छत्तीसगढ़ विधानसभा के दू दिवसीय विशेष सत्र आज ले सुरू होईस। सत्र के पहिली दिन आज बिहनिया ग्यारह बजे सदन के कार्यवाही सुरू होतेच विधानसभा के उपाध्यक्ष रेहे कांग्रेस के दिवंगत नेता मनोज मंडावी अउ मनेन्द्रगढ़ ले भाजपा के विधायक रेहे दीपक पटेल ल श्रद्धांजलि दे गीस। श्रद्धांजलि के बाद विधानसभा के कार्यवाही काली तक बर स्थगित कर दे गीस। सत्र के दूसर दिन काली दू ठन शासकीय विधेयक पेश करे जाही। उहें, अनुपूरक बजट घलो पेश करे जाही। आरक्षण विधेयक म भाजपा विधायक दल डहार ले संसोधन प्रस्ताव राखे जाही।
आज के कार्यवाही स्थगित होय के बाद सदन ले बाहिर पत्रकार मन ले गोठबात करत नेता प्रतिपक्ष नारायण चंदेल ह किहीन कि आरक्षण ले जुड़े विधेयक म अनुसूचित जाति वर्ग बर तेरह ले बढ़ाके सोलह प्रतिसत करे जाय के प्रस्ताव भाजपा डहार ले करे गेहे। ए प्रस्ताव के स्वीकार होय म ही संसोधन विधेयक ल भाजपा डहार ले समर्थन दे जाही। ओमन आरोप लगईन कि आरक्षण के ए संसोधन विधेयक के माध्यम ले कांग्रेस सरकार ह राजनीतिक फायदा उठाना चाहत हे।
खबर के मुताबिक संसोधन विधेयक म अनुसूचित जनजाति ल बत्तीस, अनुसूचित जाति ल तेरह अउ अन्य पिछड़ा वर्ग ल सत्ताईस प्रतिसत आरक्षण देना तय करे गेहे। उहें, सामान्य वर्ग के गरीब मन ल चार प्रतिसत आरक्षण देके प्रस्ताव करे गेहे। हाल म होय राज्य मंत्रिपरिषद के बइठका म ए संसोधन विधेयक के प्रारूप ल मंजूरी दे गे रिहीस।
भानुप्रतापपुर उपचुनाव-प्रचार
भानुप्रतापपुर विधानसभा उपचुनाव म राजनीतिक दल के प्रचार अभियान तेज होगे हवय। कांग्रेस अउ भाजपा के स्टार प्रचारक पार्टी प्रत्यासी मनके पक्ष म जगह-जगह जनसभा लेवत हे। उहें, दूसर प्रत्यासी मन ह घर-घर जाके मतदाता मन ले वोट मांगत हे।
मुख्यमंत्री भूपेश बघेल ह कांग्रेस प्रत्यासी सावित्री मंडावी के समर्थन म पाछु दू दिन म इहां छह ठिन जनसभा ल संबोधित करीन। काली मुख्यमंत्री ह सुरंगदोह, भानुप्रतापपुर, पुरी अउ टंहकापार म जनसभा लीन। उहें, आज दमकसा अउ चारामा म आमसभा लीन अउ रोड-शो घलो करीन।
दूसर कोति, प्रदेस भाजपा अध्यक्ष अरूण साव ह पार्टी प्रत्यासी ब्रम्हानंद नेताम के पक्ष म – चारामा, भैंसाकन्हार, जैसाकर्रा, सेलेगांव अउ संबलपुर म जनसभा करीन। ओमन ह आरोप लगईन कि महिला समूह के कर्ज माफी के वादा करइया कांग्रेस सरकार ह माईलोगिन मनके समूह रोजगार ल छीन ले हवय अउ ओमन ह हजारों गरीब मन ल प्रधानमंत्री आवास ले वंचित करे के आरोप घलो लगईन।
