मुख्यमंत्री-राशि वितरण
मुख्यमंत्री भूपेश बघेल ह किहीन हे कि छत्तीसगढ़ म राष्ट्रपिता महात्मा गांधी के स्वावलंबी गांव के परिकल्पना धीरे-धीरे साकार होवत हे। ओमन किहीन कि गोधन न्याय योजना के तहत गांव म बनाय गे गौठान मन म तीन हजार नवासी गौठान स्वावलंबी होगे हे।
मुख्यमंत्री ह आज रायपुर म गोधन न्याय योजना के हितग्राही मन ल गोबर खरीदी के रासि, महिला स्व-सहायता समूह मनके अलावा गौठान समिति मन ल लाभांश रासि अउ गन्ना उत्पादक किसान मन ल गन्ना प्रोत्साहन रासि के वितरण कार्यक्रम ल वर्चुअल माध्यम ले संबोधित करीन। ए मउका म ओमन किहीन कि स्वावलंबी गौठान मन ह अब तक अपन संसाधन ले सवा चौबीस करोड़ रूपिया के गोबर खरीदी करे हे।
गौरतलब हे कि मुख्यमंत्री ह गौठान मन म पन्द्रह ले इकतीस अक्टूबर तक पशुपालक ग्रामीण, किसान अउ भूमिहीन मन ले खरीदे गे दू लाख पैंतीस हजार क्विंटल गोबर के एवज म चार करोड़ उनहत्तर लाख रूपिया के भुगतान करीन। मुख्यमंत्री ह गन्ना उत्पादक किसान मन ल अड़सठ करोड़ नब्बे लाख रूपिया के बोनस रासि के ऑनलाइन अंतरण घलो करीन।
कांग्रेस-किसान सम्मान यात्रा
प्रदेस कांग्रेस आज ले राज्य के नब्बे विधानसभा क्षेत्र मन म किसान सम्मान यात्रा निकालत हे। ए यात्रा ल प्रदेस प्रभारी पी.एल. पुनिया ह हरी झंडी दिखाके रवाना करीन। किसान सम्मान यात्रा प्रदेस के सबो जिला मन ले गुजरही अउ करीब पच्चीस सौ किलोमीटर के दूरी तय करही। ए यात्रा प्रत्येक नगर, गांव अउ बूथ तक जाही। एखर माध्यम ले राज्य सरकार के जनकल्याणकारी योजना मनके जानकारी दे जाही। यात्रा के समापन दिसंबर म होही।
महिला लखपति पहल योजना
केन्द्रीय ग्रामीण विकास मंत्रालय के सचिव नागेन्द्रनाथ सिन्हा ह वीडियो कान्फ्रेंसिंग के जरिया ‘‘महिला लखपति पहल योजना‘‘ के क्रियान्वयन के समीक्षा करीन। ए दउरान ओमन किहीन कि योजना ल कारगर ढंग से लागू करके महिला मनके आर्थिक सशक्तिकरण ल बढ़ावा देके दिसा म सकारात्मक प्रयास करे जाना चाही। ओमन ए दिसा म राष्ट्रीय ग्रामीण आजीविका मिशन के संगेसंग मनरेगा अउ दूसर योजना मनके सहारा लेके आजीविका संबंधी अलग-अलग गतिविधि मन ले महिला स्व-सहायता समूह मन ल व्यापक रूप ले जोड़े बर किहीन। वीडियो कान्फ्रेंसिंग के माध्यम ले छत्तीसगढ़ के अपर मुख्य सचिव सुब्रत साहू अउ राजनांदगांव कलेक्टर डोमन सिंह ह घलो योजना के क्रियान्वयन के जानकारी दीन।
बतादन कि केन्द्रीय ग्रामीण विकास मंत्रालय डहार ले पूरा देस के चयनित सौ जिला मन म महिला लखपति पहल योजना के क्रियान्वयन करे जात हे। सौ जिला मन म कोंडागांव जिला ल घलो सामिल करे गेहे।
