देश के छठवंा सेमी हाइस्पीड ट्रेन वंदे भारत एक्सप्रेस बिलासपुर ले नागपुर के बीच चलाये जाही। प्रधानमंत्री नरेंद्र मोदी ग्यारा दिसंबर के नागपुर म ये ट्रेन ल हरियर झंडी दिखाके रवाना करही। इही बीच बिलासपुर-कोचिन डिपो ले तियार होके वंदे भारत एक्सप्रेस ट्रेन आज नागपुर बर रवाना होगे। डीआरएम प्रवीण पांडे समेत बिलासपुर रेल मंडल के आने अधिकारी के मौजूदगी म ये ट्रेन प्लेटफार्म नंबर सात ले रवाना करे गीस। एखर पहिली बुधवार के वंदे भारत एक्सप्रेस ट्रेन बिलासपुर पहुंचीस, जेखर संग आये चेन्नई के तेरा सदस्यीय टीम ह स्थानीय कर्मचारी मन ल ट्रेन के देखभाल के प्रशिक्षण दे गीस।
रेलवे के मुताबिक करीबन एक सौ तीस किलोमीटर प्रति घंटा के रप्तार ले चलइया ये ट्रेन के स्टापेज रायपुर, दुर्ग अउ गोंदिया म दे गेहे। शनिचर ल छोड़के ये ट्रेन हप्ता म छै दिन चलही अउ यात्रा के एक चरण करीबन पांच घंटा म पूरा करही। ये ट्रेन बिलासपुर ले बीहनिया पौने सात बजे रवाना होही अउ मंझनियंा करीबन सवा बजे रायपुर पहुंचही। लहुटत बेरा ये ट्रेन मंझनियंा दू बजे नागपुर ले रवाना होके संझा सात बजके पैंतीस मिनट म बिलासपुर पहुंचही। ये सेमी हाइस्पीड ट्रेन म स्वचालित दरवाजा अउ जीपीएस आधारित ऑडियो वीजुअल सूचना प्रणाली के संग जम्मों आधुनिक सुविधा होही ।
गरियाबंद अविश्वास प्रस्ताव
गरियाबंद के नगरपालिका उपाध्यक्ष सुरेंद्र सोनटेके के खिलाफ लाये गे अविश्वास प्रस्ताव ध्वस्त होगे । अविश्वास प्रस्ताव के पक्ष म आठ वोट अउ विपक्ष म सात वोट पड़े हे। खबर के मुताबिक नगर पालिका उपाध्यक्ष के खिलाफ अविश्वास जतात कंाग्रेस के आठ पार्षद मन चौबीस नवंबर के कलेक्टर ल ज्ञापन देके अर्जी सौंपे रीहिन। एखर बादे आज एडीएम अउ एसडीएम के आगू कराय गे मतदान म प्रस्ताव के पक्ष म आठ अउ विपक्ष म सात वोट पड़ीस। तय संख्या म वोट नइ मिले के सेती प्रस्ताव ध्वस्त होगे।
खबर के मुताबिक पंद्रह सदस्य वाले गरियाबंद नगर पालिका म कांग्रेस के आठ अउ भारतीय जनता पार्टी के सात पार्षद हवय। इंहा पालिका अध्यक्ष अउ उपाध्यक्ष दूनो भाजपा समर्थक हे ।
रोजगार मेला
रायपुर म राखे गे रोजगार मेला म सामिल होय बर उम्मीदवार काली दस दिसंबर तक ऑनलाइन अर्जी दे सकत हे। ये मेला ले प्रायवेट छेत्र के आने-आने सेक्टर म छियांलिस हजार ले जादा पद बर भर्ती करे जाही। रोजगार मेला के बेरा दसवीं अउ बारहवीं पास आवेदक मनके संगेसंग स्नातक, स्नातकोत्तर अउ जीडीए, होटल मैनेजमेंट, आईटीआइर्, पॉलिटेक्निक, डिप्लोमा, बीई अउ बीटेक पास योग्य आवेदक मनके भर्ती करे जाही।
