भानुप्रतापपुर विधानसभा उपचुनाव बर काली पांच दिसंबर के वोट डारे जाही। निर्वाचन आयोग ह एखर तियारी पूरा कर लेहे। स्वतंत्र अउ निष्पक्ष मतदान बर सुरक्षा के कड़ा प्रबंध करे गेहे। मतदान के बेरा बीहनिया सात बजे ले मंझनियां तीन बजे तक राखे गेहे। ए उपचुनाव म एक लाख पंच्यानबे हजार ले जादा मतदाता मन अपन मत के प्रयोग करही। उपचुनाव बर दू सौ छप्पन मतदान केंद्र बनाय गेहे। जेमा बियांसी मतदान केंद्र माओवाद संवेदनशील, सतरा मतदान केंद्र अतिसंवेदनशील अउ तेइस मतदान केंद्र राजनीतिक रूप ले संवेदनशील हरय।
कांग्रेस के सावित्री मंडावी अउ भाजपा ले ब्रम्हानंद नेताम समेत सात प्रत्याशी मन चुनाव मैदान म हवय। चुनावी शोर थमे के पहिली काली कांग्रेस अउ भाजपा के संग आने उम्मीदवार मन चुनाव प्रचार म अपन ताकत झोंक दीन। उम्मीदवार मन घर-घर जाके प्रचार करत हे। कांकेर कलेक्टर अउ जिला निर्वाचन अधिकारी डॅाक्टर प्रियंका शुक्ला ह जम्मों मतदाता मन ल निर्भिक होके मतदान करे के अपील करे हे। ए चुनई के मतगणना अउ परिणाम के घोषणा आठ दिसंबर के होही।
वंदे भारत एक्सप्रेस
बिलासपुर ले नागपुर के बीच वंदे भारत एक्सप्रेस अवइया ग्यारा दिसंबर ले शुरू होवइया हे। केंद्रीय जनजाती कार्य राज्य मंत्री रेणुका सिंह ह छत्तीसगढ़ ल वंदे भारत एक्सप्रेस के सौगात मिले म प्रदेशवासी मन ल बधाई दीन। ओमन कीहिन कि प्रधानमंत्री नरेंद्र मोदी डहार ले छत्तीसगढ़ के जनता ल देगे सौगात वंदे भारत एक्सप्रेस ट्रेन बिलासपुर ले नागपुर के बीच सफर तय करही। एखर स्टापेज रायपुर, दुर्ग अउ गोंदिया म दे गेहे। शनिवार के छोड़ ये ट्रेन हप्ता म छै दिन चलही।
केंद्रीय बजट म अवइया तीन साल के भीतर चार सौ वंदे भारत ट्रेन चलाय के घोषणा करे गेहे । एति रायगढ़ सांसद गोमती साय ह ए ट्रेन बर प्रधानमंत्री नरेंद्र मोदी अउ केंद्रीय राज्य मंत्री रेणुका सिंह ल धन्यवाद दीन। ओमन कीहिन कि केंद्र सरकार छत्तीसगढ़ के विकास म बढ़चढ़ के योगदान देवत हे।
अंतर्राष्ट्रीय दिव्यांग दिवस
अंतर्राष्ट्रीय दिव्यांग दिवस के उपलक्ष्य म समाज कल्याण विभाग डहार ले राजधानी रायपुर स्थित जोरा मैदान म अंतर्राष्ट्रीय दिव्यांगजन समारोह के आयोजन करे गीस। समारोह म समाज कल्याण मंत्री अनिला भेडिया ह उत्कृष्ट काम करइया आठ आने आने श्रेणी दिव्यांगजन राज्य स्तरीय पुरस्कार दीन। संगेसंग बीस दिव्यांगजन मन ल अत्याधुनिक कृत्रिम बॉयोनिक हाथ अउ कृत्रिम पैर निशुल्क दे गीस। ए बेरा म निशक्तजन के कल्याण बर दुर्ग जिला ल राज्य स्तरीय पुरस्कार ले सम्मानित करे गीस।
