प्रदेस म टीबी अउ कुष्ठ रोगी मनके पहिचान बर एक दिसंबर ले सघन अभियान चलाय जाही। ए संबंध म स्वास्थ्य विभाग ह सबो कलेक्टर ल परिपत्र जारी कर देहे। अभियान के तहत स्वास्थ्य विभाग के टीम घर-घर जाके ए दूनों बीमारी के संभावित मरीज मनके पहिचान करही अउ पॉजिटिव पाय गे लोगन के इलाज घलो उपलब्ध कराय जाही। ए अभियान दू चरण म संचालित करे जाही। पहिली चरण म एक से इक्कीस दिसंबर तक चार जिला – नारायणपुर, सुकमा, बीजापुर अउ दंतेवाड़ा ल छोड़ के राज्य के आने सबो जिला म संचालित करे जाही। उहें, दूसर चरण म अवइया बछर दू ले सत्रह जनवरी तक सबो निजी चिकित्सालय, नर्सिंग होम्स, प्राईवेट प्रैक्टिशनर अउ केमिस्ट मन डहार ले चिन्हांकित टी.बी. अउ कुष्ठ के मरीज मनके दैनिक सूची लेके मरीज मनके पोर्टल म दर्ज करे जाही। ए दउरान जांच के जरूरत वाले संदिग्ध मरीज के निःशुल्क सैंपल घलो ले जाही। बस्तर संभाग के नारायणपुर, सुकमा, बीजापुर अउ दंतेवाड़ा म चार ले पच्चीस जनवरी तक ए अभियान चलही।
एशिया पैसिफिक ब्रॉडकास्टिंग यूनियन
केन्द्रीय सूचना अउ प्रसारण मंत्री अनुराग सिंह ठाकुर ह किहीन कि देस के लोक प्रसारक आकाशवाणी अउ दूरदर्शन हमेसा ले सच के साथ खड़े हे अउ लोगन मनके भरोसा म खरा उतरे हे। श्री ठाकुर आज नई दिल्ली म उनसठवां एशिया पैसिफिक ब्रॉडकास्टिंग यूनियन-एबीयू महासभा अउ एसोसिएटेड मीटिंग के उद्घाटन सत्र ल संबोधित करत रिहीन। ओमन किहीन कि मीडिया लोगन मनके निर्णय क्षमता म गहरा असर डालथे। प्रसारण सामग्री म सटीकता एखर प्राथमिकता होना चाही। श्री ठाकुर ह कहिन कि कोविड महामारी के दउरान प्रसार भारती ह सौ ले जादा करमचारी मन ल खो दे रिहीस, लेकिन एखर बावजूद रफ्तार नइ थमीस।
कोविड टीका
कोरोना संक्रमण ले बचाव बर नाक ले दे जाने वाला दुनिया के पहिली टीका ‘‘इनकोवैक‘‘ ल भारतीय औषधि महानियंत्रक ह कोविड बूस्टर खुराक के रूप म स्वीकृति दे देहे। केन्द्रीय विज्ञान अउ प्रौद्योगिकी मंत्री डॉक्टर जितेन्द्र सिंह ह आज किहीन कि भारत ह प्रधानमंत्री नरेन्द्र मोदी के नेतृत्व म कोविड देखभाल के दिसा म मार्गदर्शन करत हे। ओमन ह ए टीका के विकास अउ डीसीजीआई के मंजूरी पाय बर डॉक्टर राजेश गोखले के नेतृत्व म जैव प्रौद्योगिकी विभाग ल बधाई दीन।
मल्टीमीडिया चित्र प्रदर्शनी
‘आजादी का अमृत महोत्सव: एक भारत श्रेष्ठ भारत‘ बिसय म आज ले चंपारण म दू दिवसीय मल्टीमीडिया चित्र प्रदर्शनी के सुरूवात होईस। केन्द्रीय संचार ब्यूरो के प्रादेशिक कार्यालय रईपुर डहार ले आयोजित ए प्रदर्सनी ल संबोधित करत सांसद सुनील सोनी ह कहिन कि कतकोन सेनानी मनके बलिदान के बाद मिले आजादी ल जीवित बनाय रखे बर सबो ल अपन भूमिका ईमानदारी से निभाना पड़ही अउ इही आजादी के अमृत महोत्सव के सार्थकता घलो हे।
