लोक अदालत
राष्ट्रीय विधिक सेवा प्राधिकरण डहार ले आज छत्तीसगढ़ म घलो तहसील ले उच्च न्यायालय स्तर तक राष्ट्रीय लोक अदालत के आयोजन करे गीस। जिला विधिक सेवा प्राधिकरण रईपुर के अध्यक्ष अउ जिला न्यायाधीश संतोष शर्मा ह रईपुर जिला म राष्ट्रीय लोक अदालत के सुभारंभ करीन। ए बार राष्ट्रीय लोक अदालत ल हाइब्रिड तरीका ले आयोजित करे गीस, जेमा पक्षकार के भौतिक रूप से उपस्थित होय के संगे-संग वर्चुअल या फेर ऑनलाइन माध्यम सामिल होईन। लोक अदालत म राजीनाम योग्य प्रकरण ल पक्षकार मनके आपसी सुलह-समझौता के तहत निराकरण करे गीस।
भाजपा-बैठक
भानुप्रतापपुर विधानसभा उपचुनाव बर प्रत्याशी चयन ल लेके भारतीय जनता पार्टी चुनाव समिति के बइठका आज रईपुर स्थित पार्टी कार्यालय म होईस। बइठका म भाजपा के राष्ट्रीय सह संगठन महामंत्री शिवप्रकाश, पूर्व मुख्यमंत्री डॉक्टर रमन सिंह, नेता प्रतिपक्ष नारायण चंदेल अउ राज्यसभा सांसद सरोज पांडेय सहित चुनाव समिति के आने सदस्य मन सामिल होईन।
जीजीयू-एनएसएस कैम्प
बिलासपुर के गुरू घासीदास केन्द्रीय विश्वविद्यालय-जीजीयू म दिल्ली के कर्तव्य पथ म गणतंत्र दिवस समारोह परेड के तैयारी बर आज ले दस दिवसीय सिविर के आयोजन करे जावत हे। राष्ट्रीय सेवा योजना के क्षेत्रीय निदेशालय भोपाल के निदेशक ए.एस. कबीर ह पत्रकारवार्ता म बतईन कि विश्वविद्यालय म युवा कार्यक्रम अउ खेल मंत्रालय के अंतर्गत एनएसएस के छह राज्य मनके दू सौ वॉलेंटियर मन ह गणतंत्र दिवस समारोह परेड के तैयारी बर ए सिविर म भाग लीहीं। ए सिविर के उद्घाटन तेरह नवंबर के बिलासपुर सांसद अरूण साव अउ बेलतरा विधायक रजनीश कुमार सिंह के उपस्थिति म करे जाही। समारोह के अध्यक्षता जीजीयू के कुलपति प्रोफेसर आलोक चक्रवाल ह करही। सिविर म भाग लेवइया वॉलेंटियर मन ल परेड बर प्रसिक्षण के संगेसंग एक भारत-श्रेष्ठ भारत, योग अउ बौद्धिक सत्र के टिप्स घलो दे जाही। ए सिविर म चयनित चालीस वॉलेंटियर मन ह गणतंत्र दिवस परेड समारोह म कर्तव्य पथ म राष्ट्रपति ल सलामी दीही।
लोक सेवा प्रसारण दिवस
आज लोक सेवा प्रसारण दिवस मनाय जावत हे। बछर उन्नीस सौ सैंतालीस म आजे के दिन राष्ट्रपिता महात्मा गांधी ह दिल्ली के आकाशवाणी स्टुडियो आय रिहीस। उही दिन के सुरता म हर बछर बारह नवंबर के ए दिवस मनाय जाथे। गांधी जी ह नई दिल्ली के प्रसारण भवन ले हरियाणा के कुरूक्षेत्र म अस्थायी सिविर म रहइया विस्थापित मन ल संबोधित करे रिहीस।
असर सर्वे-प्रशिक्षण
