भानुप्रतापपुर-उपचुनाव
भानुप्रतापुर विधानसभा उपचुनाव के घोसना के संगे-संग कांकेर जिला म आदर्स आचार संहिता प्रभावसील होगे हे। एला देखत कलेक्टर अउ जिला दंडाधिकरी डॉक्टर प्रियंका शुक्ला ह कांकेर जिला के सीमा क्षेत्र के भीतर रहवइया सबो लाइसेंसधारी मन ल अपन अस्त्र-शस्त्र ल तीर के पुलिस थाना म अवइया नौ नवंबर तक जमा करे के निरदेस देहे। ये आदेश जिला म रहवइया, दूसर जिला ले आय लाइसेंसधारी मन उपर घलो लागू होही। सबो लाइसेंसधारी मन दस दिसंबर के बाद अपन अस्त्र-शस्त्र वापस ले सकहीं। ए आदेश ले मान्यता प्राप्त बैंक मनके सुरक्षा गार्ड, राष्ट्रीय राईफल, जिला रायफल संघ, जिला के औद्योगिक अउ शैैक्षणिक संस्था मन म तैनात गार्ड मन मुक्त रही, फेर ओमन ल अपन अस्त्र-शस्त्र के जानकारी संबंधित थाना म देना जरूरी होही।
आप मन ल बतादन कि निर्वाचन कार्यालय के अनुसार अवइया दस नवंबर के भानुप्रतापपुर विधानसभा उपचुनाव बर अधिसूचना जारी करे जाए के संगे-संग नामांकन पत्र भरे के सिलसिला घलो शुरू हो जही। सतरा नवंबर तक नामांकन भरे जा सकही। नामांकन पत्र के जांच अट्ठारा नवंबर के होही। उंहे, नाम वापसी के आखिरी तारिख इक्कीस नवंबर राखे गेहे। मतदान पांच दिसंबर के होही। मतगणना अउ चुनाव परिणाम के घोसना आठ दिसंबर के करे जाही।
मेगा लीगल सर्विस कैम्प
छत्तीसगढ़ राज्य के विधिक सेवा प्राधिकरण डहार ले आजादी के अमृत महोत्सव के अंर्तगत आज बलरामपुर-रामानुजगंज, धमतरी, बालोद अउ मुंगेली जिला म मेगा लीगल सर्विस कैम्प के अयोजन करे गेहे। ए दउरान लोमन मन ल विधिक सेवा के संगे-संग आने-आने विभाग मन म संचालित योजना मनकेे जानकारी दे गीस। बलरामपुर म आयोजित मेगा लीगल सर्विस कैम्प म बिंयालीस हितग्राही मन ल आने-आने योजना मनके अंर्तगत सुने के मशीन, ट्राईसिकल, आयुष्मान हेल्थ कार्ड, राशन कार्ड के संग किसान मन ल सरसों के बीजा घलो बांटे गीस।
एती, मुंगेली जिला म आयोजित शिविर म शासन के जनकल्याणकारी योजना मनेक तहत् तेरह हितग्राही मन ल आयुष्मान कार्ड, तेरह पढ़हईया लईका मन ल जाति, निवास, अउ आय प्रमाण पत्र, तीन हितग्राही मन ल नवीन जॉब कार्ड, दस हितग्राही मन ल मिनी किट, सात झन ल वीलचेयर अउ ट्राईसाइकल, नौ हितग्राही मन ल राशन कार्ड अउ सात झन ल जाल, आइस बॉक्स अउ प्लेक्टान ग्रोवर दे गीस।
उंहे, धमतरी अउ बालोद के कलेक्ट्रेट म आयोजित मेगा लीगल सर्विस कैम्प म आने-आने विभाग मन म संचालित योजना मनके जानकारी दे गीस।
गौरव दिवस
केन्द्रीय शिक्षा मंत्रालय देशभर के विद्यालय अउ उच्च शिक्षण संस्थान मन म पंद्रह नवंबर के जनजातीय गौरव दिवस मनाही। पाछु बछर केन्द्र सरकार ह जनजातीय स्वातंत्रता सेनानानि मनके सुरता म पंद्रह नवंबर के जनजातीय गौरव दिवस के रूप म मनाए के घोसना करे रिहीन। आप मन ल बतादन कि पंद्रह नवंबर के जनजातीय समुदाय म भगवान केहे जाने वाला बिरसा मुंडा के जयंती मनाए जाथे। बिरसा मुंडा स्वतंत्रता सेनानी, समाज सुधारक अउ जनजातीय समुदाय के नेता रिहीन। जनजातीय गौरव दिवस के मउका म पूरा देस म बड़ संख्या म कार्यक्रम आयोजित करे जाथे।
बाल संराक्षण आयोग डहार ले आज नवा रायपुर म पहिली त्रैमासिक समीक्षा बैठक सह-कार्यशाला के आयोजन करे गीस। ए बैइठका म युनिसेफ अउ विविध सेवा प्राधिकरण डहार ले लइका मनके हित संरक्षण बर नवा पहल करत पहिली दरी जिला मनके किसोर न्याय बोर्ड, बाल कल्याण समिति मनके अध्यक्ष, जिला विधिक सेवा प्राधिकरण अउ जिला बाल संरक्षण इकाई ल एक मंच म लाए गीस।
