प्रधानमंत्री-नियुक्ति पत्र
प्रधानमंत्री नरेन्द्र मोदी ह आज वीडियो कान्फ्रेंसिंग के माध्यम ले इकहत्तर हजार ले जादा नवा नियुक्त कर्मी मन ल नियुक्ति पत्र सौंपीन। नियुक्ति पत्र के मूल प्रति देश के पैंतालीस ठन जघा म बांटे गीस। प्रधानमंत्री ह कर्मयोगी प्रारंभ मॉडयूल के घलो सुरूवात करीन। ए मॉडयूल आने-आने सरकारी विभाग म नवा-नियुक्त कर्मी मन बर ऑनलाइन अनुकूलन पाठ्यक्रम हे। नवा कर्मचारी मन ल अपन ज्ञान, कौशल अउ सक्षमता बढ़ाय बर आई.जी.ओ.टी. कर्मयोगी डॉट जीओवी डॉट इन प्लेटफॉर्म म दूसर कोर्स करे के घलो मउका मिलही।
ए मउका म श्री मोदी ह किहीन कि सरकार नौकरी देवाय बर मिशन मोड म काम करत हे। ओमन किहीन कि कतकोन राज्य म रोजगार मेला कराय जावत हे अउ ए अभियान ल आगे घलो चलत रिही। युवा मन ल देस के सबले बड़े शक्ति बतावत प्रधानमंत्री ह किहीन कि सरकार युवा मनके प्रतिभा अउ ऊर्जा के उपयोग करे ल प्राथमिकता देवत हे। श्री मोदी ह किहीन कि कर्मयोगी भारत मंच म कतकोन पाठ्यक्रम उपलब्ध रइही, जेखर ले नवा नियुक्त कर्मी मन ल आगू बढ़े म मदद मिलही। श्री मोदी ह किहीन कि सरकार के प्रयास के सेती सरकारी अउ निजी क्षेत्र म नवा रोजगार के मउका सरलग बाढ़त हे।
ए मउका म कार्मिक, जन-शिकायत, पेंशन अउ प्रधानमंत्री कार्यालय म राज्यमंत्री डॉक्टर जितेन्द्र सिंह ह किहीन कि प्रधानमंत्री नरेन्द्र मोदी ह दस लाख लोगन ल नौकरी दे बर प्रतिबद्ध हे।
भानुप्रतापपुर-उपचुनाव
भानुप्रतापपुर विधानसभा उपचुनाव बर अखिल भारतीय कांग्रेस कमेटी के प्रभारी महासचिव मुकुल वासनिक ह स्टार प्रचारक मनके सूची जारी कर दीन हे। ए सूची म मुख्यमंत्री भूपेश बघेल संघरा सैंतीस झिन नेता मन सामिल हे। एमा प्रदेस प्रभारी पी.एल. पुनिया, प्रभारी सचिव डॉक्टर चंदन यादव, प्रदेश अध्यक्ष मोहन मरकाम, गृह मंत्री ताम्रध्वज साहू अउ स्वास्थ्य मंत्री टी.एस. सिंहदेव संघरा दूसर मंत्री मन ल घलो सामिल करे गेहे।
उपचुनाव-आरोप-प्रत्यारोप
इही बीच, भानुप्रतापपुर उपचुनाव म भारतीय जनता पार्टी के प्रत्यासी ब्रम्हानंद नेताम उपर लगाय गे आरोप के खिलाफ आज भाजपा के आने-आने मंडल के नेता, कार्यकर्ता अउ पदाधिकारी मन ह सिकायत करत प्रदेस कांग्रेस अध्यक्ष मोहन मरकाम के खिलाफ पॉक्सो एक्ट म एफआईआर दर्ज करे के मांग करीन। भाजपा ह सिकायत म केहे हे कि प्रदेस कांग्रेस अध्यक्ष ह पीड़ित नोनी के पहिचान ल सरेआम उजागर करीन हे, जउन ह पॉक्सो एक्ट के धारा-तेईस के तहत अपराध माने जाथे।
