भानुप्रतापपुर-उपचुनाव
भानुप्रतापपुर विधानसभा उपचुनई बर आज ले नामांकन पत्र भरे के काम सुरू होगे हे। उम्मीदवार मन सत्रह नवंबर तक नामांकन भर सकथे। नामांकन पत्र के जांच अट्ठारह नवंबर के होही। त उहें, नाम वापसी के आखिरी तारीख इक्कीस नवंबर राखे गेहे। ए विधानसभा उपचुनई बर पांच दिसंबर के वोट डारे जाही। चुनाव परिणाम के घोसना आठ दिसंबर के होही।
मुख्य निर्वाचन पदाधिकारी कार्यालय ले जारी निरदेस के मुताबिक कोनों उम्मीदवार के खिलाफ अपराध दरज हे त ओमन ल मतदान के दू दिन पहिली प्रचार माध्यम ले विज्ञापन देके एखर जानबा दे बर पड़ही अउ कोनों मनखे पार्टी ले जुड़े हे त फेर सोशल मीडिया के माध्यम ले एला बताय बर पड़ही। उम्मीदवार मन ल बैंक खाता अलग ले खोलना पड़ही। चुनावी खरचा के सीमा ल चालीस लाख रूपिया तय करे गेहे। पहिली ए रासि पच्चीस लाख रूपिया रिहीस।
जानबा के मुताबिक भानुप्रतापपुर विधानसभा सीट छत्तीसगढ़ विधानसभा के उपाध्यक्ष मनोज मंडावी के निधन के बाद खाली होय हे।
जाति प्रमाण पत्र
प्रदेस म अब पढ़ईया छात्र मन ल स्थायी जाति प्रमाण दे जाही, जउन ह दस्तावेज जइसन होही। अब तक हर साल छात्र मन ल जाति प्रमाण पत्र बनाके स्कूल मन म जमा करे बर पड़थे। ए बारे म सामान्य प्रशासन विभाग ह जम्मों कलेक्टर मन ल निरदेस जारी कर देहे। जाति प्रमाण पत्र गंवाय के स्थिति म जउन अधिकारी नियुक्त करे जाही, ओखर तीर जाके डुप्लीकेट कॉपी बनाय जा सकथे।
मतदाता सूची-पुनरीक्षण
प्रदेस के जम्मों मतदान केन्द्र मन म एकीकृत मतदाता सूची के प्रकासन के संगेसंग विशेष संक्षिप्त पुनरीक्षण के काम सुरू होगे हे। एमा मतदाता सूची म नाव जोड़े, हटाय या सुधारे बर आठ दिसंबर तक अरजी दे जा सकथे। ए अरजी मनके निराकरण पांच जनवरी तक करे के बाद अंतिम मतदाता सूची के प्रकासन करे जाही। मतदाता सूची म नाम जोड़वाय बर एक जनवरी, एक अप्रैल, एक जुलाई अउ एक अक्टूबर के अट्ठारह साल के उमर पूरा करइया मतदाता मन अरजी कर सकथे। एखर बर प्रदेस के हायर सेकेंडरी स्कूल अउ कालेज मन म बिसेस सिविर लगाय जाही। आयोग ह नाम जोड़े के काम ल पेपरलेस करे बर वोटर हेल्पलाइन ऐप अउ एनवीएसपी पोर्टल के माध्यम ले लोगन मन ले अरजी जमा करे के बिनती करे हे।
उहें, मुख्य निर्वाचन पदाधिकारी रीना बाबा साहेब कंगाले ह आज रईपुर जिला के आरंग विधानसभा क्षेत्र के कयाबांधा मतदान केन्द्र के निरीक्षण करीन।
विधानसभा विशेष सत्र
आदिवासी आरक्षण के बारे म गोठबात करे बर छत्तीसगढ़ के पंचम विधानसभा के पन्द्रहवां सत्र एक अउ दू दिसंबर के बुलाय जाही। जेमा कुल दू बइठका होही। ए बारे म विधानसभा सचिवालय ह अधिसूचना जारी कर देहे।