बइठक म छत्तीसगढ़ उच्च न्यायलय के न्यायधीश अउ छत्तीसगढ़ राज्य विधिक सेवा के कार्यपालक अध्यक्ष गौतम भादुड़ी, छत्तीसगढ़ राज्य बाल संरक्षण आयोग के अध्यक्ष तेजकुंवर नेताम अउ युनिसेफ के राज्य प्रमुख जॉब जकारिया मौजूद रिहीन। ए दउरान किसोर न्याय अधिनियम-2015 अउ पॉक्सो एक्ट- 2012, ओखर प्रावधान मनके क्रियान्वयन अउ ओला लागू करे म अवइया परेशानी मन ऊपर चर्चा करे गीस। एखर अलावा सबो जिला मनके किसोर न्याय बोर्ड म लंबित प्रकरण के समीक्षा करे गीस।
धान खरीदी-प्रशिक्षण
कोंडागांव म काली समर्थन मूल्य म धान अउ मक्का खरीदी के बेवस्था ल सुचारू रूप ले चलाए बर नोडल अधिकारी, प्रबंधक, समिति प्रभारी अउ ऑपरेटर मनके एक दिवसीय प्रशिक्षण शिविर आयोजित करे गीस। ए प्रशिक्षण शिविर म कलेक्टर दीपक सोनी ह धान अउ मक्का खरीदी बर सबो समिति मन म किसान मनके सुविधा बर शेड अउ पेयजल के बेवस्था करे के निरदेस देहे। संगे-संग समिति प्रबंधक मन ल धान ल नमी ले बचाए राखे बर ड्रेनेज लगाए अउ फेंसिंग करे बर केहे हे। कलेक्टर ह किसान मन ले अच्छा व्यवहार करे बर अउ कोनों भी प्रकार के समस्या होय म नोडल अधिकारी ल तुरते सूचना देके निरदेस देहे।
इही बीच, टोकन तुंहर हाथ ऐप म रजिस्ट्रेसन के बेरा किसान मन ल होवइया समस्या के जानकारी दे बर हेल्पलाईन नंबर – 07786-299028 जारी करे गेहे।
केशकाल-घाटी निर्माण कार्य
कोंडागांव जिला म राष्ट्रीय राजमार्ग क्रमांक-तीस, केशकाल घाट म सड़क मरम्मत के काम करे जात हे। कलेक्टर दीपक सोनी ह काली केशकाल घाटी पहुंच के सड़क मरम्मत के काम के जाएजा लीन। ओमन ह अधिकरी मन ल गुण्वत्ता के संग तेजी ले काम पूरा करे के निरदेस दीन।
आप मन ल बतादन कि सड़क के मरम्मत बर 11 नवंबर तक ए रद्दा म भारी वाहन मनके आवाजाही ल रोके गेहे। उंहे, छोटे वाहन अउ यात्री बस मनके परिचालन जारी हे। लोगन मन ल होवइया परेशानी ल देखत जिला प्रशासन ह भारी वाहन मनके आवाजाही बर केशकाल-विश्रामपूरी चौक ले विश्रामपूरी-बोरई-नगरी होवत धमतरी रद्दा के उपयोग करे के सलाह देहे।
एक ठन आने रद्दा माकड़ी ढाबा ले भानुप्रतापपुर-अंतागढ़-नारायणपुर होवत घलो कोंडागांव पहुंचे जा सकथे।
एसपी-गश्त
राजनांदगांव जिला म विजुअल पुलिसिंग के अंर्तगत पुलिस टीम ह अपराध मन ऊपर अंकुश लगाए बर सरलग अभियान चलात हे। इही कड़ी म काली संझा पुलिस अधीक्षक प्रफुल्ल ठाकुर अउ अतिरिक्त पुलिस अधीक्षक लखन पटले मोटर साईकिल म गश्त म निकलीन। ए दउरान शहर के सीमा क्षेत्र के बाहिर अउ संदिग्ध जगा मन म दबिस दीन। सड़क म घुमइया अउ संदिग्ध जगा मन म बईठे लोगन मनके तलासी ले गीस। अउ समझाइश दे गीस। पुलिस अधीक्षक प्रफुल्ल ठाकुर ह बताईन कि शहर म अपराधिक घटना मन ऊपर अंकुश लगाए के संग असामाजिक तत्व मन ऊपर नजर राखे जात हे। जेखर बर पुलिस के टीम मोेटर साईकिल म शहर के आउटर क्षेत्र मन म गश्त करत हे।
शालेय खेल प्रतियोगिता
स्कूल शिक्षा विभाग अउ जिला प्रशासन रायगढ़ के संयुक्त तत्वाधान म आयोजित 22वां राज्य स्तरीय शालेय खेल प्रतियोगिता म रायपुर संभाग के टीम ह ओवर आल चैंपियन रिहीस। जबकि अनुशासन बर सरगुजा संभाग अउ मार्चपास्ट बर बस्तर संभाग ल पुरस्कार दे गीस। समापन समारोह म रायगढ़ के विधायक प्रकाश नायक मुख्य अतिथि के रूप म मौजूद रिहीन।
ए खेल प्रतियोगिता म टेनिक्वाईट, सॉफ्टबॉल अउ साइकिलिंग सहित आने खेल मन म मुकाबला होईस। प्रतियोगिता म सात सौ ले जादा खिलाड़ी मन भाग लीन।
हाथी-आतंक
महासमुंद जिला के गांव रायमुड़ा म बीते रतिहा एक दंतैल हाथी के पहुंचे ले ग्रामीण मन म दहसत के माहौल हे। जेखर सूचना राते कुन वन विभाग ल दे दे गे रीहिस। बताए जात हे कि दंतैल हाथी बारनवापारा क्षेत्र ले विचरण करत रायमुड़ा पहुंचे रिहीस। जिहां ले ओहा बनदौरा गांव डहार चल दीस। वन विभाग ह तीर-तखार के गांव मन म मुनादी करा के लोगन मन ल सतर्क रेहे बर केहे हे।