लाॅकडाउन 01
कोरोना संक्रमण के बाढ़त मामला ल देखत रायपुर, सरगुजा,कोरबा अउ बलौदाबाजार जिला के संगेसंग रायगढ़ जिला के सारंगीगढ़ क्षेत्र म आज ले सात दिन तक पूर्ण लाॅकडाउन शुरू होगे हे। उंहें दुर्ग अउ बिलासपुर जिला म काली ले लाॅकडाउन लगाए जाही। लाॅकडाउन के दउरान दवई दुकान मन ल छोड़के जम्मों दुकान बंद रीही। अउ संगेसंग सरकारी अउ प्रायवेट आॅफिस मन ल घलो बंद राखे गेहे। दूध, सागभाजी, के दुकान मन ह बीहनिया चार घंटा बर खुलही। बीहनिया दस बजे के बाद कोनो भी मनखे मन ह बिना काम के घुमही त ओखर मन उपर कार्रवाई करे जाही।
रायपुर अउ बीरगांव नगर पालिक निगम के क्षेत्र ल पूरा सील कर दे गेहे। आज शहर म पुलिस ह फ्लैग मार्च करीन अउ संगेसंग जगा-जगा बैरिकेट्स लगाके अवइया जवइया मन ले पूछ परख करे जात हे। शहर के जम्मों चैक चैराहा मन म लाउड स्पीकर माध्यम ले लोगन मन ल कोरोना संक्रमण ले बांचे बर घरेच म रेहे के अपील करे गीस। रायपुर जिला प्रशासन ह पहिलीच ले ये स्पष्ट कर देहे कि अठाईस जुलाई तक चलइया ये लाॅकडाउन के दउरान कोनो प्रकार के छूट नइ दे जाय। किराना अउ राशन दुकान घलो बंद रीही। लाॅकडाउन के दउरान बीहनिया अउ संझा घुमइया मन उपर घलो रोक लगाए गेहे ।
लाॅकडाउन 02
उंहें दुर्ग जिला के नगरीय निकाय अउ गांव गवतरी के चिन्हा वाले जगा मन म आज अधरतिया ले उनतीस जुलाई तक पूर्ण लाॅकडाउन लागू रीही। ए दउरान मेडिकल दुकान मन ह संझा पांच बजे तक खुले रीही। फेर सब्जी, अंडा, मांस-मछली अउ दूध बेचे के काम बीहनिया सात बजे ले मंझनियंा बारा बजे तक करे जाही।
एति बिलासपुर जिला के बिल्हा अउ बोदरी म काली तेईस ले इकतीस जुलाई तक अउ राजनंादगंाव जिला म चोबीस ले उनतीस जुलाई तक लाॅकडाउन रीही। अइसने जांजगीर चंापा जिला के जम्मों नगरीय निकाय क्षेत्र मन म घलो चैबीस ले तीस जुलाई तक लाॅकडाउन लागू करे के आदेश जारी कर दे गेहे।
ओति कोंडागांव जिला म पच्चीस ले इकतीस जुलाई तक लाॅकडाउन लागू करे जाही।
कोरोना मरीज
प्रदेश म आज संझा तक कोरोना संक्रमण के बावन नवा मरीज मिले हे, जेमा रायपुर के अठाईस मरीज घलो सामिल हे। पंडरी स्थ्ति जउन कपड़ा के शोरूम म पाछू दिन बारा झिन कर्मचारी कोरोना पाॅजीटिव पाये गे रीहिस। उंहा के तीन झिन अउ कर्मचारी मन आज संक्रमित मिले हे। एति भाटागांव ह कोरोना संक्रमण के मामला म हाॅट-स्पाट बन गेहे। आज इंहा ले सोला झिन नवा मरीज मिले हे।
उंहें दुर्ग जिला म बीएसएफ के पांच जवान के संगेसंग बाईस कोरोना संक्रमित नवा मरीज मिले हे। सरकारी क्वारंटाइन सेंटर सेक्टर तीन अउ चार के प्रभारी डॅाक्टर अनिल शुक्ला ह बताइन कि ए मरीज मन ल अस्पताल म भर्ती कराय गेहे।