ए मउका म एक भारत श्रेष्ठ भारत विषय म चित्रकला प्रतियोगिता के आयोजन करे गीस। संगेसंग जागरूकता रैली घलो निकाले गीस। काली तीस नवंबर के प्रदर्सनी के आखिरी दिन निबंध, भासन अउ गुजराती व्यंजन प्रतियोगिता के आयोजन करे जाही।
जवान-घायल
बीजापुर जिला म बारूदी विस्फोट के चपेट म आय ले केन्द्रीय रिजर्व पुलिस बल-सीआरपीएफ के एक जवान घायल होगे हे। पुलिस ले मिले जानबा के अनुसार जवान मनके दल तलाशी अभियान बर निकले रिहीस। इही दउरान उसूर थाना क्षेत्र के गलगम इलाका तीर आईईडी के चपेट म आय ले एक जवान घायल होगे, जेला इलाज बर रायपुर भेजे गेहे।
छत्तीसगढ़ी राजभाषा दिवस
छत्तीसगढ़ी राजभाषा दिवस के उपलक्ष्य म काली रईपुर के महंत घासीदास संग्रहालय म कवि-गोष्ठी अउ गोठ-बात कारीकरम के आयोजन करे गीस। कवि-गोष्ठी म चरचा के दउरान साहित्यकार मन कहिन कि राज्य सरकार के प्रयास ले पाछु चार बछर म छत्तीसगढ़ी भासा के प्रति लोगन मनके रूचि बढ़े हे। साहित्यकार मन कहिन कि अभी भी राजभासा ल आगू लाय बर काम करे के जरूरत हे। ओमन ह छत्तीसगढ़ी ल संविधान के आठवीं अनुसूची म सामिल करे के मांग घलो करीन।
उपचुनाव-नोटिस
नाबालिग ले दुष्कर्म के मामला म भानुप्रतापपुर उपचुनाव म उम्मीदवार भाजपा प्रत्यासी ब्रम्हानंद नेताम के संग चार आरोपी मन ल झारखंड पुलिस डहार ले दे गे नोटिस के आज भाजपा प्रत्यासी के एजेंट नंदकुमार ओझा ह जवाब दीन हे। ओमन ह बतईन कि भाजपा प्रत्यासी चुनाव प्रचार म व्यस्त हे। उहें, झारखंड पुलिस के डीएसपी सुमीत कुमार ह बतईन कि सबो आरोपी मनके गिरफ्तारी बर छापामारी करे जात हे। जानबा के मुताबिक झारखंड पुलिस ह आज भाजपा प्रत्यासी के संग चार आरोपी मनके घर म नोटिस देके उंखर बयान बर कांकेर थाना बुलाय रिहीस।
इही बीच, प्रदेस भाजपा ह किहीन कि भानुप्रतापपुर विधानसभा उपचुनाव म हार के डर के कारण कांग्रेस पार्टी षड़यंत्र करत हे। पार्टी ह एक संयुक्त प्रेस विज्ञप्ति जारी करत किहीन कि भाजपा प्रत्यासी ब्रम्हानंद नेताम ल मिलत जनसमर्थन ले राज्य सरकार घबरा गेहे, जेखर कारण झारखंड सरकार ले मिलके ब्रम्हानंद नेताम के गिरफ्तारी बर षड़यंत्र रचे जावत हे।
उहें, भाजपा विधि विभाग के प्रमुख नरेश गुप्ता ह प्रदेस कांग्रेस अध्यक्ष मोहन मरकाम के गिरफ्तारी के मांग करीन। ओमन ह किहीन कि राष्ट्रीय बाल संरक्षण आयोग के नोटिस के बाद भी अब तक मोहन मरकाम के गिरफ्तारी नइ करे गेहे। श्री गुप्ता ह कहिन कि पॉक्सो एक्ट के तहत पीड़िता के नाम उजागर करना कानून अपराध हे।