प्रदेस म कक्षा पहली ले आठवीं तक पढ़ईया लइका मनके बेसिक स्तर म हिन्दी, अंग्रेजी भासा अउ गणित के जांच ‘‘असर सर्वे‘‘ दू हजार बाईस के अंतर्गत करे जाही। सर्वे के दउरान तीन ले सोलह बछर के लइका मनके नामांकन स्थिति के जानकारी ले जाही। एखर बर प्रत्येक जिला के साठ गांव ल चुने जाही। चुने गे हर गांव ले कोनों भी बीस घर के चयन करे जाही। ए जानकारी राज्य शैक्षिक अनुसंधान अउ प्रशिक्षण परिषद म ‘‘असर सर्वेक्षण‘‘ के प्रसिक्षण के दउरान दे गीस। पांच दिनी ए प्रसिक्षण म प्रदेस के अट्ठाईस जिला ले आय एक सौ तेरह प्रतिभागी मन ह प्रसिक्षण प्राप्त करीन।
कबीरधाम-मोतियाबंद ऑपरेशन
छत्तीसगढ़ के कबीरधाम जिला ह देस के पहिली जिला बन गेहे, जिहां मोतियाबिंद के कारण दृष्टिहीन होय सबो लोगन मनके आंखी के रोशनी वापस लहुटाय जा चुके हे। सितंबर दू हजार इक्कीस म कबीरधाम जिला म दूनों आंखी ले मोतियाबिंद के कारण दृष्टिहीन होय एक हजार एक सौ अट्ठाईस अउ एक आंखी म मोतियाबिंद दृष्टिहीनता वाले दू हजार एक सौ चौबीस लोगन मन ल चिन्हांकित करे गे रिहीस। स्वास्थ्य विभाग ह पाछु अगस्त माह म ए सबो लोगन मनके ऑपरेशन के लक्ष्य ल हासिल कर लेहे।
वीडियो कॉन्फ्रेंसिंग के माध्यम ले आयोजित राष्ट्रीय नेत्र ज्योति अभियान के समीक्षा बइठका म केन्द्र सरकार के अधिकारी मन ह ए उपलब्धि बर छत्तीसगढ़ राज्य के प्रसंसा करे हे। राष्ट्रीय अंधत्व निवारण कारीकरम के राज्य नोडल अधिकारी डॉक्टर सुभाष मिश्रा ह बतईन कि चालू वित्तीय बछर दू हजार बाईस-तेईस म प्रदेस म अब तक मोतियाबिंद ले दृष्टिहीन होय उनचास हजार तीन सौ उनयासी लोगन मनके सफल ऑपरेशन करे जा चुके हे।
मुख्यमंत्री-भेंट मुलाकात
मुख्यमंत्री भूपेश बघेल ह जांजगीर-चांपा विधानसभा क्षेत्र म भेंट-मुलाकात कार्यक्रम म छप्पन करोड़ रूपिया ले जादा के आने-आने विकास कार्य मनके भूमिपूजन अउ लोकार्पण करीन।
मुख्यमंत्री ह आज जांजगीर स्थित सर्किट हाउस म अधिकारी मनके बइठका लेके राज्य सासन के विभिन्न योजना मनके प्रगति के समीक्षा करीन। ओमन किहीन कि शिक्षा के गुणवत्ता म बिसेस ध्यान दे जाना चाही। काबर कि काली एक सिकायत म एक झिन प्राचार्य के खिलाफ अनुशासनात्मक कार्रवाई करे गेहे, अइसने स्थिति नइ बनना चाही। ओमन किहीन कि स्कूल मन म पढ़ई ठीक ले होय एखर बर सिक्षक मन ह सही बेरा म स्कूल पहुंचे अउ पूरा समय स्कूल म रहय, जेखर मॉनिटरिंग अधिकारी मन ह करे अउ जेन सिक्षक ह बिना सूचना के अनुउपस्थित रिही, ओखर उपर अनुशानात्मक कार्रवाई करे जाय।
