प्रधानमंत्री नरेन्द्र मोदी ह आज नागपुर रेलवे स्टेशन ले ‘‘वंदे भारत एक्सप्रेस‘‘ ल रवाना करीन। जेन ह संझा करीब पांच बजे बिलासपुर स्टेशन पहुंच गेहे। नागपुर-बिलासपुर वंदे भारत एक्सप्रेस दूनों कोति ले सनिच्चर के छोड़ सप्ताह म छयो दिन चलही। एखर स्टापेज रईपुर, दुरूग, राजनांदगांव अउ गोंदिया म रइही।
इही बीच, वंदे भारत एक्सप्रेस के राजनांदगांव पहुंचे म पूर्व मुख्यमंत्री डॉक्टर रमन सिंह, प्रदेस भाजपा अध्यक्ष अरूण साव अउ सांसद संतोष पांडेय ह बड़का जनसमूह संग स्टेशन म स्वागत करीन।
उहें, दुरूग रेलवे स्टेशन म लोकसभा सांसद विजय बघेल, राज्यसभा सांसद सरोर पांडेय अउ दुरूग जिला भाजपा अध्यक्ष जितेन्द्र वर्मा ह स्वागत करीन। जबकि, भिलाई स्टेशन म ट्रेन के अगुवई जिला अध्यक्ष ब्रजेश बिचपुरिया ह करीन।
वंदे भारत एक्सप्रेस के राजधानी रईपुर पहुंचे म सांसद सुनील सोनी, पूर्व मंत्री बृजमोहन अग्रवाल, राजेश मूणत अउ जिला अध्यक्ष जयंती पटेल स्वागत करीन। अइसने, भाटापारा स्टेशन म विधायक शिवरतन शर्मा, जिला अध्यक्ष डॉक्टर सनम जांगड़े, बिल्हा रेलवे स्टेशन म विधायक धरमलाल कौशिक, भाजपा प्रदेश उपाध्यक्ष भूपेन्द्र सवन्नी अउ बिलासपुर रेलवे स्टेशन पहुंचे म विधायक पुन्नूलाल मोहले, रजनीश सिंह, डॉक्टर कृष्णमूर्ति बांधी अउ भाजता नेता अमर अग्रवाल अउ रामदेव कुमावत समेत बड़ संख्या म कार्यकर्ता मन ह ट्रेन के स्वागत करीन। ए मउका म बिलासपुर रेल परिवार के सदस्य मन कोति ले रंगारंग सांस्कृतिक कार्यक्रम के आयोजन करे गीस, जेमा कत्थक, कुचीपुड़ी, भरतनाट्यम, बीहू अउ ग्रुप डांस के सुघ्घर प्रस्तुति दे गीस।
जानबा के मुताबिक वंदे भारत एक्सप्रेस ट्रेन ह काली बारह दिसंबर ले नियमित चलही, जेखर बर रिजर्वेशन ह पहिली ले सुरू होगे हे।
राज्यपाल-वीर मेला
राज्यपाल अनुसुईया उइके ह काली छत्तीसगढ़ के महान स्वतंत्रता संग्राम सेनानी सहीद वीरनारायण सिंह के सहादत दिवस के मउका म बालोद जिला के राजाराव पठार म आयोजित वीर मेला कारीकरम म सामिल होईन। ए मउका म ओमन सहीद वीरनारायण सिंह के प्रतिमा के अनावरण करीन। कारीकरम ल संबोधित करत हुए राज्यपाल ह किहीन कि अइसना आयोजन ले सहीद वीरनारायण सिंह के योगदान अउ बलिदान ल सम्मान मिलथे।
छग/मप्र-संयुक्त बैठक
‘‘मानव-वन्यजीव द्वंद और वन्यप्राणी अपराध नियंत्रण‘‘ बिसय उपर छत्तीसगढ़ अउ मध्यप्रदेश के वन अधिकारी मनके संयुक्त बइठका कबीरधाम जिला के चिल्फी म आयोजित करे गीस। बइठका म अधिकारी मन कोति ले दूनों राज्य के सीमा क्षेत्र म घूमत हाथी, शेर अउ आने-आने जंगली जानवर मनके निगरानी अउ सुरक्षा, मानव-वन्यप्राणी द्वंद, अवैध सिकार ल रोके अउ वन अपराध उपर नियंत्रण जइसे आने-आने मुद्दा म चर्चा करे गीस।
पीएमश्री योजना
राज्य सरकार के स्वामी आत्मानंद अंग्रेजी माध्यम स्कूल के तर्ज पर अब प्रदेस के सब्बों जिला मन म चुनिंदा सरकारी स्कूल मन ल ‘‘पीएमश्री’’ स्कूल के रूप म कायाकल्प करे जाही। चुने गे स्कूल ल केन्द्र सरकार ह सवारही अउ ओमा सब्बों सुविधा घलो होही, जेखर मॉनिटरिंग पीएम पोर्टल के माध्यम ले करे जाही।
एखर अंतर्गत राजनांदगांव जिला म पहिली चरण म तीन ठन पीएमश्री स्कूल खोले जाही। सिक्षा विभाग के अधिकारी मन ह बतईन कि स्कूल ल चुने बर मसौदा तियार करे जावत हे। ओमन बतईन कि ए योजना के अंतर्गत सब्बों जिला के हरेक विकासखंड म दू-दू ठिन पीएमश्री स्कूल खोले जाही। फेर अभी सुरूआती चरण म हर जिला म पीएमश्री स्कूल खोले जाए के प्रस्ताव हवय। राजनांदगांव, मोहला-मानपुर-चौकी अउ खैरागढ़-गंडई-छुईखदान म एक-एक ठिन स्कूल खोले जाही।