ट्रेन परिचालन
पूर्व मध्य रेलवे सोनपुर मंडल के बरौनी स्टेशन म नॉन इंटरलॉकिंग के काम करे जाही। एखर चलत तीन से नौ दिसंबर तक कुछ यात्री गाड़ी के अवई-जवई प्रभावित रइही। जानबा के मुताबिक तीन ले आठ दिंसबर बरौनी-गोंदिया अउ चार ले नौ दिसंबर तक गोंदिया-बरौनी एक्सप्रेस रद्द रइही।
इंद्रावती टाईगर रिजर्व-बाघ
बीजापुर जिला के इंद्रावती टाईगर रिजर्व म एक अउ बाघ मिले के खबर हे। एला मिलाके अब इंद्रावती टाईगर रिजर्व म बाघ मनके संख्या बाढ़के छह होगे हे। जानबा के मुताबिक वन विभाग डहार ले लगाय गे ट्रेप कैमरा म एक बाघ के फोटो मिले हे, जेला जांच बर देहरादून भेजे गे रिहीस, जिहां से मिले रिपोर्ट म नवा बाघ के पुष्टि होईस।
जानबा के मुताबिक इंद्रावती टाईगर रिजर्व बाघ मनके रेहे बर अच्छा जगह हे, जिहां बाघ के अलावा वन भैंसा, गौर, तेंदुआ, भालू, नीलगाय, हिरण, सांभर अउ जंगली सुअर के संग आने वन के प्राणी पाय जाथे।
हाथी-उत्पात
कोरिया जिला के चिरमिरी रेंज के बंजारीडांड अउ बहालपुर गांव म पन्द्रह हाथी के दल उत्पात मचावत हे। हाथी के दल ह कतकोन किसान मनके फसल ल नुकसान पहुंचाय हे। वन विभाग ह ग्रामीण मन ल हाथी मनके दल ले दूर रेहे के समझाईश दीन।
ऐति, जशपुर जिला म हाथी के एक बच्चा पहाड़ी ले गिरके घायल होगे, जेखर इलाज बर रईपुर ले वन्यजीव विशेषज्ञ डॉक्टर ल बुलाय गेहे।
छत्तीसगढ़िया ओलंपिक
छत्तीसगढ़ म स्थानीय अउ पारंपरिक खेल ल बढ़ावा देके संग पारंपरिक खेल मन ल विश्व स्तर म पहिचान दिलाय के उद्देश्य ले सूरजपुर जिला म घलो जिला स्तरीय छत्तीसगढ़िया ओलंपिक के आयोजन करे गीस। एमा हर उम्र के प्रतिभागी मन ह हिस्सा लेके अपन प्रतिभा के प्रदर्शन करीन। प्रतियोगिता के समापन समारोह म स्कूल शिक्षा मंत्री डॉक्टर प्रेमसाय सिंह टेकाम ह किहीन कि छत्तीसगढ़िया ओलंपिक के उद्देश्य प्रदेस म नंदावत पारंपरिक खेल ल बढ़ावा देना हे।
अउ अब पेस हे मौसम के हाल…
प्रदेस म फिलहाल न्यूनतम तापमान बढ़े रेहे के संभावना हे। बस्तर संभाग म तीन दिसंबर तक न्यूनतम तापमान म चार ले पांच डिग्री सेल्सियस वृद्धि होय के आसार हे। उहें, अवइया चौबीस घंटा के दउरान प्रदेस के मौसम सुष्क बने रइही।
मौसम विभाग ले मिले जानबा के अनुसार एक उपरी हवा के चक्रीय चक्रवाती घेरा मध्य बंगाल के खाड़ी के उपर हे। इंखर कारण प्रदेस के दक्षिणी भाग म हल्का बादल छाय हुए हे, जेखर ले फिलहाल ठंड बढ़े के संभावना नइ हे।