आरक्षण-विस विशेष सत्र
छत्तीसगढ़ विधानसभा के बिसेस सत्र अवइया एक अउ दू दिसंबर के होना हे। मुख्यमंत्री भूपेश बघेल ह आदिवासी आरक्षण के विषय ल लेके विधानसभा के बिसेस सत्र ल बलाय के प्रस्ताव विधानसभा अध्यक्ष डॉक्टर चरणदास महंत ल भेजे रिहीन। श्री बघेल ह आदिवासी समाज ल घलो भरोसा दिलाय हे कि राज्य म आरक्षण के मामला म आदिवासी मन निश्चिंत राहय। ओमन ल बत्तीस प्रतिसत आरक्षण के लाभ दिलाय बर भरसक कोसिस करे जाही। महाराष्ट्र, तमिलनाडु अउ कर्नाटक म आरक्षण के स्थिति के अध्ययन करे बर छत्तीसगढ़ शासन डहार ले वरिष्ठ अधिकारी अउ सामाजिक कार्यकर्ता मनके दल जल्दी ही उहां जाही। अध्ययन दल के गठन अउ एखर बारे म जरूरी दिसा-निरदेस ल लेके सामान्य प्रशासन विभाग ह आदेस घलो जारी कर देहे।
इही बीच, राज्यपाल अनुसुईया उइके ह विधानसभा के पन्द्रहवां सत्र ल बलाय के संबंध म मिले प्रस्ताव उपर हस्ताक्षर कर दीन हे।
दूसर कोति, विधानसभा म नेता प्रतिपक्ष नारायण चंदेल ह आदिवासी मन ल बत्तीस प्रतिसत आरक्षण दे बर अध्यादेश लाय के मांग करीन हे।
उहें, सुकमा जिला के दोरनापाल म भारतीय जनता पार्टी के कार्यकर्ता मन ह आदिवासी मन ल बत्तीस प्रतिसत आरक्षण देके मांग ल लेके चक्काजाम करीन। राष्ट्रीय राजमार्ग म होय ए चक्काजाम के सेती अवई-जवई ह घलो बाधित होगे रिहीस।
मुख्य न्यायाधीश-शपथ
राष्ट्रपति द्रौपदी मुर्मू ह आज राष्ट्रपति भवन म न्यायमूर्ति धनंजय यशवंत चंद्रचूड़ ल सुप्रीम कोर्ट के मुख्य न्यायाधीश के शपथ दिलईस। शपथ ग्रहण समारोह के बाद पत्रकार मन ले गोठबात म न्यायमूर्ति ह किहीन कि ओमन ह रजिस्ट्री अउ न्यायिक प्रक्रिया म सुधार करे बर काम करही।
न्यायमूर्ति चंद्रचूड़़ ह न्यायमूर्ति उदय उमेश ललित के जघा लीन हे, जउन ह काली रिटायर होगे। उन्नीस सौ उनसठ म जनमे न्यायमूर्ति चंद्रचूड़ ल तेरह मई दू हजार सोलह के सर्वोच्च न्यायालय के न्यायधीश बनाय गे रिहीन। एखर ले पहिली ओमन ह इलाहाबाद उच्च न्यायालय के मुख्य न्यायाधीश के रूप म काम करे रिहीन।
मतदाता सूची-पुनरीक्षण
भारत निर्वाचन आयोग ह आज ले देशभर म मतदाता सूची के विशेष पुनरीक्षण कार्यक्रम के सुरूवात करीन हे। मुख्य निर्वाचन आयुक्त राजीव कुमार ह सबो पात्र नागरिक मन ले अपील करीन हे कि ओमन आज ले सुरू होय राष्ट्रव्यापी मतदाता सूची के विशेष पुनरीक्षण अउ नवीनीकरण काम म भाग लेवय।
छत्तीसगढ़ म घलो मतदाता सूची म युवा मतदाता मनके नाम जुड़वाय खातिर कतकोन जागरूकता कार्यक्रम करे जात हे। अइसन म आज रईपुर के तेलीबांधा तरिया ले निकले साइकिल रैली ल पद्मश्री शमशाद बेगम अउ पर्वतारोही चित्रसेन साहू ह हरा झंडी दिखाके रवाना करीन। ‘‘पेडल फॉर पार्टिसिपेटिव इलेक्शन्स‘‘ के थीम म निकले ए रैली म जवान लइका, दिव्यांग, स्कूली लइका अउ तृतीय लिंग के मनखे मनके संग जिला प्रसासन अउ मुख्य निर्वाचन पदाधिकारी कार्यालय के अधिकारी अउ कर्मचारी मन ह हंसी-खुसी भाग लीन। युवा मनके हौसला बढ़ाय बर मुख्य निर्वाचन पदाधिकारी रीना बाबा साहेब कंगाले अउ पूर्व अंतर्राष्ट्रीय क्रिकेटर राजेश चौहान ह घलो रैली म साइकिल चलईन।
भानुप्रतापपुर-उपचुनाव
भानुप्रतापपुर विधानसभा उपचुनई बर काली ले नामांकन पत्र भरे के काम सुरू हो जही। सत्रह नवंबर तक नामांकन भरे जा सकही। नामांकत्र पत्र के जांच अट्ठारह नवंबर के होही। उहें, नाम वापसी के आखिरी तारीख इक्कीस नवंबर तय करे गेहे। ए उपचुनई बर पांच दिसंबर के वोट डाले जाही। मतगणना अउ चुनई परिणाम के घोसना आठ दिसंबर के होही। भानुप्रतापपुर विधानसभा सीट छत्तीसगढ़ विधानसभा के उपाध्यक्ष मनोज मंडावी के निधन के बाद ले खाली होगे हे।
आयकर/ईडी-छापा