उहें, भाजपा के प्रचार अभियान म भारतीय जनता युवा मोर्चा के प्रदेस अध्यक्ष रवि भगत ह काली पार्टी उम्मीदवार ब्रम्हानंद नेताम संग कोड़ेखुरसे म जनसभा करे के संग दूसर क्षेत्र म जनसंपर्क करीन। इहां भाजपा प्रत्यासी ब्रम्हानंद नेताम ह किहीन कि कांग्रेस डहार ले षड़यंत्र करके दुराचार के मामला उछाल के ओमन ल बदनाम करे के परयास करे गेहे।
उपचुनाव-आरोप/प्रत्यारोप
भानुप्रतापपुर उपचुनाव म प्रचार के दउरान झारखंड ले संबंधित नाबालिग ले दुष्कर्म के मामला घलो लगातार चरचा म हवय। कुछेक बछर पुराना ए मामला म आरोपी बनाय गे भाजपा प्रत्यासी ब्रम्हानंद नेताम उपर प्रदेस कांग्रेस अध्यक्ष मोहन मरकाम ह आरोप लगईन हे कि झारखंड पुलिस डहार ले आरोपी बनाय जाय के बावजूद भाजपा डहार ले नेताम ल प्रत्यासी बनाय ले ए स्पष्ट होगे हवय कि ओ ह उंखर अपराध ल अनदेखा करत हे।
उहें, भानुप्रतापपुर उपचुनाव बर भाजपा डहार ले चुनाव प्रभारी बनाय गे बृजमोहन अग्रवाल ह ए मामला म किहीन हे कि पार्टी प्रत्यासी के खिलाफ कांग्रेस के कथित दुष्प्रचार के जवाब दे बर भाजपा कार्यकर्ता मन ह पूरा तरीका ले तैयार हे। राजनीतिक आरोप ल डर के भाजपा ह पाछु हटइया नइ हे।
विश्व एड्स दिवस
आज विश्व एड्स दिवस हरय। ए दिन ल ए महामारी ल खतम करे के उद्देश्य ले हर बछर एक दिसंबर के मनाये जाथे। एचआईवी ह दुनिया भर म लोगन के सेहत ले जुड़े एक ठिन गंभीर विसय हे। ए बीमारी ले विश्व म करोड़ो लोगन ग्रस्त हे। एखर ले दूसर बीमारी बर जरूरी प्रतिरोधक क्षमता खतम हो जाथे अउ मउत के खतरा घलो बाढ़ जाथे।
आज छत्तीसगढ़ म घलो विश्व एड्स दिवस म कतकोन कार्यक्रम कराये जावत हे। इही कड़ी म जांजगीर म विश्व एड्स दिवस के मउका म स्कूल अउ नर्सिंग कॉलेज के विद्यार्थी मन ह जागरूकता रैली निकालिन। ए दउरान नुक्कड़ नाटक के प्रदर्शन अउ प्रश्नोत्तरी कार्यक्रम घलो कराये गीस।
टीबी/कुष्ठ मलेरिया
प्रदेश म क्षय रोग यानि टीबी अउ कुष्ठ रोगी मनके पहिचान बर आज ले सघन अभियान शुरू होगे हवय। इक्कीस दिसंबर तक चलइया ए अभियान के पहिली चरण म स्वास्थ्य विभाग के टीम ह घर-घर जाके ये दूनो बीमारी के संभावित मरीज मनके पहिचान करत हे। संगेसंग रोग ले ग्रसित ये मरीज मन ल इलाज घलो देवाय जात हे। ये अभियान ल दू चरण म चलाये जाही। पहिली चरण म नारायणपुर, सुकमा, बीजापुर अउ दंतेवाड़ा ल छोड़के राज्य के दूसर सबो जिला ल सामिल करे गेहे।
