आरक्षण विधेयक- पारित
छत्तीसगढ़ विधानसभा म काली देर संझा तक आरक्षण संसोधन विधेयक सर्वसम्मति ले पारित होगे। एमा अनुसूचित जनजाति ल बत्तीस प्रतिशत, अनुसूचित जाति ल तेरा, अन्य पिछड़ा वर्ग बर सत्ताईस अउ सामान्य वर्ग के गरीब मनखे मन बर चार प्रतिशत आरक्षण के प्रावधान करे गेहे।
आरक्षण विधेयक उपर विधानसभा म करीबन सात घंटा तक चले चर्चा के जवाब देत मुख्यमंत्री भूपेश बघेल ह कीहिन कि राज्य सरकार ह आबादी के आधार म आरक्षण तय करे हे। एखर बर क्वांटीफायबल डाटा आयोग के रिपोर्ट ल आधार बनाय गेहे। फेर विपक्ष ह सदन के पटल म क्वांटीफायबल डाटा आयोग के रिपोर्ट ल नइ राखे उपर आपत्ति दरज कराइन। विपक्षी विधायक मन ह कीहिन कि सदस्य मन ल डाटा अयोग के रिपोर्ट मिले के बाद स्थिति स्पष्ट हो जाही, कि प्रदेस म कौन वर्ग के कतका जनसंख्या हरय।
मुख्यमंत्री ह बताइन कि बछर दू हजार ग्यारा के जनगणना म अनुसूचित जाति के जनसंख्या बारा प्रतिशत ले कुछ जादा रीहिस हे, फेर सरकार ह तेरा प्रतिशत आरक्षण के प्रावधान करे हे। ओमन कीहिन कि संविधान के मुताबिक अनुसूचित जाति अउ जनजाति ल उंखर जनसंख्या के अनुसार ही आरक्षण देके प्रावधान हे। श्री बघेल ह विपक्ष के ईडब्लूएस के आरक्षण दस प्रतिशत करे के प्रस्ताव उपर कीहिन कि क्वांटीफायबल डाटा आयोग के रिपोर्ट म ईडब्लूएस के जनसंख्या म साढ़े तीन प्रतिशत के करीब आय हे, जबकि सरकार ह चार प्रतिशत आरक्षण के प्रावधान करे हे। ओमन कीहिन कि आरक्षण के मामला म जिला अउ संभाग संवर्ग म रोस्टर लागू होही, जउन जगा म सामान्य वर्ग के जनसंख्या जादा हे, उंहा संभाग अउ जिला संवर्ग म ईडब्लूएस ल जनसंख्या के अनुपात म अधिकतम दस प्रतिशत आरक्षण के लाभ मिलही।
राज्यपाल आरक्षण विधेयक
इही बीच राज्यपाल अनुसुइया उइके आरक्षण संसोधन विधेयक उपर सोमवार के हस्ताक्षर करहीं। आज राजधानी रायपुर म पत्रकार मनले गोठबात करत सुश्री उइके ह कीहिन कि उंखर विधि सलाहकार अभी छुट्टी म हवय। ओमन कीहिन कि आरक्षण ल लेके राज्य सरकार ल विधेयक या अध्यादेश लाये खातिर पहल मोर डहार ले ही करे गे रीहिस।
राज्यपाल ह कीहिन कि विधेयक पेस होय अउ पारित होय के प्रक्रिया हे। विधानसभा म पारित होय के बाद जब कोनो विधेयक राजभवन आथे, त सचिवालय म विधि सलाहकार परीक्षण करथे। एखर बाद विधेयक राज्यपाल के तीर आथे। तुरते विधेयक उपर हस्ताक्षर नइ होय। सुश्री उइके ह कीहिन कि जब राज्य सरकार के मंत्री मन मिले खातिर आए रीहिन, त में ह ओमन ल बता दे हवों के मोर कोति ले घलो सकारात्मक सहयोग मिलही।
आरक्षण विधेयक-चंदेल
उंहे नेता प्रतिपक्ष नारायण चंदेल ह कीहिन हे कि राज्य सरकार ह बहुमत के दुरूपयोग करत आरक्षण संशोधन विधेयक ल पारित कराय हवय। ओमन ईडब्लूएस ल दस प्रतिशत के जगा चार प्रतिशत आरक्षण दे जाय म आपत्ति जताय हे।
आज रायपुर म पत्रकार मनले गोठबात करत ओमन कीहिन कि विधानसभा म भाजपा ह संसोधन प्रस्ताव लाये रीहिस, जेमा अनुसूचित जनजाति ल बत्तीस, अनुसूचित जाति ल सोला, ओबीसी ल सत्ताईस अउ सामान्य वर्ग के गरीब ईडब्लूएस ल दस प्रतिशत आरक्षण दे जाय के मांग करे गे रीहिस। फेर सरकार ह ओला खारिज कर दीस। श्री चंदेल ह आरोप लगाइन कि राज्य सरकार ह भानुप्रतापपुर विधानसभा उप चुनाव ल देखत आरक्षण संसोधन विधेयक ल पारित कराय हे।
विस-शीतकालीन सत्र
छत्तीसगढ़ विधानसभा के शीतकालीन सत्र अवइया दू जनवरी ले शुरू होके छै जनवरी तक चलही। सत्र के चलत कुल पांच ठिन बइठका होही। एमा प्रश्नकाल के संगेसंग आने आने शासकीय अउ अशासकीय कार्य संपादित करे जाही।
दू दिवसीय विधानसभा के विशेष सत्र के बाद काली देर संझा विधानसभा सचिवालय डहार ले पुनरीक्षित सामान्य सूची जारी करे गीस, जेमा अवइया दू जनवरी ले छै जनवरी तक विधानसभा के बइठका के जानकारी देगे हवय।
