आदिवासी नृत्य महोत्सव/राज्योत्सव
ये मउका म मुख्यमंत्री ह कीहिन कि पूरा दुनिया के आदिम सांस्कृतिक मूल्य ल जब हम बचाय रखबो तभे हमर एकजुटता बंाचे रीही अउ प्राकृतिक संतुलन के संगेसंग विकास के अवधारणा साकार हो सकही। ओमन कीहिन कि राष्ट्रीय आदिवासी नृत्य महोत्सव के आयोजन के मुख्य उद्देश्य आदिवासी मनके अधिकार बर पूरा दुनिया म एकजुटता कायम करना हे।
स्वागत कार्यक्रम देश के अठाइस राज्य सात केंद्रशासित प्रदेश सहित दस ठन देश के कलाकार मन आदिवासी नृत्य के झलक देखाके दर्शक मन ल मंत्रमुग्ध करीन। ये आयोजन म लगभग पंद्रह सौ देशी विदेशी कलाकार मन शिरकत करत हे। मुख्यमंत्री ह राष्ट्रीय आदिवासी नृत्य महोत्सव कु शुभारंभ के अवसर म पोस्टल विभाग डहार ले जारी पोस्टल स्टेम्प, लिफाफा अउ बछर दू हजार इक्कीस के राष्ट्रीय आदिवासी नृत्य महोत्सव के काफी टेबल बुक के विमोचन घलो करीन ।
उंहे मेलास्थल म शासकीय विभाग के अलावा छत्तीसगढ़ सहित अलग अलग राज्य मनके कलाकृति उपर आधारित प्रदर्शनी लगाय गेहे। ये मउका म मुख्यमंत्री ह छत्तीसगढ़ शिल्पकार अउ विभागीय प्रदर्शनी के शुभारंभ करीन। अबले थोरकुन देरी म महोत्सव स्थल म राज्य अलंकरण समारोह के आयोजन होही कार्यक्रम के मुख्य अतिथि राज्यपाल अउ अध्यक्षता मुख्यमंत्री करहीं। राज्योत्सव के समापन तीन नवंबर के होही । ये कार्यक्रम के मुख्य अतिथि झारखंड के मुख्यमंत्री हेमंत सोरेन होही।
भाजपा गौरव दिवस
उंहे भारतीय जनता पार्टी डहार ले छत्तीसगढ़ राज्य स्थापना दिवस ल गौरव दिवस के रूप म मनाये जात हे। पार्टी के प्रदेश अध्यक्ष अउ सांसद अरूण साव ह कीहिन कि ये अवसर म घर म दीप प्रज्वलित करे जाही अउ कई तरह के कार्यक्रम के आयोजन करे जाही। ओमन छत्तीसगढ़ राज्य के निर्माण बर तत्कालिन प्रधानमंत्री अटल बिहारी बाजपेयी के प्रति कृतज्ञता जताइन हे।
दूसर डहार गरियाबंद म सर्व आदिवासी समाज के बैनर तले आदिवासी समाज के लोगन मन राज्योत्सव के आयोजन उपर विरोध जताइन हे। गरियाबंद म आदिवासी समाज के लोगन मन प्रदेश म आरक्षण कम करे के विरोध म प्रदर्शन करीन अउ विरोध रैली निकालिन। राष्ट्रीय राजमार्ग म होय प्रदर्शन के दउरान आदिवासी अउ पुलिस मनके बीच हल्का झूमा झटकी होय के समाचार मिले हे।
मुख्यमंत्री शुभकामना
इही बीच राज्यपाल अनुसुइया उइके अउ मुख्यमंत्री भूपेश बघेल ह प्रदेशवासी मन ल तेइसवंा राज्य स्थापना दिवस के बधाई अउ शुभकामना दीन। ओमन कीहिन कि छत्तीसगढ़ निर्माण बर हमर पुरखा मन जेन सपना देखे रीहिस। ओ सपना ल साकार करे के दिशा म हम लगातार काम करत हन ।
राज्यपाल ह कीहिन कि छत्तीसगढ़ ह पाछू बाईस साल के दउरान हर क्षेत्र म प्रगति करे हवय अउ प्रदेश के नाव म देश म अग्रणी स्थान म हवय। मुख्यमंत्री ह कीहिन कि छत्तीसगढ़ सरकार ह पाछू चार बछर म लोगन मनके जीवन म बदलाव लाये बर अनेक नवाचारी काम के शुरूआत करे हे।
मुख्यमंत्री ह अपन संदेश म कीहिन कि राज्य के बागडोर संभालते ही ग्रामीण अर्थव्यवस्था ल संभाले के काम शुरू कर दे गेहे। ओमन कीहिन कि किसान अउ ग्रामीण मनके भागीदारी राज्य के अर्थव्यवस्था म सुनिश्चित करे बर सुराजी गांव योजना शुरू करे गेहे।
आधार मितान योजना
