भारतीय थल सेना म अग्निवीर अउ नर्सिंग असिस्टेंट के भर्ती बर दुरूग जिला के रविशंकर स्टेडियम म काली ले तेरह दिसंबर तक रैली राखे गेहे। ए प्रदेस के सबो जिला के युवा संघरही। भर्ती रैली के बेरा हरेक दिन करीबन छह हजार युवा मनके शारीरिक जांच करे जाही। दुरूग जिला प्रसासन ह भर्ती रैली म जादा ले जादा युवा मन ल सामिल होय के अपील करीन हे। प्रसासन कोति ले सुराना कालेज मैदान म उम्मीदवार मन बर मुफत म भोजन अउ रेहे के व्यवस्था करे गेहे। उम्मीदवार मनके सुभीता खातिर हेल्पलाइन नंबर – शून्य सात आठ आठ दू दू एक दू तीन चार पांच अउ शून्य सात आठ आठ दू दू एक दू तीन चार छह जारी करे गेहे। उम्मीदवार मन ए नंबर म भर्ती रैली के संबंध म जानकारी ले सकत हे।
राज्यपाल परीविक्षाधीन
राज्यपाल अनुसूइया उइके ह आज राजभवन म राज्य प्रशासनिक सेवा बछर दू हजार बीस के चौंतीस झिन परीविक्षाधीन अधिकारी मनले भेंट करीन। ये बेरा म राज्यपाल ह अधिकारी मनले कीहिन कि ओमन लोगन ले तालमेल बनाके काम करय अउ छत्तीसगढ़ आदिवासी बाहुल्य राज्य हरय। इंहा के कतकोन क्षेत्र पांचवा अनुसुची म आथे। आम जनता समेत आदिवासी मनके समस्या ल संवेदना संग सुलझाय के प्रयास करय। ओमन अधिकारी मनले राजस्व नियम के संगेसंग पेसा कानून अउ वन अधिकार अधिनियम के अध्ययन करे बर कीहिन । ओमन केंद्र शासन अउ राज्य शासन के योजना ल बने ढंग ले चलाय म सही भूमिका निभाय बर कीहिन।
उपचुनाव-प्रचार
भानुप्रतापपुर विधानसभा उपचुनाव म प्रचार अभियान तेज होगे हे। कांग्रेस अउ भाजपा के स्टारक प्रचारक मन पार्टी उम्मीदवार मनके पक्ष म जघा-जघा सभा करत हे। उहें, आने उम्मीदवार मन लोगन के घर-घर जाके मतदाता मन ले वोट मांगत हे।
इही बीच, आज मुख्यमंत्री भूपेश बघेल, प्रदेश कांग्रेस अध्यक्ष मोहन मरकाम अउ मंत्री अनिला भेंडिया ह कोडेकुर्स म जनसभा म बोलत कांग्रेस उम्मीदवार सावित्री मंडावी के पक्ष म वोट मांगीन।
उहें, भाजपा उम्मीदवार ब्रम्हानंद नेताम ह भानूप्रतापपुर अउ दुर्गूकोंदल मंडल के कई गांव म घर-घर जाके लोगन ले भेंट करीन।
जवान-शहीद
सुकमा जिला म सुरक्षा बल के कैम्प म काली संझा माओवादी मन कोति ले करे गे हमला म कोबरा बटालियन के एक जवान शहीद होगे हे।
बस्तर रेंज के पुलिस महानिरीक्षक सुंदरराज पी. ह घटना के पुष्टि करत बतईन कि चिंतागुफा थाना क्षेत्र के नवीन कैम्प डब्बाकोंटा अउ पेंटापाड़ जंगल के बीच ड्यूटी म तैनात सुरक्षा बल के जवान मन उपर माओवादी मन ह फायरिंग सुरू कर दीन। जवान मन कोति ले करे गे जवाबी कार्रवाई के बाद माओवादी जंगल के आड़ लेके भाग गे। उहें, माओवादी मन कोति ले करे गे फायरिंग म ड्यूटी म तैनात प्रधान आरक्षक सुलेमान घायल होगे, जउन ल सीआरपीएफ फील्ड अस्पताल लाय गीस, जिहां इलाज के बेरा जवान के मउत होगे। शहीद जवान केरल के पालाक्काड़ जिला रहवइया रिहीस।
मन की बात
प्रधानमंत्री नरेन्द्र मोदी ह लोगन ल आकाशवाणी ले ए महीना प्रसारित ‘‘मन की बात‘‘ कारीकरम म सामिल बिसय अउ आने-आने सामुदायिक प्रयास म राखे गे मन की बात क्विज म भाग ले बर बलाय हे। श्री मोदी ह एक ट्वीट म किहीन कि नमो ऐप म ए प्रश्नोत्तरी म भागीदारी करे जा सकत हे। नमो ऐप लॉग करके दस प्रश्न के उत्तर दे बर पड़ही। ए क्विज ग्यारह दिसंबर तक चलही। दस भाग्यशाली विजेता मन ल दस्तखत करके किताब दे जाही।
युवा महोत्सव
