संसद के सीतकालीन सत्र सात दिसंबर ले सुरू होही। ए सत्र ह उनतीस दिसंबर तक चलही। संसदीय कार्यमंत्री प्रहलाद जोशी ह बतईन कि तेईस दिन तक चलइया ए सत्र म 17 बइठका होही। ओमन आसा व्यक्त करत किहीन कि ए सत्र म विधायी कार्य सुचारू रूप ले होही अउ आने-आने मुद्दा म चरचा अउ विचार-विमर्श घलो करे जाही।
सिंगल यूूज प्लास्टिक प्रतिबंध
सामान्य प्रशासन विभाग ह प्रदेस म सिंगल यूज प्लास्टिक के उपयोग म जोरलगहा ढंग ले प्रतिबंध लगाय के निरदेस देहे। ए संबंध म जम्मों संभाग आयुक्त अउ जिला कलेक्टर मन ल पत्र जारी करे गेहे। पत्र म केहे गेहे कि केन्द्रीय पर्यावरण मंत्रालय ह 12 अगस्त 2021 के सिंगल यूज प्लास्टिक ल बंद करे के अधिसूचना जारी करे रिहीस हे। एखर अनुसार प्लास्टिक ईयर बड्स के संगेसंग गुब्बारा बर बने प्लास्टिक के डंडा, झंडा, चॉकलेट स्टीक अउ थर्माकोल के संग आने प्लास्टिक के वस्तु जिखर मोटाई सौ माइक्रॉन ले कम हो, उंखर बिक्री अउ उपयोग बर ए साल एक जुलाई ले प्रतिबंध लगा दे गेहे। प्रदेस म घलो एखर पालन करे बर केहे गेहे।
नसबंदी-पखवाड़ा
पुरूष नसबंदी ल बढ़ावा दे बर प्रदेस म 21 नवंबर ले 04 दिसंबर तक पुरूष नसबंदी पखवाड़ा के आयोजन करे जाही। स्वास्थ्य विभाग ह जम्मों जिला के मुख्य चिकित्सा अउ स्वास्थ्य अधिकारी मन ल ए पखवाड़ा ल सफल बनाय बर जरूरी दिसा-निरदेस देहे। ए पखवाड़ा ‘‘अब पुरूष निभाएंगे जिम्मेदारी, परिवार नियोजन अपनाकर दिखाएंगे अपनी भागीदारी‘‘ के थीम म मनाय जाही। ए पखवाड़ा दू चरण म आयोजित होही। पहिली चरण इक्कीस ले सत्ताईस नवंबर अउ दूसरा चरण अट्ठाईस नवंबर ले चार दिसंबर तक मनाय जाही। पहिली चरण म पुरूष स्वास्थ्य कार्यकर्ता ‘‘मोर मितान-मोर संगवारी‘‘ के आयोजन करही। ए बेरा ओमन अपन क्षेत्र के जम्मों लक्षित दंपत्ति खास कर पुरूष मन ले व्यक्तिगत संपर्क करके नसबंदी के फायदा बताही।
भानुप्रतापपुर-प्रेसवार्ता
भाजपा नेता केदार कश्यप, महिला मोर्चा के प्रदेस अध्यक्ष शालिनी राजपूत अउ देवलाल ठाकुर ह आज भानुप्रतापपुर म आयोजित एक पत्रकारवार्ता म कांग्रेस पार्टी उपर आरोप लगावत हुए किहीन कि एनएसयूआई के प्रदेस महासचिव ल दुष्कर्म के आरोप म गिरफ्तार करके जेल भेजे के बाद घलो कांग्रेस ह अभी तक चुप हवय। जे ह समझ ले परे हे। ओमन किहीन कि कांग्रेस ल भानुप्रतापपुर के जनता ले माफी मांगना चाही।
बतादन कि कांकेर म एनएसयूआई के प्रदेस महासचिव ल पुलिस ह दुष्कर्म के मामला म गिरफ्तार करके जेल भेज देहे।
जांजगीर-विशेष अदालत
जांजगीर-चांपा जिला के बिसेस अदालत ह नगर पंचायत अड़भार के तत्कालीन सीएमओ राजेश चन्द्र त्रिवेदी अउ एकाउंटेंट गोपाल सिंह ठाकुर के जमानत याचिका खारिज कर देहे। ए दूनों झन उपर फरवरी दू हजार उन्नीस म एंटी करप्शन ब्यूरो ह नगर पंचायत म आर्थिक गड़बड़ी के मामला दर्ज करे रिहीस। ईओडब्ल्यू के टीम ह ए दूनों आरोपी ल काली गिरफ्तार करे रिहीस। ए मामला म नगर पालिका के तत्कालीन अध्यक्ष कार्तिकराम रात्रे अभी घलो फरार हे।
लाख खेती
राज्य म किसान मनके लाख के खेती म रूझान बढ़त जात हे, जेला देखत लाख के खेती करे बर राज्य सरकार ह किसान मन ल बिना ब्याज के ऋण देके के निर्णय लेहे। ए काम दू सौ वन-धन मित्र के माध्यम ले करे जात हे। वैज्ञानिक पद्धति ले लाख के खेती करे खातिर प्रसिक्षण बर राज्य लघु वनोपज संघ डहार ले कांकेर म प्रशिक्षण केन्द्र घलो खोले गेहे। विशेषज्ञ मन ले मिले जानकारी के अनुसार लाख उत्पादन म किसान मन ल एक कुसुम पेड़ ले हर साल लगभग छह हजार चार सौ रूपिया, उहें बोईर के एक पेड़ ले बारह सौ पन्द्रह रूपिया अउ पलाश के एक पेड़ ले हर साल पांच सौ पैंतालीस रूपिया के लाभ हो सकथे।