माओवादी मुठभेड़
नारायणपुर जिला म आज बिहनिया सुरक्षा बल अउ माओवादी मनके बीच मुठभेड़ होय के खबर हवय। मिले जानकारी के मुताबिक डिस्ट्रिक्ट रिजर्व गार्ड-डीआरजी अउ छत्तीसगढ़ सशस्त्र बल-सीएएफ के संयुक्त टीम ह एरिया डोमिनेशन म निकले रिहीस। इही दउरान ओरछा थाना क्षेत्र के गांव गुदाड़ी ले पहिली नाला के तीर माओवादी मन ह कुकर म आईईडी ब्लास्ट कर दीन, जेखर बाद जवान मन ह मोर्चा संभालीन अउ दूनों कोति ले गोलीबारी सुरू होगे। जवान मन ल भारी पड़त देख माओवादी मन जंगल के आड़ म भाग खड़े होईस।
बस्तर रेंज के पुलिस महानिरीक्षक सुंदरराज पी. ह बतईन कि मुठभेड़ म कोनों घायल नइ होय हे अउ घटनास्थल ले जवान मन ह करीब सौ मीटर तार बरामद करे हे।
रबी फसल-प्रदर्शन
धमतरी जिला के कुरूद म किसान मन ल रबी फसल बर पानी नइ दे जाय के खिलाफ भाजपा कार्यकर्ता मन तेरह दिसंबर के चक्काजाम करके प्रदर्सन करही। भाजपा प्रवक्ता अजय चंद्राकर ह कहिन कि छत्तीसगढ़ के सबो बांध ए बछर अच्छा बरसा के कारण लबालब हवय। फेर, राज्य सरकार ह मेंटनेस के नाम म किसान मन ल पानी देहे ले मना करत हे।
कांग्रेस-हाथ जोड़ो यात्रा
कांग्रेस, भारत जोड़ो यात्रा के उद्देश्य ल आम जनता तक पहुंचाए बर देसभर म ‘‘हाथ जोड़ो’’ यात्रा निकालही। ए कड़ी म छत्तीसगढ़ म घलो हाथ जोड़ो यात्रा ह हर विधानसभा तक जाही, जेखर माध्यम ले सामाजिक सौहार्द्र अउ एकता-अखंडता के संदेस दे जाही।
प्रदेस कांग्रेस अध्यक्ष मोहन मरकाम ह बतईन कि छत्तीसगढ़ म हाथ जोड़ो यात्रा ह छब्बीस जनवरी ले सुरू होही, जो ह हर बूथ तक जाही अउ हर जिला म अधिवेसन घलो होही। यात्रा के समापन अवसर म राज्य स्तरीय रैली निकाली जाही।
बैडमिंटन
बैडमिंटन वर्ल्ड फेडरेशन कोति ले बांग्लादेश के राजधानी ढाका म आयोजित योनेक्स सनराईज इंटरनेशनल चैलेंज बैडमिंटन प्रतियोगिता के खिताब छत्तीसगढ़ के आकर्षी कश्यप ह जीत लेहे। काली खेले गे आखिरी मुकाबला म ओमन ह भारत के ही असम राज्य के अस्मिता चालिया ल सीधा सेट म इक्कीस-पन्द्रह अउ इक्कीस-तेरह ले हरईस।
एखर पहिली, आकर्षी ह मालदीव म इंटरनेशनल चैलेंज प्रतियोगिता म घलो जीत हासिल करे रिहीस।
ऑनलाइन सट्टा-आरोपी गिरफ्तार
ऑनलाइन सट्टा चलाय वाले महादेव ऐप के पैनलिस्ट नसीम ल दुरूग पुलिस ह गिरफ्तार कर लीस हे। आरोपी ह पाछु छै महीना ले दस ले जादा पैनल बेच चुके हे। ओ ह नागपुर ले तीन पैनल संचालित करत रिहीस। ओखर तीर ले दस ले जादा खाता म करोड़ों रूपिया के धनराशि जमा होय के पता चले हे। ए ह दुबई स्थित महादेव ऐप के बड़का संचालक मनके सीधा संपर्क म रिहीस।
अउ अब थोरकुन समाचार सार म –
– फायलेरिया उन्मूलन बर काली ले रईपुर, गरियाबंद अउ बलौदाबाजार जिला म विशेष अभियान चलाय जाही, जेन ह अट्ठारह दिसंबर तक चलही।
– राजनांदगांव जिला के खैरागढ़ म लोन देवाय के नाम म लाखों रूपिया के ठगी के मामला सामन आय हे। पुलिस ह मामला पंजीबद्ध करके जांच सुरू कर देहे। उहें, डोंगरगांव म एक सिक्षक के खाता ले अज्ञात मनखे ह करीब दू लाख रूपिया निकाल लीस।
– संभाग स्तरीय छत्तीसगढ़िया ओलंपिक प्रतियोगिता के आयोजन तेरह अउ चौदह दिसंबर के दुरूग म करे जाही।
– राजनांदगांव के पुलिस अधीक्षक ह सड़क सुरक्षा बर अधिकारी अउ करमचारी मन ल सपथ देवईन।
अउ
– महासमुंद जिला के पिथौरा क्षेत्र के ग्राम उर्रीदादर के तीर एक चारपहिया वाहन अनियंत्रित होके पलट गे। ए हादसा म पन्द्रह झन घायल होगे हे।