प्रदेस के भारतीय जनता पार्टी डहार ले भानुप्रतापपुर विधानसभा उपचुनई बर ब्रह्यानंद नेताम ल अपन प्रत्यासी घोसित कर दे गेहे। भाजपा के प्रदेस अध्यक्ष अरूण साव ह बताईन हे कि पूर्व विधायक श्री नेताम के नाव के चयन ल केन्द्रीय चुनाव समीति डहार ले तय करे गेहे। ओमन आसा जतावत कीहिन कि ए चुनाव ल श्री नेताम ह जरूर जीतही।
उंहे, जिला चुनाव अधिकारी प्रियंका शुक्ला ह बताईन हे कि ए उपचुनई बर नामांकन पत्र दाखिल करे के काम ह जारी हे। उम्मीदवार मन ह सत्रह नवंबर तक अपन नाव ल दाखिल कर सकत हे। नामांकन पत्र के जांच ल अट्ठारा नवंबर के करे जाही। उंहे, नाम वापस लेके आखरी तारिख इक्कीस नवंबर तय करे गेहे। ए चुनाव बर पांच दिसंबर के वोट डारे जाही। वोट के गिनती अउ चुनाव के परिणाम के घोसना ल आठ दिसंबर के दिन करे जाही।
उंहे, चुनाव आयोग डहार ले ए उपचुनई के तियारी ल पूरा कर ले गेहे।
जनजातीय गौरव दिवस
आज जनजातीय गौरव दिवस हरय। आदिवासी स्वतंत्रता संग्राम सेनानी बिरसा मुंडा के जयंती ल केन्द्र सरकार ह जनजातीय दिवस के रूप म मनाय के घोसना करे हे। ए मउका म झारखंड के खुटी जिला के तीर उलीहातु गांव म राखे गे एक ठन कारीकरम म राष्ट्रपति द्रौपदी मुर्मू ह भगवान बिरसा मुंडा के मुर्ति म फूल माला चढ़ाईन। ए दउरान राष्ट्रपति मुर्मू ह कीहिन कि जनजातीय समुदाय के मनखे मन ह अपन कला अउ मेहनत ले हमर देस ल बहुत जादा सक्ति साली बनाय हे।
उंहे, प्रधानमंत्री नरेन्द्र मोदी ह कीहिन कि भगवान बिरसा मुंडा अउ करोडों आदिवासी मनके सपना ल साकार करे बर देस ह अमृतकाल के पांच ठन परन ल आगू बढ़ावत हेे।
एती, छत्तीसगढ़ के राज्यपाल अनुसुईंया उइके ह स्वतंत्रता संग्राम सेनानी बिरसा मुंडा के जयंती के मउका म उंखर मुर्ति म फूलमाला चढ़ाईन। ए दउरान ओमन कीहिन कि बिरसा मुंडा ह महाविद्रोह ऊलगुलान चलाके अंग्रेज सरकार ल ललकारे रिहीन। अउ आदिवासी मनके सामाजिक आर्थिक अउ अधिकार मन बर लड़ाई लड़े रिहीन।
उंहे, राज्य के मुख्यमंत्री भूपेश बघेल ह अपन निवास म बिरसा मुंडा अउ गांधीवादी नेता आचार्य विनोबा भावे के पुण्य तिथि के मउका म उंखर फोटो म फूल माला चढ़ाके उंन ल सुरता करीन। ए दउरान श्री बघेल ह किहीन कि बिरसा मुंडा ह आदिवासी समुदाय के मनखे मन ल जल, जंगल, जमीन के बारे म जागरूक करीन। अउ उंखर हक के लड़ाई लड़े बर उत्साहित करीन।
मोहन भागवत-अंबिकापुर
राष्ट्रीय स्वयंसेवक संघ के सर संघचालक डाक्टर मोहन भागवत ह आज अंबिकापुर के पीजी कालेज मैदान म एक ठन बौद्धिक कारीकरम म सामिल होईन। ए दउरान प्रदेस के आने-आने क्षेत्र ले आए संघ के कार्यकर्ता मन घलो सामिल होईन।
एखर पहिली, अंबिकापुर म राष्ट्रीय स्वयंसेवक संघ के दू ठन बिभाग सरगुजा अउ कोरिया के स्वयंसेवक मन ह संयुक्त पथ संचलन निकालिन। ए पथ संचलन ल सहर के कई ठन जघा मन ले निकाली गीस अउ अंबिकापुर के पीजी कालेज मैदान म जाके सिराइस हे। ए दउरान डाक्टर मोहन भागवत ह किहीन कि भारत म पूजा-पाठ अउ खान-पान अलग-अलग हे, उंखर बाउजूद जम्मों देस ह एकेच हवय।
भेंट-मुलाकात
भेंट-मुलाकात कारीकरम के दउरान मुख्यमंत्री भूपेश बघेल ह राजनांदगांव जिला के डोंगरगढ़ विधानसभा क्षेत्र के घुमका ल नगर पंचायत बनाय अउ तीन महिना के भीतर पूर्ण तहसील बनाय के संगे-संग कई ठन विकास काम के घोसना करीन। ए दउरान बघेरा म सहकारी बैंक के साखा घुमका ले गोपालपुर सड़क चौंड़ी करण घुमका म स्वामी आत्मानंद अंग्रेजी स्कूल, हड़वा खारा अउ मुरमुंदा हाईस्कूल ल हायर सेकेंडरी स्कूल बनाय के काम सामिल हे।
ए दउरान मुख्यमंत्री ह रानी अवंती बाई लोधी के मुर्ति के अनावरण घलो करीन।
आदिवासी समाज चक्काजाम
