा गुरू घासीदास जयंती कार्यक्रम म सामिल होइन।
भाजपा-चावल गड़बड़ी
भारतीय जनता पार्टी के प्रदेस प्रवक्ता अउ पूर्व मंत्री राजेश मूणत ह राज्य सरकार उपर केन्द्र ले मिलइया चाउर ल पीडीएस सिस्टम के माध्यम ले बांटे म गड़बड़ी के आरोप लगाय हे। रईपुर म पत्रकारवार्ता म ओमन किहीन कि केन्द्र सरकार डहार ले भेजे गे चाउर अउ राज्य सरकार डहार ले बांटे गे चाउर के आंकड़ा म मिलान नइ हो पात हे, जेखर ले ए पता चलथे कि छत्तीसगढ़ सरकार ह करीबन पांच हजार एक सौ सत्ताईस करोड़ रूपिया के चाउर बांटे म गड़बड़ी करे हे। ओमन बतईन कि केन्द्र सरकार ह तीन करोड़ अस्सी लाख कुंटल चाउर भेजे रिहीस, जेमा ले एक करोड़ पचास लाख कुंटल के चाउर गायब हे। ओमन किहीन कि प्रदेस म तिरसठ लाख तिहत्तर हजार रासन कार्डधारी हवय। हरेक सदस्य मन ल पांच किलो उपरहा चाउर देके व्यवस्था केन्द्र सरकार ह करे हे।
सायकिल रैली-मांडविया
केंद्रीय स्वास्थ्य मंत्री डॅाक्टर मनसुख मांडविया ह लोगन मनले सायकिल के प्रयोग करे के विनती करे हे । डॅाक्टर मांडविया ह आज नई दिल्ली म नेशनल बोर्ड ऑफ एक्जामिनेशन इन मेडिकल सांइसेज डहार ले राखे गे साइक्लोथॉन कार्यक्रम म भाग लीन। ओमन कीहिन कि कतकोन विकसित देश मन म साइकिल के प्रयोग उंहा के लोगन मन करत हे। साइकिल रैली के थीम पृथ्वी बचाओ जीवन बचाओ हे।
सुशासन सप्ताह
देस म आज ले सुसासन सप्ताह मनाय जात हे। केन्द्रीय कार्मिक, लोक सिकायत अउ पेंसन मंत्री डॉक्टर जितेन्द्र सिंह ह आज नई दिल्ली म सुसासन सप्ताह के सुरूवात करीन। ओमन पूर्व प्रधानमंत्री अटल बिहारी वाजपेयी के जयंती ल मनाय बर पांच दिन के ‘‘प्रसासन गांव की ओर‘‘ राष्ट्रव्यापी अभियान के घलो सुरूवात करीन। ए मउका म ओमन किहीन कि ए अभियान के तहत ऑनलाइन सेवा वितरण बर देसभर के जिला आयुक्त मन डहार ले चिन्हारी करे गे करीबन तीन हजार एक सौ बीस नवा सेवा मन ल जोड़े जाही।
ऐति, प्रदेस म घलो ‘‘प्रसासन गांव की ओर‘‘ अभियान आज ले सुरू होगे हे। पच्चीस दिसंबर तक चलइया ए अभियान बर मुख्य सचिव अमिताभ जैन ह जम्मों जिला कलेक्टर मन ल लोगन मन ले मिले सिकायत के निपटारा करे बर सिविर लगाय के निरदेस देहे अउ संगेसंग विशेष कार्यशाला घलो राखे जाही।
पीएम-आवास योजना
बिलासपुर सांसद अरूण साव ह प्रधानमंत्री आवास योजना के मामला ल लोकसभा म उठाइन । ओमन कहिन कि छत्तीसगढ़ सरकार ह राज्यांश के नाम म ग्यारा लाख ले जादा परिवार मनके प्रधानमंत्री आवास योजना के तहत घर बनाये के काम ल रोक देहे। ओमन कीहिन कि प्रधानमंत्री आवास योजना ल रोकना लोगन मनके संग अन्याय हवय। अइसन करके राज्य के कांग्रेस सरकार ह गरीब मनके सपना ल तोड़त हे।
तबादला