उहें, भाजपा विधायक अउ भानुप्रतापपुर उपचुनाव प्रभारी बृजमोहन अग्रवाल ह भाजपा के उम्मीदवार ब्रम्हानंद नेताम उपर कांग्रेस डहार ले लगाय गे आरोप ल साजिश बतावत किहीन कि उंखर खिलाफ अतका बछर म न तो कोनों सिकायत करे गेहे अउ न ही कोनों जांच। ओमन किहीन कि कांग्रेस के ए आरोप ले साबित होथे कि ए सब साजिश के तहत होय हे।
मुख्यमंत्री-भेंट मुलाकात
भेंट-मुलाकात कार्यक्रम के दउरान मुख्यमंत्री भूपेश बघेल ह आज राजनांदगांव विधानसभा क्षेत्र के ग्राम सुरगी म जिला सहकारी बैंक के साखा अउ मनकी म धान खरीदी केन्द्र खोले संघरा कतकोन घोसना करीन। कार्यक्रम म सुरगी के किसान मन ह सौ ट्रैक्टर पैरादान करीन। मुख्यमंत्री ह किसान मन डहार ले करे जावत पैरादान के तारीफ करत किहीन कि गोधन न्याय योजना बर ए सहभागिता सीखे के लइक हे। ए मउका म मुख्यमंत्री ह पैरादान बर ट्रैक्टर ल हरा झंडा दिखाके रवाना करीन।
क्वांटिफायबल डाटा आयोग
क्वांटिफायबल डाटा आयोग ह सर्वेक्षण के बाद राज्य सरकार ल प्रतिवेदन सौंप दीन हे। सेवानिवृत्त जिला न्यायाधीश छबिलाल पटेल के अगुवई म बनाय गे आयोग डहार ले चिप्स के माध्यम ले बने मोबाइल ऐप अउ वेबपोर्टल के माध्यम ले सर्वे के काम एक सितंबर दू हजार इक्कीस म सुरू करे गे रिहीस। सर्वे के काम बेरा म पूरा नइ होय के सेती आयोग के कार्यकाल ल समय-समय म बढ़ाय गीस।
खबर के मुताबिक छत्तीसगढ़ शासन डहार ले राज्य के जनसंख्या म अन्य पिछड़ा वर्ग अउ आर्थिक रूप ले कमजोर वर्ग के मनखे मनके सर्वेक्षण करके क्वांटिफायबल डाटा प्रस्तुत करे बर आयोग के गठन करे गे हवय।
विश्व मात्स्यिकी दिवस
राज्य सरकार ह नवा रईपुर म प्रमुख चौक के नामकरण मछुवारा समाज के महापुरूष के नाव म करे के फइसला ले हवय। रईपुर के पंडित दीनदयाल उपाध्याय ऑडिटोरियम म विश्व मात्स्यिकी दिवस म राखे के कारीकरम म मुख्यमंत्री भूपेश बघेल ह किहीन कि मछुवारा समाज के भूमिका प्राचीन काल ले अभी तक गर्व के रेहे हे। ओमन किहीन कि राज्य सरकार ह मछली पालन ल कृषि के दरजा दे हवय। ए फइसला ले मछुवारा मन ल सून्य प्रतिसत ऋण अउ दूसर सुविधा मिलत हे। कारीकरम म मछली पालन ले जुड़े इकतीस झन हितग्राही मन ल मोटर साइकिल सह आईस-बॉक्स अउ सात हितग्राही मन ल चारपहिया गाड़ी दे गीस।
मितानिन दिवस