कुसुमी बीहन लाख बर 15 दिसंबर तक मांग के अनुसार राशि जमा करे के समय-सीमा निर्धारित करे गेहे। ए साल राज्य सरकार ह लगभग चार ले दस हजार टन लाख उत्पादन करे के लक्ष्य राखे हे।
धान खरीदी
प्रदेस म अभी तक दू लाख बैसठ हजार किसान मन ले समर्थन मूल्य म आठ लाख सड़सठ हजार मीटरिक टन ले जादा के धान खरीदी करे जा चुके हे। एखर एवज म किसान मन ल बैंक लिंकिंग व्यवस्था के तहत एक हजार सात सौ ससत्तर करोड़ उनसठ लाख रूपिया के भुगतान करे जा चुके हे। खाद्य विभाग के सचिव टोपेश्वर वर्मा ह बतईन कि अधिकारी मन धान खरीदी व्यवस्था म सरलग नजर राखे हे। सीमावर्ती राज्य ले अवैध धान के परिवहन ल रोके बर चेकपोस्ट के माध्यम ले निगरानी करे जावत हे।
इही बीच, भारतीय जनता पार्टी के प्रदेस प्रवक्ता संदीप शर्मा ह आरोप लगईन हे कि कोरिया अउ मनेन्द्रगढ़-चिरमिरी-बैकुंठपुर जिला म ‘‘टोकन तुंहर हाथ‘‘ ऐप नइ खुले के सेती किसान मन ल ऑफलाइन टोकन ले बर समिति के चक्कर लगाय बर पड़त हे। ओमन किहीन कि धान खरीदी केन्द्र मन म बारदाना नइ हे, जेखर सेती किसान मन ल परेसानी होवत हे। श्री शर्मा ह किहीन कि जउन समिति म पैंतीस हजार किसान मन ल धान बेचना रिहीस, उहां पन्द्रह दिन के बाद घलो सिरिफ तीन सौ किसान ही धान बेच पाय हे।
माओवादी गिरफ्तार
बीजापुर जिला म पुलिस ह दू झिन माओवादी ल गिरफ्तार करे गेहे। मिले जानकारी के अनुसार जिला पुलिस बल के जवान मिरतुर थाना क्षेत्र म सर्चिंग बर निकले रिहीन। इही दउरान तीमेनार के जंगल ले ए माओवादी मन ल गिरफ्तार करे गीस। इंखर तीर ले विस्फोटक समेत जिंदा बारूद, कोडेक्स वायर अउ माओवादी साहित्य बरामद करे गेहे।
हाथी विचरण
कोरबा जिला के कटघोरा वनमंडल के पसान क्षेत्र म चवालीस हाथी मनके दल ह घूमत हे। पाछु रतिहा हाथी मन सेमरहा गांव म दू मवेसी मन ल मार डरीन। उहें, तीन ग्रामीण मनके घर ल तोड़ दीन। हाथी मन फसल ल घलो नुकसान पहुंचाय हे। वन विभाग के टीम ह हाथी मन उपर नजर बनाय रखे हे।
ऐति, मोहला-मानपुर के तीर के गांव मन म हाथी के विचरण ले गांव वाले मन दहसत म हे। वन विभाग ह सरहदी क्षेत्र के जम्मों गांव म हाका परवा के सतर्क रेहे बर केहे हे। वन विभाग के अधिकारी मन बतईन कि हाथी मनके दल महाराष्ट्र के गढ़चिरौली जिला के कोटगुल म देखे गीन, जे मोहला-मानपुर के तीर म हे।
अउ अब थोरकुन समाचार सार म –
– राज्यपाल अनुसुईया उइके बीस अउ इक्कीस नवंबर के भोपाल प्रवास म रिही। ए दउरान ओमन काली भोपाल म राखे गे टैगोर अंतर्राष्ट्रीय साहित्य अउ कला महोत्सव ‘‘विश्वरंग‘‘ के समापन समारोह म सामिल होही।
– राज्य सरकार ह वरिष्ठ पुलिस अधिकारी डी.एम. अवस्थी ल ईओडब्ल्यू-एसीबी के डायरेक्टर बनाय हे। उहें, अजय कुमार यादव ल इंटेलीजेंस के संगेसंग रईपुर रेंज के पुलिस महानिरीक्षक के अतिरिक्त प्रभार सौंपे हे।
– अखिल भारतीय सैनिक स्कूल म छठवीं कक्षा म प्रवेस बर अवइया आठ जनवरी के सैनिक स्कूल अंबिकापुर म परीक्षा आयोजित करे जाही। एखर बर तीस नवंबर तक ऑनलाइन आवेदन मंगाय गेहे।
– जिला रोजगार अउ स्वरोजगार मार्गदर्शन केन्द्र रईपुर डहार ले इक्कीस, बाईस अउ तेईस नवंबर के पुराना पुलिस मुख्यालय के रोजगार कार्यालय परिसर म प्लेसमेंट कैम्प के आयोजन करे जाही।
– सुकमा जिला म जमीन के नक्सा म गड़बड़ी के मामला म एसडीएम ह एक झिन पटवारी ल निलंबित कर देहे।
अउ
– जांजगीर-चांपा जिला के सिटी कोतवाली पुलिस ह नौकरी लगाय के नाम म आठ लाख रूपिया के धोखाधड़ी करे के मामला म एक दंपत्ति ल गिरफ्तार करे हे।