जानबा के मुताबिक मुख्यमंत्री ह प्रदेस के आदिवासी समाज के लोगन मन ल बत्तीस प्रतिसत आरक्षण के फायदा देवाय बर विधानसभा के दू दिन के बिसेस सत्र बुलाय के प्रस्ताव राजभवन भेजे रिहीन। एखर उपर राज्यपाल ह दस्तखत करके मंजूरी दे हवय।
महतारी हुंकार रैली
काली ग्यारह नंवबर के बिलासपुर म भारतीय जनता महिला मोर्चा डहार ले म महतारी हुंकार रैली के आयोजन करे जाही। एला लेके प्रदेस म तियारी पूरा होगे हे। ए हुंकार रैली म सामिल होय बर केन्द्रीय मंत्री स्मृति ईरानी ह काली बिहनिया आठ बजे रईपुर पहुंचही अउ ओखर बाद कारीकरम म सामिल होय बर बिलासपुर जाही।
उहें, भाजपा के प्रदेस प्रवक्ता रंजना साहू अउ महिला मोर्चा के प्रदेस अध्यक्ष शालिनी राजपूत ह एक ठिन बयान म बतईन कि राज्य सरकार ह माईलोगिन मन ले सराबबंदी के वादा करे रिहीन अउ ए वादा ल पूरा नइ करत हे। ओमन किहीन कि प्रदेस म दुष्कर्म के घटना बाढ़त हे। छात्रावास, अस्पताल अउ आने-आने जघा म माईलोगिन मन ले गलत ढंग ले व्यवहार करे जात हे। महिला स्व-सहायता समूह मन ले कर्ज माफी के वायदा करे के बाद करजा ल घलो माफ नइ करे हे। ओमन किहीन कि कुपोषण के मामला म प्रदेस ह पहिली स्थान म हवय, इही जम्मों मुद्दा ल लेके भाजपा महिला मोर्चा ह महतारी हुंकार रैली के आयोजन करत हे।
शिक्षक-पदोन्नति
राज्य सरकार ह प्राइमरी स्कूल के सहायक सिक्षक मन ल प्रधान पाठक के पद म प्रमोसन के बारे म जम्मों जिला सिक्षा अधिकारी मन ल निरदेस जारी करे हे, जेमा केहे गेहे कि जउन स्कूल मन म सिक्षक नइ हे, ओ स्कूल मन म अउ ओखर बाद एकल सिक्षक वाले स्कूल मन म प्रधान पाठक मन ल प्राथमिकता के आधार म भेजे जाही।
जानबा के मुताबिक विभाग के आगू जानकारी आय रिहीस हे कि सहायक सिक्षक ले प्रधान पाठक बनइया सिक्षक मनके पदांकन ले जुड़े नियम के पालन नइ करे जात हे।
चंदूलाल चंद्राकर-दाखिल प्रक्रिया
दुरूग जिला म स्थित चंदूलाल चंद्राकर स्मृति चिकित्सा महाविद्यालय ल मेडिकल काउंसिल ऑफ इंडिया ले मान्यता मिले के बाद इहां दाखिला के काम सुरू होग हे। अभी इहां एक सौ पचास सीट म छात्र मन ल प्रवेस दे जाही। ए कालेज ल मिलाके अब प्रदेस म दस ठिन मेडिकल कालेज होगे हे, जेमा एमबीबीएस के पहिली साल बर एक हजार दू सौ सत्तर सीट हवय।
धान खरीदी
प्रदेस म अब तक किसान मन ले समर्थन मूल्य म करीबन एक लाख चौहत्तर हजार मीटरिक टन धान के खरीदी करे जा चुके हे। खाद्य विभाग के सचिव टोपेश्वर वर्मा ह बतईन कि अधिकारी मन ह धान के बेवस्था के निगरानी करत हवय। धान खरीदी ल लेके कोनो परकार के सिकायत नइ मिले हे। ओमन बतईन कि धान खरीदी के संगेसंग कस्टम मिलिंग बर धान के उठाव सुरू होगे हे। अब तक करीबन तीन हजार सात सौ मीटरिक टन धान के उठाव होय हे।