खेल अउ युवा कल्याण विभाग कोति ले प्रदेस के आने-आने जिला म अभी जिला स्तरीय युवा महोत्सव के आयोजन होवत हे। एमा आज रईपुर के मायाराम सुरजन शासकीय कन्या उच्चतर माध्यमिक विद्यालय म राखे गे जिला स्तरीय युवा महोत्सव म जिला के जम्मों विकासखंड के प्रतिभागी बड़ संख्या म सामिल होईन। महोत्सव म युवा मन ह लोकनृत्य, लोकगीत, एकांकी, शास्त्रीगायन, वादन, लोक खेल, चित्रकला प्रतियोगिता अउ वाद-विवाद समेत सत्ताईस ठिन आने-आने विधा म प्रतिभा देखाय गीस।
ऐति, अंबिकापुर के राजीव गांधी शासकीय स्नातकोत्तर महाविद्यालय म घलो आज जिला स्तरीय युवा महोत्सव के आयोजन करे गीस। ए महोत्सव म एक हजार ले जादा युवा मन ह सत्ताईस ठिन आने-आने विधा म अपन प्रतिभा दिखईन। ए बेरा म सरगुजा कलेक्टर कुंदन कुमार ह किहीन कि युवा महोत्सव ले राज्य सरकार युवा मन ल एक संघरा लाय के परयास करत हे।
उहें, धमतरी जिला म जिला स्तरीय युवा महोत्सव के आयोजन करे गीस। जिला के बाबू पंडरी राव कृदत्त इंडोर स्टेडियम म राखे गे ए महोत्सव म नौ सौ ले जादा प्रतिभागी सामिल होईन।
अस्पताल एनक्यूएएस सर्टिफिकेशन
केन्द्रीय स्वास्थ्य मंत्रालय ह छत्तीसगढ़ के चार अउ सरकारी अस्पताल ल राष्ट्रीय गुणवत्ता आश्वासन मानक प्रमाण पत्र-एन.क्यू.ए.एस. दीन हे। एमा धमतरी जिला के दू, दुरूग अउ रायगढ़ जिला के एक-एक अस्पताल सामिल हे। केन्द्रीय स्वास्थ्य मंत्रालय ह धमतरी जिला के गेदरा अउ गाड़ाडीह अउ दुरूग जिला के अहेरी हेल्थ एंड वेलनेस सेंटर उप स्वास्थ्य केन्द्र के संगेसंग रायगढ़ जिला के रामभाटा शहरी प्राथमिक स्वास्थ्य केन्द्र ल ए प्रमाण पत्र जारी करे हे।
मुक्तिबोध-प्रसंग
देस के जाने-माने साहित्यकार गजानंद माधव मुक्तिबोध अउ मराठी के प्रसिद्ध साहित्यकार शरच्चंद माधव मुक्तिबोध के जीवन म आधारित दू दिवसीय मुक्तिबोध प्रसंग आज सिरा गे। रईपुर के पंडित रविशंकर शुक्ल विश्वविद्यालय म राखे गे कारीकरम के पहिली दिन काली कवि अउ विचारक लाल्टू ह किहीन कि जब तक अंधेरा गहरात रिही, मुक्तिबोध सुरता करे जात रिही। संगेसंग ओमन भाषाई संकट म घलो अपन बात राखीन। वरिष्ठ आलोचक जयप्रकाश ह मुक्तिबोधन के जीवन प्रसंग ले जुड़े संस्मरण सुनईन। एखर अगुवई प्रदीप मुक्तिबोध ह करीन। ए बेरा म कवि गोष्ठी के आयोजन घलो करे गीस।
अउ अब थोरकुन समाचार सार म –
– पंडित सुंदरलाल शर्मा मुक्त विश्वविद्यालय बिलासपुर म आने-आने पाठ्यक्रम म भर्ती के काम काली ले सुरू होही। विद्यार्थी विश्वविद्यालय के वेबसाइट ले ऑनलाइन प्रवेस ले सकत हे।
– राजनांदगांव जिला के मोहला म राखे गे जिला स्तरीय छत्तीसगढ़िया ओलंपिक काली सिरा गे। ए प्रतियोगिता म करीबन सात सौ खिलाड़ी सामिल होईन। जिला सहकारी केन्द्रीय बैंक के अध्यक्ष नवाज खान ह विजेता खिलाड़ी ल इनाम दीन।
– सुकमा जिला म संचार सेवा के बढ़वार बर मोबाइल टावर लगाय जात हे। जिला प्रसासन के निरदेस म सुकमा जिला के तेरह ठिन जघा म फोर-जी मोबाइल टावर लगाय गेहे।
– जांजगीर-चांपा पुलिस ह मेडिकल कालेज म प्रवेस देवाय के नाव म धोखाधड़ी करे के आरोप म एक मनखे ल असम ले गिरफ्तार करे हे। ए संबंध म जिला के खरौदा के रहवइया मनखे ह आठ लाख रूपिया ले जादा के ठगी के सिकईत पुलिस म करे रिहीस।
अउ
– राजनांदगांव पुलिस ह चिटफंड कंपनी के एक डायरेक्टर ल रईपुर ले गिरफ्तार करे हे। आरोपी ह खैरागढ़ क्षेत्र के कतकोन झन ले कमती बेरा म जादा फायदा देवाय के झांसा देके रकम जमा कराय रिहीस।