भानुप्रतापपुर उपचुनाव
भानुप्रतापपुर विधानसभा उपचुनाव खातिर आज संझा पांच बजे चुनाव प्रचार थम गीस। अबले राजनीतिक दल अपन अपन प्रत्याशी खातिर डोर-टू-डोर प्रचार करहीं।
एखर पहिली राजनीतिक दल के दिग्गज नेता मन ह आज अपन-अपन प्रत्याशी के पक्ष म चुनावी सभा मन ल संबोधित करीन। मुख्यमंत्री भूपेश बघेल अउ प्रदेश कांग्रेस अध्यक्ष मोहन मरकाम ह कोरर अउ लखनपुरी म सभा लेके कांग्रेस प्रत्याशी सावित्री मंडावी खातिर वोट मांगीन। उंहे पूर्व मुख्यमंत्री डॅाक्टर रमन सिंह ह भाजपा प्रत्याशी के समर्थन म रोड शो करीन। फेर प्रदेश भाजपा अध्यक्ष अरूण साव ह गांव मन म जनसंपर्क के जरिया ले भाजपा प्रत्याशी ब्रम्हानंद नेताम के पक्ष म वोट मांगीन।
इही बीच बस्तर रेंज के पुलिस महानिरीक्षक सुंदरराज पी. अउ कमिश्नर श्याम धावड़े ह मतदान केंद्र के निरीक्षण कर निर्वाचन काम म लगे अधिकारी अउ कर्मचारी मन ल जरूरी सुरक्षा बेवस्था के निर्देश दीन।
जानबा के मुताबिक ए उपचुनाव म कांग्रेस अउ भाजपा प्रत्याशी समेत सात झिन उम्मीदवार मैदान म हे। ए उपचुनाव म पांच दिसंबर के वोट जाही, उंहे मतगणना अउ चुनाव परिणाम के घोषणा आठ दिसंबर के होही।
ईडी-सौम्या चौरसिया
मुख्यमंत्री भूपेश बघेल ह प्रवर्तन निदेशालय-ईडी डहार ले मुख्यमंत्री सचिवालय म उपसचिव सौम्या चौरसिया के गिरप्तारी ल राजनीतिक कार्रवाई बताइन हे। ट्वीट म श्री बघेल ह कीहिन कि सुश्री चौरसिया के गिरप्तारी के खिलाफ पूरा ताकत ले लड़ाई लड़े जाही। उंहे प्रदेश कांग्रेस अध्यक्ष मोहन मरकाम ह ट्वीट कर कीहिन हे कि ए कार्रवाई लोकतांत्रिक ढंग ले चुने गे सरकार ल अस्थिर करे के साजिश हवय।
ओति भारतीय जनता पार्टी ह सौम्या चौरसिया के गिरप्तारी ल उचित बतावत कीहिन कि एखर ले भ्रष्टाचार के एक बड़ मामला उजागर होगे हवय। पूर्व मंत्री महेश गागड़ा ह ए मामला म मुख्यमंत्री भूपेश बघेल ह इस्तीफा के मांग करे हवय।
जानबा के मुताबिक काली ईडी ह मुख्यमंत्री सचिवालय म उपसचव सौम्या चौरसिया ल गिरप्तार कर रायपुर के विशेष अदालत म पेश करे गे रीहिस, जिहां ले अदालत ह सौम्या चौरसिया ल ईडी के चार दिन के रिमांड म लेके आदेश दीन।
जी-20 समूह-महासमुंद
भारत ह जी-20 समूह के अध्यक्षता औपचारिक रूप ले ग्रहण कर ले हवय। ए मउका म देशभर के सौ ठिन स्मारक मन म रोशनी करे के संगेसंग आने आने कार्यक्रम आयोजित करे जावत हे। इही कड़ी म छत्तीसगढ़ के महासमुंद जिला म स्थित सिरपुर के लक्षमण मंदिर ल घलो सजाय गे हवय। लेजर लाईट ले जगमगावत लक्षमण मंदिर म वसुधैव कुटुंबकम के संग एक पृथ्वी, एक परिवार, एक भविष्य विसय ले संबंधित प्रेरित संदेस हवय, जउन ह आकर्षण के केंद्र हवय।
जानबा के मुताबिक महासमुंद जिला म स्थित वेटिंग वर्ल्ड हेरिटेज लक्ष्मण मंदिर इंटा ले बने भारत के विशेष मंदिर हवय।
जिले की चिट्ठी
प्रादेशिक समाचार एकांश, आकाशवाणी समाचार डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मों केंद्र मन ह एके संगरा रिले करही। ए बखत के अंक म ‘‘कोंडागांव‘‘ जिला के गतिविधि मनके बारे म जानकारी दे जाही।
दुर्घटना
मनेन्द्रगढ़ चिरमिरी जिला ले फरार आरोपी ल पकड़े खातिर जबलपुर गे पुलिस के गाड़ी ह लहुटत बेरा एक ठिन हादसा के सिकार हो गीस। ए हादसा म वाहन चालक के मउकाच म मउत हो गीस अउ पांच झिन पुलिसकर्मी मन घायल हो गीन।
जानबा के मुताबिक पुलिस के एक ठिन टीम ह आई टी एक्ट के तहत फरार आरोपी ल पकड़े खातिर मनेन्द्रगढ़ ले जबलपुर गे रीहिस। आरोपी ल गिरप्तार करे के बाद पुलिस के टीम मनेन्द्रगढ़ लहुटत रीहिस। इही दउरान जबलपुर के तीर एक ठिन गाय ल बचाय के प्रयास म गाड़ी अनियंत्रित होके उल्दा गीस।