संविधान सभा ले भारतीय संविधान के मंजूरी के उपलक्ष्य म आज देसभर म संविधान दिवस मनाय जावत हे। बछर उन्नीस सौ उनचास म आजे के दिन संविधान सभा ह संविधान के प्रारूप ल औपचारिक रूप ले मान्यता दे गीस। एखर बाद छब्बीस जनवरी उन्नीस सौ पचास ले देस के संविधान लागू कर दे गीस।
प्रधानमंत्री नरेन्द्र मोदी ह आज नई दिल्ली म संविधान दिवस समारोह ल संबोधित करत किहीन हे कि भारत संविधान के आदर्स ल मजबूत करत हे। ओमन किहीन कि संविधान के जनसमर्थक नीति देस के गरीब अउ माईलोगिन मन ल मजबूत बनावत हे। ओमन किहीन कि कानून ल लोगन बर आसान बनाय जावत हे। न्यायपालिका बेरा म न्याय करे बर कतकोन उदिम करत हे। श्री मोदी ह संविधान के प्रस्तावना के पहिली तीन शब्द- वी द पीपल यानि ‘‘हम लोग‘‘ के उल्लेख करत किहीन कि ए एक आह्वान, विश्वास अउ संकलप हरय। प्रधानमंत्री ह अमृत काल ल कर्तव्यकाल बतावत किहीन कि राष्ट्र बर कर्तव्य के मंत्र सबले पहिली हे। कार्यक्रम के बेरा ओमन ई-कोर्ट परियोजना म करे गे आने-आने पहल के सुरूवात करीन।
ऐति, छत्तीसगढ़ म घलो संविधान दिवस के मउका म कतकोन कारीकरम होवत हे। राष्ट्रीय अउ राज्य विधिक सेवा प्राधिकरण कोति ले रईपुर अउ गरियाबंद जिला म आज ले दू दिसंबर तक संविधान दिवस सप्ताह मनाय जात हे। जिला सत्र न्यायाधीश संतोष शर्मा ह रईपुर म राखे गे कारीकरम म ए सप्ताह के सुभारंभ करीन।
उहें, धमतरी के अंबेडकर चउक म संविधान निर्माता डॉक्टर भीमराव अंबेडकर के मूर्ति म फूलमाला चढ़ाय गीस। जिला के स्कूल अउ आने संस्था म संविधान के कर्तव्य अउ अधिकार के वाचन करे गीस।
पीएससी-विज्ञापन
छत्तीसगढ़ लोक सेवा आयोग ह डिप्टी कलेक्टर समेत आने-आने विभाग म खाली एक सौ नवासी पद म भर्ती बर विज्ञापन जारी कर देहे। राज्य सेवा परीक्षा दू हजार बाईस बर अरजी ऑनलाइन सिरिफ मंजूर करे जाही। कोनों भी किसम के मैनुअल या डाक ले भेजे गे अरजी आयोग कोति ले मंजूर नइ करे जाय। राज्य सेवा प्रारंभिक परीक्षा दू हजार बाईस बर ऑनलाइन अरजी एक ले बाईस दिसंबर तक करे जाही। प्रारंभिक परीक्षा के संभावित तारीख बारह फरवरी दू हजार तेईस तय करे गेहे। उहें, मुख्य परीक्षा के संभावित तारीख ग्यारह, बारह, तेरह अउ चौदह मई दू हजार तेईस हरय।
माओवादी-मुठभेड़
बीजापुर जिला म आज सुरक्षा बल संग होय मुठभेड़ म दू महिला समेत चार झिन माओवादी मारे गेहे। उंखर सव बरामद कर ले गेहे। पुलिस अधीक्षक अंजनेय वार्ष्णेय ह घटना के पुष्टि करत बतईन कि मिरतुर थाना क्षेत्र के डीआरजी, एसटीएफ अउ सीआरपीएफ के टीम ल गांव पोमरा अउ हल्लूर म माओवादी मनके होय के सूचना मिले म रवाना करे गे रिहीस हे। इही बेरा आज बिहनिया पोमरा के जंगल म सुरक्षा बल के जवान अउ माओवादी मनके बीच मुठभेड़ होईस। मुठभेड़ म माओवादी मन जंगल कोति भाग गे। पाछु घटना के जघा के तलाशी के बेरा चार झिन माओवादी के सव बरामद करे गीस। उहें, रायफल अउ माओवादी जिनीस घलो बरामद करे गेहे। पुलिस अधीक्षक ह ए मुठभेड़ म कुछेक अउ माओवादी मनके मारे जाय के आसंका जतईन हे।
भानुप्रतापपुर-उपचुनाव
भानुप्रतापपुर विधानसभा उपचुनाव म स्वतंत्र अउ निष्पक्ष मतदान कराय बर भारत निर्वाचन आयोग कोति ले सबो तियारी होवत हे। वोट डारे बर निर्वाचन आयोग ह फोटो लगे मतदाता पहिचान पत्र के संगेसंग बारह ठिन आने पहिचान पत्र ल मान्यता देहे। वोट डारे बर मतदाता फोटो लगे पहिचान पत्र नइ होय म मान्य पहिचान पत्र देखाके वोट डार सकत हे। आयोग ह आने पहिचान पत्र म आधार कार्ड, मनरेगा जॉब कार्ड, फोटो लगे पासबुक, स्वास्थ्य बीमा स्माअर् कार्ड, ड्राईविंग लाइसेंस, पैन कार्ड, भारतीय पासपोर्ट समेत आने वैकल्पिक पहिचान पत्र ल मान्यता देहे।