प्रदेस म पन्द्रह झिन आईएएस अधिकारी मनके ट्रांसफर करे गेहे। एमा दू जिला के कलेक्टर घलो सामिल हे। धमतरी कलेक्टर पदुम सिंह एल्मा ल राज्य मंडी बोर्ड के प्रबंध संचालक बनाय गेहे। उंखर जगह म नारायणपुर कलेक्टर रितुराज रघुवंशी ल धमतरी कलेक्टर बनाय गेहे। उहें, खनिज विभाग म संचालक रेहे अजीत वसंत ल नारायणपुर जिला के कलेक्टर बनाय गेहे। भारतीय वन सेवा के अधिकारी शालिनी रैना ल वन विभाग के सचिव, त आलोक कटियार ल जल जीवन मिशन के संचालक अउ प्रेम कुमार ल प्रधानमंत्री ग्राम सड़क योजना के सीईओ बनाय गेहे। उहें, अरूण प्रसाद पी. ह खादी ग्रामोद्योग बोर्ड के एमडी होही। त ऐति आईएएस रेना जमील ल बलरामपुर जिला पंचायत के मुख्य कार्यपालन अधिकारी बनाय गेहे।
मोर मयारू गुरूजी-सम्मान
छत्तीसगढ़ राज्य बाल अधिकार संरक्षण आयोग के ‘‘मोर मयारू गुरूजी‘‘ कारीकरम ल राष्ट्रीय स्तर म सिल्वर स्कॉच अवार्ड ले सम्मानित करे गीस। ए सम्मान आज नई दिल्ली म राखे गे एक ठिन कारीकरम म स्कॉच फाउंडेशन डहार ले दे गीस। सम्मान ल महिला अउ बाल विकास मंत्री अनिला भेड़िया के संग आयोग के अध्यक्ष तेजकुंवर नेताम ह लीन।
कारीकरम म श्रीमती भेड़िया ह किहीन कि लइका मनके मानसिकता ल ध्ध्यान म राख के गुरूजी मन ह लइका मन ले बने व्यवहार करे जाय, इही उद्देश्य ले ए कारीकरम के सुरूवात करे गेहे। समारोह म छत्तीसगढ़ हाउसिंग बोर्ड अउ वन विभाग बालोद ल घलो पुरस्कार दे गीस।
कांग्रेस नेता हत्या-आरोपी गिरफ्तार
बिलासपुर म पाछु दिन कांग्रेस नेता संजू त्रिपाठी के हत्या के मामला म पुलिस ह माता-पिता, भाई अउ गोसईन के संगेसंग ग्यारह झिन आरोपी मन ल गिरफ्तार करे हे। मृतक के भाई ल उत्तरप्रदेश पुलिस के मदद ले लखनऊ ले गिरफ्तार करे गीस अउ बाकी आरोपी मन ल दिल्ली म पकड़े गीस।
जानबा के मुताबिक कांग्रेस नेता संजू त्रिपाठी के अज्ञात हमलावर मन ह पाछु चौदह दिसंबर के गोली मारके हत्या कर दे रिहीन।
अउ अब थोरकुन समाचार सार म –
– प्रदेश म काली ले राज्य स्तरीय रोजगार मेला के आयोजन करे जाही। एखर माध्यम ले छियांलिस हजार पद मन म भर्ती करे जाही।
– राजनांदगांव जिला के गांव जोब म नदिया म बूडे ले एक झिन युवक के मउत होगे हे।
– रायगढ़ जिला के खोपौली गांव म बस अउ कंटेनर के बीच होय भिडंत म बस चालक के मउत होगे। उंहें दस झिन यात्री मन घायल होगे। बस म करीबन पैंतीस झिन मनखे मन सवार रीहिन, जउन ह बिहाव कार्यक्रम ले लहुटत रीहिन।
अउ
– राजनांदगांव जिला म पशु तस्करी के सूचना मिले के बाद पहुंचे बजरंग दल के कार्यकर्ता मन ल तस्कर मन ह अपन गाड़ी के चपेट म ले लीन। ए घटना म एक झिन युवक के मउत होगे। उंहे आने मनखे मन गंभीर रूप ले घायल होगे हे। घटना ले गुस्साये लोगन मन बसंतपुर थाना के घेराव करीन।