भानुप्रतापपुर-उपचुनाव
छत्तीसगढ़ के भानुप्रतापपुर विधानसभा उपचुनाव बर आगामी पांच दिसंबर के मतदान होही। भारत निर्वाचन आयोग ह आज भानुप्रतापपुर विधानसभा क्षेत्र क्रमांक-अस्सी बर उपचुनाव कार्यक्रम के घोसना करीन। एखरे संग कांकेर जिला म आदर्श आचार संहिता प्रभावशील होगे हे। भानुप्रतापपुर विधानसभा सीट अनुसूचित जनजाति वर्ग बर आरक्षित हे। छत्तीसगढ़ विधानसभा के उपाध्यक्ष मनोज मंडावी के निधन के बाद ले ए सीट खाली हे।
निर्वाचन कारीकरम के मुताबिक आगामी दस नवंबर के भानुप्रतापपुर विधानसभा उपचुनाव बर अधिसूचना जारी करे जाय के संगेसंग नामांकन पत्र भरे के सिलसिला सुरू हो जही। सत्रह नवंबर तक नामांकन भरे जा सकही। नामांकन पत्र मनके जांच अट्ठारह नवंबर के होही। उहें, नाम वापसी के अंतिम तिथि इक्कीस नवंबर निर्धारित करे गेहे। मतदान पांच दिसंबर के होही। मतगणना अउ चुनाव परिणाम के घोसना आठ दिसंबर के करे जाही।
छत्तीसगढ़ के मुख्य निर्वाचन पदाधिकारी रीना बाबा साहेब कंगाले ह बतईन कि भानुप्रतापपुर विधानसभा क्षेत्र म दू सौ छप्पन मतदान केन्द्र हे। पांच जनवरी दू हजार बाईस के निर्वाचन नामावली के अंतिम प्रकासन के स्थिति म भानुप्रतापपुर निर्वाचन क्षेत्र म कुल मतदाता मनके संख्या एक लाख संतानवे हजार पांच सौ पैंतीस हे। ए उपचुनाव म इलेक्ट्रॉनिक वोटिंग मसीन अउ वीवीपैट के उपयोग करे जाही।
भोरमदेव मंदिर-जीर्णोद्धार
कबीरधाम जिला म स्थित भोरमदेव मंदिर के नींव सुदृढ़ीकरण अउ जीर्णोद्धार के काम पुरातत्व अउ संस्कृति विभाग के विषय-विशेषज्ञ अउ कुशल कामगार मन डहार ले जल्दी करे जाही। विभाग के तकनीकी अउ विषय-विशेषज्ञ मनके टीम ह भोरमदेव मंदिर परिसर के अवलोकन करीन। टीम के सदस्य मन बतईन कि ग्यारहवीं शताब्दी म स्थापित भोरमदेव मंदिर के नींव ल मजबूत बनाय बर तकनीकी रूप ले चरणबद्ध काम कराय जाही। ए दउरान बताय गीस कि पुरातत्व विभाग के सुरक्षा मानक मनके अनुरूप ही काम करे जाही।
जिला कलेक्टर जन्मेजय महोबे ह पुरातत्व विभाग के टीम के सदस्य अउ अधिकारी मनके बइठका लेके भोरमदेव मंदिर परिसर म प्रस्तावित कार्य अउ कार्ययोजना के संबंध म जानकारी लीन।
मतदाता सूची-प्रकाशन
प्रदेस म त्रिस्तरीय पंचायत अउ नगर पंचायत के उपचुनाव बर मतदाता सूची तैयार करे के प्रक्रिया सुरू होगे हे। राज्य निर्वाचन आयोग के मुताबिक अवइया नौ नवंबर तक निर्वाचक नामावली के संबंध म सार्वजनिक सूचना के प्रकाशन करे जाही। दावा-आपत्ति करे के आखिरी तारीख सोलह नवंबर अउ दावा आपत्ति मनके निपटारा करे के आखिरी तारीख इक्कीस नवंबर निर्धारित करे गेहे। छह दिसंबर के निर्वाचक नामावली के आखिरी प्रकासन रजिस्ट्रीकरण अधिकारी डहार ले करे जाही।
अइसने, प्रदेस के आने-आने नगर पंचायत अउ नगर पालिका परिषद म प्रस्तावित उपचुनाव बर घलो निर्वाचक नामावली तैयार करे के प्रक्रिया सुरू होगे हे। नगरीय निकाय म उपचुनाव बर घलो मतदाता सूची के अंतिम प्रकाशन छह दिसंबर के करे जाही।
धान खरीदी
प्रदेस म समर्थन मूल्य म धान खरीदी के काम चलत हे। अब तक प्रदेस म किसान मन ले समर्थन मूल्य म करीबन ससत्तर हजार मीटरिक टन धान के खरीदी करे जा चुके हे। धान के एवज म किसान मन ल बैंक लिंकिंग व्यवस्था के तहत दू सौ तिरासी करोड़ रूपिया के भुगतान जारी कर दे गेहे।
खाद्य सचिव टोपेश्वर वर्मा ह बतईन कि धान खरीदी के सुचारू व्यवस्था बनाय रखे बर अधिकारी निरंतर निगरानी करत हे। प्रदेस म ए बछर एक सौ दस लाख मीटरिक टन धान खरीदी के लक्ष्य राखे गेहे। समर्थन मूल्य म धान बेचे बर प्रदेस म पच्चीस लाख बयानवे हजार किसान मनके पंजीयन करे गेहे। धान खरीदी बर प्रदेसभर म दू हजार चार सौ संतानवे उपार्जन केन्द्र बनाय गेहे।