उंहे रायपुर के सासकीय औद्योगिक प्रशिक्षण संस्था सड्डू म आईटीआई पास युवक मन बर बारा दिसंबर के अप्रेंटिस शिप्ट मेला के आयोजन करे जाही। ये मेला म पोर्टल म जादा ले जादा उद्योग अउ प्रतिष्ठान मनके पंजीयन करे जा सकत हे।
वीर नारायण सिंह शहादत दिवस
छत्तीसगढ़ के प्रथम स्वतंत्रता संग्राम सेनानी अमर शहीद वीर नारायण सिंह ेंके काली शहादत दिवस हरय । ये मउका म राज्यपाल अनुसुइया उइके अउ मुख्यमंत्री भूपेश बघेल ह ओमन ल सुरता करीन हे । राज्यपाल अनुसुइया उइके काली बालोद जिला के राजाराव पठार म वीर मेला आयोजन समिति कोति ले राखे गे वीर मेला म सामिल होही। उंहे आदिम जाति अनुसंधान अउ प्रशिक्षण संस्थान कोति ले शहीद वीर नारायण सिंह के सुरता म काली दस ले बारा दिसंबर तक रायपुर के पंडित दीनदयाल उपाध्याय ऑडिटोरियम म चित्रकला प्रतियोगिता राखे जाही।
प्रतियोगिता म प्रतिभागी मन शहीद वीर नारायण सिंह के संग आने-आने आदिवासी स्वतंत्रता संग्राम सेनानी अउ जननायक मनके जीवन के घटना ले जुड़े चित्र बनाही। प्रतियोगिता म सोला ले पच्चीस अउ पच्चीस ले जादा दू आयु वर्ग म राखे जाही।
आधार अपडेशन
रायपुर जिला म लोगन ल सासकीय योजना के फायदा लेबर अउ दिगर परसानी ले बांचे बर दस साल जुन्ना आधार कार्ड के अपडेट करे बर शिविर लगाये जात हे। कलेक्टर डॅाक्टर सर्वेश्वर भुरे के निर्देश म सबो ग्राम पंचायत, नगरीय निकाय म शिविर लगाके दस बछर पहिली बने आधार कार्ड म डेमोग्राफिक अपडेशन के काम करे जात हे।
जिला म अब तक पंद्रा ले जादा शिविर लगाये गेहे। ये शिविर म साढ़े चार हजार ले जादा लोगन के आधार कार्ड अपडेट करे गेहे। अवइया दिन म अइसन शिविर लगाके आधार अपडेशन के काम जल्दीच करे के निर्देश कलेक्टर ह अधिकारी मन ल दीन हे। कलेक्टर ह जिल ावासी मनले अपील करीन हे कि जेखर आधार कार्ड दस साल पहिली बने हे, वोमन ल जल्दी ले जल्दी अपडेट कराना जरूरी हे ।
ट्रेन परिचालन
उत्तर रेलवे के दिल्ली रेल मंडल के दिल्ली-एरिया खंड म सतरा ले इक्कीस दिसंबर तक नॉन इंटरलॉकिंग के काम करे जाही। एखर सेती उत्तर रेलवे अउ दक्षिण पूर्व मध्य रेलवे ले चलइया कुछएक गाड़ी मन ल दिगर रद्दा ले रवाना करे जाही।
रेलवे ले मिले खबर के मुताबिक सोला, सतरा अउ बीस दिसंबर के छिंदवाड़ा-फिरोजपुर पातालकोठ एक्सप्रेस परिवर्तित रद्दा मथुरा-अलवर-रेवाड़ी अस्थलबोहर होके रवाना होही। उंहे सतरा अउ अठारा दिसंबर के फिरोजपुर-छिंदवाड़ा-पातालकोठ एक्सप्रेस बदले गे रद्दा बोहर-रेवाड़ी अलवर-मथुरा होके रवाना होही। अइसने बीस दिसंबर के दुर्ग ले चलइया दुर्ग – जम्मूतवी एक्सप्रेस बदले रद्दा पलवल-नई दिल्ली आदर्शनगर दिल्ली होके जाही।
