छत्तीसगढ़ विधानसभा के दू दिवसीय बिसेस सत्र के आखिरी दिन आज सदन म वित्तीय बछर दू हजार बाईस-तेईस बर चार हजार तीन सौ सैंतीस करोड़ रूपिया ले जादा के द्वितीय अनुपूरक बजट ध्वनिमत ले पारित कर दे गीस। चालू वित्तीय बछर के मुख्य बजट एक लाख चार हजार करोड़ रूपिया हवय। प्रथम अउ द्वितीय अनुपूरक ल मिलाके अब राज्य के बजट बाढ़के एक लाख ग्यारह हजार दू सौ बयालीस करोड़ रूपिया होगे हवय।
द्वितीय अनुपूरक बजट पेस करत मुख्यमंत्री भूपेश बघेल ह किहीन कि बेहतर वित्तीय प्रबंधन अउ कड़ा वित्तीय अनुशासन ले राज्य के वित्तीय स्थिति मजबूत होय हे। ओमन किहीन कि ए बछर अक्टूबर महीना तक आठ सौ अंठानवे करोड़ रूपिया के राजस्व आधिक्य बने हे। चालू वित्तीय बछर के पहिली आठ महीना म सरकार ह अभी तक बाजार ले कोनों करजा नइ हे अउ नवंबर महीना तक छह हजार करोड़ रूपिया ले जादा के पूंजीगत व्यय राज्य के संसाधन ले करे गे हवय।
मुख्यमंत्री ह बतईन कि द्वितीय अनुपूरक बजट म राजीव गांधी किसान न्याय योजना बर नौ सौ पचास करोड़ अउ राजीव गांधी ग्रामीण भूमिहीन कृषि मजदूर न्याय योजना बर एक सौ उनतीस करोड़ रूपिया के प्रावधान करे गे हवय। उहें, सड़क बनाय के अउ मरम्मत अउ पुल-पुलिया बनाय दू सौ करोड़ रूपिया के घलो प्रावधान करे गे हवय। एखरे संग स्वास्थ्य सेवा के क्षेत्र म घलो राशि के प्रावधान करे गेहे। मुख्यमंत्री ह बतईन कि बस्तर क्षेत्र म माओवाद उन्मूलन बर बनाय गे डिस्ट्रिक्ट स्ट्राईक फोर्स बर तीन हजार सात सौ छत्तीस नवा पद बर बजट म जरूरी प्रावधान करे गेहे।
विधानसभा-विशेष सत्र-02
छत्तीसगढ़ विधानसभा म आज आरक्षण ले संबंधी सरकार डहार ले पेस करे गे संसोधन विधेयक म चरर्चा चलत हे। सत्तापक्ष अउ विपक्ष के विधायक अपन विचार राखत हे। सदन म आरक्षण के मुद्दा उपर चरचा के दउरान मंत्री शिव कुमार डहरिया ह किहीन कि सरकार ह आरक्षण ल लेके गंभीर हे अउ प्रदेस के नागरिक मन संग न्याय करना चाहत हे। फेर, विपक्षी दल भाजपा ह एखर विरोध करत हे। उहें, भाजपा के वरिष्ठ विधायक अजय चंद्राकर ह प्रदेस सरकार ल आरक्षण विरोधी बतईन कि ए दउरान मंत्री शिव कुमार डहरिया अउ भाजपा विधायक अजय चंद्राकर के बीच टकराव के स्थिति बन गीस, जेखर बाद सदन के कार्यवाही ल दस मिनट बर स्थगित करे गीस।
मुख्यमंत्री-सी मार्ट उद्घाटन
मुख्यमंत्री भूपेश बघेल ह आज वीडियो कॉन्फ्रेंसिंग के माध्यम ले बिलासपुर अउ अंबिकापुर म राज्य स्तरीय सी-मार्ट के उद्घाटन करीन। ए राज्य के सबो स्थान म निर्मित नौ सौ ले जादा प्रकार के उत्पाद ल बिक्री बर उपलब्ध कराय जाही। ए मउका म मुख्यमंत्री ह किहीन कि प्रदेस के अट्ठाईस ठिन जिला म सी-मार्ट बनाय गे हवय। एखर बने ले महिला समूह ल अपन उत्पाद ल बेचे म आसानी होही।
भाजपा-कार्यसमिति सदस्य
भारतीय जनता पार्टी के पूर्व प्रदेस अध्यक्ष विष्णुदेव साय ल पार्टी के राष्ट्रीय कार्यसमिति के बिसेस आमंत्रित सदस्य बनाय गे हवय। पार्टी के राष्ट्रीय अध्यक्ष जगत प्रकाश नड्डा ह आज संगठन म नवा नियुक्ति करीन हे। एमा राष्ट्रीय कार्यसमिति म सदस्य के रूप म कैप्टन अमरिंदर सिंह, सुनील जाखड़ अउ स्वतंत्र देव सिंह ल सामिल करे गेहे। उहें, मदन कौशिक, एस. राणा, गुरमीत सिंह सोढ़ी, मनोरंजन कालिया अउ अमनजोत कौर रामूवालिया संग छत्तीसगढ़ ले विष्णुदेव साय ल राष्ट्रीय कार्यसमिति म बिसेस आमंत्रित सदस्य बनाय गे हवय। एखर अलावा जयवीर शेरगिल ल राष्ट्रीय प्रवक्ता के जिम्मेदारी दे गे हवय।
खदान-मजदूर मौत
जगदलपुर के तीर मालगांव के छुईखदान के धसे ले ओमा दबके एक झिन माईलोगिन संघरा छह झिन ग्रामीण मनके मउत होगे। उहें, तीन झिन दूसर ग्रामीण मन घायल होगे हे।