खबर के मुताबिक ए सीट म कांग्रेस अउ भाजपा प्रत्यासी समेत सात झिन उम्मीदवार मैदान म हवय। उपचुनाव बर प्रचार अभियान जोरदरहा चलत हे। ए उपचुनाव म पांच दिसंबर के वोट डारे जाही। उहें, वोट के गनती अउ नतीजा के घोसना आठ दिसंबर के होही।
नई चेतना अभियान
लैंगिक भेदभाव के विरूद्ध राष्ट्रीय अभियान ‘‘नई चेतना- पहल बदलाव की‘‘ काली ले सुरू होगे हे, जउन तेईस दिसंबर तक चलही। नई दिल्ली म राखे गे सुभारंभ कारीकरम म छत्तीसगढ़ के राष्ट्रीय ग्रामीण आजीविका मिशन-बिहान के माईलोगिन मन ह भागीदारी निभईन हे। केन्द्रीय ग्रामीण विकास अउ पंचायत राज मंत्री गिरीराज सिंह के अगुवई म होय कारीकरम म धमतरी के चंद्रिका साहू ह पहुना मन संग दीया जलईन। उहें, बस्तर के गायत्री लोन्हारे ह आभार जतईन। ए बेरा म ओमन लैंगिक समानता बर अपन काम के अनुभव साझा करीन। अइसने, गरियाबंद के छुरा विकासखंड के रानी परतेवा गांव के हुलसी धु्रव ह पहुना मनके सुवागत करीन। कारीकरम म लैंगिक भेदभाव ल दुरिहा करे बर बस्तर म चलाय जात जेंडर परिवार चौपाल म आधारित डाक्युमेंट्री के प्रदर्सन करे गीस।
भाजपा-आरोप
भारतीय जनता पार्टी ह छत्तीसगढ़ के कांग्रेस सरकार उपर सरलग झूठ बोले के आरोप लगाय हे। नेता प्रतिपक्ष नारायण चंदेल ह अपन बयान म किहीन कि कांग्रेस पहिली ए काहत रिहीस कि केन्द्र पचपन हजार करोड़ रूपिया के रकम नइ देवत हे। फेर अब ओ ह बकाया रकम सात हजार करोड़ रूपिया बतावत हे। एखर बर कांग्रेस ल जनता ले माफी मागना चाही। श्री चंदेल ह किहीन कि राज्य सरकार पाछु चार बछर ले केन्द्र उपर झूठा आरोप लगावत हे। उहें, केन्द्र सरकार ह ए बेरा म राज्य सरकार ल करीबन डेढ़ लाख करोड़ रूपिया देहे।
पक्षी-सर्वे
बस्तर संभाग के कांगेर घाटी राष्ट्रीय उद्यान म पक्षी मन उपर शोध अउ सर्वे आज ले सुरू होगे। शोध बर देशभर ले चौहत्तर झिन पक्षी बिसेसज्ञ आय हे। जउन राष्ट्रीय उद्यान म तीन दिन तक रूक के देखही कि कोन-कोन से कतका प्रजाति के चिरई-चिरगुन इहां राहत हे। संगेसंग प्रवासी पक्षी मन उपर घलो सोध करही। कांगेर घाटी राष्ट्रीय उद्यान के प्रबंध संचालक ह बतईन कि पक्षी बिसेसज्ञ मन कोति ले सोध करे जाय ले उद्यान म रहवइया पक्षी अउ बाहिर ले अवइया प्रवासी पक्षी के संबंध म जानकारी मिल सकही।
दत्तक ग्रहण
नवीन दत्तक ग्रहण विनियम दू हजार बाईस म राज्य स्तरीय उन्मुखी प्रशिक्षण कार्यशाला आज राजधानी रईपुर के न्यू सर्किट हाउस म राखे गीस। कार्यसाला म बताय गेहे कि लइका मनके हित ल ध्यान म राखत किशोर न्याय अधिनियम म जरूरी फेरबदल करे गेहे। एमा नवा दत्तक ग्रहण विनियम दू हजार बाईस बनाय गेहे। एमा जिला दंडाधिकारी यानि जिला कलेक्टर ल दत्तक ग्रहण के उत्तरादायित्व अउ आदेस के अधिकार दे गेहे। पहिली दत्तक ग्रहण के आदेस न्यायालय कोति ले दे जात रिहीस। दत्तक ग्रहण के जम्मों कामकाज अब जिला स्तर म ही जिला दंडाधिकारी के आदेस के मुताबिक होही। विनियम म जिला बाल संरक्षण इकाई के भूमिका ल घलो महत्ता के बनाय गेहे।
जिले की चिट्ठी
आकाशवाणी रईपुर डहार ले प्रस्तुत कार्यक्रम ‘‘जिले की चिट्ठी‘‘ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मां केन्द्र रिले करही। ए बखत के अंक म ‘‘नारायणपुर‘‘ जिला के संबंध म जानकारी दे जाही।
राजस्व प्रकरण
राजस्व प्रकरण के तुरते निपटारा बर नवा पहल करत धमतरी जिला धमतरी तहसील म ‘‘घर-घर अभियान‘‘ के सुरूवात करे गीस। एमा पटवारी अपन हल्का के खातेदार अउ किसान के घर-घर जाके राजस्व प्रकरण ले जुड़े जानकारी लेवत हे अउ तय प्रक्रिया म जल्दी निपटारा करत हे। उहें, लोगन ल घर अमरा के जाति, आय अउ निवास प्रमाण पत्र बर जरूरी दस्तावेज घलो देवाय जात हे, जेखर ले लोगन ल पटवारी अउ तहसील कार्यालय के चक्कर लगाय बर झन पड़य। धमतरी तहसील के सत्तर हजार ले जादा खातेदार म उन्नीस हजार खाताधारक के घर जाके पटवारी मन ह मेलजोल करीन हे।