भेंट-मुलाकात कार्यक्रम के दौरान मुख्यमंत्री भूपेश बघेल ह आज राजनांदगांव विधानसभा क्षेत्र पहुंचीन। ए दउरान ओमन ह कृष्ण कुंज संघरा तिरसठ करोड़ इकसठ लाख रूपिया ले जादा के विकास काम के लोकार्पण अउ भूमिपूजन करीन।
मुख्यमंत्री ह अधिकारी मनके बइठका लेके राजनांदगांव के बंद पड़े बीएनसी मिल ल शुरू करे बर कार्ययोजना बनाय के अउ नेशलन टेक्सटाईल कार्पोरेशन ले चर्चा करे के निर्देश दीन। ओमन ह चिटफंड कंपनी मनके खिलाफ करे गे कार्रवाई के घलो जानकारी लीन।
मुख्यमंत्री ह गौठान म कुक्कुट पालन अउ फ्लाई ऐश ब्रिक्स जइसन गतिविधि मन ल बढ़ावा देके निर्देश दीन। एखर पहिली मुख्यमंत्री ह काली राजनंादगंाव म पुलिस अधीक्षक कार्यालय म पुलिस जनसंवाद कक्ष के उद्घाटन करीन। संगेसंग बसंतपुर जिला अस्पताल म डायलिसिस यूनिट के घलो शुरूआत करीन।
मुख्यमंत्री प्रेसवार्ता
मुख्यमंत्री भूपेश बघेल ह किहीन हे कि अवइया बछर होवइया विधानसभा चुनाव बर कंाग्रेस के नीति स्पष्ट हे। ओमन कीहिन कि कंाग्रेस अपन काम के दम म चुनाव लड़ही अउ ए दारी पार्टी के लक्ष्य इकहत्तर सीट म जीत हासिल करे के रइही।
राजनंादगंाव म पत्रकार मनले गोठबात करत श्री बघेल ह भानुप्रतापपुर उपचुनाव म घलो जीत के दावा करे हे। ओमन ह कीहिन कि बछर दू हजार अठारा म होय विधानसभा चुनाव म कंाग्रेस ह अड़सठ सीट म जीत दरज करे रीहिस। ये छत्तीसगढ़ के चुनावी इतिहास म सबले बड़े जीत हे।
ओमन ह आरोप लगाइन कि प्रवर्तन निदेशालय-ईडी अउ आयकर विभाग के दम म अधिकारी मन ल प्रताड़ित करे जावत हे। मुख्यमंत्री ह झीरम घाटी कंाड ल राजनीतिक षडयंत्र बतावत कीहिन कि जब एनआईए ह अपन जांच पूरा कर लेहे, त आगू राज्य सरकार ल जांच करे बर देना चाही।
मनी लॉन्ड्रिंग/कोयला घोटाला
मनी लॉन्डिंªग अउ कोयला घोटाला मामला म जेल म बंद निलंबित आईएएस समीर बिश्नोई संघरा दूसर चार आरोपी सूर्यकांत तिवारी, लक्ष्मीकंात तिवारी अउ सुनील अग्रवाल के जमानत याचिका ल खारिज करत रायपुर के विशेष अदालत ह छै दिसंबर तक न्यायिक रिमंाड म भेजे के आदेश देहे।
ए सबो आरोपी मन ल रिमंाड के अवधि खतम होय के बाद आज प्रवर्तन निदेशालय-ईडी के टीम ह ओमन ल रायपुर कोर्ट म पेश करीस। स्पेशल कोर्ट ह कोयला कारोबारी सुनील अग्रवाल के जमानत आवेदन खारिज कर देहे। एखर पहिली कोर्ट ह समीर बिश्नोई ल घलो जमानत देले इंकार कर दे रीहिस।
ऑनलाइन सट्टा-आरोपी गिरप्तार
दुर्ग पुलिस ह ऑनलाइन सट्टा मामला म महादेव ऐप अउ रेड्डी अन्ना ग्रुप के अठारा आरोपी मन ल भोपाल ले गिरप्तार करे हे। आरोपी मनके तीर ले बारा ठिन लैपटॉप अउ इकतालीस मोबाइल, डायरी, एटीएम अउ पासबुक जब्त करे गीस।