प्रदेश म आम नागरिक मन बर आवश्यक सेवा घर म ही उपलब्ध कराय खातिर मुख्यमंत्री मितान योजना म आज ले एक ठन अउ सेवा जोड़े जात हे। ये योजना के तहत अब पांच बछर तक के लइका मनके आधार कार्ड मितान द्वारा घर आके बनाये जाही। एखर बर टोल फ्री नंबर एक चार पांच चार पांच म फोन करके आवेदक अपन सुविधानुसार अपाइटंमेंट बुक करा सकही। एखर बाद नियत तिथि अउ समय म मितान आवेदक के घर आके लइका के आधार पंजीकरण करही। पंजीकरण प्रक्रिया पूरा होय के कुछ दिन म लइका के आधार आवेदक डहार ले देगे पता म आ जही।
पांच बछर तक के लइका मनके आधार बनाये ले जिहंा एक ओर उनला अलग अलग शासकीय योजना मनके लाभ ले म सरलता होही, उंहे लइका मनके आधार बनाये ले ये एक ठन डिजिटल फोटो पहिचान के रूप म घलो काम आही।
धान खरीदी
मुख्यमंत्री भूपेश बघेल ह धान खरीदी अभियान शुरू होय म किसान अउ प्रदेशवासी मन ल शुभकामना दीन हे । अपन संदेश म ओमन कीहिन कि राज्य सरकार के किसान हितैशी योजना मनके सेती खेत मनसे दूर होवत किसान मन खेत डहार लहुटत हें अउ खेती के रकबा घलो बाढ़े हे।
खाद्य विभाग के सचिव टोपेश्वर वर्मा ह बताइन कि धान खरीदी बर प्रदेश म लगभग ढाई हजार उपार्जन केंद्र बनाय गेहे। किसान मन ल धान बेचे म कोनो तरह के दिक्कत झन आवय एखर बर सबो केंद्र मन म बेहतर प्रबंध करे जाय के संगेसंग व्यवस्था उपर मॉनिटरिंग बर अधिकारी कर्मचारी मनके ड्यूटी घलो लगाय गेहे। ये बखत एक सौ दस लाख मीट्रिक टन धान खरीदी के लक्ष्य राखे गेहे। समर्थन मूल्य उपर धान बेचे बर प्रदेश म पच्चीस लाख बहत्तर हजार किसान मन अपन पंजीयन कराय हे, जेमा लगभग एक लाख सड़सठ हजार ले जादा नवा किसान आय।
ये बखत पंजीकृत किसान मन ल धान बेचे बर घर बइठे ऑनलाईन टोकन प्राप्त करे के सुविधा दे जात हे। एखर बर एनआईसी डहार ले एंड्रायड ऐप ‘टोकन तुम्हर हाथ ल विकसित करे गेहे। ये ऐप के मदद ले पंजीकृत किसान संबंधित उपार्जन केंद्र म स्वयं के द्वारा निर्धारित तिथि म धान बेचे बर टोकन प्राप्त कर सकही।
ए साल किसान मन से सामान्य धान दू हजार चालीस रूपिया प्रति कुंटल अउ ग्रेड ए धान ल दू हजार साठ रूपिया प्रति कुंटल के दर से खरीदे जाही। धान खरीदी बर सबो समिति मन पर्याप्त बारदाना के बेवस्था सुनिश्चित कर डरे हे। उंहे उपार्जित धान के कस्टम मिलिंग बर मिलर्स के पंजीयन करे जात हे। संवेदनशील उपार्जन केंद्र मन म निगरानी बर नोडल अधिकारी तैनात करे गहे।
रिजर्व बैंक डिजिटल रूपिया
भारतीय रिजर्व बैंक ह आज थोक बिक्री क्षेत्र म डिजिटल रूपिया के पायलट परियोजना शुरू करीन। रिजपर्व बैंक ह एक प्रेस विज्ञप्ति म केहे हे कि डिजिटल रूपिया सरकारी प्रतिभूति मन म द्वितीयक बाजार लेनदेन निपटाय बर करे जाही। आरबीआई ल आशा हे कि ई रूपिया अंतर बैंक बाजार ल अउ कार्यकुशल बनाही अउ एखर ले लेनदेन लागत म कमी आही।
अउ अब थोरकुन समाचार सार म –
– बिलासपुर स्थित छत्तीसगढत्र इंस्टीट्यूट ऑफ मेडिकल साइंस-सिम्स म स्नातकोत्तर कक्षा मन म प्रवेश शुरू होगे हे। ये संस्था म पीजी के दस ठिन सीट के आवंटन करे गेहे ।
– रायगढ़ जिला के तमनार स्थिल मिलूपारा गांव म कोयला ले भरे ट्रेलर के चपेट म आय ले मोटर सायकिल सवार एक झन युवक के मउत होगे।
अउ
– सारंगढ़ जिला के चिखली गांव करा वाहन के चपेट म आय ले एक झन बुजुर्ग के मउत के मामला म आरोपी वाहन चालक ल पुलिस ह गिरप्तार कर लेहे। बीते तीस अक्टूबर के आरोपी ह नशा के हालत म अपन कार सड़क किनारे के एक ठन झोपड़ी म चढ़ा दे रीहिस।