प्रदेस म काली तेईस नवंबर के मितानिन दिवस मनाय जाही। स्वास्थ्य मंत्री टी.एस. सिंहदेव ह पंच अउ सरपंच मन ल चिट्ठी लिखके मितानिन दिवस म ग्राम पंचायत म कार्यक्रम करके मितानिन मनके सम्मान करे के अपील करीन हे। ओमन किहीन कि पोषण, स्वास्थ्य अउ जागरूकता के क्षेत्र म मितानिन मन ह बड़ सुघ्घर काम करीन हे। ओमन ह हमर प्रदेस के गौरव हवय। राज्य बने के बाद प्रदेश ह स्वास्थ्य के क्षेत्र म जउन प्रगति पाय हे, ओ ह मितानिन मनके परयास के बिना संभव नइ रिहीस। स्वास्थ्य के संगेच मितानिन मन ह महिला सशक्तिकरण जइसन सामाजिक मुद्दा उपर घलो काम करत हे। ओमन ह राज्य सरकार के कतकोन कल्याणकारी योजना के अधिकार ले घलो समुदाय ल जोड़त हे।
धान खरीदी
प्रदेस म धान खरीदी के आंकड़ा दस लाख मीटरिक टन ले पार होगे हे। एखर एवज म किसान मन ल इक्कीस सौ करोड़ रूपिया ले जादा के राशि के भुगतान करे गे हवय। धान खरीदी के संग कस्टम मिलिंग बर धान के उठाव घलो करे जावत हे। अभी तक चार लाख मीटरिक टन ले जादा धान के उठाव समिति मन डहार ले करे गे हवय। राज्य सरकार डहार ले ए बछर एक सौ दस लाख मीटरिक टन धान खरीदी के लक्ष्य राखे गे हवय।
खाद्य विभाग के सचिव टोपेश्वर वर्मा ह बतईन कि अधिकारी मन ह धान खरीदी व्यवस्था उपर सरलग नजर राखत हे। उहें, सीमा ले लगे राज्य मन ले धान के अवैध परिवहन ल रोके बर चेकपोस्ट के जरिया कड़ा निगरानी रखे जावत हे।
अउ अब थोरकुन समाचार सार म –
– भारतीय जनता पार्टी के प्रदेस प्रवक्ता संदीप शर्मा ह गरियाबंद जिला के धुरवागुड़ी म पुलिस अउ किसान के बीच होय झड़प ल दुर्भाग्यपूर्ण बतावत किहीन कि ए राज्य के कांग्रेस सरकार के नाकामी के परिणाम हे।
– राजस्व अउ आपदा प्रबंधन मंत्री जयसिंह अग्रवाल ह कोरबा जिला के प्रियदर्शनी इंदिरा स्टेडियम म राखे गे जिला स्तरीय छत्तीसगढ़िया ओलंपिक म सामिल होईन। ए मउका म ओमन ह विजेता प्रतिभागी मन ल सम्मानित करीन।
– भारत निर्वाचन आयोग के निरदेस म दावा आपत्ति प्राप्त करे के, ओखर निपटारा के अउ दूसर काम के समीक्षा बर रईपुर संभाग आयुक्त ह काली तेईस नवंबर के आने-आने मतदान केन्द्र के भ्रमण करही। ए दउरान कोनों भी मनखे अपन समस्या अउ सुझाव दे सकत हे।
– जिला रोजगार अउ स्वरोजगार मार्गदर्शन केन्द्र रईपुर डहार ले दसवीं ले स्नातक स्तर के युवा मन बर काली तेईस नवंबर के पुराना पुलिस मुख्यालय परिसर म रोजगार मेला के आयोजन करे जाही।
– कोंडागांव जिला म यूनिसेफ के मददले छत्तीसगढ़ योग आयोग डहार ले गर्भवती माईलोगिन मन बर योगाभ्यास कार्यक्रम कराय जावत हे।
अउ
– बिलासपुर सहर के सिरगिट्टी थाना क्षेत्र म एक ठिन निजी तेल मिल म आगी लगे ले हजारों लीटर के तेल जल गे।