दुर्ग पुलिस अधीक्षक डॅाकटर अभिषेक पल्लव ह बताइन कि मध्यप्रदेश भेजे गे टीम ह भोपाल म ऐप के तीन ब्रांच ल ध्वस्त करत आरोपी मनके ठिकाना म छापा मारीन। जिहंा महादेव ऐप अउ रेड्डी अन्ना ग्रुप के पैनलिस्ट ऑनलाइन सट्टा खिलावत रीहिन। जम्मांे आरोपी मन ले भिलाई म पूछताछ के बाद पुरा खुलासा करे जाही।
छत्तीसगढ़िया ओलंपिक
छत्तीसगढ़िया ओलंपिक के अगला चरण रायपुर जिला म शुरू होगे हवय। पंचायत मंत्री रविंद्र चौबे ह आज रायपुर के सुभाष स्टेडियम म जिला स्तरीय प्रतियोगिता के शुरूआत करीन। ए मउका म श्री चौबे ह कीहिन कि ए आयोजन ले छत्तीसगढ़ के पारंपरिक खेल ल बचाय बर अउ ओखर विश्व स्तर के पहचान बर प्रयास करे जावत हे।
रायपुर कलेक्टर डॅाक्टर सर्वेश्वर नरेंद्र भूरे ह बताइन कि जिला स्तरीय प्रतियोगिता पच्चीस नवंबर तक चलही। जिला स्तरीय विजेता मन ह राज्य स्तर के प्रतियोगिता म भाग ले सकहीं। छत्तीसगढ़िया ओलंपिक म कबड्डी, बांटी, पिट््ठूल, बिल्लस, फुगड़ी, गेंड़ी दौड़ अउ भंवरा जइसन चौदा ठन पारंपरिक खेल के मुकाबला होवत हे।
पुरूष नसबंदी पखवाड़ा
स्वास्थ्य विभाग डहार ले प्रदेश भर म ए बेरा परिवार नियोजन के जागरूकता बर पुरूष नसबंदी पखवाड़ा मनाये जावत हे,जउन ह चार दिसंबर तक चलही। नसबंदी करइया हितग्राही मन ल स्वास्थ्य विभाग डहार ले तीन हजार रूपिया प्रोत्साहन राशि दे जावत हे। ए बछर के थीम हे – अब पुरूष निभायेंगे जिम्मेदारी परिवार नियोजन को अपनाकर दिखाएंगे अपनी भागीदारी ।
अभियान म कोरबा म अपर कलेक्टर विजेंद्र पाटले ह जागरूकता रथ ल हरा झंडा दिखाके रवाना करीन। मुख्य चिकित्सा अउ स्वास्थ्य अधिकारी डॅाक्टर एस.एन. केसरी ह बताइन कि पखवाड़ा के दउरान गांव म महिला स्वास्थ्य कार्यकर्ता, आंगनबाड़ी कार्यकर्ता अउ मितानिन मन डहार ले सास-बहू सम्मेलन घलो आयोजित करे जाही, जेमा परिवार कल्याण के अस्थाई अउ स्थाई साधन के घलो जानकारी दे जाही।
मितानिन दिवस
मितानिन दिवस के मउका म आज प्रदेश के कतकोन जिला म मितानिन मनके सम्मान करे गीस। जांजगीर-चंापा कलेक्टर तारण प्रकाश सिन्हा ह स्वास्थ्य केंद्र बारगांव म मितानिन मनके शॉल अउ श्रीफल ले सम्मान करीन। उंहे कोरिया म कलेक्टर विनय कुमार लंगेह ह कलेक्ट्रेट म राखे गे कार्यक्रम म मितानिन दीदी मनके संघर्ष, साहस अउ सहयोग के सराहना करत उंखर सम्मान करीन।
ठगी आरोपी गिरप्तार
बलौदाबाजार-भाटापारा पुलिस ह चिटफंड कंपनी के माध्यम ले करीबन सत्ताईस करोड़ इकसठ लाख रूपिया के ठगी के मामला म चार झन आरोपी मन ल राजस्थान के धौलपुर ले गिरप्तार करे हे। सबो आरोपी मन ह चिटफंड कंपनी गरिमा रियल इस्टेट के डायरेक्टर हे अउ ओमन ल वारंट म छत्तीसगढ़ लाये गे हवय। एखर पहिली इही कंपनी के दू झन डायरेक्ट ल गिरप्तार करे गेहे।