हाफ बिजली बिल योजना
राज्य सासन ह प्रदेस के नागरिक मन ल सस्ता बिजली उपलब्ध कराय के उद्देश्य ले हाफ बिजली बिल योजना लागू करे हे। एखर सीधा लाभ राज्य के लगभग बयालीस लाख उपभोक्ता मन ल मिलत हे। ए योजना के तहत बिजली उपभोक्ता मन ल अब तक ढाई हजार करोड़ रूपिया के राहत दे जा चुके हे। बिजली उपभोक्ता मन ल चार सौ यूनिट तक खपत बर बिजली बिल म छूट दे जावत हे। एखर अलावा मोर बिजली ऐप म विद्युत सेवा अउ सुविधा मन बर ऑनलाइन आवेदन अउ बिजली बिल के भुगतान के सुविधा उपलब्ध कराय गेहे।
माओवादी समाचार
बीजापुर जिला म आज दू झिन माओवादी मन पुलिस के समक्ष आत्मसमर्पण कर दीन। एमा ले एक झिन माओवादी पामेड़ एरिया कमेटी के अंतर्गत सप्लाई टीम के सदस्य अउ दूसरइया माओवादी मिलिशिया कंपनी के सदस्य के रूप म लंबा समय ले सक्रिय रेहे हे। ए माओवादी मन उपर पुलिस पार्टी म हमला करे समेत कई दूसर वारदाता मन म सामिल रेहे के आरोप हे।
इही बीच, दंतेवाड़ा जिला के अरनपुर थाना क्षेत्र के अंतर्गत ग्राम रेवाली म माओवादी मन ह एक झन मनखे के धारदार हथियार ले हत्या कर दीन। मृतक के पत्नी ग्राम पंचायत रेवाली के सरपंच हे।
दुर्घटना जवान-मौत
सुकमा जिला म आज होय सड़क दुर्घटना म डीआरजी के दू झिन जवान मनके मउत होगे। मिले जानकारी के मुताबिक मोटर साइकिल म सवार दूनों जवान एल्मागुंडा इलाका म माओवादी मनके खिलाफ अभियान ले लहुटत रिहीन। इही दउरान राष्ट्रीय राजमार्ग क्रमांक-तीस म कोंटा डेंग करा ट्रेलर ह उंखर मोटर साइकिल ल टक्कर मार दीस। ए हादसा म दूनों जवान मनके मउका म ही मउत होगे। मृतक जवान पदाम मुया दोरनापाल करा बोडीगुडा अउ मौसम सुब्बा बंडा बेस कैम्प के रहइया रिहीन।
जिले की चिट्ठी
आकाशवाणी रईपुर डहार ले प्रस्तुत कार्यक्रम ‘‘जिले की चिट्ठी‘‘ के प्रसारण समय म बदलाव करे गेहे। ए कार्यक्रम के प्रसारण अब काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र रिले करही। ए बखत के अंक म ‘‘बेमेतरा‘‘ जिला के गतिविधि मनके बारे म जानकारी दे जाही।
दुर्ग पुलिस-नई पहल
दुरूग पुलिस ह भिलाई नगर सब डिवीजन म टेक्नोलॉजी ल बउरत जनता के संग संबंध बढ़ाय के दिसा म एक नवा पहल करे हे। स्मार्ट पुलिसिंग के दिसा म होवत ए नवा पहल के तहत जम्मों संबंधित थाना मनके प्रवेस द्वार म क्यूआर कोड लगाय गेहे। सिकायतकर्ता या आम जनता ए क्यूआर कोड ल मोबाइल ले स्कैन करके अपन फीडबैक दे सकत हे। ए संबंध म पुलिस प्रशासन कोति ले केहे गेहे कि सिकायत या सुझाव के रूप म फीडबैक देवइया मनके पहिचान गुप्त राखे जाही। संघरा ओमन के अनुभव के आधार म व्यवस्था म सुधार के प्रयास घलो करे जाही।
अउ अब थोरकुन समाचार सार म –
– सैनिक स्कूल अंबिकापुर म कक्षा छठवीं म प्रवेस बर परीक्षा आठ जनवरी के आयोजित करे जाही। एखर बर ऑनलाइन आवेदन राष्ट्रीय परीक्षा एजेंसी के वेबसाइट म तीस नवंबर शाम पांच बजे तक भरे जा सकही।
– कर्मचारी चयन आयोग डहार ले, ले जाने वाला मल्टी टास्किंग अउ हवलदार के परीक्षा काली छह नवंबर के रईपुर म आयोजित करे जाही।
– दंतेवाड़ा जिला के बारसूर थाना क्षेत्र म इंद्रावती नदी ल पार करत बेरा नाव के पलटे ले एक झिन ग्रामीण डूब गे, जेखर खोजबीन करे जात हे। उहें, नाव म सवार आने लोगन मन ल सुरक्षित हे।
अउ
– जांजगीर-चांपा जिला के जांजगीर अउ बिर्रा क्षेत्र म खनिज विभाग के टीम ह खनिज के अवैध परिवहन करे के मामला म पांच ठिन वाहन ल पकड़े हे।