रायपुर, कोरबा, बिलासपुर अउ रायगढ़ शहर म कतकोन कारोबारी मनके घर अउ कार्यालय म आज आयकर विभाग के टीम ह छापा मारीन हे। दिल्ली, भोपाल अउ जबलपुर ले आय अधिकारी मनके टीम ह आज तड़के छापामार कार्रवाई ल सुरू करीन। जेमा रायगढ़ के एक कोयला कारोबारी अउ रायपुर म रहइया उंखर भाई के घर घलो छापा मारे गीस। एखर अलावा बिलासपुर अउ कोरबा म घलो कोयला कारोबारी मनके यहां आयकर विभाग के टीम ह पहुंचीन।
जानबा के अनुसार आयकर विभाग के टीम ह हवाई जहाज ले रायपुर पहुंचीन अउ बिसेस सुरक्षा व्यवस्था के संग छापामार कार्रवाई बर निकलीन।
इही बीच, सक्ती म घलो आयकर विभाग के टीम ह पूर्व नगर पालिका अध्यक्ष के अलावा पेट्रोल पंप अउ जमीन कारोबारी मनके ठिकाना म छापा मारीन। कार्रवाई के बेरा मउका म सीआरपीएफ के जवान तैनात रिहीन। आखिरी समाचार लिखे जाय तक आयकर अउ ईडी के टीम ह जम्मों दस्तावेज के जांच म जुटे रिहीन।
कृषि उत्पादन आयुक्त-समीक्षा
कृषि उत्पादन आयुक्त डॉक्टर कमलप्रीत सिंह ह प्रदेस म किसान मनके स्थिति ल अच्छा बनाय खातिर धान के संगेसंग आने-आने व्यावसायिक फसल के खेती ल बढ़ावा दे कर जोर देहे। ओमन ह आज रायपुर म एक ठिन बइठका करके रईपुर अउ दुरूग संभाग म खरीफ अउ रबी फसल के कार्यक्रम के समीक्षा करीन। बइठक म कृषि अउ संबंधित विभाग के फ्लैगशिप योजना के प्रगति के घलो समीक्षा होईस। कृषि उत्पादन आयुक्त ह बइठका म बतईन कि राज्य अउ केन्द्र सरकार डहार ले दलहन अउ तिलहन के खेती ल बढ़ावा दे बर योजना ल चलाय जात हे। किसान मन ल एखर लाभ सुनिश्चित करके दलहन अउ तिलहन के खेती बर ओमन ल प्रेरित करे के जरूरत हे।डॉक्टर सिंह ह अधिकारी मन ल रबी फसल बर किसान मन ल बीज अउ उर्वरक बांटे के काम तेजी ले कराय के निरदेस दीन।
महिला लखपति पहल योजना
राष्ट्रीय ग्रामीण आजीविका मिशन के चलत सुरू करे गे ‘‘महिला लखपति पहल योजना‘‘ म राजनांदगांव जिला ले डोंगरगांव विकासखंड के चयन करे गेहे। योजना के चलत ए विकासखंड म माईलोगिन मनके रोजगार बर आय के स्त्रोत बनाय जाही।
केन्द्रीय ग्रामीण विकास मंत्रालय के सचिव नागेन्द्र नाथ सिन्हा ह काली वीडियो कान्फ्रेंसिंग करत हुए ए योजना के सुभारंभ करीन। ए बेरा म ओमन कहिन कि योजना ल ठीक तरीका ले लागू करे माईलोगिन मनके आर्थिक सशक्तिकरण ल बढ़ावा दे बर सकारात्मक कोसिस करे जाना चाही। उहें, एक वीडियो कान्फ्रेंसिंग म राजनांदगांव कलेक्टर डोमन सिंह ह घलो सामिल होईन।
हाथी विचरण
सीमावर्ती राज्य महाराष्ट्र के गढ़चिरौली ले जंगली हाथी मनके एक दल ह राजनांदगांव जिला के मोहला कोति बाढ़त हे। एला देखत हुए वन अमला ह सतर्क हवय अउ विभाग डहार ले तीर-तार के गांव म रहइया लोगन मन ले सावधानी बरते बर केहे गेहे। वन विभाग के अनुसार महाराष्ट्र ले छत्तीसगढ़ कोति आत ए दल पच्चीस ले तीस हाथी सामिल हे। वन अमला ह ए हाथी मनके गतिविधि उपर नजर राखे हे। उहें, मोहला रेंज के वन अधिकारी मन ह बतईन कि अभी के बेरा म हाथी मन महराष्ट्र के तलरवारगढ़ के आसपास हवय।
अउ अब थोरकुन समाचार सार म –
– राज्यपाल अनुसईया उइके ह आज ले रायपुर म सुरू होय पांच दिन तक चलइया श्री शिव महापुराण कथा कार्यक्रम म सामिल होईन।
– छत्तीसगढ़ माध्यमिक शिक्षा मंडल के हाईस्कूल अउ हायर सेकेंडरी परीक्षा के नियमित पढ़ईया लइका मनके प्रायोगिक परीक्षा अउ प्रायोजन काम सबो मान्यता प्राप्त संस्था म अवइया साल दस ले इकतीस जनवरी के बीच होही। ए जानकारी मंडल के सचिव प्रोफेसर व्ही.के. गोयल ह दीन हे।
अउ
– राज्य म छत्तीसगढ़िया ओलंपिक के चलत विकासखंड स्तरीय खेल प्रतियोगिता होवत हे। इही कड़ी म जांजगीर-चांपा जिला के जोन स्तरीय रस्सी खींच अउ फुगड़ी जइसे प्रतियोगिता म माईलोगिन मन ह घलो बढ़-चढ़के हिस्सा लेवत हे।