एखर संगेसंग मुख्यमंत्री ह राजनांदगांव जिला के डोंगरगांव विधानसभा क्षेत्र के दौरा घलो करीन। जिहां लाल बहादुर नगर ल नगर पंचायत बनाय अउ उहां स्वामी आत्मानंद अंग्रेजी माध्यम स्कूल खोले के घोसना करीन।
रबी फसल
प्रदेस म किसान मनके आर्थिक स्थिति ल बेहतर बनाय बर धान के संगेसंग आने-आने व्यावसायिक फसल मनके खेती ल बढ़ावा दे जाही। सिंचित क्षेत्र मन म गेहूं के खेती ल घलो प्रोत्साहित करे जाही।
कृषि उत्पादन आयुक्त डॉक्टर कमलप्रीत सिंह ह बिलासपुर म होय समीक्षा बइठका म ए बारे म अधिकारी मन ल जरूरी निरदेस दीन हे। ओमन ह बिलासपुर अउ सरगुजा संभाग के बइठका म खरीफ बछर दू हजार बाईस अउ रबी बछर दू हजार बाईस-तेईस के कारीकरम निर्धारण के समीक्षा करीन। उत्पादन आयुक्त ह किसान मन ल जैविक खेती ल अपनाय बर अउ रबी सीजन म वर्मी कम्पोस्ट के जादा ले जादा उठाव अउ ओखर उपयोग के निरदेस दीन।
जिले की चिट्ठी
प्रादेशिक समाचार एकांश आकाशवाणी रईपुर डहार ले प्रस्तुत कार्यक्रम ‘‘जिले की चिट्ठी‘‘ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र रिले करही। ए बखत के अंक म ‘‘जशपुर‘‘ जिला के गतिविधि मनके बारे म जानकारी दे जाही।
माओवादी समाचार
मोहला-मानपुर-अंबागढ़ चौकी जिला म पुलिस ह ग्राम कोहका ले दू माओवादी सहयोगी मन ल गिरफ्तार करे हे। इंखर उपर हत्या सहित आने-आने माआवोदी घटना म सामिल रेहे के आरोप हे।
ओति, सुकमा जिला म चिंतागुफा थाना क्षेत्र के छोटे केड़वाल इलाका ले सुरक्षा बल ह विस्फोटक सहित भारी मात्रा म माओवादी जिनीस बरामद करे हे।
अउ अब थोरकुन समाचार सार म –
– कवर्धा स्थित जिला रोजगार अउ स्व-रोजगार मार्गदर्शन केन्द्र म चौदह नवंबर के बिहनिया ग्यारह बजे ले मंझनिया तीन बजे तक प्लेसमेंट कैम्प के आयोजन करे जाही।
– राजनांदगांव जिला म परिवार नियोजन बर महिला नसबंदी के संगेसंग पुरूष नसबंदी ल घलो बढ़ावा देके उद्देश्य ले इक्कीस नवंबर ले पुरूष नसबंदी पखवाड़ा सुरू करे जाही, जउन ह चार दिसंबर तक चलही।
– बस्तर संभाग के आयुक्त श्याम धावड़े अउ पुलिस महानिरीक्षक पी. सुंदरराज ह राष्ट्रीय राजमार्ग-तीस के केशकाल घाटी म चलत रद्दा मरम्मत काम के निरीक्षण करीन अउ अधिकारी मन ल गुणवत्ता के संग समय-सीमा म काम पूरा करे के निरदेस दीन।
अउ
– कोंडागांव जिला म समग्र शिक्षा के अंतर्गत हाईस्कूल अउ हायर सेकेंडरी विश्वविद्यालय मनके कलात्मक प्रतिभा मनके पहिचान बर जिला स्तरीय कला उत्सव के आयोजन करे गीस। एखर पहिली विद्यालय स्तरीय आने-आने प्रतियोगिता मन म पढ़ईया लइका मन बढ़-चढ़के भाग लीन।