ओति बीजापुर जिला म आज कोरोना संक्रमण के नौ नवा मरीज मिले हे, जेमा सुरक्षा बलके सात जवान, एक झिन स्वास्थ्यकर्मी अउ एक झिन पंचायतकर्मी सामिल हे।
अब प्रदेश म कोरोना संक्रमित मरीज के आंकड़ा बाढ़के छै हजार के तीर पहुंच गेहे, जेमा ले करीबन चैदा सौ मरीज राजधानी रायपुर के हवय। उंहें पाछू चैबीस घंटा के दौरान प्रदेश म कोरोना संक्रमित एक सौ पंद्रा नवा मरीज मिले हे। त उंहें इलाज के दउरान एक झिन संक्रमित महिला के मउत होगे हे।
निर्वाचन आयोग
राज्य निर्वाचन आयोग डहार ले नौ जिला के नगर पालिका चुनाव बर निर्वाचन नामावली ले जुड़े प्रपत्र अउ प्रारूप बांटे जात हे। राज्य निर्वाचन आयोग डहार ले कोरिया, रायगढ़, रायपुर, दुर्ग, बेमेतरा, राजनंादगंाव, कंाकेर, सुकमा अउ बीजापुर के जिला निर्वाचन अधिकारी मन ल चिट्ठी लिखके निर्वाचक नामावली ले जुड़े प्रपत्र ल लेबर केहे गेहे।
पुलिस आधुनिकीकरण योजना
राज्य सरकार ह पुलिस बल आधुनिकीकरण योजना के तहत केंद्र डहार ले दे जात पइसा म बढ़ोत्तरी करे के विनती करे हे। ए बारे म राज्य के गृहमंत्री ह केंद्रीय गृहमंत्री अमित शाह ल एक ठिन चिट्ठी लिखके केहे हवय कि राज्य के चैदा ठन जिला ह माओवाद समस्या ले जूझत हे जेमा ले आठ जिला अति संवेदनशील हवय।
ओमन केंद्रीय मंत्री ले कीहिन कि माओवादी मनके खिलाफ प्रभावी कार्रवाई करे अउ पुलिस बल ल जरूरी सुविधा देबर केंद्र डहार ले दे जात पइसा म बढ़ोत्तरी करे के मांग करीन।
माओवादी समर्पण
बस्तर जिला म आज पांच लाख रूपिया के इनामी एक झिन महिला माओवादी ह पुलिस के आगू आत्मसमर्पण करीन। दसमीं नाव के ए माइलोगिन माओवादी ह दरभा डिवीजन म कटेकल्याण एरिया कमेटी के सदस्य अउ चेतना नाट्यमंडली के अध्यक्ष रीहिन। ए माओवादी उपर बस्तर अउ दंतेवाड़ा जिला म होय बीस ले जादा माओवादी घटना म सामिल रेहे के आरोप हे।
महिला माओवादी ह आज बस्तर रेंज के पुलिस महानिरीक्षक सुंदरराज पी, पुलिस अधीक्षक दीपक कुमार झा अउ सीआरपीएफ के कमंाडेंट अमिताभ कुमार के आगू आत्मसमर्पण करीन। ए महिला माओवादी ह बताइन कि जिला म चलत आमचो बस्तर आमचो पुलिस कार्यक्रम अउ शासन के पुर्नवास नीति ले प्रभावित होके ओह समाज के मुख्यधारा म सामिल होय के फैसला लीन।
हरेली पौधारोपण
हरेली तिहार के दिन प्रदेश म दू लाख ले जादा पौधा लगाए गीस। इही दिन पंद्रा सौ इक्कीस गौठान मन म फल वाले अउ लघु वनोपज के पौधा लगाए गीस। हरेली के दिन राज्य के गौठान मन म पेड़ पौधा लगाए के विशेष अभियान चलाए गे रीहिस।