उंहे दुर्ग स्थित जिला परियोजना कार्यालय परिसर म समग्र शिक्षा विभाग डहार ले शपथ फाउंडेशन के सहयोग ले कार्यक्रम के आयोजन करे गीस। पाटन धमधा अउ दुर्ग के स्कूल ले आये दिव्यांग लइका मन आने आने खेल प्रतियोगिता म बढ़चढ़ के हिस्सा लीन।
ए बेरा रंगोली, मेहंदी, साफ्टबॉल थ्रो, पचास मीटर दौड़, चित्रकला, कुर्सीदौड़, मटका फोड़, जलेबी दौड़, जइसे आने आने प्रतियोगिता के आयोजन करे गे रीहिस। ए कार्यक्रम म विजेता मन ल पुरस्कार देके सम्मानित करे गीस।
उंहे राजनांदगांव के स्टेट हाईस्कूल मैदान म अंतर्राष्ट्रीय दिव्यांग दिवस के बेरा म खेलकूद प्रतियोगिता के आयोजन करे गीस। एखर पहिली शहर म रैली घलो निकाले गीस। दिव्यांग कौशल विकास पुनर्वास अउ सशक्तिकरण समेकित क्षेत्रीय केंद्र समाज कल्याण अउ समग्र शिक्षा विभाग डहार ले घलो अंतर्राष्ट्रीय दिव्यांग दिवस मनाये गीस।
कांग्रेस महाविधवेशन
अखिल भारतीय कांग्रेस कमेटी के महाधिवेशन अवइया फरवरी महीना म छत्तीसगढ़ के राजधानी रायपुर म आयोजित होही। ए महाधिवेशन म पार्टी के राष्ट्रीय अध्यक्ष मल्लिकार्जुन खड़गे सहित वरिष्ठ नेता सोनिया गांधी अउ राहुल गांधी के संगेसंग आने आने पदाधिकारी मन सामिल होही। महाधिवेशन म छत्तीसगढ़, राजस्थान अउ मध्यप्रदेश समेत आने राज्य मन म होवइया विधानसभा चुनाव के तियारी ल लेके चर्चा करे जाही।
नौसेना दिवस
आज नौसेना दिवस हरय। वर्ष उन्नीस सौ एकहत्तर म पाकिस्तान के संग लड़ई म भारतीय नौसेना के भूमिका अउ उपलब्धि के प्रति सम्मान जताय बर ए दिन ल मनाये जाथे।
ए बेरा म नौसेना प्रमुख एडमिरल आर. हरिकुमार ह कीहिन कि भारतीय नौसेना के लक्ष्य भारत म तियार, भारत डहार ले तियार अउ भारत बर तियार सुरक्षा के सामान प्राप्त करना हे। ओमन ह आकाशवाणी ले बातचीत म कहिन कि भारतीय नौसेना आत्मनिर्भरता अउ स्वदेशी प्रौद्योगिकी विकास बर प्रयास करत हे अउ जम्मों पूंजीगत परियोजना बर पर्याप्त संसाधन उपलब्ध हे।
प्रधानमंत्री नरेंद्र मोदी अउ रक्षामंत्री राजनाथ सिंह ह नौसेना दिवस म भारतीय नौसेना ल बधाई दीन। प्रधानमंत्री ह कीहिन कि नौसेना सरलग देश के सुरक्षा अउ चुनौती के बेरा म म आगू रहिथे।
छत्तीसगढ़ के मुख्यमंत्री भूपेश बघेल ह नौसेना दिवस म साहस, शौर्य अउ निष्ठा के प्रति जल सीमा के प्रहरी भारतीय नौसैनिक अउ उंखर परिवार जन ल बधाई अउ शुभकामना दीन।
राष्ट्रीय बाल विज्ञान कांग्रेस
छत्तीसगढ़ के बाल वैज्ञानिक मन अहमदाबाद जाके उंहा आयोजित राष्ट्रीय बाल विकास कांग्रेस म भाग लीहीं। राजधानी रायपुर म आयोजित राज्य स्तरीय बाल विज्ञान कांग्रेस म सोला झन लइका मनके चयन करे गेहे।