छत्तीसगढ़ सर्व आदिवासी समाज डहार ले आज प्रदेस भर म आरक्षण म कटौती करे के विरोध म चक्काजाम अउ प्रर्दसन करे गीस। कोरबा के उरगा चउक म चक्काजाम के सेती अवई जवई ह परभावित होइस। ओति, जांजगीर-चांपा जिला के अकलतरा के तीर अमरताल गांव म चक्काजाम करे गीस।
उंहे, राजनांदगांव जिला के चिल्हाटी-चौकी रद्दा म चक्काजाम करे गीस। कांेडागंाव जिला के नारायणपुर अउ केसकाल म चक्काजाम करे गीस। जेखर सेती अवई जवई ह परभावित होइस। ओति, दुरूग के पटेल चउंक म आदिवासी समाज के मनखे मन डहार ले चक्काजाम रे गीस। अउ नायब तहसीलदार ल राष्ट्रपति के नांव पांच सुत्रीय ज्ञापन सौंपे गीस।
खबर के मुताबिक आदिवासी समाज डहार ले राज्य म पहिली जइसन बत्तीस प्रतिसत आराक्षण लागू करे पेसा कानून म ग्रामसभा के अधिकार ल कम नइ करे, बस्तर अउ सरगुजा म तृतीय अउ चतुर्थ वर्ग के पद म स्थानीय लोगन के भर्ती के संगे-संग राज्य म वन अधिकार संरक्षण अधिनियम दू हजार बाइस लागू नई करे के अलावा हसदेव वन क्षेत्र म कोयला के खनई ल बंद करे के मांग करे जात हे।
स्कूल स्वच्छता पुरूस्कार
बाल दिवस के मउका म प्रदेस के ग्यारा जिला के छब्बीस ठन स्कूल मन ल राज्य स्तरीय स्वच्छता पुरूस्कार ले सनमानित करे गेहे। राजधानी रईपुर के साइंस कालेज मैदान म काली राखे गे एक ठन कारीकरम म स्कूल शिक्षामंत्री डॉक्टर प्रेमसाय सिंह टेकाम ह ए पुरूस्कार ल भेंट करीन। ए कारीकरम ल युनिसेफ अउ छत्तीसगढ़ सरकार डहार ले राखे गे रिहीस।
एम्स जागरूकता कार्यक्रम
विश्व मधुमेह दिवस के मउका म काली राजधानी रईपुर के अखिल भारतीय आयुर्विज्ञान संस्थान एम्स म जागरूकता कारीकरम राखे गीस। ए दउरान एम्स के स्पेसल डायबिटिक फूट क्लिीनीक म तीन ठन नवा मसीन चालू कर गीस। एखर माध्यम ले अब मरीज मनके आसानी ले जांच करे जाही।
मल्टीमीडिया चित्र प्रदर्शनी
“एक भारत-श्रेष्ठ भारत” कारीकरम के तहत बिलासपुर म काली ले मल्टीमीडिया चित्र प्रदर्शनी लगाय जाही। आजादी के अमृत महोत्सव के तहत अट्ठारा नवंबर तक चलईया ए प्रदर्शनी ल बिलासपुर के गुरू घासीदास केन्द्रीय विश्वविद्यालय परिसर म राखेे जाही। ए प्रदर्शनी ल बिहनिया ग्यारा बजे ले संझा सात बजे तक देखे जा सकत हे। प्रदर्शनी स्थल म हरेक दिन आने-आने र्स्पधा अउ सांस्कृतिक कारीकरम राखे जाही। ए कारीकरम ल केन्द्रीय सूचना अउ प्रसारण मंत्रालय रईपुर के प्रादेशिक कार्यालय अउ बिलासपुर के क्षेत्रीय कार्यालय के केन्द्रीय संचार ब्यूरो डहार ले करे जाही। ए चित्र प्रदर्शनी के सुरूआत ल बिलासपुर के भरनी समूह केन्द्र के सीआरपीएफ ग्रुप कमांडिंग अधिकारी लक्ष्मीनारायण मिश्रा ह करही।
उंहे, गुरू घासीदास केन्द्रीय विश्वविद्यालय के कुलपति प्रोफेसर आलोक चक्रवाल ह कारीकरम के अगुवई करही।
बिलासपुर-लूट
बिलासपुर के दयालबंद के तीर बिजली आफिस म तेरा लाख रूपिया ले जादा के लूट के मामला ह आगू आय हे। मिले जानकारी के मुताबिक काली संझौती बेरा चार झन हथियार बंद नकाब पोस आरोपी मन ह बिजली आफिस पहुंचीन अउ उंहा के करमचारी मन ल चाकू दिखाके ए पइसा ल लूट लीन। पुलिस ह मामला ल दरज कर लेहे। अउ जांच परताल ल सुरू कर देहे।
अउ अब थोरकुन समाचार सार म –
– राज्य म प्रधान मुख्य वन संरक्षक के पद ले रिटायर मेंट होय पूर्व अधिकारी राकेश चतुर्वेदी ल राज्य जैव विविधता बोर्ड के अध्यक्ष चुने गेहे।
– रईपुर जिला के आरंग जनपद कार्यालय म काली सोला नवंबर के प्लेसमेंट कैम्प के कारीकरम राखे जाही। ए दउरान एक ठन कार कंपनी म करीबन सौ झन युवा लईका मन ल भर्ती करे जाही।
– धमतरी-दुरूग रद्दा म आमदी गांव के तीर एक ठन चर चकिया गाड़ी के चपेट म आय ले एक झन सियान मनखे के मउत होगे।
– कोंडागांव जिला के केशकाल घाटी म पाछू रतिहा एक ठन गाड़ी के चपेट म आय ले एक झिन आरक्षक के मउत होगे।