ये अभियान के दूसरा चरण अवइया बछर दू ले सतरा जनवरी तक चलही। ये दउरान प्रदेश के सबो निजी अस्पताल, निजी चिकित्सक अउ केमिस्ट मन डहार ले चिन्हे गे टीबी अउ कुष्ठ के संदेहास्पद मरीज मनके दैनिक सूची ल लेके एला संबंधित पोर्टल म दर्ज करे जाही। ए दउरान जांच के जरूरत वाले संदिग्ध मरीज मनके निशुल्क सैंपल घलो ले जाही। बस्तर संभाग के नारायणपुर, सुकमा, बीजापुर अउ दंतेवाड़ा म चार ले पच्चीस जनवरी तक ये अभियान चलाये जाही।
उहें, प्रदेश म मलेरिया मुक्त छत्तीसगढ़ अभियान के सातवां चरण घलो आज ले शुरू होगे हे। राज्य के बीजापुर, दंतेवाड़ा, नारायणपुर अउ सुकमा जइसन मलेरिया संवेदी जिला मन म एक महीना तक अभियान चलाये जाही। एमा स्वास्थ्य विभाग के टीम ह बस्तर संभाग के ए चारो जिला के दुर्गम इलाका म घर-घर म जाके लोगन के मलेरिया जांच करही। प्रभावित मन ल तुरते मलेरिया के दवई दे जाही। संगेसंग मलेरिया ले बांचे बर जागरूकता अभियान घलो चलाये जाही।
अग्निवीर भर्ती रैली
भारतीय थल सेना म अग्निवीर अउ नर्सिंग सहायक के भर्ती बर रैली दुर्ग के रविशंकर स्टेडियम म आज ले शुरू होगे हे। तेरह दिसंबर तक चलइया ये भर्ती रैली म प्रदेश के सबो जिला के युवा मन शामिल होही। एखर बर करीबन सत्तर हजार युवा मन ह पंजीयन करे हे। रैली के दउरान हर दिन करीबन छै हजार युवा मनके शारीरिक परीक्षण करे जाही। दुर्ग जिला प्रशासन ह भर्ती रैली म जादा ले जादा युवा मन ले शामिल होय के अपील करीन हे। भर्ती म शामिल होवइया युवा मन बर सुराना कॉलेज मैदान म निशुल्क भोजन अउ आवास के बेवस्था करे गेहे। उम्मीदवार मनके सुविधा बर हेल्पलाइन नंबर – शून्य सात आठ आठ – दू दू एक दू तीन चार पांच अउ शून्य सात आठ आठ – दू दू एक दू तीन चार छै – जारी करे गेहे।
विद्युत कंपनी-प्रबंध निदेशक
ऊर्जा विभाग ह संजीव कटियार ल छत्तीसगढ़ राज्य विद्युत उत्पादन कंपनी के नया प्रबंध निदेशक बनाय हे। श्री कटियार ए बखत उत्पादन कंपनी के कोरबा पश्चिम इकाई म कार्यपालन निदेशक के जिम्मेदारी संभालत हे। ओमन ह उत्पादन कंपनी के वर्तमान प्रबंध निदेशक एन.के. बिजौरा के कार्यकाल पूरा होय म नवा जिम्मेदारी संभालही।
अउ अब थोरकुन समाचार सार म –
– जी-ट्वेंटी समूह के अध्यक्षता ग्रहण करे के मउका म देसभर के सौ ठन स्मारक म अंजोर करे के संगेच कतकोन कारीकरम कराय जावत हे। ए एमा छत्तीसगढ़ के महासमुंद जिला के सिरपुर ल घलो सामिल करे गेहे।
– सीमा सुरक्षा बल-बीएसएफ ह आज अपन अंठावनवां स्थापना दिवस मनावत हे। ए मउका म भिलाई के रिसाली के महानिरीक्षक कार्यालय म घलो कारीकरम कराय गीस।
अउ
– इंदिरा गांधी राष्ट्रीय मुक्त विश्वविद्यालय के सत्रांत परीक्षा काली ले सुरू होवत हे।