सीआरपीएफ अधिकारी-सुकमा
केन्द्रीय रिजर्व पुलिस बल-सीआरपीएफ के विशेष महानिदेशक नितिन अग्रवाल ह सुकमा जिला के बुरकापाल के दौरा करीन। ए दउरान अतिरिक्त महानिदेशक ऑपरेशन वितुल कुमार घलो उंखर संग रिहीन। दूनों अधिकारी मन ह सीआरपीएफ अउ कोबरा बटालियन के जवान मन से मुलाकात करीन अउ उंखर हौसला बढ़ईन। ए दउरान अधिकारी मन बुरकापाल के शहीद स्मारक म पुष्प अर्पित कर शहीद जवान मन ल श्रद्धांजलि दीन। ए अवसर म सीआरपीएफ छत्तीसगढ़ के महानिरीक्षक साकेत सिंह अउ उप महानिरीक्षक अरविंद राय घलो उपस्थित रिहीन।
ऐति, बीजापुर जिला म सुरक्षा बल ह चार झिन माओवादी मन ल गिरफ्तार करे हे। इंखर करा ले विस्फोटक सहित माओवादी सामग्री बरामद करे गेहे। बताय जात हे कि डीआरजी अउ सीआरपीएफ के संयुक्त दल तलाशी अभियान म निकले रिहीन। ए दउरान बासागुड़ा अउ आवापल्ली थाना क्षेत्र म घेराबंदी करके ए माओवादी मन ल गिरफ्तार करे गीस।
कांग्रेस-बैठक
भानुप्रतापपुर विधानसभा उपचुनाव म प्रत्याशी चयन ल लेके रायपुर स्थित राजीव भवन म आज कांग्रेस चुनाव समिति के बइठका होईस। बइठका म मुख्यमंत्री भूपेश बघेल, प्रदेश प्रभारी पी.एल. पुनिया, सह प्रभारी सप्तगिरी शंकर उल्का अउ प्रदेस अध्यक्ष मोहन मरकाम सहित प्रमुख पदाधिकारी मन सामिल होईन। बइठका के दउरान चौदह दावेदार मन उपर चरचा करे गीस। बताय जात हे कि दावेदार मन म सावित्री मंडावी, कांग्रेस के प्रदेश उपाध्यक्ष बिरेश ठाकुर, जिला पंचायत अध्यक्ष हेमंत धु्रव, जनपद उपाध्यक्ष सोनाराम तेता, विजय ठाकुर, ललित नरेठी अउ छेरकू तुलावी के नाम सामिल हे।
अग्निवीर भर्ती-पंजीकरण
भारतीय वायुसेना म अग्निवीर मनके भर्ती बर ऑनलाइन पंजीकरण काली ले सुरू होगे हे। आवेदक तेईस नवंबर संझा पांच बजे तक पंजीकरण करा सकत हे। परीक्षा अवइया बछर अट्ठारह ले चौबीस जनवरी तक ऑनलाइन माध्यम ले आयोजित करे जाही।
गौरतलब हे कि चार बछर बर सशस्त्र बल मन म युवा मनके भर्ती बर केन्द्र सरकार ह कुछ महीना पहिली अग्निपथ योजना ल स्वीकृति दे रिहीस हे।
दुर्घटना
पाछु चौबीस घंटा के दउरान प्रदेस म अलग-अलग सड़क दुर्घटना म सात झन लोगन के मउत होगे।
रायगढ़ जिला के पुंजिपथरा थाना क्षेत्र म होय सड़क दुर्घटना म तीन झिन युवक मनके मउत होगे। बताय जात हे कि विपरीत दिसा ले आवत बस के चपेट म आय ले मोटर साइकिल सवार तीन झिन युवक मन म दू झिन के मउका म ही मउत होगे। उहें, एक झिन अन्य युवक ह इलाज के दउरान दम तोड़ दीस।
ऐति, बलौदाबाजार-भाटापारा जिला के पाहंदा गांव करा पाछु रतिहा कार के चपेट म आय ले मोटर साइकिल सवार दू झिन युवक मनके मउत होगे। उहें, एक अन्य युवक घायल होगे हे।