नगर पुलिस अधीक्षक विकास कुमार ह बतईन कि नगरनार थाना क्षेत्र के मालगांव के ग्रामीण मन घर के पोताई बर छुई निकाले बर गे रिहीन। इही दउरान खदान के धसे ले ओमा कतकोन झन दब गीन। सूचना मिले म पुलिस अउ एस.डी.आर.एफ. के टीम ह तुरते उहां पहुंचीस अउ रेस्क्यू ऑपरेसन चलाके ग्रामीण मन ल बाहिर निकालना सुरू करीस। ए दउरान खदान दबे ले एक झिन माईलोगिन संघरा छै झिन लोगन के मउत होगीस। उहें, घायल तीन झिन दूसर लोगन ल इलाज बर अस्पताल म भर्ती कराय गे हवय।
ऑनलाइन सट्टा-कार्रवाई
ऑनलाइन सट्टा मामला म दुरूग पुलिस ह धोखा देके बड़ संख्या म बैंक खाता खुलवा के सट्टा कारोबारी मन ल बेचे के आरोप म एक झिन मनखे ल गिरफ्तार करीन हे। पुलिस डहार ले सट्टा मामला म प्राप्त बैंक खाता के जांच के दउरान सट्टा कारोबारी मन डहार ले मजदूर मनके बैंक खाता धोखा ले खुलवा के सट्टा कारोबार म उपयोग करना पाय गीस। इही आधार म पुलिस डहार ले करे गे जांच म पता चलीस कि एक झिन ठेकेदार डहार ले अपन मजदूर मनके खाता खुलवा के सट्टा कारोबार म लगे लोगन ल लेनदेन बर दे गीस।
नैना सिंह धाकड़-सम्मान
छत्तीसगढ़ के पर्वतारोही नैना सिंह धाकड़ ल राष्ट्रपति द्रौपदी मुर्मू ह तेजनिंग नोर्गें राष्ट्रीय पुरस्कार म ‘‘लैंड एडवेंचर पुरस्कार‘‘ ले सम्मानित करीन हे। ए उपलब्धि बर मुख्यमंत्री भूपेश बघेल ह नैना सिंह धाकड़ ल बधाई अउ सुभकामना दीन हे।
खबर के मुताबिक नैना सिंह धाकड़ ह दुनिया के सबले ऊंचा चोटी माउंट एवरेस्ट अउ चौथा ऊंचा चोटी माउंट ल्होत्से म दस दिन के भीतर चढ़ाई करके तिरंगा फहराय रिहीन। नैना धाकड़ ए उपलब्धि हासिल करइया भारत के पहली महिला पर्वतारोही हे।
रामायण मंडली प्रतियोगिता
राजनांदगांव जिला म काली ले दू दिन के ग्राम पंचायत स्तरीय रामायण मंडल प्रतियोगिता के आयोजन करे जाही। प्रतियोगिता बर नगर निगम आयुक्त डॉक्टर आशुतोष चतुर्वेदी ल नोडल अधिकारी बनाय गे हवय। ओमन ह बतईन कि ग्राम पंचायत के बाद दस अउ ग्यारह दिसंबर के जोन स्तरीय प्रतियोगिता होही। एखर बाद चौदह अउ पन्द्रह जनवरी के जनपद पंचायत अउ अट्ठाईस अउ उनतीस जनवरी के जिला स्तर म रामायण मंडली मनके बीच प्रतियोगिता होही। ओमन बतईन कि राज्य स्तरीय प्रतियोगिता सोलह ले अट्ठारह फरवरी तक गरियाबंद जिला के राजिम म कराय जाही।
खबर के मुताबिक राज्य सरकार के संस्कृति विभाग डहार ले रामायण मंडली मन ल प्रोत्साहित करे के उद्देश्य ले राज्य स्तरीय रामायण मंडली प्रतियोगिता के आयोजन करे जावत हे।
अउ अब थोरकुन समाचार सार म –
– मुख्य सचिव अमिताभ जैन ह छह दिसंबर के वीडियो कान्फ्रेंसिंग के माध्यम ले प्रदेस म चलत धान खरीदी के व्यवस्था के समीक्षा करही। ए संबंध म प्रदेस के सबो कलेक्टर अउ संभागायुक्त मन ल पत्र जारी कर दे गेहे।
– जांजगीर-चांपा जिला के जैविक कृषि ग्राम बहेराडीह म तेईस ले पच्चीस दिसंबर तक अंतर्राष्ट्रीय किसान दिवस मनाय जाही।
– कोंडागांव के विकास नगर स्टेडियम म राखे गे तीन दिवसीय जिला स्तरीय छत्तीसगढ़िया ओलंपिक के समापन होगे हवय। कार्यक्रम म विजेता प्रतिभागी अउ दल मन ल पुरस्कृत करे गीस।
– जांजगीर-चांपा जिला के हरदी गांव म ट्रैक्टर के चपेट म आय ले मोटर साइकिल म बइठे एक झिन मनखे के मउत होगीस। उहें, एक झिन दूसर मनखे घायल होगीस।
– राजनांदगांव जिला के अंबागढ़ चौकी के सांगली-मेरेगांव तीर होय सड़क दुर्घटना म नगर पंचायत के इंजीनियर के मउत होगीस।
– मनेन्द्रगढ़-चिरमिरी-भरतपुर जिला के ग्राम पंचायत चनवारीडांड म दू दिन पहिली एक झिन माईलोगिन ह तरिया म डूब गे रिहीस, जेखर सव ल आज बरामद कर ले गेहे।
अउ
– जांजगीर-चांपा जिला के कटौद गांव म पुलिस अउ आबकारी विभाग के टीम ह चार हजार किलो महुआ लहान जब्त करीन हे।