लाख खेती
देस म लाख उत्पादन म आय गिरावट के सेती कुसमी लाख के बाजार दर म तीन सौ रूपिया ले लेके नौ सौ रूपिया प्रतिकिलो के बढ़ोतरी होय हे। एला देखत छत्तीसगढ़ म लाख के खेती म किसान मनके रूझान बाढ़त हे। राज्य सरकार ह घलो किसान मन ल बिना कोनों ब्याज के लाख फसल बर करजा देके फइसला लेहे। ए काम करीब दू सौ वन-धन मित्र मनके माध्यम ले करे जात हे। वैज्ञानिक पद्धति ले लाख पालन के प्रसिक्षण दे बर राज्य लघु वनोपज संघ डहार ले कांकेर म प्रसिक्षण केन्द्र घलो खोले गेहे। बिसेसज्ञ मनके मुताबिक लाख उत्पादन म किसान मन ल एक कुसुम पेड़ ले हरेक बछर करीब छह हजार चार सौ रूपिया उहें, बेर के एक पेड़ ले बारह सौ पन्द्रह रूपिया अउ पलास के एक पेड़ ले हरेक बछर पांच सौ पैंतालीस रूपिया के फायदा मिल सकथे।
चिटफंड कंपनी-संपत्ति कुर्की
दुरूग जिला म हजारों लोगन मन ले धोखाधड़ी करे के मामला म एक ठिन प्राईवेट चिटफंड कंपनी के चार झिन संचालक मन ल गिरफ्तार करके जेल भेज दे गेहे। जिला के पुलिस अधीक्षक डॉक्टर अभिषेक पल्लव ह बतईन कि कंपनी के करीबन एक करोड़ चालीस लाख रूपिया के संपत्ति ल कुर्क करे के कार्रवाई करे जात हे। एखर ले जउन पइसा मिलही, ओला कंपनी म निवेस करे लोगन मन ल दे जाही।
अउ अब थोरकुन समाचार सार म –
– प्रधानमंत्री ग्राम सड़क योजना कोति ले बने रद्दा मनके गुणवत्ता परीक्षण बर राष्ट्रीय गुणवत्ता समीक्षक ह इही महीना प्रदेस के दस जिला के दउरा म आवत हे।
– छत्तीसगढ़ योग आयोग के अध्यक्ष ज्ञानेश शर्मा ह रईपुर के नरैया तालाब गार्डन म प्रदेस के बीसवां निःशुल्क योगाभ्यास केन्द्र के सुभारंभ करीन।
– पांच झिन अपात्र मनखे मन ल नियम के विरूद्ध अनुकंपा नियुक्ति देके मामला म राज्य सरकार ह जांजगीर-चांपा के तत्कालीन जिला शिक्षा अधिकारी ल निलंबित कर देहे।
– बलौदाबाजार वनमंडल के देवपुर परिक्षेत्र म नर हाथी के करेंट ले मउत के बाद ए मामला म दू झिन आरोपी मन ल गिरफ्तार कर ले गेहे।
– जांजगीर-चांपा जिला के गुडरूकला गांव म सोन नंदियां म करेंट लगाके मछरी पकड़इया एक झिन मनखे के मउत होगे। ए मामला म पुलिस ह चार झिन युवक मन ल गिरफ्तार करे हे।
अउ
– पुडुचेरी म अवइया दस ले अट्ठारह दिसंबर तक राष्ट्रीय शतरंज प्रतियोगिता होही, जेमा छत्तीसगढ़ के जूनियर शतरंज टीम ह घलो सामिल होही। एखर बर खिलाड़ी मनके चयन बारह अउ तेरह नवंबर के मुंगेली म करे जाही।