प्रसार भारती-रजत जयंती
प्रसार भारती ह आज अपन स्थापना के रजत जयंती मनावत हे। एखर स्थापना बछर उन्नीस सौ संतानवे म आजे के दिन एक सांविधिक स्वायत्त इकाई के रूप म करे गे रीहिस । एमा दूरदर्शन अउ आकाशवाणी दूनों सामिल हे।
प्रसार भारती के मुख्य कार्यकारी अधिकारी गौरव द्विवेदी ह कीहिन कि प्रसार भारती देश अउ विदेश के आगू आय चुनौती के दउरान लोगन संग मजबूती ले खड़े हे।
ट्रेन परिचालन
मध्य रेलवे के जलगांव-भुसावल के बीच चौथा लाइन बर नॉन इंटरलॉकिंग काय के सेती छत्तीसगढ़ ले जाने वाला कुछएक रेलगाड़ी मनके अवई जवई अवइया चार ले छै दिसंबर तक प्रभावित रीही। ए दउरान कोल्हापुर-गांेदिया महाराष्ट्र एक्सप्रेस अउ मुंबई-गोंदिया विदर्भ एक्सप्रेस रद्द रीही। उंहे बिलासपुर- हापा एक्सप्रेस, हावड़ा-अहमदाबाद, पूरी-सूरत, पूरी-गांधीधाम अउ शालीमार- पोरबंदर एक्सप्रेस ह बदले रद्दा ले चलाये जाही।
युवा महोत्सव
राज्य स्तरीय युवा महोत्सव के आयोजन रायपुर म बारह ले चौदा जनवरी तक करे जाही। महोत्सव म अड़तीस ठन विधा म ढाई हजार ले जादा प्रतिभागी मन शामिल होही। एमा लोगन मन पारंपरिक लोक संगीत, नृत्य , खेल अउ छत्तीसगढ़ी व्यंजन के आनंद ले सकहीं। महोत्सव के तियारी ल लेके रायपुर कलेक्टर डॅाक्टर सर्वेश्वर नरेंद्र भूरे ह काली स्थानीय आयोजन समिति के सदस्य मनके बइठका लीन अउ जरूरी निर्देश दीन।
अउ अब थोरकुन समाचार सार म –
– नरवा विकास कार्यक्रम के माध्यम ले वन क्षेत्र म भू-जल संरक्षण बर छत्ती सगढ़ ल स्कॉच अवार्ड के पर्यावरणीय श्रेणी म स्वर्ण पुरस्कार दे जाही। मुख्यमंत्री भूपेश बघेल अउ वनमंत्री मोहम्मद अकबर ह ये उपलब्धि बर विभागीय अधिकारी कर्मचारी मन ल बधाई दीन हे।
– मुंगेली धान खरीदी केंद्र प्रभारी उपर हमला करे के अउ शासकीय काम म बाधा पहुंचाय के आरोप म पुलिस ह एक झन मनखे ल गिरप्तार करके न्यायिक हिरासत म भेज दे हवय।
– छत्तीसगढ़ योग आयोग अउ यूनिसेफ के मदद ले कोंडागांव जिला के पैंतालिस ठन हेल्थ अउ वेलनेस संेटर म गर्भवती माइलोगिन मन बर विशेष योगाभ्यास कार्यक्रम चलाये जावत हे।
– जांजगीर चंापा जिला के बारद्वार म एक ठन गाड़ी के चपेट म आय ले दुपहिया म बइठे एक झन नोनी के मउत होगे। घटना ले गुस्साये लोगन मन थोरकुन देर बर रद्दा म चक्का जाम करीन।
अउ
– दुर्ग जिला रोजगार अउ स्वरोजगार मार्गदर्शन केंद्र डहार ले अठासी पद मन म भर्ती बर अवइया पच्चीस नवंबर के प्लेसमेंट कैंप के आयोजन करे जाही।