एखर संगेसंग दक्षिण पश्चिम रेलवे के केसलरॉक-वास्कोदगामा स्टेशन के बीच दोहरीकरण कमिश्निंग काम के सेती वास्कोदगामा-जसीडीह एक्सप्रेस के अवई जवई प्रभावित होही। सोला दिसंबर के वास्कोदगामा-जसीडीह एक्सप्रेस मड़गांव स्टेशन ले सुरू होही अउ वास्कोदगामा-मड़गांव के बीच रद्द रीही। उंहे उन्नीस दिसंबर के जसीडीह-वास्कोदगामा एक्सप्रेस मड़गांव स्टेशन म सिराही अउ मडगावं वास्कोदगामा के बीच रद्द रीही।
धान खरीदी
राज्य म समर्थन कीमत म अभी तक करीबन दस लाख चौदह हजार किसान मनले अड़तीस लाख चौबीस हजार मीटरिक टन ले जादा धान के उपार्जन करे के हे। एखर बर किसान मन ल सात हजार नौ सौ तिरालिस करोड़ रूपिया के भुगतान बैंक लिंकिंग बेवस्था म करे गेहे। धान बेचे म किसान मन ल कोनो किसम के परसानी झन होवय, एखर बर जम्मों बेवस्था म सरलग निगरानी राखे गेहे। उंहे धान बिसाय के संगेसंग धान के उठाव करे जात हे। अभी तक उपार्जन केंद्र ले इक्कीस लाख मीटरिक टन ले जादा धान के उठाव होगे हे।
माओवादी आत्मसमर्पण
सुकमा जिला म आठ लाख रूपिया के इनामी माओवादी ह सुरक्षा बल के े आगू आत्मसर्पण करीस हे। खबर के मुताबिक ये माओवादी ह अतिरिक्त पुलिस अधीक्षक किरण चव्हाण अउ सीआरपीएफ के कोबरा बटालियन के अधिकारी मनके आगू आत्मसमर्पण करीन। एखर उपर कतकोन माओवादी घटना म सामिल रेहे के आरोप हे ।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत भारत ल जी ट्वंटी के अध्यक्षता मिले उपर केंद्रित रीही । एमा राज्य के पूर्व निर्वाचन आयुक्त अउ सामाजिक, राजनीतिक विश्लेषक डॅाक्टर सुशील त्रिवेदी ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली दस दिसंबर के बिहनिया दस बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
मौसम
प्रदेस म जाड़ गजब जनावत हे। गरम कपड़ा के पूछ-परख बाढ़े हे उंहे रतिहाकुन जाड़ ले बांचे बर भुर्री तापत हे।
मौसम विभाग के मुताबिक अवइया दू-तीन दिन म जाड़ म कमी आय के आसार हे । मौसम विज्ञानी ह बताइन कि बंगाल के खाड़ी म गहरा अवदाब बने हे। उंहे चक्रवाती तूफान मंडौस के प्रभाव ले अवइया दू-तीन दिन म प्रदेश के न्यूनतम तापमान म बढ़वार हो सकत हे। ये बेरा म प्रदेस म बादर छाय अउ बस्तर संभाग के एक दू जगा म छुटपुट बरसा होय के संभावना हरय।
अउ अब थोरकुन समाचार सार म –
– प्रधानमंत्री फसल बीमा योजना के तहत अवइया रबी फसल बर बीमा कराये के आखरी तारीख पंद्रह दिसंबर तय करे गेहे।
अउ
– योग आयोग के अध्यक्ष ज्ञानेश शर्मा ह काली रायपुर के शारदा चौक स्थित वार्ड क्रमांक सत्ताइस म पच्चीसवंा निशुल्क नियमित योगाभ्यास केंद्र के शुभारंभ करीन।