प्रधान मुख्य संरक्षक राकेश चतुर्वेदी ह बताइन कि ए दिन सबले जादा सरगुजा वन वृत्त के तहत सड़सठ हजार ले जादा पौधा लगाए गीस। ये अभियान के तहत राज्य म छाया देवइया रूख के संगेसंग अमली, आंवला, हर्रा, बेहड़ा अउ चिरौंजी जइसन प्रजाति के पौधा लगाए गीस।
पर्यावरण संरक्षण-रेलवे
पर्यावरण ल ठीकठाक राखे बर दक्षिण पूर्व मध्य रेलवे डहार ले घलो पेड़ पौधा लगाए के संगेसंग जागरूकता उपर कतकोन कार्यक्रम सरलग करे जात हे। ए बेरा राज्य म आने आने जगा मन म अब तक इकतीस हजार ले जादा पेड़ लगाए जा चुके हे। वृक्षा रोपण अभियान के तहत रेलवे डहार ले एसो करीबन साढ़े सात लाख पौधा लगाए के लक्ष्य राखे गेहे। रेलवे के मुताबिक पाछू छै बछर के दउरान उनतीस लाख ले जादा पेड़ पौधा लगाए गेहे।
जंगली सुअर हमला
राजनंादगंाव जिला के छुरिया ब्लाॅक म एक ठिन जंगली सुअर के हमला म पांच झिन लोगन मन घायल होगे। जेमा ले एक झिन माइलोगिन के संगेसंग दू झिन के हालत गंभीर बताय जात हे।
जानबा के मुताबिक आज बीहनिया एक ठिन जंगली सुअर ह खेत म काम करत मजदूर मन उपर हमला कर दीन। घटना के बाद वन विभाग के टीम ह मउका म पहुंच गे फेर जंगली सुअर ल पकड़े नइ जा सकीस।
मौसम
मौसम विभाग ह अवइया चैबीस घंटा के दउरान प्रदेश के एक दू जगा जोरदरहा बरसा अउ गाज गिरे के चेतावनी दे हवय। उंहें राज्य के कतकोन जगा म हल्का ले मध्यम बरसा गरज-चमक के संग हो सकत हे।
रायपुर स्थित मौसम विज्ञान केंद्र के मुताबिक बीकानेर, पलवल, बदानी, बहराइच, मुजफ्रपुर अउ पश्चिम बंगाल ले असम तक मानसून द्रोणिका सक्रिय हवय। उंहें दक्षिण असम अउ ओखर तीर तखार म एक ठिन चक्रवाती घेरा बने हे। मौसम विज्ञानी एच.पी. चंद्रा ह बताइन कि अवइया चैबीस घंटा के दउरान दुर्ग अउ रायपुर संभाग के एक दू जगा म भारी बरसा हो सकथे।
रायगढ़ अभियान
इंहे के जीनिस ल बनाके बाजार म बेचके माइलोगिन मन ह आर्थिक रूप ले अपन आप ल मजबूत करे के उद्देश्य ले राष्ट्रीय ग्रामीण आजीविका मिशन बिहान के तहत विशेष प्रयास करे जात हे।
रायगढ़ महिला संघ ग्रामोद्योग के माइलोगिन मन ह रक्षा बंधन के परब ल देखत हाथ ले बनाए गे राखी ल बेचत हवय। कलेक्ट्रेट परिसर म लगे ए प्रदर्शनी म राखी के संगेसंग माइलोगिन मन ह घर म बनाए गे आचार, बड़ी, पापड़, आटा अउ सरसों तेल ल घलो बेचत हे।
माइलोगिन मनके ए काम म एके दिन म करीबन आठ हजार रूपिया के जीनिस के बिक्री होय हे। जिला कलेक्टर के संगेसंग कतकोन बड़का अधिकारी अउ कर्मचारी मन ह माइलोगिन मन डहार ले बनाए गे ए जीनिस के खरीदी करत हे।
