केंद्रीय स्वास्थ्य मंत्रालय ह छत्तीसगढ़ ल बेरा ले पहिली हेल्थ एंड वेलनेस सेंटर्स फंग्शनल करे के शत-प्रतिशत लक्ष्य हासिल करे बर सम्मानित करे हे। यूनिवर्सल हेल्थ कवरेज डे के मउका म बनारस म होय एक ठिन कार्यक्रम म केंद्रीय स्वास्थ्य मंत्री डॅाक्टर मनसुख मांडविया ह ए सफलता उपर छत्तीसगढ़ ल प्रमाण पत्र देहे। ए सफलता उपर मुख्यमंत्री अउ स्वास्थ्य मंत्री ह स्वास्थ्य विभाग अउ राष्ट्रीय स्वास्थ्य मिशन के जम्मों अधिकारी अउ कर्मचारी मन ल बधाई दे हवय।
जानबा के मुताबिक प्रदेश ल कुल चार हजार आठ सौ पच्चीस प्राथमिक स्वास्थ्य केंद्र, उप स्वास्थ्य केंद्र अउ शहरी स्वास्थ्य केंद्र के उन्नयन करके हेल्थ अउ वेलनेस सेंटर्स के रूप म चलाये के लक्ष्य मिले रीहिस। राज्य म अभी चार हजार आठ सौ सत्यासी हेल्थ एंड वेलनेस सेंटर्स चलाये जात हे।
केंद्र सरकार ह स्पष्ट करे हे कि केंद्रीय कर्मचारी मन बर पुराना पेंशन योजना एक घांव फेर चालू करे के कोनो प्रकार के प्रस्ताव नइ हे। केंद्रीय वित्त राज्यमंत्री डॅाक्टर भगवत कराड ह आज लोकसभा म ये बात कीहिन।
ओमन कीहिन कि राजस्थान छत्तीसगढ़ अउ झारखण्ड सरकार ह अपन कर्मचारी मन बर पुराना पेंशन योजना ल एक घांव फेर बहाल करे के फैसला करे हे। श्री कराड ह कीहिन कि ए राज्य मन ह केंद्र अउ पेंशन कोश नियामक अउ विकास प्राधिकरण ल राष्ट्रीय पेंशन प्रणाली के तहत कर्मचारी मनके संचित राशि ल वापिस करे के प्रस्ताव भेजे हे।
केंद्र सरकार ह छत्तीसगढ़ उच्च न्यायालय के दू अतिरिक्त न्यायाधीश न्यायमूर्ति नरेंद्र कुमार व्यास अउ नरेश कुमार चंद्रवंशी ल स्थाई न्यायाधीश नियुक्त करे हे। ए बारे म अधिसूचना जारी कर दे गेहे। ए दूनों न्यायाधीश छत्तीसगढ़ उच्च न्यायालय के न्यायाधीश के रूप म अपन कार्यभार शुरू करे के दिन ले प्रभावी होही ।
राष्ट्रीय वेक्टर जनित नियंत्रण कार्यक्रम के तहत आज ले प्रदेश के तीन जिला – रायपुर, गरियाबंद अउ बलौदाबाजार म फाइलेरिया उन्मूलन अभियान शुरू होइस । अठारा दिसंबर तक चलइया ये अभियान म वयस्क लोगन मन ल फाइलेरिया के दवा खवाय जाही । अभियान के दउरान मितानिन मन ह घरोघर जाके लोगन मन ल ए दवा दीही। रायपुर प्रेस क्लब म एक ठिन कार्यक्रम म जिला के मुख्य चिकित्सा अउ स्वास्थ्य अधिकारी डॅाक्टर मिथिलेश चौधरी अउ डॅाक्टर राकेश गुप्ता ह जागरूकता रैली ल हरा झण्डी दिखाके रवाना करीन।
प्रधानमंत्री नरेंद्र मोदी ह अवइया पच्चीस दिसंबर के आकाशवाणी ले प्रसारित होवइया मन की बात कार्यक्रम बर लोगन मनले विचार अउ सुझाव देबर केहे हे।
सुनइया मन नमो ऐप या माईजीओवी ओपन फोरम म अपन विचार भेज सकथे या टोल फ्री नंबर 1 8 0 0-1 1-7 8 0 0 म घलो डायल कर अपन संदेस हिंदी या अंग्रेजी म रिकॉर्ड करा सकत हे । फोन लाइन तेईस दिसंबर तक खुला रइही। लोगन मन 1 9 2 2 म मिस्ड कॉल घलो दे सकत हे अउ एसएमएस लिंक मिले म सोझे प्रधानमंत्री ल अपन सुझाव दे सकत हे।
भारतीय जनता पार्टी के प्रदेश अध्यक्ष अरूण साव ह नागपुर ले बिलासपुर के बीच वंदे भारत एक्सप्रेस चलाय जाय के केंद्र सरकार के ए कदम ल बड़का कदम बताय हे। ओमन कीहिन कि वंदे भारत एक्सप्रेस चलाये ले प्रदेश के लोगन मन ल अवई जवई म आसानी होही अउ प्रदेश के विकास घलो होही।