छत्तीसगढ़ विज्ञान अउ प्रौद्योगिकी परिषद डहार ले आयोजित राज्य स्तरीय आयोजन के समापन म बाल वैज्ञानिक मनके नाव के घोषणा करे गीस। छत्तीसगढ़ विज्ञान अउ प्रौद्योगिकी के महानिदेशक डॅाक्टर एस. कर्मकार ह बताइन कि आयोजन म लइका मनके रचनात्मक अउ नवाचार सोच ल परिणाम तक पहुंचाय म मदद मिलथे।
उंहे पंडित रविशंकर शुक्ल विश्वविद्यालय के कुलपति प्रोफेसर के.एल. वर्मा ह कहिन कि लइका मन म वैज्ञानिक रूचि विकसित करे बर ए आयोजन सराहनीय हवय। उल्लेखनीय हे कि ए बछर राष्ट्रीय बाल विज्ञान कांग्रेस एक ले तीन दिसंबर तक पारिस्थितिक तंत्र, स्वास्थ्य अउ कल्याण थीम म आयोजित करे गीस।
खेल
न्यूजीलैंड के ऑकलैंड म चलत कॉमनवेल्थ अंतर्राष्ट्रीय पॉवर लिफ्टिंग प्रतियोगिता म दुर्ग जिला के पॉवर लिफ्टर संतोषी मांझी अउ राज वासनिक ह रजत पदक हासिल करीन।
मुख्यमंत्री भूपेश बघेल ह ये उपलब्घि बर ओमन ल शुभकामना दीन। उंहे पुणे महाराष्ट्र म आयोजित सत्रहवां ऑल इंडिया पुलिस गेम मीट म राजनांदगांव पुलिस विभाग के महिला प्रधान आरक्षक अंजू सिंह ह स्वर्ण पदक जीते हे। अंजू सिंह ह उनहत्तर किलोग्राम वर्ग म तीन सौ चालीस किलोग्राम पॉवर लिफ्टिंग करके पहला स्थान प्राप्त करीन।
धमतरी एसपी-दौरा
धमतरी के पुलिस अधीक्षक प्रशांत ठाकुर ह माओवाद प्रभावित बोरइ अउ मेचका थाना के संग सीएएफ कैम्प बहीगांव के निरीक्षण करीन। ए बेरा म ओमन पुलिस अउ सुरक्षा बल के जवान मनले घलो मुलाकात करीन। संगेसंग ओमन ल सतर्क अउ सुरक्षित ड्यूटी करे के संबंध म आवश्यक निर्देश दीन। पुलिस अधीक्षक ह बइठक लेके पुलिस जवान मनके सुविधा अउ उंखर समस्या के बारे म जानकारी लीन। उंहे सीएएफ कैम्प बहीगांव म निरीक्षण के दौरान माओवाद ले निपटे बर सरलग सर्चिंग अभियान चलाये बर निर्देश दीन।
अउ अब थोरकुन समाचार सार म –
– अखिल भारतीय आयुर्विज्ञान संस्थान-एम्स डहार ले आयोजित चिकित्सा शिक्षा के सुपर स्पेशलाइजेशन प्रवेश परीक्षा म भिलाई के चिकित्सक डॅाक्टर उत्कर्ष ह देशभर म पहला स्थान पाय हे।
– कृषि मंत्री रविंद्र चौबे ह सेवा सहकारी केंद्र धमधा म चौदा लाख रूपिया के लागत ले बने किसान कुटीर भवन के लोकार्पण अउ नवीन धान खरीदी उपकेंद्र करेली के शुभारंभ करीन।
– नगरीय प्रशासन मंत्री डॅाक्टर शिवकुमार डहरिया के अनुशंसा म मनरेगा के तहत रायपुर जिला के आरंग विकासखंड म करीबन पौने पांच करोड़ रूपिया के विकास काम के स्वीकृति मिलिस।
– जिला रोजगार अउ स्वरोजगार मार्गदर्शन केंद्र रायपुर डहार ले कौशल विकास प्राधिकरण के तत्वावधान म मेगा रोजगार मेला के आयोजन करे जाही। एखर बर छै दिसंबर ले ऑनलाइन आवेदन आमंत्रित करे गेहे। एमा दिव्यांगजन मन घलो सामिल हो सकत हे।