ओति, राजनांदगांव जिला के डोंगरगांव नगर के करियाटोला करा यात्री बस के चपेट म आय ले मोटर साइकिल सवार एक झिन मनखे के मउत होगे।
उहें, जांजगीर-चांपा जिला के सुल्ताननार गांव म अज्ञात वाहन के चपेट म आय ले दोपहिया सवार एक झिन मनखे के मउत होगे। घटना ले गुस्साए लोगन मन मुआवजा के मांग ल लेके सड़क म चक्काजाम करीन।
गुरूनानक जयंती
सिख मनके प्रथम गुरू अउ सिख पंथ के संस्थापक गुरूनानक देवजी के जयंती आज छत्तीसगढ़ सहित देसभर म हर्षोल्लास के संग मनाय जात हे। गुरूनानक जी के पांच सौ तिरपनवां जयंती के मउका म आज राजधानी रायपुर सहित प्रदेस के अलग-अलग जिला मन म नगर-कीर्तन निकाले गीस।
राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेन्द्र मोदी, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह गुरूनानक जयंती म आम जनता ल बधाई अउ सुभकामना दीन।
राज्यपाल अउ मुख्यमंत्री रईपुर के खालसा स्कूल म आयोजित गुरूनानक जन्मोत्सव कार्यक्रम म सामिल होईन। ए अवसर म राज्यपाल ह किहीन कि गुरूनानक देव जी ह धर्म अउ जाति के भेद ल मिटाके मानव कल्याण बर अपन जीवन समर्पित करीन। मानव मात्र के सेवा ही उंखर विचार के प्रमुखता रिहीस। उहें, मुख्यमंत्री ह किहीन कि गुरूनानक जयंती पूरा मानवता के प्रकास पर्व आय। ओमन किहीन कि खालसा पंथ के सबले बड़े विशेषता सेवा आय। अपन सेवा कार्य बर ही सिख समाज पूरा विश्व म जाने जाथे।
कार्तिक पुर्णिमा
उहें, आज कार्तिक पुन्नी आय। ए मउका म श्रद्धालु मन आज बिहनिया ले नदी म पवित्र स्नान कर भगवान शिव के अराधना करीन। कार्तिक पुन्नी के अवसर म प्रदेस के अलग-अलग स्थान मन म मेला के आयोजन घलो करे जात हे।
मुख्यमंत्री भूपेश बघेल आज तड़के कार्तिक पुन्नी के अवसर म रायपुर के महादेव घाट पहुंच के खारून नदी म पुण्य स्नान करीन। उंखर संग संसदीय सचिव विकास उपाध्याय सहित कांग्रेस के कई पदाधिकारी अउ कार्यकर्ता मन आस्था के डूबकी लगईन।
अउ अब थोरकुन समाचार सार म –
– छत्तीसगढ़ के अंतर्राष्ट्रीय शतरंज खिलाड़ी किरण अग्रवाल ल अखिल भारतीय शतरंज महासंघ ह भारतीय शतरंज टीम के कोच नियुक्त करे हे। सुश्री अग्रवाल अवइया तेरह ले तेईस नवंबर तक श्रीलंका म आयोजित कॉमनवेल्थ शतरंज प्रतियोगिता म सामिल होवइया सोलह सदस्यीय भारतीय टीम म बतौर कोच सामिल होही।
अउ
– बस्तर के कांगेर घाटी राष्ट्रीय उद्यान म पहली बार पक्षी के सर्वेक्षण करे जाही। ए सर्वेक्षण बर्ड कॉउंट इंडिया अउ बर्ड्स एंड वाइल्ड लाइफ ऑफ छत्तीसगढ़ के मदद ले करे जाही।