उंहे पूर्व मुख्यमंत्री डॅाक्टर रमन सिंह ह कीहिन कि वंदे भारत ट्रेन के राजनांदगांव म स्टॉपेज होय ले इंहा के लोगन मन ल नागपुर अउ बिलासपुर के बीच आय जाय म आसानी होही।
कंाकेर जिला के राष्ट्रीय राजमार्ग क्रमांक तीस ले लापता होय ओडिशा के नायब तहसीलदार अउ ओखर परिवार के तीन झिन लोगन के शव कंाकेर के तीर एक ठिन कुंआ ले बरामद करे गेहे।
जानबा के मुताबिक ओडिशा के उमरकोट रहवइया नायब तहसीलदार सपन सरकार ह अपन परिवार मनके संग दस दिसंबर के कांकेर जिला के गोविंदपुर म बिहाव म सामिल होय बर आये रीहिन। ओडिशा जावत खानी ओखर कार ह कांकेर स्थित जंगलवार कॉलेज के तीर रद्दा के बाजू म बने कुंआ म गिर गे। ए घटना म परिवार के चारो सदस्य के मउत होगे। पुलिस ह कुंआ ले कार के संगेसंग शव ल निकाल के पोस्टमार्टम बर देहे।
दुर्ग कलेक्टर पुष्पेंद्र मीणा ह कुम्हारी फ्लाईओवर दुर्घटना म जिम्मेदार ठेका कंपनी के अधिकारी अउ कर्मचारी मन ल गिरप्तार करे के निर्देश देहे अउ संगेसंग चारो फ्लाईओवर म सीसीटीवी कैमरा लगाय बर केहे।
ओमन बताइन कि फ्लाईओवर बनाय के दउरान बंद करे गे रद्दा के जिम्मेवारी बनइया ठेका एजेंसी के होथे। एखर ले जुड़े कंपनी ह अपन कामकाज म लापरवाही बरते हे, जेखर सेती ओखर मनके खिलाफ कार्रवाई करे जाही।
जानबा के मुताबिक कुम्हारी म अधूरा बने ओवरब्रिज ले फटफटी म बइठे दू झिन लोगन मनके गिरके मउत होगे अउ एक झिन लइका ह घायल होगे रीहिस। त उंहे आने घटना म इही जगा ओवरब्रिज ले टकराके कार म बइठे मनखे ह घायल होगे रीहिन।
भारतीय जनता पार्टी के प्रदेश मीडिया प्रभारी अमित चिमनानी ह कीहिन हे कि छत्तीसगढ़ म जी-20 समिट प्रधानमंत्री नरेंद्र मोदी के छत्तीसगढ़ के प्रति प्रेम के प्रतीक हरय। ओेमन कीहिन कि केंद्र सरकार के नीति के सेती छत्तीसगढ़ म विकास के काम चलत हे। त उंहे छत्तीसगढ़ म जी-20 सम्मेलन राखे जाय के प्रधानमंत्री के फैसला के कंाग्रेस ह स्वागत करे हे। प्रदेश कांग्रेस के संचार विभाग के अध्यक्ष सुशील आनंद शुक्ला ह कीहिन कि केंद्र सरकार ह घलो छत्तीसगढ़ मॉडल ल दुनिया के आगू राखत हे।
रायगढ़ के कोतवाली पुलिस ह मानव तस्करी के मामला म नई दिल्ली स्थित प्लेसमेंट एजेंसी के दफ्तर मन म छापा मारके दू झिन आरोपी मन ल गिरप्तार करे हे। ए दूनो झिन ल रायगढ़ कोर्ट म पेस करे गीस। जिहंा ल ओमन ल पुलिस रिमांड म भेज दे गेहे। ये आरोपी मन उपर गंवई गांव के युवक युवती अउ नाबालिग मन ल काम देवाय के बहाना ले उंखर मन उपर शोषण करे के आरोप हे।
भारतीय जनता पार्टी के प्रदेश अध्यक्ष अरूण साव ह नगर पालिक निगम भिलाई-चरौदा, भिलाई, रिसाली अउ बीरगांव म नेता प्रतिपक्ष के चयन बर पर्यवेक्षक नियुक्त करे हे। पार्टी मुख्यालय ले जारी आदेश के मुताबिक विधायक बृजमोहन अग्रवाल अउ शिवरतन शर्मा ल भिलाई-चरौदा के पर्यवेक्षक बनाय गेहे। त उंहे सांसद संतोष पांडेय अउ भूपेंद्र सवन्नी ल भिलाई, पूर्व विधानसभा अध्यक्ष धरमलाल कौशिक अउ किरणदेव ल रिसाली के संगेसंग विधायक सौरभ सिंह ल बीरगांव नगर पालिक निगम के नेता प्रतिपक्ष चुने बर पर्यवेक्षक बनाय गेहे।
– दुर्ग म चलत अग्निवीर भर्ती रैली म अब तक करीबन चालीस हजार युवा मन ह भाग लेहे। रैली बर करीबन सत्तर हजार अर्जी मिले रीहिस।
अउ
– बलौदाबाजार वनमंडल के लवन परिक्षेत्र म दू ठिन तेंदुआ के कंकाल बरामद होय हे। वन विभाग के टीम ह मामला के जांच करत हे।